Сёёдоʼ сэрер лядпиʼ | «Красный Север»
0°C

обновлено: 06:47, 07 февраля 2023

Няръяна Ӈэрм

Сёёдоʼ сэрер лядпиʼ

Тикы яляʼ Ямальской районхы Сюнай-Саляʼ хардахана ӈулиʼʼ сенасялмась. Пивня ядэрта вэнекохорт яӈгусь. Тэри ханяӈы харадʼ махалэйʼ нимня трубытоʼ мюй якэридоʼ путрась. Ханяʼ тарця ӈаʼʼ.


Хэвы сиʼʼив яляхана Ямальской районхы нюдяко хардаʼʼмна ёльце тарана сермʼ минрець. «Ямал- нюʼʼнаʼʼ я!» ассоциацияʼ ӈэвахана мэна Эдуард Яунгад «Выʼ сей» ансамбльхана хыноти ненэй ненэцяʼ нида маябтаванзь танямна ӈэдалёлтамбись.

Пыдоʼ мале танякуна Тазовской, Пуровской районвана таремʼ ӈэдалёрӈаць. Тарцямʼ манэсоʼʼмахадандоʼ Ямальской районʼ терʼʼ нидоʼ ӈаниʼ хаʼʼмыдоʼ. Сёётэй нинаʼʼ ӈэдалёрмамдоʼ ансамбльндоʼ 20 поʼʼ няюʼ минредоʼ.

Фото: vk.com/nn.yanao
Фото: vk.com/nn.yanao

Тедаʼ ӈэдалавандоʼ мальӈгана нюртеʼʼэ Панаевск харданʼ нултадонзь. Невхы сётоʼ хавна едэй сёёʼʼ, Татьяна Нюдихасововнаʼ Лар няби Елена Хабиевна Уфимцеваʼ — попурри «Нув’сармик хынобц», едэй трабцоʼʼ — Яв’ хамба», «Мюсева» манэʼʼӈаць. Сёдоʼ малʼ ненэй вадавна мэʼʼэйдонзь.

Концертанʼ инзелеваʼ няюʼ есямʼ салда тарась. Таремʼ ӈодʼʼ тикада хибяхартмʼ нись таблаʼʼ. Хусувэй хардахана няндоʼ инзелеванзь туртаʼʼ ӈокаць. Пушкинской картамʼ мэць ӈаниʼ тэмдорць пирӈадонзь. Лохоʼʼ панʼʼӈаць.

Фото: vk.com/nn.yanao
Фото: vk.com/nn.yanao

Сюнай — Саляхана ӈодʼʼ культурандоʼ мяд ӈаниʼ ӈулиʼʼ панӈась. Зинаида Айбаевна Худи маʼʼнисяв, маняʼʼ ӈэсываʼʼ ӈаʼʼи яхана ӈа, ӈадьбята нянаʼʼ хэлиʼʼ тэворта яӈгуʼʼ. «Выʼ сей» ансамльʼ терʼʼ товамʼ ӈахана намдаваць, ӈадьбянаʼʼ ёльце ӈатенаваць. Маняʼʼ нянанаʼʼ ӈулиʼʼ нюрцьмʼ. Харданаʼʼ терʼʼ малʼ тоць. Нянаʼʼ турти пилиʼʼ савуʼʼянаʼʼ.

«Выʼ сей» ансамбльхана хынотаʼʼ нидоʼ намдмахадандоʼ Сюнай Саляʼ харадʼ помна ненэцяʼʼ вэрналыдаць. Хусэвэдоʼ ихинянда тамна сёхоʼʼ инзеленарахась.

Тедаʼ таремʼ ӈэдалёроʼʼмамдоʼ тедариʼ ёльцедоʼ. Тадриʼ ӈаниʼ ханяриʼ нэкалтадоʼ.

Автор: А. Салиндерʼ падвы


1

0

0

0

0

0



обновлено: 06:47, 07 февраля 2023

Темы