обновлено: 12:35, 23 октября 2026
Лух Авт
Хонсяпса эӆты хурыяты
Кашӊ сус округ хоятӆув грипп хонсяпсайн мушитӆат. Няврэмат па ун хоятат мушаӊа ант йиты ураӊан прививкайн верӆайт. Роспотребнадзор ясаӊ эӆты, кашӊ порайн моӆты яӆап хонсяпса нёӊхал этаӆ. Муй сирн кашитты порайн, нынан шавиты мосаӆ, ясаӊ версат.
Муй арат хоят там йисан мушаӊа йис
Хасям таӆан там порайн ар хоят кашаӊ ус. Тампуш антом шеӊк ар. Кашӊ таӆ вантӆа, артаӆаӆа, хонсяпсайӊ хоят шимаӆ уӆты ураӊан, муй верты мосаӆ. Там ӆапатан Овс мувеван ОРВИ хонсяпсайн 4 874 хоят мушаӊа йис — 3 574 няврэм, 1 300 ун хоят. Сит 18,6% шимаӆшак хасям ӆапат пиӆан артаӆаман.
Округев хуват ин кашӊ вошан, куртан прививочной кампанияйт рупитӆат. Там пора сыс 313 863 хоят уколан понты вутсиӆа: 213 260 ун хоята, 100 603 няврэма. Там хатӆатан 115 сёрс хоят портунан понтса. Леккар хоятат ястаӆат, портун ки понӆан, мушен кеншак манаӆ.
Хоты си муш ӆэрапты рахаӆ па кашаӊа ант йиты
ОРВИ па грипп хонсяпсайӊан хоятат ӆыӆ шув хуват кашаӊа йиӆат. Хун кашаӊ хоят хуӆӆыйӆ, няхтыйӆ па хоят пиӆан потрэмийӆ, йиӊк сэм нёӊхалӆаӆ ӆыӆ шув пиӆан ӆыӆӆаӆат. Хоӆна арсыр пормас хуват хойӆат. Си порайн, няврэмат, ун хоятат веншӆаӆ, сэмӆаӆ па нёӆӆаӆ кетамтэӆ порайн кашаӊа йиты верытӆат. Леккарат партапса хуват, ёшат лонсях пиӆан яма лёхитты мосаӆ, там йис уӆты антисептикатан нэрты, ар хоят кутан шимаӆшак уӆты.
Войт эӆты па кашаӊа йиты рахаӆ
Там йис порайн хоӆна унтан уӆты войт эӆты кашаӊа йиты рахаӆ. Хасям таӆатан ӆув артан хоятат хося этӆат. Хон мувеван Иркутской область хося чума муш ӆэрапса. Вой веӆпасӆаты хоятата си вер па вантман тайты мосаӆ. Мосятам вой нёхеӆ яма ӆэсятты па кавартты.
Альбина Тырлина ханшам потар
