Лух Авт
Сус порайн касӆыты юшӆув
Вуща уӆаты! Хоттэӆэм пиӆн яӆап потрат ӆэщатсам. Нын ӆуӊтаӆан, па нын уӆапсайн уӆам верат эӆты нумаӆмияты. Номас ки тайӆаты, ищимащ потрат ханшаты.
Потрэм ханты мур каӆаӊна касӆыты юшат эват еӆӆы туӆэм. Ма нумты ӆоват усам. Хоттэӆэв пиӆн «Горковской совхоз», Питӆор пеӆа уӆты кимет тащн касӆыман яӊхсув.
Тащ кущая ащем Егор Лазаревич Наков понман ус. Тащ шавиты хоятат Порават ёх — иса ма акиӆам. Калин Андреевич Родямов, Павел Николаевич Родямов, щаӆта кат яй сакӊан — Дмитрий Григорьевич Ямру па Павел Григорьевич Ямру. Ӆын аӊкан — Посӆаӊ нэ ус.
Муӊ оӆӊеван там муват хуват Ляль кертам Порават ёх акиӆув касӆысат. Щишн ӆув нэмтам кевӆаӆ, мувӆаӆ, юшӆаӆ, ёханӆаӆ нэмат итта унты уӆӆат па номасн нумман тайӆаӆӆам.
Волитты Кеват ёхан лотн
Суса йиты кемн хотӆув Кев Хот Паты лотн ӆойсат. Наӊкаӊ лот. Кев хары ӆыпина ӆоӊтына наӊкат йи ара йиӆат. Ӆыпина Кат Кев Кутн нэмпи лотн Волиты Кеват ёхан оваӆ.
Ӆув сыӆаӆн арсыр хорпи тынаӊ нави волиты кеват таяӆ. Рущ щирн аятӆаят — горный хрусталь. Щишн ёхан кевӆаӆ волиты антасн ханты щирн щиты аяӆӆа.
Кат Кев Кутн овты Волиты Кеват ёхан пуӊаӆна ӆойтэвна Мохсарт ныӊ аӊкем шуӊат йи щимащ ар кев акатман таяс. Шай ан хошапан шависӆы па нэӊат ухаӆн ищи таяс.
Ай уӆмемн Леонид яйм пиӆн янман щи кеват тайсаӆаман. Шеӊк хорамат. Вантыӆӆаман. Тухаӆ отӆаӆ восты тарн хорпет, кимет отӆаӆ ӆор йиӊк хорпет, хоӆмет отӆаӆ тынаӊ кев хорпет. Няврэм сэман умащ ванттыя. Аӊкем ястыӆыяс, ащем актыӆыям хорам кеват уӆмеӆ.
Инта унты Волиты Кеват ёханан, щи пора актам кевӆам тайӆаӆӆам. Няврэмӆам эӆты этаӆтыӆӆам па монщ иты потарӆаӆӆам па алиӆыӆӆам.
«Эспилица»
Ма нумтэм порайн, Кев Хот Паты лотн, кев ӆырамты «эспилиция», рущ ясаӊан экспедиция, ӆояс. Уӆты павар хот тайсат. Кимет хотэӆ ӆыпи лёхытыты лота тайсэӆ. Вездеходат тайсат. Аса яха нияӆкем хоят усат. Иса ёх хоятат.
Муӊ хощаева ёхтыӆысат. Няр нёха вохыӆысат, щи сахат муӊев рущ ӆэтот тутлисат. Рущ ӆэтот Полярный Урал станция эӆты ӆутыӆысат. Щи порайн ӆув Кев шукатӆат. Кев мараӊ сый еӆта, хуваӆта щащӆ. Кев шукаттына — паӆтап. Еӆта щукатам кев хыш, туп шуваӆ ныӆа.
Ӆуӊ кутап емаӊ хатӆ порайн ӆув вездеходан муӊ хощаев ёхатсат. Емаӊ хатӆ кеша каӆаӊ хорсув. Няр нёха порыӆыман омасӆув. Ӆув пасан сыӆа йисат. Ӆэтты омассат. Нёха ӆэты оӆаӊан йинщты вур вохсат. Ащем вур хоща соӆ эсӆас, ямас руватсаӆӆы па вуры хыр эват нюмар анна вур амармас па ёхтам рущ ёша катӆаптасӆы. Иттам мояӊ ёх муӊ вантман имохты анӆаӆ ёхы вур пиӆна йинщсаӆӆаӆ. Юхат ястаӆат: «Ям ӆэтот уӆмаӆ, ин уятты питӆэв».
Наяӊ хатӆ сыс муӊ хощаев усат. Ай верн унтна яӊхтэӆн парта порах понна ар хорпи ун толах ёхтаптаӆат. Муӊ ястаӆув: «Щит каӆаӊ ӆэтот, муӊ щишн ант ӆэӆув». Рача вохсат па Римма опемн рачайн масаят. «Эспилица» хоятат этаӆтысат, хоты толах ӆэщатты. Хоты шарытты па ӆэтота тайты.
Потарсув, пеяӆтты ӆув хощаеӆ ёхтыӆыты. Порайн Афанасий Кельчин Ӆорвош эӆты ёхтас. Щи порайн ӆув нэ хоӆна ат таяс. Манэм па Игорь Родямов пиӆн «Эспилица» хотвоӆ ванттыя вохсаӆы па щита пеяӆтаты хотн пеяӆты. Мин ищи сыстам сохӆаман, венш муӊхты сох каӆтамн вусман.
Юш уятсэман. Этаӆтысэман. Яӊкем километра кем шушсув. Пеяӆты лотэӆна ямас лёхытысув, ӆаращн актам арсыр кеват вантысӆув па щитэвн ёхы ёхатсув.
Кев Хот Паты лотн
Кев вунстэв юпина мет еӆан, Кев патына, касӆыты лотэв — Кев Хот Паты лота аяӆӆа. Волиты Кеват ёхан пуӊаӆн. Шеӊк ун кеваӊ таха. Ӆуӊ порайн тэӆна ӆонщаӆ тата ар. Каӆаӊат эӆты ям, ёлах. Кев хораят хоща ӆонщаӆ ар. Каӆаӊат нёта кашман кева нох хуӊхӆат.
Йиӊк Волиты Кеват ёхан эӆты аӆӆув. Тут аӆӆыты варс ищи ар. Щи кеша ёхан путарн яӊхӆув. Аӊкем эӆты яйм, опем пиӆн варс акаттыя нётӆув. Ащем акиӆам пиӆн иса каӆаӊ шавиман яӊхӆат.
Няврэм пораем ус па шеӊк каш. Пиӆӆам: Римма опем, Леонид яйм, Юрий Родямов па Игорь Родямов, Софья (Соня) Ямру, Евгений (Женя) Ямру. Щи порайн, уртыӆам энамты хоятат. Каӆаӊ шавиты лот эват уртыӆам: Илья Максаров, Сергей Максаров, Вениамин Максаров. Аспохӆам: Виктор Возелов, Валерий Возелов. Ёхаттэӆн, муӊ пиӆэван футболан янтсув. Щи порайн тащан уӆты няврэмат иты тынщаӊ ёваӆмаман Игорь Родямов пиӆн янтӆаман. Ар няврэм яха актащман лапта нэмпи янтапсына янтӆув.
Леонид яйм еша уншак па шеӊк нэпек ӆуӊатты нумпи ус. Кевху акем ики — Калин Андреевич Родямов гармошкайн ӆув щираӆн нарасӆыты унтӆас. «Спидола» радио эӆты муй хуӆаӆ, юхат щи ар соват нох унӆтаӆӆы па гармошкайн нарасӆыӆӆы. Похаӆ — Юрий Родямов, ащеӆ эват вантман, ищи унтӆас гармошкайн янтты. Камн ар сов сыяӊа нарысӆыӆӆы.
Римма опем пиӆн оккайӆаман эӆты нёта ураӊан кев патына, найӊ хатаӆн нёта акатыя нох хуӊхыӆысман. Щиӆта оккайӆаман пиӆн янсаман. Ӆув оккайӆ нэм Нёвтыйи, манэм Няравой.
Ӆуӊан ар пелак камн ӆэӆув. Аӊкиӆув ӆуӊан верантты пораеӆ. Хой татӆасӆ, хой вай, тупар ёнтаӆ, хой ӆэщатам сохат эват сах, моӆщаӊ верӆ. Мохсарт нэ аӊкем хоты, ивевн ӆэптамтам кепӆ ёшн тайӆ. Аӆаӊсахат, аӆаӊ туп этӆ, ӆув вуш ёнтасты ӆуйӆ сый щащӆ.
Герман Наков ханшам потар
Авторы
Лух Авт
Темы