обновлено: 07:25, 29 октября 2026
Лух Авт
Колледжатан манам уйтантопсайт
Ай тахайт потты тыӆась ӆапатхосьяӊмет хатаӆан, округ хуватан рупитты ӆапат колледжан уйтантопсайт мантсат. Нийӆ-ихосьяӊмет классатан утаӆтыты няврэмат па асиӆаӆ-аӊкиӆаӆ си хатаӆан ӆув вошӆаӆан уӆты колледжата яӊхты верытсат.
Ёхтам няврэмат па ун хоятат ещаӆ сита рупитты хоятат потар тусат, муй рупата хуват сита утаӆтыты рахаӆ, муй хорпи утаӆтыты верат уӆӆат.
Вошаӊ рупитты тахайт эӆты кусяйт пиӆан уйтантопсайт мантсат, ар хорпи мастер-классат, практической рупатайт, консультацияйт па колледжат хуват вантопсайт ӆэсятман усат.
Рупитты тахайт эӆты вохам хоятат, рупата эӆты муй уятты, рупата хуват муй верты мосаӆ, яӆап рупатая питсяты веӆси этты няврэмата потар тусат. Кашӊ таӆ симась уйтантопсайт верты еӆпийн, ашкуӆа няврэмат рупитты тахаята тутӆыӆайт. Рупитты тахайт альӆат па сита рупитты хоятат пиӆан еӊта пасан суран потрэмиӆат.
Симась уйтантопсайт «Профессионалитет» федеральной проект «Энамты ёх па няврэмат» национальной проект хуват верман уӆӆат. Округ куся партапса хуват, Овс мувеван рупитты тахаятан мосты рупитты ёх артаӆаӆат па симась уйтантопсайт верӆат.
Альбина Тырлина ханшам потар
