обновлено: 10:25, 30 октября 2026
Лух Авт
Ямал мувем саман тайсэм
Кашӊ таӆ Россия хон мувев ӆоватан няврэмат касты па юращты утаӆтаты хоятат емаӊ хатӆ постаӆа. Ӆув ай тахайт потты тыӆащ 30-мет хатӆа хойӆ. Там пуш щи кеша Пулӊават хоятат Геннадий Сысолятин нумаӆматы ураӊна яха актащисат.
Время для чтения ~ 4 минуты
Няврэмат касты па юращты утаӆтаты хоятат емаӊ хатӆ еӆпийн, ай тахайт потты тыӆащ 25-мет хатаӆн, «Ямал мувем саман тайсэм» нэмпи уйтантты хар ӆэщатыса. «Наследие» нэпек ӆуӊатты хотан ар хоят актащийс. Кашӊ ёхтыӆыйм хоят Геннадий Владимирович уӆмаӆан шеӊк яма уйтсэӆ, щишан ар ям ясаӊ ӆув эӆтаеӆ потартсат.
Уйтантопсая ёхтам энамты няврэмӊан Глеб Яунгад па Виолетта Ниязова тамиты ястасӊан: «Нын уйтӆаты Геннадий Владимирович Сысолятин…? Овс мув шимӆаӊ рут мир няврэмат кеша Ямал мувев ӆоватан, 1982-мет таӆан, Овс мув шимӆаӊ рут мир ёх касапсайӊ ашкуӆа пуншты ураӊан, муй арат ӆув юр понас. Щита ӆув оӆаӊ кущая понтса, 2009-мет таӆ унты рупитас. Щи тумпийн кашӊ районан па куртан няврэмат касты питсат. Хоӆна куртаӊ няврэмат ураӊна хорам хорат ханшты касапса ӆэщатысӆы, па щи отӆаӆ йи нэпека поныӆысӆы. Мир ӆоватна вантсайт».
Геннадий Сысолятин 1954-мет таӆан Пулӊаватан сэма питас. Кимет ашкуӆайн утаӆтыйс. Щаӆта педагогической училище етшаптас. Ай пора эӆты касты па юращты верат пеӆа шеӊк самаӊ ус. Ванты, энаммаӆ порайн, ӆув пиӆэӆан хантэт, урат па саранат ӆухсаӊа усат. Ӆувеӆа алиӆысат, хоты сахат ӆув кутӆаӆан, ӆув уӆты тахайӆаӆан касты ӆойӆыӆат. Щишан ӆув унашак ювмаӆан, касты верат еӆӆы пеӆа туты ураӊна нэпека понты номас понас. Айнайн, щиты Овс мув шимӆаӊ рут мир ёх касапсайт Советской союз ӆоватан уйтты питсайт.
Ямал мувев ӆоватан, 1979-мет таӆ эӆты 2009 мет таӆ унты, ӆув мет ун тренера ус. Щи сыс Ямал мувев касты ёх хольмаӊ моӆтас пуш Россия Хон мувев ӆоватан нох питыӆысат. Уӆмаӆан, Геннадий Владимирович энамты па айӆат ханты, ур, саран няврэмат пиӆан шеӊк самаӊа рупитас, ищи матты ӆув ащия ус. Рупитмаӆ сыс ӆув 32 хоят мастер спорта РСФСР па 30 хоят мастер спорта кандидат РСФСР энмаӆтас па утаӆтас. Щи тумпийн Россия па па муватан 18 хоят нох питыӆыйс.
Ӆув хощайӆ утаӆтыты яӊхиӆыйм хоятат кутан Евгений Озелов па ус. Щит эӆты каматса ясаӊ ястас: «Геннадий Владимирович муӊев анта туп касты утаӆтасӆы. Щи тумпийн па кимет вератан ищи муӊев нётасас. Ванты, муӊ Пулӊаватан утща усув, ащи-анти ванан антом. Щишан ӆув щи муӊев ащи иты ус. Муӊ верӆув сахат яӊхас, онтас верас. Муӊев каш верман патан тутӆысӆы. Шеӊк ям номасан ӆувеӆ нумӆэв!».
Иван Сандрин ханшам потар
