Pulse.Mail

Яндекс.Дзен

Google.News

Яндекс.Новости

<div class="content-lead">Хон мувева ляль ёхатты порайн шоши мув хоятӆув, мувев шавиты па аратыты ант нумасман маныӆысат. Ин па СВО нэмпи яӆап ляль ветмет таӆ ант верытаӆ етшаптаты. Муӊ хоятӆув ищи пуӊаӆан ант хащсат, оӆаӊ хатӆат эӆты шоши мувев аратыман ешащӆат.</div>Оӆаӊ таӆан кашӊ куртые эӆты ар ханты хоят мобилизация щиран ляля китсайт. Щи юпийн па хоятат ӆув щирӆаӆан, ӆув нумасӆаӆан тохи манты питсат. Ар ханты айӆат ёх ёхи ант ёхатсат, век кеша мантсат. Хащам ущ тыӆащан па щи атом айкеӆан ёхатсаюв, Роман Леонидович Севли антома ювмаӆ, паратам.Роман Тюмень вошан 1999-мет таӆан щёхар тыӆащ 28-мет хатаӆан сэма питас. Ащеӆ Леонид Петрович Севли, антеӆ па Анастасия Егоровна. Ӆорвош районан Горки вошан ус па энмас. Щи вошаӊ ашкуӆа 2016-мет таӆан етшаптасӆы па мохты еӆӆы утаӆтыты манас. Пулӊаватан Ямальской многопрофильной колледж хоща «оператор ИСР» нэмпи специальность щира утаӆтыйс. Щи юпийн соӆтана китса.Щита ӆув танковой войска хоща пиӆтащиман ус. Соӆтан пора етшам юпийн ӆув еӆӆы щи щир туты номас понас. 2020-мет таӆан Хон мувев Министерство обороны пиӆан контракт ханшӆтас.Туп СВО ляль веӆщи питас, мохты тохи манас. Шоши Хон мувев шавиман па аратыман оӆаӊ гвардейской танковой армияйн группировка «Запад» Харьковской область хоща лялясман яӊхас. Щёхар тыӆащ 2022-мет таӆан мушмаӆтса. Тумтак, яма ювмаӆ юпийн па лялясты хара манас.<div class="content-new-image"><img alt="pic" src="https://storage.yandexcloud.net/ym-sites-static/dd394490-05e.webp" style="width:100%" height="1408" width="2038"/><div class="content-image_child">Оӆаӊ шитам меваӊ посаӊ. Хор: Василий Тыликов</div></div>Каркама па вещката рупатайӆ тайты ураӊна «отличник сухопутных войск» нэман юкантса. Ар пуш меваӆ посатан постаса. Мет оӆӊа 11-мет хатаӆан Ас потты тыӆащан 2022-мет таӆан «За воинскую доблесть 2 степени» меваӆ посан мойӆаптаса. Таӆ шуп хащаман, Воӆаӊ Ляльн нох питам емаӊ хатӆ еӆпийн, «За отвагу» нэмпи медалян юкантса. Щаӆта «За храбрость 2 степени» па «Участнику специальной военной операции» меваӆ картыйн мийӆыса. Туняӆ таӆэв соханты еӆпийн «5 лет на военной службе» меваӆ пос шитас. Щи юпийн хоӆна таӆ шуп лялясас…<div class="content-new-image"><img alt="pic" src="https://storage.yandexcloud.net/ym-sites-static/a10db9dc-e9c.webp" style="width:100%" height="1240" width="2560"/><div class="content-image_child">Шитам меваӆ посӆаӆ. Хор: Василий Тыликов</div></div>Опращӆаӆ ищи Воӆаӊ Ляльн нох питты ураӊна ар юр понтсат. Роман Яковлевич Русмиленко Ленинградской фронтат лялясас, 1943-мет таӆан пармаӆ. Гаврил Михайлович Контеров Украина мув эӆты немщат ёхӆы воштыман Днепр ёхан хоща такан мушмаӆтса, щи юпийн ёхи китса. Николай Данилович Севли (Микуӆ ики) «трудовой армияя» китса па щита ляль етшаптаты унты рупитас.Роман еӆӆы уӆты уратас. Хот ӆутас. Пиӆнэӊаӆ пиӆан хащам товийн яха ханштаӆтысӊан, ийимеӊа-ийикеӊа йисӊан. Там ант етшаты лялян уӆапсайӆ сохнас. Московской область Одинцово вошан иӆ лоттаса. Век кеша нумты питӆэв!Иван Сандрин ханшам потар

Шоши муваӆ аратыман уӆапсайӆ хайс

<div class="content-lead">Таӆ шуп хащам юпийн, хуӆ веӆпасӆаты рупитты харат кутан артаӆаса, хой мет ар хуӆ мас. Там пора унты, округ хуват, ӆоватаӆан хуӆам щёрас пеӆа нийӆсот моӆтас тонна хуӆ мощатса. Туняӆ, йи там порайн хуӆам щёрас пеӆа катсот моӆтас тонна туп маса.</div>«Кев сыӆ район хуӆ веӆпасӆаты ёх ӆапатсот моӆтас тонна хуӆ масат. Округ хуват щит мет аршак, щитэӆан ӆув оӆаӊ тахая этсат. Ӆув юпеӆан Ӆорвош район, еша ёӆта хащсат, ӆапатсот пеӆа няӆхощъяӊ тонна хуӆ мощатсат. Тазовской район хуӆмет тахайн — мощатам хуӆэӆ няӆсот моӆтас тонная туп этас.Тампуш, рупитты хоятӆув ар пелак ёханатан па ӆоратан веӆпасӆысат. Молам щарс мув сыӆан мийм хуӆаӆ йи ветмет шупа ант ёхатаӆ. Ӆашкупата па хуӆ потаӆтаты хотата аршак питы хуӆ маӆа. Нови хуӆ шимаӆ хойӆыйӆ.Цифра ӆуӊатты хоты кен. Туп кашӊ тамащ ӆуӊатты нэпек юпийн ӆаварт рупата ӆойӆ па щи рупата верты хоятӆув. Нётапса туты щиран, кашӊ таӆ моӆтас рупитты тахайт пуншӆув, хуӆ маты тынаӆ эӆатӆэв. Веӆпасӆаты хоятӆув пиӆан уйтантыӆув, потрэмиӆув, инщасӆаӆӆув, хота муй вер хоӆна туӊматты мосаӆ», — АПК рупата верат туты департамент куща ху Андрей Рубашин ястас.Туняӆ эӆты, округ хуват ярсот пеӆа хут хуӆ мощатты па ӆэщатты таха рупитаӆ. Щёрас моӆтас веӆпасӆаты ёх кутан, ар пелак шимӆаӊ рут мир хоятӆув рупитӆат.Зоя Куртямова ханшам потар

Ар хуӆ мощатам ёх

<div class="content-lead">Ямал мувеван йис ханты уӆапса монщ иты нэпека понты рахаӆ. Щимащ вещкат ханшатты нэ муӊ кутэван уӆ. Уӆтаӆ хуват опращӆаӆ, рутӆаӆ па ӆухасӆаӆ эӆты муй хуӆӆыйс, ант ёрэматы ураӊна, кум шитман, иса нэпека понӆаӆӆы.</div>Щиты айӆта яӆап ӆуӊатты нэпек этас, хота ияха самаӊа уӆты кат айӆат хоятӊан эӆты потар манаӆ. Нэпекаӆ нэм — «Любовь Юхура».– Там ханшам нэпекем рутӆам уӆапса вер эӆты понман уӆ. Хоты Юхур па Посӆаӊнэ яха уйтатсатӊан, хоты ӆаварт Воӆаӊ Ляль порайн уӆапсайн еӆӆы манты питас. Ванты, щи уӆапса сахат ныӆа, хоты ханты хоятӆув еӆӆы уӆты уратсат, — нэпек ханшты нэ Зинаида Викторовна Лонгортова ястас. — Потарӆам ма шеӊк хув ханшӆаӆӆам, кашӊ каскем, кашӊ ай вер ёрэматы ант мосаӆ. Щи эӆты иса утпем ими эӆты инщасысам. Ма уӆтэм хуват ӆув эӆтаеӆ утаӆтысам, ӆув пеӆаеӆ хуӆантысам. Инщасысэм, вантсам муй хоты вераӆ. Ӆув пиӆаӆан иса потрэмисам.Ас нопатты тыӆащ оӆаӊ ӆапатан Хон Петра вошан «Четыре» нэмпи издательство хоща Зинаида Лонгортова ӆэщатам ун потраӆ нэпека понты питса. Ханшты нэӊев ястас: «Яӆап ӆуӊатты нэпекем ущ тыӆащан таӆаӊа йис. Хон Петра вош эӆты ты китса. Ин ӆавӆасӆам, хун Пулӊавта ёхатаӆ». Муӊ ищи ӆавӆасӆув хун Зинаида Викторовна ханшам нэпекаӆ муӊев этаӆтаӆӆы па ӆуӊатты ортӆаӆӆы.Иван Сандрин ханшам потар

Яӆап ӆуӊтап этас

<div class="content-lead">Щёхар тыӆащ 18, 19, 20-мет хатӆатан Хон мувев ӆоватан депутатат пирыты питӆайт. Пиращты комиссия куща ху Андрей Гиберт айкеӆ верас, хоты щи хатӆат кеша ӆэщатыӆа па муй арат хоят тохи пиӆтащийӆ.</div>Щи кеша хащам ӆапатан Андрей Николаевич пресс-конференция верас, хота айкеӆат ханшты ёх актащисат. Ӆув ястас, тампуш йи эӆты хуӆам пиращты вер питаӆ, щишан таӆаӊ хуӆам хатӆ сыс депутатат пирыты питӆайт:Хон мувев Государственной Дума (9-мет созыв);Тюменской областной Дума (8-мет созыв);Ямал мувеван муниципальной Думайт (Губкинский вош, Ямальской па Красноселькупской районӊан).<div class="content-new-image"><img alt="pic" src="https://storage.yandexcloud.net/ym-sites-static/a5dd3083-d46.webp" style="width:100%" height="1405" width="2498"/><div class="content-image_child">Хор: Фёдор Воронов</div></div>Государственной Дума хоща 11 политической партия пиращты кеша ханшӆтантысат: Единая Россия, КПРФ, ӅДПР, Справедливая Россия, Новые люди, Яблоко, Партия пенсионеров, Коммунисты России, Родина, Партия прямой демократии па Зеленые. Аратаӆ тохи 2066 щёрас хоят ӆуӊтасаӆ.Ямал мувеван пиращты одномандатной округ № 225 эӆты вет хоят нэпекӆаӆ ӆэщатсаӆӆаӆ.Тюменской областной Думая 7 партия 237 хоятӆаӆ пиӆан пиращты ӆытӆайт. Щи кутан Ямал мувев эӆты 19 хоят 4 партия эӆты.Ямал мувеван хуӆам муниципальной образование хоща 4 партия эӆты 81 хоят пиращты хара нэпекӆаӆ масӆаӆ. Щи эӆты туп 47 хоят пирыты мосаӆ.Ин пирыты партияята ӆоӊам хоятат айкеӆ па потар ӆэщатӆат. Унт ӆор тыӆащ 22-мет хатӆ эӆты ӆэщатам хораӊ потрат кина па газет хуват щёхар тыӆащ 17-мет хатӆ унты поныӆыты питӆайт.Вуӆы тащ хотатан касӆыман яӊхман, хуӆ веӆпасӆаты панатан па ай куртатан уӆты ёх кеша нэман ёхтыӆыты пиращты харат, унт ӆор тыӆащ 30-мет хатӆ эӆты щёхар тыӆащ 17-мет хатӆ унты, верыӆыты питӆайт. Пиращты харатан рупитты ёх ӆув хощайӆаӆ тохӆаӊ, тутаӊ па аӆ хопатан яӊхиӆыты питӆат.Хой пиращты хатӆатан уӆты муваӆ эӆты кимет тахайн питаӆ, ванан уӆты МФЦ, пиращты харата па Госуслуги хуват айкеӆ верты верытӆат. Хой, мосаӊ, моӆты инщасты утщийл там телефон номер хуват рахаӆ потарты: 8-800-302-00-89.Иван Сандрин ханшам потар

Пирыты хатӆата ӆэщатыӆа

Хор: Галина Артанзеева

<div class="content-lead">Пора сора хащаӆ. Ӆуӊев кутпаӆ ванамас па емаӊ хатӆэв ёхтас. Унт ӆор тыӆащ 2-мет хатӆ кеша аратаӆ уӆты мир ёх ӆув уӆты тахайӆаӆан порыӆыты харатан яха актащиӆат.</div>Хоты, катра порайн, там емаӊ хатӆ порыӆыса Надежда Егоровна Лонгортова потартыйс. Щи хатаӆан Иӆта мув икия поры верты щир ӆэщатӆа. Ванты, щи хатӆ эӆты хув найӊ хатӆат ёхӆы керӆаӆат, вана йиты питӆат. Щишан, хой хоӆна моӆты верат тайӆ, мосаӆ сус-таӆ кеша етшаптаты.Катра там иты потартыса: «Там емаӊ хатӆ унты ки уӆты верытсув, еӆӆы па уӆты питӆув». Там хатаӆан кашӊ хоттэӆ хоятат ӆув рутӆаӆ пиӆан уйтантыӆат, порыӆыты харата яӊхӆат. Вуӆы тащат энмаӆты ёх там порайн сах нёпиӆув хорӆат. Хуӆ веӆты ёх па аӆаӊ эӆты яӆап хуӆ мощатыман ноптаӆтыты ӆэӆамтыӆат. Хой муй ямшак ӆэтот тайӆ, щитаӆ пасана омасаӆ.Хуӆам хуван яӆап ӆэщатом ӆэтот пиӆан хуӆам тахая омпсыӆыӆа: муван юх пуӊӆа, тут имия па йиӊк пеӆа.Кашӊ ёхтам хоят патан карты охан ярам щашкан щелам тайӆ. Тут ими пеӆа ӆувеӆ шашиӆыӆӆы па емаӊ сумат нува ярӆаӆӆы. Щи кут мосаӆ ям эӆты нумасты па хатӆ манты щиран хуӆам пуш ӆарэматы па ох понты. Нэӊат па ӆапат нови ай ернас юха ярӆат.Тут ими шоппи вуншты ант рахаӆ. Полщаӊ тута лякты ищи ем. Емаӊ тут ими пиӆан потрэмиӆа па пойкащман ям уӆапса вохӆа. Хоятат ратхар пуӊӆа ӆойӆат, ёш нох аӆамман потарӆат: «Ун Турам Аӊкие! Юр муӊев мия!».Щаӆта па порыӆыты омпсыӆыйм анат нох вуӆайт па йи пасана туӆайт. Ар хоят ун пасан сурыйн ӆэты питӆат, хой муй айкеӆ тайӆ, щи эӆты потартаӆ. Юхат па каш верты пора ёхатаӆ. Хой арыты хошаӆ, арыты ӆойӆыйӆ. Хой якты хошаӆ, тус як этаӆтыйӆ. Касты ёх юрӆаӆ артаӆаман нох ӆойӆыӆат: тынщаӊ ёваӆмиӆат, юх катна пертащиман омпсыӆыӆат, ухаӆ шоппи наварӆат. Уншак ёх кутӆаӆан потрэмиӆат, юращты ёх пеӆа вантӆат па няврэмӆаӆа пиӆ каншӆат.Етна пелка, ехи манты еӆпийн, хоятат карты ох шук юх иӆпия ёваӆӆат. Ӆапат ай нови ернас ёх хоятатан нох вуӆайт, ияха ярӆайт па юх тая ющтаӆайт. Нэӊат щи кут тамиты потарӆат: «Турам Аӊкев ӆапат пох тайс. Там ернасыет Турам Аӊкева китӆаӆӆув». Щи юпийн ёх ӆапат пуш увемаӆат, хатӆ манты щиран ӆарыӆат, хуӆам пуш ох понӆат па ёхи манӆат. Щимащ порыӆыты щир!Иван Сандрин ханшам потар

Ӆуӊ кутап хатӆ

<div class="content-lead">Унт ӆор тыӆащ 9-мет хатаӆан 1994-мет таӆан Генеральной Ассамблея ООН рупитты мохет уйтантопса версат, хота мир ӆоватан шошия уӆты арсыр рут хоятата нётап вер эӆты потар тусат. Щишан щи пора эӆты емаӊ хатӆ постаты питса.</div>«Там емаӊ хатӆ ванамаман муӊ нумасӆув хоты рут ясаӊӆув еӆӆы туты, хоты ӆувиӆаӆ шавиты мосӆат! Муӊ хорам па тарм Овс мувна уӆӆув, самаӊа тайӆэв. Тата уӆты шоши хоятӆув мет такан сайӆаты мосӆат, ӆув катра йис уӆапсаеӆ па ясӊеӆ еӆӆы туӆэӆ. Ӆувиӆаӆ хоӆна еӆӆы нётап мосаӆ. Щи щирн муӊ ивеван ияха актащиӆув. Мосаӊ па хоятӆува нёттыя яӆап щир оша ёхатаӆ. Ин там яӆап щирн уӆты порайн муӊев шеӊк мосаӆ рут ясаӊӆув шавиман тайты. 2022-мет таӆ эӆты мир ӆоватан уӆты шоши ёх кеша нэпек щирн яӆап программа ханшса — Международное десятилетие языков коренных народов. Щи щирн ар нётты нэпекат ханшӆайт, законат туӊа щира ӆэщатӆайт», — ястас Ассоциация «Ямал — потомкам!» куща ху Эдуард Яунгад.Щи емаӊ хатӆ кеша унт ӆор тыӆащ 8-мет хатаӆан Канащ пухаран ун каш верты лот ӆарпитӆа. Араӊ-монщаӊ тус хоятат ёхатӆат. Ар па вещката рупитам шоши хоятат мойӆаптаты питӆайт. Щи тумпийн ур ёх поры верты питӆа. Мойӊ хоятата верантты лотата пиӆтащиты рахаӆ па моӆты пормас ӆувиӆаӆа ӆэщатты верытӆат.Щи хатаӆан Ямал мувев ӆоватан хольмаӊ моӆтас арсыр уйтантыты вантапса лотат ӆэщатӆайт. Нын па уӆты вошӆанан, куртӆанан емаӊ хатӆа яӊхаты па каш вераты!Иван Сандрин ханшам потар

Мир ӆоватан шошия уӆты ёх кеша

<div class="content-lead">Округев хуват шоши мир ёх хоятат ураӊан кашӊ таӆ моӆты яӆап нётапсайт ӆэсятӆайт. Тампуш, хуӆ веӆпасӆаты ёх уйтантопсайт юпийн, Ямал мув куся партапса хуват яӆап вер этас.</div>Кашӊ шимӆаӊ мир хуӆ веӆпасӆаты хоттэӆ вет таӆ йи пуш ӆыӆ шавиты кат порах сохан маты питӆа. Хой си пормас вуты ант кашасяӆ, ӆувиӆаӆ ӆутты ураӊан, хут сёрас соӆкувайн сохаптаӆа. Хой хоӆна нэпек ант ханшас, уӆты куртаӆан уӆты утхотан нэпекӆаӆ ӆэсятты верытаӆ.Ӆорвош па Приуральской районаӊан хуӆ веӆпасӆаты ёх мет оӆӊа симась пормасатан маты питсайт. Ӆорвош районан уйт ӆор тыӆасян рыпакат хуӆ веӆпасӆаты ёх емаӊ хатӆатан, хопан яӊхты ӆуматты порах сохатан масайт.Сит эӆты Ӆорвош районан утхот шоши мир верат туты ху Дмитрий Леонидович Костин ясаӊ верас: «Ӆорвош районан хуӆ веӆпасӆаты ёх, хой нэпек китыӆыйс, хоӆ симась пормасат шитсат. Катсот заявление китман ус. Яӆап таӆ эӆты хуӆамсот пеӆа няӆъяӊ жилет ӆутса. Еӆӆы хоӆна ӆутты питӆув. Катсот пеӆа няӆ хоттэӆ симась пормасан масӆув. Сит хуӆамсот пеӆа нийӆ жилет. Оӆаӊ пормасӆув хуӆ веӆты ёх емаӊ хатӆатан Аканьлейман, Ӆорвошан па Хашкуртан ортсаӆӆув. Там ӆапатан Асов, Ӆоркурт, Ямкурт па Овкурт ёх симась пормасат шитсат».Симась рупата ин Надымской, Пуровской па Тазовской районатан манаӆ. Шоши мир ёх эӆты, си пормасат шитты ураӊан, хуӆамсот пеӆа ӆапатъяӊ заявление нэпек китман ус. Там хатӆа йи сёрс ветсот ӆыӆ шавиты порах сох ӆутса.Альбина Тырлина ханшам потар

Шоши мир ёх яӆап нётапса

Мурах Кев пайн. Хор: Иван Сандрин.

<div class="content-lead">Хошам па ертаӊ хатӆат уӆам онтасан унтан ӆэвпасат яма энамӆат. Мет оӆӊа мурах акатты пора ёхатаӆ. Ин ты «Ӆух Авт» газет ӆуӊатты хоятат хорат понӆув. Унта яӊхтыйн, ищи хор верыӆыяты па муӊев китыӆыяты.</div>Тампуш ӆуӊев ёлах хатӆат пиӆан ёхтас. Щаӆта па, щи юпийн муй арат вотаӊ хатӆат усат. Туп уйт ӆор тыӆащан веӆщи хошам хатӆат ёхатсат. Хойтат ястаӆат анта хошам, руваӊ хатӆат. Щи ям найӊ хатӆат ёхтам юпийн унтатан лыптат яма энамты питсат.<div class="content-new-image"><img alt="pic" src="https://storage.yandexcloud.net/ym-sites-static/17556921-c3c.webp" style="width:100%" height="1080" width="1920"/><div class="content-image_child">Вуӆы хотаӊ няврэмат мурах акатты нётӆат. Хор: София Максарова</div></div>Лыптат похантсат па унтэв мет хорамаӊа ювмаӆ. Щи кут хоятат ӆаваӆӆат хун вонщамот акатты пора ёхатаӆ. Мет олаӊан мурах вонщапса пошаӆ.<div class="content-new-image"><img alt="pic" src="https://storage.yandexcloud.net/ym-sites-static/67294df5-21c.webp" style="width:100%" height="1021" width="1817"/><div class="content-image_child">Хор: Алена Хартаганова</div></div>Мурах — щит мет хорам па эпӆаӊ рых. Хоятатан ӆув шеӊк самаӊа тайӆа. Туп мурах акатты кен антом. Ар юр понты мосаӆ. Рув кутан нюрмат, сотаят па варсаӊ соймат кутан шушиӆыты мосаӆ. Щи тумпийн пирмат, пеӆӊайт па нипируват тэӆыя. Хоят ёхи ӆэты утщиӆэӆ. Мурах акатты кутаӆ ван, кум ант шитсан ки — пора хащас.<div class="content-new-image"><img alt="pic" src="https://storage.yandexcloud.net/ym-sites-static/9f60a0fb-91f.webp" style="width:100%" height="1440" width="2560"/><div class="content-image_child">Самаӊ мурах. Хор: Алексей Енов</div></div>Щишан щи ар юр понман актам рых, шеӊк эпӆаӊа айӆӆа па самаӊа тайӆа!

Мурах акатты пора

Хор: Нелли Фролова архив эӆты

<div class="content-lead">Там ванан ашкуӆайн утаӆтыйм эвет, похат яртъяӊмет, хой па ихощъяӊмет класс етшаптасат. Тухаӆ энамты няврэмат еӆӆы утаӆтыты манӆат. Ӆув аӊкиӆаӆ-ащиӆаӆ пиӆан нумасӆат, маты воша па муй рупата пеӆа еӆӆы утаӆтыты манты. Там потар шупан Нелли Фролова (Сибарева) эӆты ясаӊ туӆув.</div>Нелли Артёмовна Ёхан Кутап вошан (Зелёной Яр) куртан сэма питас. Аӊкеӆ-ащеӆ хуӆ веӆман усӊан. Аӊкеӆ — Александра Лукинична, хоттэӆаӆ шавийс, ащеӆ — Артем Сергеевич, хуӆ веӆман ус. Юхат ӆув пиркатира рупитты питас. Ӆын уӆман хуват кутӆана иса нётсаӊан.Ай Нелли Охсар куртан яртъяӊмет класс етшаптас. Щи юпийн Пулӊават вошан вой леккара утаӆтыйс.«Шеӊк ям пора ус, муӊ рупитты лот ант каншсув, — Нелли Артёмовна ястас, — ма Тюменской область Заводоуковской района, Сединкино ай курта китсайм. Щита хуӆам таӆ рупитсам. Мусат, пурщат, тохӆаӊ войт яммаӆсам. Щикуш ям ус войт пиӆан рупитты, туп ма шеӊк ай няврэмат пиӆан рупитты ӆытсайм. Номпсэман ивеван еӆӆы манты утаӆтыты нумассам».Юхат ӆув няврэмат шавиты нэӊа утаӆтыты Топаӆ воша манас. Утаӆтыты етшамаӆ юпийн, ёхӆы Сединкино курта ёхтас па щита ай няврэмат хатӆ сыс яӊхты хотан рупитты питас. Оӆӊа воспитателя рупитас, пора хащман, садик куща нэӊа понтса.«Ма ащем-аӊкем па рут мувем эӆты шеӊк хуван усам. Щикуш ийикем энмам мув ус, туп ма ёхи манты номас усам. 1996-мет таӆан Пулӊавта ёхатсам па мохты еӆӆы ай няврэмат пиӆан «Брусничка» нэмпи садикан рупитты питсам, — ханты нэӊиев нумаӆмиман ястаӆ. — Ай няврэмата ма мурэм, уӆапсайӆ, емаӊ хатӆат эӆты альсам па потарсам. Ханты ясаӊан арат, ӆуӊтарат утаӆтысам. Ма ханты сохӆам ӆумтыӆысам, няврэмата ищи ернасат ёнтыӆысам. Ӆув па моӆты емаӊ хатӆатан умащӆыман щи сохат тайсаӆӆаӆ. Ай няврэмӆам пиӆан сак каратсам, нуй эӆты ай хирыет ёнтсув. Рупитты группаеман ай ур хот ӆонщсам, ухӆыет омассам па пормасат эӆпа понтсам. Муӊ ханты аканьӆуван няврэмат ивеван ёнтӆат. Тухаӆ ишан хоӆна па ёхи тутӆыӆӆаӆ. Ай няврэмат пиӆан ма хольмаӊ моӆтаскем таӆ рупитӆам».Нелли Артёмовна хуӆам няврэм тайӆ. Ӆув иса Пулӊават вошан уӆӆат па рупитӆат. Там ванан щутщаты манты номас ус. Пора сора хащаӆ, хиӆыӆаӆ пиӆан уйтантыты па ӆувиӆаӆа нётты ищи ӆытӆа. Щи порайн веритаӆ ивеван ай куртаӆа яӊхты, щита яйӆаӆ уӆӆат.«Ащем-аӊкем уӆам, ма сэма питам лотэм умащӆыман тайӆэм. Яна щи, мет сама мосты лот — щит муӊ ащев-аӊкев хот. Ӆын хуван антома йисӊан. Муӊ ащиӆув па аӊкиӆув уӆтэв хуват саман па номасан шавиман тайӆаӆӆув. «Ма аӊкием» ӆуӊтаран Тамара Александровна Пырысева сама хойты ясӊат ханшас», — Нелли Артёмовна ястас.Ма аӊкием хоты нумӆэмРупатайӆы ант уӆӆыйс.Ӆуӊ порайна хуӆэӊ хурэтТэрмат иса ӆэщатыйс.Соӆаӊ хуӆэн ванщты мосаӆ,Нырӆаӆ шумахна тахартыя.Таӆ кешая щохаӊ войнаПутӆаӆ мосаӆ вертыя.Ёхантайнэ аӊкем имиМетты вер па ант уйтыйс.Шаӊк йиӊк кутна щиты вантыХатӆ хуват шушамтыйс.Аӊкев аӆаӊсахат ахунКармас юхи паят аӆтаӆ.Хой порайна мурхи сунӆаӆМуӆан ӆойӆат муӊев ӆаваӆман.Аӊкев рупатайӆ хоӆӆы:Тонты ёнтты хот лаӊктыя,Щи кут мосаӆ торан верты,Щаӆта кепӆат ӆэптаптыя.Тупар шупат етшаптаты,Тохам посат лап ёӆтыя.Сах ханшиӆаӆ еша ёнтты,Охшам сыӆӆаӆ кераттыя.Щимащ аӊки тайиӆысув —Хоттэӆ няврэм энмаӆтыйс.Аӆ куш таӊха метыӆыйс,Щит хун муӊев ястыӆыйс.Щира-паӆа потартыйс,Нопса ясаӊ хаиӆыйс.Пумащипа, ям аӊкиев,Уӆтэв хуват наӊен нумӆэв.Любовь Возелова ханшам потар

Няврэмат шавиты нэ

<div class="content-lead">Овс мув шимӆаӊ рут мир ёх «Российский Север» нэмпи уйтантопсая сус порайн актащӆат. Щёхар тыӆащ 17-мет хатӆ унты заявкайт китты мосаӆ. Туп 100-кем хоят пирыӆа, хой мет тусшака ӆув эӆтэӆ потар лэщатаӆ.</div>Щиты мет туса потар ӆэщатты Алексей Эдуардович Конев ищи хошаӆ. Хон Петра вошан утаӆтымаӆ порайн, ӆув там уйтантопсая каматса пуш яӊхас.«А.И. Герцен нэмпи университет хоща утаӆтымеман, мет оӆӊа 2018-мет таӆан там форума ханшӆтантысам. Ӆув щикем ма самема рахас, ар ӆухас мощатсам, ин хой хоятат пиӆан хоӆна уйтантыӆам. Щи таӆ эӆты ма кашӊ таӆ там уйтантопсая ёхтыӆыӆам. Йи пуш туп 2021-мет таӆан ант верытсам ёхатты. Щаӆта па ма ты рупата щиран нётты ёхтыӆысам. Туӊа ястаты-ки, ма участника, волонтёра па эксперта усам. Тампуш па там форума кущая рупитты вохсайм. Олӊа кат тыӆащ нумассам, щаӆта ястасам — муя ма хурыӆам, там уйтантопса вер шеӊк яма уйтӆэм!Ин еӆпи таӆ сыс верам рупатаев артаӆасэв, программа ӆэщатӆэв па экспертат пирыӆув. Там форум ӆэщатты ураӊан шеӊк ар юр понты мосаӆ. Ма ар таӆ Овс мув шимӆаӊ мир энамты няврэмат пиӆан рупитӆам. Ващъёханован вет таӆ ханты ясӊа няврэмат утаӆтасам. Тампуш Пулӊавта касаӆсам, энамты няврэмат пиӆан «Движение Первых» хоща рупитты питсам. Ма ӆаӊхаӆайм, няврэмат ӆуӆан шоши мир уӆапсаеӆ еӆӆы па ат туӆэӆ, ант ёрэмиӆэӆ», — «Российский Север» форум программной куща ху Алексей Конев ястас.Там таӆан Хон мувев ӆоватан уӆты регионат эӆты айӆат ёх катхощъяӊмет пуш яха актащиӆайт. Мет оӆӊа там уйтантопса 2015-мет таӆан Клязьма нэмпи куртан Москва вош пуӊаӆан ӆарпиӆыса. Ямал мувеван иса 2021-мет таӆ эӆты уйтантопса ӆэщатты питса. Туняӆ 105 хоят 35 регионат эӆты Новый Уренгой вошан ияха уйтантысат.Таӆэв арсыр рут хоятат ияха пиӆтащиты Таӆа постаман уӆ. Щишан айӆат ёх потарты па альты питӆат, хоты сахат шоши мир ёх ясаӊ шавиты па уӆапса еӆӆы туты мосаӆ. Хой рут ясаӊ ант уйтаӆ, щи хоятата альты па потарты, муй щиран щи вер сорашак верты рахаӆ. Там йисан щи верата нётты ураӊан арсыр мутрайт ӆэщатман уӆӆат.Тампуш там уйтантопса Ас потты тыӆащ 17-20-мет хатӆатан Пулӊаватан манты питаӆ. Тохи пиӆтащты хоята анкета нэпек ханшты па нёхты хор верты мосаӆ. Няӆхощъяӊ таӆ эӆты па няӆъяӊ пеӆа вет таӆ ӆоват унты энамты ёх, хой номас понас, заявка QR-код хуват китты верытӆат.Энамты ёх опращӆаӆ йис уӆапса шавиты ураӊан, арсыр проектат ханшӆат па уӆапсая ӆоӊаӆӆэӆ. Кашӊ ай куртаӊ хоят ӆув самаӆ хошиты верат па рупатайт мира этаӆтыты верытаӆ. Щи кеша 18 номинаций ӆэщатман уӆ. Мет тусшак па мосты проект ураӊна 800-кем щёрас соӆкува шитты рахаӆ. Хой щимащ вер ӆэщатты номас тайӆ, ай тахайт потты тыӆащ 1-мет хатӆ унты там ссылка хуват заявка китты верытаӆ: cӆck.ru/3UspY8. Щишан пиӆтащияты, ӆухсаӊа ювиӆыяты, мойӆапсайт шитыӆыяты!Иван Сандрин ханшам потар

Айӆат ёх ияха пиӆтащиӆат

Валерий Александрович Любовь Николаевна ийимеӆ пиӆан. Хор: Альбина Тырлина

<div class="content-lead">Там мосванан хуӆ веӆпасӆаты ёх емаӊ хатӆэӆ постасэӆ. Горковской рыбозаводан Ӆорвош рыбоучасткан рупитты хоятат Ӆорвош куртан уйтантысат. Ванан уӆты куртыет эӆты хуӆ мосятты хоятат си веӆпасӆаты тахая ӆуӊтасӆат.</div>Мет апраӊ хуӆ веӆпасӆаты ёхӅорвош рыбоучасткан рупитты куся ху Андрей Иосифович Кондыгин рупитты хоятӆаӆ эӆты потар тус: «Ма хуӆмет таӆ рупитӆам. Муӊ хосяев штат хуват хольмаӊ пеӆа хут хоят хуӆ веӆпасӆыман уӆ. Ӆапат хоят ӆуӊ сыс туп хуӆ мийӆыйӆ. Там таӆан таӆ сыс ярсот пеӆа кат тонна хуӆ мосятсув. Ӆуӊ сыс емаӊ хатӆ унты катсот пеӆа ӆапатъяӊ тонна хуӆ масув. Ин хоӆапӆув ӆоран омасман уӆӆат. Ар пелак питы хуӆ, айнайн сарах хойӆыйӆ. Пышьян шимаӆ хойӆ, ин хоӆна ӆаваӆӆув.Кашӊ веӆпасӆаты хоятэв яма рупитаӆ. Мет оӆӊа веӆпасӆаты нэӊева ям ясаӊ ястаты утсиӆам. Сит — Арина Анатольевна Кельчина. Ӆув яӆап таӆ тыӆась эӆты ун кер тыӆась унты, катхосьяӊ моӆтас тонна хуӆ мосятас. Таӆ планаӆ тэкаптасӆы. Валерий Александрович па Мартын Романович Ребасьӊан таӆ сыс иси ар хуӆ масӊан. Планэв тэкаптаты ураӊан, ӆуӊ па сус пораев уӆ. Си пора унты мохиӆув аршак хуӆ мосятӆат».Ай Ас хумпат хуватЁханован хуӆ мосятты хоятат иси Ӆорвош рыбоучастка ханшӆтаман уӆӆат. Си куртан ар таӆ хуӆ веӆпасӆыман Валерий Александрович Ребась рупитаӆ. Сикем потраӊ, няхаӊ, веськат хоят. Ёханован энмас па уӆ. Няӆъяӊ моӆтас таӆ хуӆ веӆман рупитаӆ. Уӆапсайӆ эӆты каматса ясаӊ ястас: «Муӊ куртэв ай куртые. Муйкем сита энампсам, иса хуӆ веӆман усам. Ӆуӊ порайн утся курта яӊхиӆыӆув. Ёханов эӆты хус километрайн уӆ. Туӊӆор нэмаӆ. Таӊха катра ӆор овӆаӆ туӊа мантсат. Еӆпи хоӆна катьрат, хопат тапиӆысат».Веӆпасӆаты питсям порайӆХанты хоятэв ашкуӆайн утаӆтымаӆ порайн веӆпасӆаты питас. Асеӆ рыпака ус. Ун яйӆ па веӆпасӆыйс, ӆувиӆаӆа нётас. Сит эӆты па потар тус: «Яӊ таӆ эӆты утся ай хопан яӊхты питсам. Хоӆпа манты мосаӆ, аӆаӊ нох киӆтаӆайм, вет сёс кеман. Си порайн ӆоваӆман яӊхсув. Ай хопна утся. Ащем-аӊкем, ун яем па уншак хопан. Уӆмев сыс рыпака иса усув.Армияйн Дальний Востокан служитсам. Ёхи ёхатмеман, утаӆтыты манты утсисам, си вер ант артмас. Асем-аӊкем пирсясайӊан. Аӊкем сэмӆы питас. Сиӊанся утаӆтыты таха эӆты нох воӆысам. Мохты хуӆ веӆпасӆаты ӆэсятысам. 1982-мет таӆ эӆты ин там хатӆ унты хуӆ веӆман рупитӆам. Ай ёх пеӆа хоӆна ант эваӆӆам. Оӆаӊ тахайт ма си уӆӆам, такан хуӆ веӆман ешащӆам. Ай ёх хоты муӊ хосяев ванан ант ӆойӆ».Яха хуӆ веӆман яӊхӆаӊанЁханован рупитты ёх таӆ сыс хуӆ веӆман уӆӆат. Хасям таӆан Валерий Александрович па Любовь Николаевна ийимеӆ пиӆан няӆъяӊ таӆа йис, хоты яха уӆӆаӊан. Яха хуӆ веӆман яӊхӆаӊан. Ийимеӆ Ӆорвош нэ. Нянь верты нэӊа утаӆтыйс. Куртан еша рупитас. Сяӆта ху сая манас, Ёханова касӆас. Си пора эӆты пиӆ хоятаӆа нётаӆ.Валерий Александрович рупатайӆ эӆты ситы ястас: «Ӆуӊан Туӊӆоран уӆӆув, ӆоран хуӆ хоӆапан мосятӆув. Хун ӆорӆув сорӆат, нык касаӆӆув. Си порайн ноптаӆӆув. Еӆ куртэван хут, ӆапат рыпак ус. Катра «Ӆапат сохаӆ хота» Туӊӆор курт аяӆса. Сохаӆ хотӆув инты унты ӆойӆат. Хоятат сита хоӆна уӆӆат. Си хотат мосаӊ катсот таӆа йисат, мосаӊ па аршак. Сохаӆӆаӆ пусаӊан манман уӆӆат, сишан такат. Аӆ вансям сохӆат».Планэв тэкаптасэвХуӆ веӆпасӆаты хоятата таӆ сыс план хуват яӊ тонна хуӆ маты мосаӆ. Таӆ порайн, хой хуӆ шимаӆ мосятас, ӆуӊ сыс планаӆ тэкаптаӆӆы, мосаӊ па аршак мосятты верытаӆ. Хоты си вер манаӆ, ханты хоятэв ситы ястас: «Муӊ планэв тэкаптасэв. Сус унты хоӆна хуӆ веӆман ешащты питӆув. Ин катхосьяӊ тонная йис ки.Хасям таӆатан кашӊ тыӆась аванс па хуӆ ураӊан сохаптаты охан мийӆыты питсаюв. Муй кем хуӆ веӆӆан, си арат ох шитӆан. Моӆты порайн аршак этаӆ, тухаӆ ишан щах шимаӆ.Муӊ оӆӊа Мужевской совхоза ӆуӊтассув. Хун пуӊӆа вусаюв, ма мохты куртаӊ мохиӆам пиӆан Горковской рыбозавода ханшӆтантысам. Совхозан рупитмеман, хут таӆ бригадира усам. Куртэман мин Мартын Романович Ребась пиӆан кат рыбак хасьсаман. Ай ёхӆув хоӆ пуӊӆа мантсат. Мин муй, утаӆман уӆӆаман, ай тэӆан рупитӆаман. Хиӆыӆам рупитсат, воӆаӊ ант верытӆат. Утаӆман уӆӆан ки, нопсэн тохи уӆ ки, туп веӆси. Нопсэн тохи антом ки, муя си рупата верты».Альбина Тырлина ханшам потар

Ӆорвош район – хуӆаӊ веӆпасӆаты мув

Хор: Окружной дом ремёсел

<div class="content-lead">Там ванан Красноярской мув сыӆан уӆты Шушенское куртан «Мир Сибири» уйтантопса ус. Хошты верӆаӆ хоятата альты, хоят рупатайт вантты па моӆты верат номпса вуты ураӊан, Хон мувев па па муват эӆты пормас нёхарты па рут мир ясаӊан арыты ёх яха ёхтыӆысат.</div>Шоши мувев эӆты верантты хотан рупитты Наталья Сергеевна Талигина па Семён Максимович Севли, щаӆта па каш ӆэщатты хотан арыты Нядма па Масне Няруй щи уйтантопсая яӊхсат. Ур ёх имеӊан-икеӊан ӆув рут ясӊеӆан арат арысӊан. Наталья па Семён юх па ӆов эӆты эвтам рупатайӆан вантопсая тутӆысӊан.«Там вантопсайн, арсыр мув сыӆат эӆты ёхтам тус ёшаӊ хоятат кашӊ верам рупатаяӆан ӆув уӆты муваӆ, унтаӆ, войӆ этаӆтас. Кашӊ рупата, туп ӆувеӆ рахты хорам тайс. Щимащ хорпи кимет пормас мув кеман ант уйтты.Ма ай тэӆан вантсам, хоты ащем юх эӆты нёхарман пормасат верас. Арсыр ухӆат, ӆохат, ӆупат, хопат иса ӆэщатыйс. Уна ювмем юпийн, юх эӆты пормас нёхарты хоят пеӆа утаӆтыты мантсам. Пулӊават верантты хотан хольмаӊ пеӆа кимет таӆ рупитӆам. Хун моӆты пормас верты питщатэман, щи хорэм номпсэман тайӆэм па ӆувеӆ нэпека понӆэм. Щаӆта нэпек эӆты вантман юхем нёхарӆэм. Тухаӆ ишан еша па щиран тыйӆ. Щит ванта, рупатая вуйм юхем хоты манаӆ, щит ураӊан верты пормасэм еша па щиран тыйты верытаӆ. Кашӊ верантты хоят ӆув сэмаӆа ныты щиран пормасаӆ верӆаӆӆы», — тус ёшаӊ нэӊиев ястас.Рупиттаӆ сыс Наталья Сергеевна тэӆыя мойӆапса нэпекатан маса па ишакты нэматан юкантса. 2007-мет таӆан нэман юкантам Губернатор нэмпи премия шитас. Щи таӆан Хон мув воӆаӊ вошеван «Лауреат ВВЦ» меваӆ посан мойӆаптаса. 2012-мет таӆан мир кеман верты «Сокровища Севера» ӆапатмет вантопсайн «Лучший мастер» нэман юкантса, щаӆта па «Союз художников России» хоща пиӆтащийс. Ямал мув кеман мастер декоративно-прикладного искусства и ремесел нэм тайӆ. 2019-мет таӆан ун юх эӆты эватты хорат нийӆмет Международной фестиваль-касапса манас. Щита Наталья «За женский взгляд» атэӆ юкантам мойӆапсайн маса.Ӆув ёшӆаӆан верам рупатайт Хон мувев хуват арсыр вошатан уӆӆат. Ун юх эӆты эвтам хорат Мордовия, Удмуртия Хон муватан, Тюменской область, Пулӊават па Ӆапатнаӊк вошатан ӆойӆат. Пулӊават воша ёхаттыйн, Ас питаран, паӆ рэп ӆоӊаӆан кев эӆты верам ун «Мамонт» нэмпи хор ӆойӆ. Щи от ищи Наталья Сергеевна юх эӆты эвтам «Мув хор» рупатайӆ хуват верса.Там касапсайн, юх па ӆов эӆты верантты хоятат кутан ӆув оӆаӊ тахая этас па «МИР» нэмпи Лауреат мастеровой премия ёша пайтас. Семён Максимович па Дипломант нэман юкантса.Зоя Куртямова ханшам потар

Тус ёшаӊ хоятӊаӆув мойӆапса

<div class="content-lead">Йис руч Рязань нэмуп вочен энэӆ фестиваль вӓри. Чет тӧса йонтэста нэӊәт сух йонтоста вӓрэн кассәт. Россия ар кәрт эвалт нэӊәт ювит.</div>Мәӊ Увәс мэӽәв йонтэм пурмасэт тусэт Тарлина Елизавета па Кечимова Галина. Ӆын эвет па имет ӄантэӄ сохэт ернаса ханши йонтэста онэӆтәсәт. Лук па васэҳ оӆӊәс йонэста онэӆтэсэт.Қантэӄ ими ернас па ики ернасэт руч мира тусэт. Ат лэилат ӄуты ӄантэӄ имет йонтэста хошӆэт.Сук эвалт верум мевӆсук, тучаӊ, намэт па тусэт. Ар мир эвэӆт йювим ёх ӆын мәӽәӆ верты сухэт тусэт. Сэмэн эмащ ӆэита, тӧс ёх ар мирән иса воӆӆәт.Чи фестиваль «От ремесла к подиуму» нэм тоиӆ. Кимит оӆ вӓри чи фестиваль.Йис щирэн верта пурасэт па сухэт нуммән тойта мосэӆ. Тэм йис тойта пурмасэн па сухэн йис ханшет верта мосэӆ. Чи фестиваль «От ремесла к подиуму» мэӊ арктической «Ямалица» хурпи.Тарлина Елизавета па Кечимова Галина чи вохум Рязань мәӽ еха вэн пэмасипа ястэӆәт.Галина Кечимова ханшам потар

Рязань воч фестиваль

<div class="content-lead">Хасям ӆапатан Ӆорвош район Ханты-Мужи куртан нийӆхусмет этнографической экспедиция манас. Хольмаӊ пеӆа няӆ няврэм «Живун» парк-музей хося яӊ хатӆа актыӆысайт.</div>Тампуш Хон Петра вошан культуролога утаӆтыты пох Никита Сергеевич Ребась па Пулӊават вош колледжан утаӆтыты хуӆам вожатой эви няврэмат пиӆан рупитсат. Си тумпийн, си куртан энмам, ин па Надым вошан каш верты хотан рупитты нэ Галина Михайловна Граблевская няврэмат вератты утаӆтаты нэман тохи вохиӆыса. Хоӆна парк-музей хося пормас шавиты верат туты нэ Алла Васильевна Конева си хатӆатан эвет па похат пиӆан рупата тус.Яӊ хатӆ сыс ихосьяӊ-няӆхосьяӊ ӆоват няврэмат вуӆы хотан муй иса верман усат. Сютсяты тумпийн, утаӆтыты урокан мийӆысайт: ханты ясаӊан потарты утаӆтасайт, ханты уӆапсаев эӆты потартсайт па пормасат этаӆтысайт. Кашӊ хатӆ моӆты хатӆа постаман ус. Няврэмат ун хоятат па нётты энамты айӆат ёх пиӆан ар хорпи мастер-классата, квестата, вантопсаята пиӆтасисат. Вератты хоятат пиӆан арсыр пормасат версат.«Ма там куртан сэма питсам, тата энампсам. Хун ты вохсайм, шеӊк аматсам. Там уйтантопсая ма оӆаӊ пуш ёхтыӆысам. Няврэмат ошаӊат, муй иса уйтты, верантты ӆытӆайт. Ма ӆувиӆаӆа альсам, хоты сак каратты, муй сирн ёнтасты, ханшет ёнтты мосаӆ. Ай хирыет, аканят ёнтсув. Хуӆ ӆоват эӆты хорамат каратсув. Вантопса ӆэсятсам. Ёӆта ёнтам ернасӆам, сак лопасӆам тутӆысӆам. Потартсаӆам па альсаӆам, хоты ханты нэӊат катра пора эӆты вератты хошсат», — Галина Михайловна ястас.Алла Васильевна хуван «Живун» парк-музей хося рупитаӆ, ханты уӆапсаев, щирӆув-пищӆув шеӊк яма уятаӆ. Няврэмата ханты пормасат, емаӊ хатӆат, уӆапсаев эӆты шеӊк ар потартас па этаӆтас. Эвет па похат умасьӆыман хуӆантсат. Муй яӊ хатӆ сыс няврэмиет версат, муй вантсат, каматса ясаӊ ӆув ястас: «Кашӊ ӆуӊ парк хося ханты, саран, русь няврэмат ёхтыӆыӆат. Тахты эӆты оӆӆат, оӆаӊ пуш вуӆы хот, ханты хотат, пормасат вантыӆат. Хоӆся ханты уӆапса уйтӆат. Вуӆы тахтэт восьхемаӆат. Ӆувиӆаӆа иса каш.Кашӊ пуш хасям хатаӆан вантопса ӆэсятӆув, няврэмат верам рупатайт этаӆтыӆув. Утаӆтыйм ханты ясӊат эӆты потар шупиет ханшсат. Ясӊеӆ шеӊк ант уятӆэӆ. Вожатой эветан нётсайт, яха нумассат. Тата уӆтэӆ сыс няврэмат яма хухатӆысат, навартсат. Вой-хуӆ веӆты юш хуват апраӊа кассат. Ар хорпи пормасат, сэсэт ӆэсятман усат. Ванты, кашӊ вой атэӆ сэсы тайӆ, па сирн мосятӆа. Няврэмата потарса па альса, маты пормас муй вой кеша верман уӆ.Кашӊ хатӆ ӆув нэм тайс: унт хатӆ, вой хатӆ, тус ёш хатӆ, йис пора хатӆ… Похат па эвет иса моӆты верман усат. Вератты тумпийн, сютсясат, яксат, ёнтсат, пора яма хайсат».Уйтантапсайӆув ханты уӆапса сирн верман усат. Яӊ хатӆ сора хасяс, няврэмата каш уӆты ус, ёхи манты ант ӆытсайт. Хой папуш ты ёхатты ӆэсятыйӆ, няврэмӆан ханшӆтыяӆан, кашӆы сита яна ант питаӆ.Альбина Тырлина ханшам потар

Ханты уӆапсаев еӆӆы тувман

Тамара Семёновна Куйбина мойӊ хоятат шийт сан пусаӊан шашантысӆы. Хор: Иван Сандрин.

<div class="content-lead">Москва эӆты нёхты хор верты ёх, «Ёрэмийм йис ӆэтотат» программа ӆэщатман, Пулӊават воша ёхтыӆысат. Ӆув Хон мувев хуват яӊхӆат па арсыр рут мир хоятат ёрэмиты ӆэтотат нох ӆэщатӆат.</div>Муй хорпи рут хоятат маты мув сыӆатан уӆӆат, хоты уӆӆат па муй ӆэтот ӆэщатыӆат, нёхты хораӊ потратан альӆат. Иса щи эӆты потартӆат, мир хоятатан ат вантӆайт па уйтӆайт.Хащам ӆапатан «Ключ» телеканал хоща яртьяӊ рупитты ёх хуӆам хатӆ Пулӊават вошан рупатаеӆ щиран усат. Кат хоят нёхты хор вуты хошап ещаӆт айкеӆ версат, потартсат, муй хорпи хорам Ямал мува ёхтыӆысат. Денис Богославский — ӆэтот каварты воӆаӊ ху па Антон Зайцев — мир муват вантман яӊхты ху.Катӊан Овс мувеван шимӆаӊ рут мир хоятӆув ӆэщатыйм ӆэтотат мир ӆоват альты номас понтсаӊан. Щи кеша ӆын Пулӊават леп уӆты ур хотатан каматса хор версаӊан. «Мув Тай» нэмпи хотвоӆан Тамара Семёновна Куйбина нэман ӆувиӆаӆа шийт сан пусаӊан шашантысӆы. Еӆӆы па потартас, хоты ханты уӆапса там муван манаӆ.Щи юпийн муӊ шоши юраӊ хоятӆув этаӆтысат, хоты ӆув касты ӆойӆыӆат. Денис Лонгортов па Юрий Лаптандер мойӊ ёх пиӆан потрэмисат па альсат, хоты сахат туӊа-щира тынщаӊ ёваӆмиты мосаӆ, муй эӆты верӆа па хоты сахат ӆув сэвӆа. Щаӆта юх катна таӆман юращты омпсыӆысат. Мет ӆавартшак курама ухаӆ шоппи наварты ус.– Хун касты верэв альты кеша ты вохсаюв, муӊ мохты кашащсув. Муӊев ӆаварт антом, щи верэв утаӆман тайӆэв. Муӊ ищи мойӊ хоятӆув иты мир ӆоватан яӊхӆув, туп касапсаята, — Денис Лонгортов ястас. — Хун ӆув хуӆсэӆ, хоты Юра Лаптандер 444-мет пуш тынщаӊ сува ёваӆмас, сэмӆаӆ шеӊк уна йисат. Хун ӆувиӆаӆа ястасув, хоты ӆув касты ӆайм 315 метрая юватсаӆӆы, хащ иӆ ант омпсантсат. Мохты инщасты питсат «Хоӆща щи арат юр?» Муӊ ӆувиӆаӆа ястасув: «Няр хуӆ па няр нёхи ӆэвман уӆӆув, щишан тумтак па юрӊат».Еша метам юпийн, мойӊ хоятӆув ур хот ӆыпия вохсайт. Щита Тамара Куйбина этаӆтас, хоты йис тэӆан ураӊ щанька верыӆыӆа. Там порайн еша ёрэматы питса, айӆат ёх воӆаӊ ант верыӆыӆат. Туп вуӆы тащан яӊхты ёх порайн шарытыӆат. Мойӊ ёх умащӆыман вантсат па ищи ураӊ щанька верты ӆойӆысат. Щимащ эпӆаӊ нянь ӆэӆан па мохты юран ёхатӆайн.Нёхты хорат вуты шеф-редактор Анна Неделько там мува оӆаӊ пуш ёхатмаӆ па умащӆыман потартас: «Муӊ нумассув, Овс мува манӆув па щита ищкийн певӆаюв. Пулӊавта ёхатмеван, тохӆаӊ хоп эӆты ким этман, щикем ям ӆаӆты ус. Хошам найӊ хатӆ ӆойс, шеӊк умащ. Тата уӆты шоши хоятат муӊ пеӆаев шеӊк ямат па самаӊат. Там мува еӆпи ант ёхтыӆысув, умащӆыман вантсув па хуӆантсув. Муӊ кешаев «Сердце Арктики» нэмпи торт ӆэщатса. Ӆэтот каварты воӆаӊ ху Денис щи рецепт ханшсаӆӆы. Щи торт нёхты хора вуйман «Охота» ресторан хоща манмеван, яӆпа нох ӆэщатсэв».Телеканал «Ключ» хоща «Ёрэмийм йис ӆэтотат» программа вантман, нумаӆмияты, мосаӊ нын па моӆты ӆэтот ёрэмиман тайӆаты. Нох ӆэщататы, няврэмат утаӆтаман этаӆтыяты.Иван Сандрин ханшам потар

Йис ӆэвапса каншман

Питласоват «Мет воӆаӊ хуӆ веӆпасӆаты хоттэӆ». Хор: Альбина Тырлина

<div class="content-lead">Хасям сютсяты хатӆатан округ ӆоватан хуӆ веӆпасӆаты ёх емаӊ хатӆат мантсат. Кашӊ хуӆ веӆпасӆаты пана ун кусяйт ёхтыӆысат, хуӆ мосятты хоятат пеӆа мойӆапса ясаӊан ястасат. Рупитты ёх ишакты нэпекатан юкантсайт па мойӆаптасайт. Ӆорвош районан тампуш хуӆ мосятты мохет Аканьлейман, Ӆорвошан па Хашкуртан уйтантысат.</div>Округ хуват ярсот пеӆа хут хуӆ веӆпасӆаты па ветхосьяӊ хуӆ ӆэсятты таха уӆ. Кат сёрс арат хуӆ веӆпасӆаты хоят рупитаӆ. Хасям вет таӆ сыс кашӊ таӆ хуӆ веӆты ёх яӊ сёрс тонна хуӆ мосятӆат.Уйт ӆор тыӆащ 10-мет хатаӆан Ӆорвош куртан «Горковской» рыбозавода ӆуӊтасты хоятат емаӊ хатӆэӆ постасэӆ. Мойӊ, куртаӊ па хуӆ веӆпасӆаты ёх ар хуӆ веӆты тахайт эӆты яха уйтантысат. Няврэмӆаӆ, рутӆаӆ пиӆан ёхтыӆысат.Ханты хоятӆув катра пора эӆты хуӆ веӆман уӆӆат. Там хатӆ унты таӆаӊ хоттэӆатан си вер тувман рупитӆат. Си хатаӆан мет апраӊшак, каркамшак хоятат ишакты нэпекатан постасайт па мойӆаптасайт. Ӆув кутэӆан Вячеслав Устинович Тояров, Ӆоркурт рыбоучастка ӆуӊтасман уӆ. Мет воӆаӊ нэпекан — Хон мув сельской хозяйство Министерства эӆты Почётной грамотайн юкантса.Округ хуват вой-хуӆ веӆпасӆаты хоятат ураӊан яӆпитам верат ӆэсятсайт. Хуӆ веӆпасӆаты ёх ияха ёхатмеӆ пуляӊ, Ӆорвош район шимӆаӊ мир ёх департаментан рупитты хоятат, хопан яӊхты порайн ӆуматты жилетатан па хуӆ шарытты хошапан масайт.Емаӊ хатӆа ёхтам ёх кеша ӆэтотаӊ пасан ӆарпитыса, эпӆаӊ хошъйиӊк кавартыса, каш па касапсайт ӆэсятысайт. Хуӆ веӆпасӆаты ёх кутан «Мет воӆаӊ хуӆ веӆпасӆаты хоттэӆ» касапса верман ус. Оӆаӊ тахая Вениамин Максимович па Ирина Константиновна Питласовӊан этсаӊан. Ӆув хольмаӊ моӆтас таӆ хуӆ веӆпасӆыман рупитсаӊан. Кашӊ касапсайн касты хоятат ишакты нэпекан па охан мойӆаптасайт.Муӊ па хуӆ мосятты ёх хоятата па нэӊата хошам ясаӊ китӆув. Веськата уӆаты, хоӆапӆын аршак хуӆан ат хойӆайт, рупатайн кентат ат манаӆ. Тумтак ёш, тумтак кур!Альбина Тырлина ханшам потар

Асэван ӆапатӆаюв, Тураман шавиӆаюв!

Алёна Аляба няӆмет пуш губернатор нэмпи ох нётапса шитас.    Хор: Алёна Аляба

<div class="content-lead">Тампуш, рупата пеӆа утаӆтыты па ӆуӊ сессия яма мийм няврэмат губернатор нэмпи ох нётапса шитты верытӆат. Щи кеша, утаӆтыты муй па пирыйм рупата верат туты департаментата унт ӆор тыӆащ хащам хатӆ унты нэпекӆаӆ китты мосаӆ.</div>Округ ашкуӆа меваӆ пос пиӆан етшам, Волновахской округ эӆты рупата пеӆа утаӆтыты эвет-похат, аӊкиӆаӆ-ащиӆаӆ СВО харан уӆты няврэмат, ин вузатан образование сирн, леккара па каш верты хоята хуӆмет курсан утаӆтыты айӆат ёх, колледжатан па вузатан утаӆтыты энамты ёх, маты отат иса «5», муй па «4» па «5» поса сессияеӆ етшаптасэӆ па касты харатан, исследовательской, интеллектуальной рупатаятан ӆувиӆаӆ шеӊк яма альсэӆ, тамащ ох нётапса вуты верытӆат.Овс мув шимӆаӊ мир ёх няврэмат, хойтат вузатан па колледжатан утаӆтыӆат, щимащ ох оӆаӊ курс эӆты вуты верытӆат. Туп ӆувиӆаӆа ищи иса «5», муй па «4» па «5» поса утаӆтыты мосаӆ.Няврэмат китты нэпекӆаӆ образование, леккар, каш рупата, хот верат туты, шоши мир ёх па мув хорас ресурсат па экология округ департаментат комиссияйн вантӆайт. Ашкуӆа яма етшам няврэмат па хойтат, аӊкиӆаӆ-ащиӆаӆ СВО хоща уӆӆат, нэпекӆаӆ утаӆтыты верат туты округ департамент хоща китты верытӆат. Шоши мир ёх няврэмат Овс мув шимӆаӊ мир ёх департаментан нэпекӆаӆ ӆаваӆӆайт.Стипендия шитты нэпекат, утаӆтыты верат туты округ департамент сайтан вантты рахаӆ. Нох питам эвет па похат кашӊ тыӆащ яӊ щёрас соӆкувайн сохаптаты питӆайт.Тамащ ох нётапса 2020-мет таӆ эӆты мийӆыты питса. Тампуш, таӆ сессия юпийн хуӆамсот пеӆа няӆъяӊ вет эви-пох губернатор нэмпи стипендия шитсат. Щиӆта катсот пеӆа яӊ хоят шимӆаӊ мир ёх эӆты ус. Нялъяӊ пеӆа хут хоят иса «5» поса утаӆтыйс. Хольмаӊ пеӆа хуӆам няврэм, аӊкиӆаӆ-ащиӆаӆ вуӆы хотан касаӆман яӊхӆат па вой-хуӆ веӆпасӆаман уӆӆат.Зоя Куртямова ханшам потар

Губернатор нэмпи нётапса

Елена Владимировна Сибарева воӆаӊ сэма питам хатӆаӆ постас. Хор: Елена Сибарева

<div class="content-lead">Там ӆапатан Елена Владимировна Сибарева воӆаӊ сэма питам хатӆаӆ постас. Хантэт кутан кашӊ муван уйтӆа. Ешауӆ хольмаӊ таӆ ванамаӆ, хоты ӆув нёхты хор айкеӆ ӆэщатман рупитаӆ.</div>Елена Владимировна Ващъёханов куртан уйт ӆор тыӆащ 15-мет хатаӆан 1976-мет таӆан сэма питас. Маты хоттэӆ эӆты ӆув уӆ, щи эӆты каматса ясаӊ ястас: «Ма эви опращ нэмем Озелова. Ащем Владимир Григорьевич, антем Зоя Васильевна. Ащем-антем вуӆы тащ энмаӆман па шавиман рупитсаӊан. Нийӆ няврэм энмаӆсаӊан: вет эви па хуӆам пох, ар пелак касаӆты порайн сэма питсув. Муӊ иса Ващъёханов куртаӊ ашкуӆайн утаӆтысув. Ӆувеӆ етшаптамев юпийн, хойтат еӆӆы утаӆтыты мантсат, хойтат па ёӆан рупитты хащсат.Евгений ун яйем Пулӊават вошн уӆ па рупитаӆ. Щи еӆпи ищи ар таӆ ма итэман нёхты хораӊ айкеӆ верман рупитыйс. Нина опем па Мужи вошан уӆ, Ӆорвош район утхот шоши мир верат туты тахайн куща ӆаӊкар нэӊа рупитаӆ. Светлана апщем Ващъёханов куртан хатӆ сыс ай няврэмат шавиты хотан воспитателя уӆ. Таня апщием ищи куртан няв¬рэмат тайты па шавиты хотан ӆэтот кавартаӆ. Галина опем хув тэӆан Надым вошан уӆ. Олег айшак яйем ащем-антем вер еӆӆы туӆ. Кум шитман, муӊ иса ӆув хощаеӆ яӊхиӆыӆув».Ашкуӆа етшам юпийн, Елена Ёмвоша еӆӆы утаӆтыты манас. Щита ӆув рущ па ханты ясаӊ утаӆтаты нэӊа утаӆтыйс. Щи юпийн, 1998-мет таӆан Пулӊавта ёхтас. Шоши ханты ясӊаӆ па уӆапсайӆ яма уйтты ураӊна «Ямал-Регион» нёхты хораӊ айкеӆат верты тахая рупитты вохса. Щи таӆ эӆты па инты унты Овс мув ёх эӆты айкеӆат ӆэщатаӆ. Ӆув онтасан муӊ ханты ясӊев, уӆапсаев мир ӆоватан хуӆантӆа па вантӆа.Мет оӆӊа ӆув «Тут суӆтам» нэмпи программа ӆэщатман па айкеӆ тувман рупитас. Щаӆта па ван кутан «Онас» радюва передача хуват яӆап айкеӆат округев ӆовата потартыйс. Еша пора хащман па рущ ясаӊан айкеӆат ищи ӆэщатты питас, ванты рущ мир хоятата ищи умащ вантты па хуӆантты, хоты Овс мув мир хоятат уӆӆат.Рупатайӆ щиран ӆув кашӊ ай куртыета, веӆпасӆаты паната, вуӆы тащ хотата па ун вошата яӊхиӆыйӆ. Хольмаӊ пеӆа нийӆ таӆ рупитмаӆ сыс, Ямал мувеван ар пелак хоятатан уйтӆа. «Зов тундры» нэмпи экспедицияя Кев ӆыпия яӊхиӆыйс. Щи эӆты ун хораӊ потрат ӆэщатыйс.Ӆэщатам нёхты хораӊ потарӆаӆ арсыр касапсаята китыӆыӆӆы. 2004-мет таӆан «Сибирский тракт» межрегиональной фестиваль радиопрограмм хоща «Ас пухӆаӊ ёх» нэмпи ӆэщатам потраӆ пиӆан нох питас. Щи рупатайӆ шеӊк ошаӊ па воӆаӊ хоят Леонтий Тарагупта эӆты ӆэщатман уӆ. Щи хоятэн ханты йис уӆапса щеӊк яма уйтсаӆӆы.Еӆӆы па 2021-мет таӆан Хон мувев ӆоват «Многоликая Россия» касапсайн ван кутан этӆыты «Овс хорамат» нёхты хораӊ потрат ураӊна ияха рупитты ёхӆаӆ пиӆан оӆаӊ места шитсат.Нёхты хораӊ потарӆаӆ тумпийн, Елена Сибарева рущ ясаӊан ханшам нэпекат ханты ясӊа толмащӆаӆы. Щиты, Постановление от 23.02.2000 года № 866 «О концепции развития коренных малочисленных народов Севера ЯНАО» ханты ясӊа кератсаӆӆы.Елена Владимировна ийикеӆ Василий Дмитриевич пиӆан Александра эвиеӆ энмаӆӆаӊан. Иса ханты ясӊа утаӆтаӆӆэӆ. Кум шитман ОЦНК хоща «Овс мувие» арыты коллектива яӊхӆатан. Там юбилей сэма питам хатӆаӆан иса ван рутӆаӆ па ӆухасӆаӆ мойӆап ясаӊ пиӆан ёхтыӆысат. Еӆӆы тумтак па ат уӆ па ханты ясӊев еӆӆы туӆ!Иван Сандрин ханшам потар

Ханты уӆапса альман

Хор: "Красный Север" архив

<div class="content-lead">Там емаӊ хатӆ кашӊ таӆ хоятатан ӆаваӆӆа. Ӆуӊ рупитты сыс емаӊ хатаӆан уйтантыты рахаӆ. Кум шитман мойӊ хоятат веӆпасӆаты паната яӊхӆат па хуӆ веӆты ёх пиӆан уйтантыӆат. Хоты щи емаӊ хатӆ этас там лопасан еша айкеӆ туӆув.</div>Хуӆ мощатты ёх емаӊ хатӆ Мурманск вош эӆты постаты питса. Щита хуӆ веӆпасӆаты «Мезень» нэмпи ун тутаӊ хоп мет оӆаӊ пуш ущ тыӆащ 21-мет хатаӆан 1920-мет таӆан щарса этас. Ветъяӊ пеӆа няӆ таӆ хащаман, Мурманск веӆпасӆаты ёх ӆув емаӊ хатӆэӆ щи этам тутаӊ хоп кеша постасэӆ. Еӆӆы па кимет таӆан хуӆ веӆпасӆаты емаӊ хатӆ Советской союз ӆоватан постаты питса. 1965-мет таӆ эӆты уйт ӆор тыӆащ кимет ӆапат ох хатаӆан постаӆа. Тампуш емаӊ хатӆ уйт ӆор тыӆащ 12-мет хатӆа хойc.Ямал мувеван хуӆ веӆпасӆаты ёх емаӊ хатӆ кашӊ районан постаӆа. Щи хатаӆан мет каркам па хув рупитты ёх мойӆаптаӆайт. Округев ӆоватан мет олаӊмет пуш хуӆ веӆты ёх емаӊ хатӆ уйт ӆор тыӆащ 11-мет хатаӆан 1965-мет таӆн постаса. Щи хатӆ эӆты «Красный Север» нэмпи газетайн ханшса. Этам лопасӆаӆ хуӆам пуш аршака этсат. Аӆ порайн туп 4 лопас, емаӊ хатӆ кеша 12 лопас верса. Кашӊ лопасан веӆпасӆаты ёх хорат па ӆув эӆтайӆ ханшам потрат понман усат.Там хащам щутщаты хатӆатан емаӊ хатӆ Ямал мувев ӆоватан постаcа. Охсарвош, Харсойм, Белоярск, Катравож, Зелёный Яр па Канащ Похаӆ куртатан Кев сыӆ районан уӆты хуӆ веӆты ёх уйт ӆор тыӆащ 11-мет хатаӆан уйтантысат. Ищи хатаӆан Надымской, Ямальской, Тазовской па Красноселькупской районатан веӆпасты ёх хоща мойӊ хоятат ёхтыӆысат.Ӆорвош районан сельхозпредприятие «Мужевское» хоща рупитты ёх кеша уйт ӆор тыӆащ 6-мет хатаӆан емаӊ хатӆ ӆэщатыса. «Горковский» рыбозавод 10-мет хатаӆан Ӆорвош емаӊ ӆор пуӊаӆан емаӊ хатӆэӆ постасэӆ. Там ӆапат оӆаӊ хатаӆан сельхозпредприятие «Горковское» хоща веӆпасты хоятат Хашкуртан ияха актащисат. Хоты емаӊ хатӆ постаса кимет ӆапатан ӆуӊтаты.Иван Сандрин ханшам потар.

Хуӆ веӆпасӆаты ёх емаӊ хатӆ

Антон Русмиленко Виктория Юрко пиӆа туты нэӊаӆ пиӆан Москва воша яӊхас. Хор: Антон Русмиленко

<div class="content-lead">Хон мувеван, уйт ӆор тыӆащ нийӆмет хатӆ Хоттэӆ хоят хатӆа постаман уӆ. Щи хатаӆан ар таӆ яха уӆам па вещката няврэмӆаӆ энмаӆтам хоттэӆ мохет мойӆаптаӆайт. Там йисан па, хоттэӆ щира уӆтыя йи номас понам айӆат ёх щи хатаӆан яха ханшӆтантыӆат.</div>Там порайн яӆап щират этсат, яха ханшӆтантыты мохет хорам каншман, ӆув пирыйм тахаеӆан ёш пос понты верытӆат. Хой щи кеша Кев ӆоӊӆа нох хуӊхӆат, еӊк хот ӆыпия иӆ охаӆӆат, ур хота, муй па щарас пеӆа манӆат, карты кешеӊ патинкайн еӊк хуват хатмиӆат.Овс мув шимӆаӊ рут мир хоятӆув па поры щир этаӆтаты ураӊан, Хон мувев воӆаӊ воша вохӆайт. Тампуш «Россия» нэмпи национальной центран арсыр рут мир айӆат ёх яха ханшӆтантыӆат. Ӆув кутэӆан хуӆам ханты хоттэӆ пиӆ. Владимир Сопочин па Арина Колыванова Ёмвош округ Сургутской районан уӆӆаӊан. Георгий Кунин Ёмвош округ Лемпино курт эӆты, нэӊа туты пиӆаӆ Диана Плисова Ёмвошан ус па щита рупитас. Яха уӆты номас понман юпийн, Диана Георгий уӆты куртаӆа касӆас.Там няврэмат ар няврэмаӊ хоттэӆатан сэма питсат. Опращӆаӆ йис тэӆан вуӆэт шавиман, вой па хуӆ веӆпасӆаман усат. Ханты уӆапсаеӆ еӆӆы тувман, айӆат ёх энмам куртӆаӆан уӆты па щита рупитты номас понтсат.Ямал мувев эӆты ёш пос понты Москва воша Антон Русмиленко Виктория Юрко пиӆа туты нэӊаӆ пиӆан яӊхас. Антон Ӆорвош район Горка вошан сэма питас. Щита энмас па ашкуӆайн утаӆтыйс. Ханты уӆапса верата ащеӆан утаӆтаса. Виктория па рущ эви.«Мин ищи ар няврэмаӊ хоттэӆатан энампсаман. Ай тэӆан рут мир уӆапсаеман шавиман тайты утаӆтасайман. Ин мин Пулӊаватан уӆӆаман па щита рупитӆаман. Номас тайӆаман, ун хот омасты, няврэмӆаман энмаӆты па кат мир рут хоятӆув пиӆан уйтантыты», — Антон па Виктория ястасӊан.Муӊ па хоттэӆаӊ хоятата мойӆапса ясаӊ китӆув. Хотӆан хошмат, пасанӆан тэӆаӊат, няврэмӆан тумтака ат уӆӆат. Ойаӊа-пищаӊа, йисаӊа-нуптаӊа!Зоя Куртямова ханшам потар

Лух Авт

Публикации автора