обновлено: 09:57, 15 октября 2026
Лух Авт
Йис верат еӆӆы туӆ
Хащам ятан Алексей Викторович Рохтымов пиӆан уйтантысам. Ӆув Овкурт эӆты уӆ. Хащам таӆатан Ващъёханова касӆас, щита уӆмитас. Кат таӆ сая йис, хоты ӆув юх эӆты хуванат па па хорпи пормасат нёхарты питас. Верты пормасӆаӆ тыныӆӆы па ёӆан ёрая тайӆаӆӆы.
Щи тумпийн ӆув мохетан шеӊк яма уйтса, хоты ӆув ишнет па оват туса вераӆ. Щишн мосты порайн иса ӆувеӆа партыӆыса ов па ишни вер.
– Там еӆпийн наӊ ишнет па оват тыныты ураӊан туп верыӆысан?
– Ишнет, оват, пасанат, уӆасат — хой муй вохаӆ, иса щит верыӆысам. Ма профессияем щиран столяра уӆӆам. Щаӆта туняӆатан номас понтсам, муя па кашӊ хатӆ тайты пормас манэм ант верты? Щи номпсэм вуйман хуванат верты щи питсам. Хоятата умащ тайты ураӊан хорампӆаӆӆам, ханшийн щуратӆаӆӆам. Киш эӆты ай аныет ищи нёхарӆам.
– Пормасӆан верты юх ураӊан, унта муй порайн яӊхиӆыӆан?
– Кашӊ пуш унта шушиӆытэман моӆты ям юх муй киш кащаӆаӆам па, ёхи щи туӆэм. Ванты, кащаӆатэм порайн артаӆаӆэм, муй хорпи ям ан-сун ӆуӆан там от эӆты верты рахаӆ. Нэман ки яӊхты — щит ун кер тыӆащан. Щи порайн юхаӆ вератты ураӊан шеӊк ям.
– Муй юх эӆты хуванӆан верӆаӆӆан?
– Нохар юх, хоп юх, киш, сумат юх эӆты артан верыӆыӆам. Йи юх эӆты арсыр пормас верты рахаӆ, антом туп йи ан. Верты шеӊк ӆаварт антом. Мосаӆ туп туӊа-щира патэӆ унты сыстапты, хорапты. Щита аршак юр па кум понты мосаӆ.
Хуванӆам Вера Степановна Озелова ийимем хорапӆаӆӆы, ханшийн щуратӆаӆӆы па щарытӆаӆӆы. Щи веран ӆув шеӊк хорамаӊа вантасӆат. Хоятатан иса умащӆыман тайӆайт. Вера Степановна такӆы пормасӆам щиты хорамаӊа ант тыйсат ӆуӆан.
– Верты пормасэн иса етшатаӆ юпийн муйн нёсытӆэн, войн?
– Щи кеша уӆты войн нёсытӆэм, пуӆаӊ войн. Щи порайн ант сораӆ па пелки ант халыйӆ.
– Хуванӆан камн соӆкувайн тыныӆӆан?
– Щит мосаӆ вантты, муй хорпи. Ар пелак няӆ щёрасан тыныӆӆам. Щаӆта рахаӆ хуӆам ятпи хуванэм ӆутты. Щий рахаӆ имохты хуӆ, нёхи па нянь понты. Ӆув нийӆ щёрас тынпи. Кашӊ ан ӆув тын тайӆ. Артаӆаӆэм, муй арат юр па щём щий понман ус.
– Пормасӆан хун артан ӆутыӆыӆайт?
– Тынасты харат уӆӆытыйн, ёӆан верыӆыты пормасӆам иса патан вуйӆыӆӆам. Щи веран, ванты, аршак хоят уӆтыйн, сорашак ӆутӆа. Аратаӆ мира ям па манэма, ищи.
Тамащ хоятат онтасан муӊ ханты мир уӆапсаев ант хурӆаӆ па еӆӆы манаӆ. Алексей Викторович еӆӆы хатӆатан ищи хорамаӊ пормасат ат вераӆ, па ӆув верты пормасӆаӆ иса мув ӆоватан ат манӆат. Кашӊ хотан умащӆыман тэӆаӊ пасанатан ат тайӆайт.
Аллина Тоярова ханшам потар
