Няхаԓ дяԓяӈ мянаԓя” | «Красный Север»
0°C

обновлено: 09:42, 30 января 2023

Няръяна Ӈэрм

Няхаԓ дяԓяӈ мянаԓя”

Вяԓкуԓоԓяш», хамуԓяш», шуԓьвиԓяш», тупкам модюпишь». Пиԓи нюӈк, нэхэта» ӈашки» мянаԓмантуӈ мэт ӈопт ӈомаш». Таԓкахана Северное многоборьеӈ дет тонԓюта Кубок Пуровского района мэӈаш».


Шитчет дюкат ва’та спортсмен мянаԓмантуӈ мэты тоӈаш». Таԓкахат диԓина» спортсмену» камна Самбуԓкахат, Каԓпюԓкат, Губкинскийхат мэна» тадямэӈаш». Мянаԓмантуӈ мэты Муравленкахана, Тюменьхана тохоԓкота» ӈашки» тоӈаш». Пытатуӈ хампԓяӈк Северное многоборьен видхана» конуԓпёши спортсмены» няхаԓ дяԓяӈ мянаԓяш». Чики спорт понанта нешади» дилхат ӈычимы. Таԓям выӈкат тохоԓкош томы» ӈашкеэ» таньше шанакомам хашаӈоӈа». Кукят чуки спортны каԓьтуӈ вимнянтуӈ томы», кукят шичитуӈ тохоԓампюта» нетуӈ няӈтуӈ мунумахат северный многоборьеӈ дет тохоԓко чепьмай».

Неԓьчеэй няԓяӈк паӈк вяԓкуԓпёшь мянаԓяш». Каса» ӈашки» поӈкна не ӈашки» вяԓуԓоԓяш». По”омнатуӈ тасԓайтоньш, кимя шан’кун дян патаԓмы няԓяӈпанк вяԓкуԓоԓмам. Тупкам ӈятпёшь», пям няампёшь шуԓьвиԓьш ӈупчики пихиня мянаԓяш». Ха’та меԓьшахана тупка, шетшапта ӈотнаӈ, куптаӈ монана ниӈа. Ӈашкиуде» вяԓтуӈ мэӈаш», чешчам ниш намтоԓ мянаԓяш». Пям няампёшь шуԓьвиԓьш» ӈуп, шича, няхаԓ километран дёԓьшат шуԓьвиԓяш». Мянаԓьш шанакомантуӈ тахана шичитуӈ тохоԓампюта» тренерутоӈ пон кявханатуӈ мэӈаш». Кукямт нята таԓа, кукямт ватахана тапаташ таԓа. Таԓьша соревнованихина неԓьчеэй мянаԓьш шанакомантуӈ мэт томы» ӈашкиуде» тэтнашту».

Няхаԓ хамхана хамоԓьш, кану» хамуԓпёшь «Геолог» нимита культурно- спортивный комплексхана мянаԓяш». Няхаԓ хамхана дю» ӈупкайван ӈамтамы» кану» хамуԓпишь». Ӈашкиуде» хомана нюӈкмана мянаԓяш», каса» ӈашки» поӈкна не» ӈашкиивдехеԓт чепиԓяш». Таньше шанакоши кукиты тамна нючауди ӈяш тохошту», таԓям четаӈ нюӈкмана хамуԓяш», вяԓкуԓоԓяш», шуԓьвиԓяш». Выӈкна диԓимы» ӈашки» вяԓкуԓоԓмам ни᾿дехеԓа», кану» нимня хомана хамоԓьшту». Куптат шанакота» таԓям мянаԓмам хомана каматымпитуӈ.

Мянаԓьш хитамахататоӈ хомана шанакомы», ӈайвахай мести» канамы ӈашки» тотуӈ патԓу» диплому» няамӈаш», медалю». Ӈокна мянаԓмэхэты» няхамты местам Каԓпюԓкат мэна» канаӈатуӈ. Нимимты местан Таԓкаӈ чеԓ нимидём каманда каамдят. Ӈайвахай местам Самбуԓкахат мэна команда канаӈата. Хомана мянаԓмы» спортсмены» навэт ӈаԓка соревнованихии кайны», таняна мянаԓмантуӈ мэт.

Лариса Айваседо патмы. Татма пыта таттамыта


2

0

0

0

0

0



обновлено: 09:42, 30 января 2023

Темы

Спорт