обновлено: 12:35, 21 октября 2026
Лух Авт
Шоши мир уӆапса этаӆтыса
Округ хоятӆув там мосванан Австрия, Венгрия, Словакия мувата яӊхсат. Кашӊ порайн Ямал мувева утаӆтыты, культура, мир верат сирн па хон мув хоятат ёхтыӆыӆат. Си тумпийн, Овс мувев эӆты аршак уятты па хорам, тасяӊ мувев вантты ураӊан, энамты ёх, аӆ хоятат па яӊхӆат.
Хасям таӆатан округ хоятӆув артан па хон мувата вохты питсайт. Овс мувев уӆапса этаӆтыман, кусяйт тумпийн, туса верантты, якты па арыты шоши мир хоятӆув па яӊхӆат. Там яӊхты уйтантопсайн кат ханты хоятӊан Валентин Валерьевич Вальгамов па Сергей Валерьевич Аляба усӊан.
Округ эӆты уӆам хоятат пиӆан Вена, Будапешт па Братислава вошатан уйтантопсайт мантсат. Воӆаӊ Ляль манам порайн, ляль харан лялясам хоятӆув си вошат нох паятсат па сита уӆты хоятӆаӆ сайӆасат. Валентин Вальгамов ун асикеӆ аси Павел Григорьевич Шиянов си хоятат кутан лялясас. Вена вош нох паятман ус. Си хоятат нумман, си вошатан кев хорат ӆэсятман уӆӆат. Хон муваӊ ёхӆув па ханты хоятэв касьтаты па лыпат понты ураӊан, ханты похӊаӆув кашӊ вошан симась кев хор хося яӊхсаӊан.
Кашӊ вошан наука па культура Хон мув центран Овс мувев эӆты вантопса пуншман ус. Си вантопсаятан Ямал мувев, уӆапсаев эӆты хорат па округ верантты хоятӆув рупатайт этаӆтыман усат. Си тахаятан туса верантты ханты хоятэв Сергей Аляба мастер-классат аляс, хоты ӆов эӆты пормасат эватӆайт. Эватты, нёхратты пормасӆаӆ па муватан иса этаӆтыӆайт.
Там яӊхам уйтантопса эӆты ӆув ситы ястас: «Ма антом оӆаӊ пуш па хон мувата яӊхӆам, вантопсаята пиӆтасьӆам. Тампуш «Ямальской филармония» хося рупитты хоятӊан Валентин Вальгамов па Надежда Салиндер пиӆан яӊхсув. Яха Овс мув уӆапсаев этаӆтасув. Кашӊ вошан ма мастер-классат версам, рупатайӆам альсам. Ӆын па русь па рут ясӊанан арат арысӊан, якат якамтысӊан. Хоӆна «Русь ясаӊан арат» фестивалян жюри кутан усӊан.
Кашӊ уӆам вошан вантопсайт ӆэсятман усат. Будапештан муӊ хоӆна Россия, Белоруссия, Казахстан, Узбекистан па Киргизия муват эӆты уӆам посол кусяйт пиӆан еӊта пасан суран актасисув па потар тусув.
Будапешт па Братислава вошӊанан уӆты гимназияйӊан, хота няврэмат русь ясаӊ утаӆтыӆат, уйтантопсайт версайт. Сита русь ясӊаӊ нэпек шимаӆ тайӆат. Сишан округев эӆты тувам учебникат па ӆуӊатты нэпекат ашкуӆайӆаӆа мойӆасув. «Энамты рейнджеры» объединенияя ӆуӊтасты айӆат ёх пиӆан па уйтантысув, шоши мир уӆапсаев эӆты потарсув. Ӆувиӆаӆа ма мастер-классат версам, пормасӆам альсам, няврэмат утаӆтасам, хоты си пормасат верӆайт па эватӆайт».
Си порайн, хун муӊ хоятӆув сита усат, Словакия мув эӆты Пулӊавта па Приуральской района Татранской нацпарк эӆты делегация ёхтыӆыйс. Мувев, йиӊкев, унтэв верат туӊматты, шавиты ураӊан уйтантысат.
Альбина Тырлина ханшам потар
