обновлено: 10:16, 15 октября 2026
Лух Авт
Монщ хорат ханшсат
Пулӊаватан уӆты ай няврэмат хатӆ сыс шавиты хотата, кашӊ емаӊ хатӆ кеша, мойӊ хоятат вохиӆыӆайт. Там щутщаты хатӆатан Ащет емаӊ хатӆ постаты питӆа. Щи хатӆ кеша ма «Росинка» нэмпи няврэмат хатӆ сыс шавиты хота яӊхсам.
Ванты, кашӊ ащи ӆув рупата, ӆув вер тайӆ. Хой сэвас тайман, хой няврэмат утаӆтыман, хой па хоятат яммаӆман леккара рупитаӆ. Ма па ханты ясӊаӊ айкеӆат ханшӆам па хорат верӆам. Ай няврэмат пиӆан рупитты нэ Надежда Константиновна Кондыгина (Макарова) щи ураӊна манэм вохсаӆӆы, ат ӆуӆан ма ӆувиӆаӆа каматса монщ монщсам па хорат ханшты утаӆтасӆам.
Глафира ай эвием «Хусыет» («Звёздочки») нэмпи группая яӊхаӆ. Ӆув пиӆэӆан яӊхты няврэмата кат ольпаӊ хораӊ нэпекӊан альсам па мойӆасам. «Мойпар па ай войие» па «Юраӊ шовар» эӆты монщӊан, ай похиет па эвиет, шеӊк олямман хуӆантсат. Щи юпийн няврэмат ханшты юхат ёша вусат па монщан хуӆантам войт хора ханшсат. Мет самаӊа мойпар нэпека оляптасат.
– Тамащ уйтантопса Ащет емаӊ хатӆ кеша муӊ веӆщи верыӆысув. Щи еӆпи, па емаӊ хатӆата, ащет ищи вохиӆысӆув. Туп ар пелак хоятат воӆаӊ няврэмӆаӆ хоща ёхтыӆыты ант кашащӆат, — Надежда Кондыгина ястас. — Хуӆантам няврэмӆам инщассаӆӆам па ӆув шеӊк самаӊа там уйтантопса эӆты потарты питсат. Верам хорӆаӆ иса яха акатсаӆӆам па вантапса ӆэщатсам. Тамащ уйтанопсайт шеӊк мосӆат. Ма нумастэман, тамиты, па няврэмат ащиӆаӆ ищи ёхтыӆыты па ощхуля ӆув рупатаеӆ эӆты потарты питӆат!
Иван Сандрин ханшам потар
