обновлено: 06:00, 06 октября 2026
Лух Авт
Няӆъяӊ моӆтас таӆ хуӆ веӆпасӆыйӆ
Сусан ар пелак хуӆ веӆпасӆаты ёх ноптаӆман па сойпиман уӆӆат. Ӆорвош хуӆ веӆпасӆаты тахаята ӆуӊтасты хоятат там порайн хоӆна вар верӆат па питель понӆат. Там лопасан потрэм Владимир Петрович Сюртахов эӆты туӆэм.
Унтсыӆкуртан энмас па рупитас
Унтсыӆкуртан туп хуӆам хуӆ веӆпасӆаты хоят хасяс. Владимир Петрович няӆъяӊ моӆтас таӆ сита хуӆ веӆман ус. Ин пенсияйн уӆ, туп исипа хуӆ мосятты яӊхаӆ. Рупатайӆ эӆты ситы ястас: «Ин ма Ӆорвошан уӆӆам. Унтсыӆкуртан энампсам. Рутӆам хоӆ куртэван лоттаман уӆӆат. Ин апщеӊаӆам — Герман па Аркаша сита хасьсаӊан. Герман рыбака ӆуӊтасаӆ. Ас питаран хот тайӆам, аӊкем-асем сита усӊан, ма сита хуӆ веӆман уӆӆам. Семьяеван вет няврэм энмас. Яртъяӊ таӆ эӆты асема-аӊкема нётты питсам.
1977-1979-мет таӆӊанан Казахстан муван армияйн военной строителя усам, ударника ӆуӊтассам. «Ударник коммунистического труда» меваӆ посан юкантсайм.
Армия эӆты ёхатмем юпийн, мохты хуӆ веӆпасӆаты питсам, хутъяӊ таӆ унты рупитсам. Ин хоӆна хуӆ веӆты яӊхӆам, туп шимаӆшак. Хун верытӆам манӆам, тухаӆ порайн ант яӊхиӆыӆам. Таӆ-ӆуӊ иса хуӆ мосятман уӆӆам. Сусан ин ар пелак ноптаӆӆам. Таӆан, катра пора сирн, хуӆӆув мосятыӆыӆув. Каӆнаӊ лепан, пун, питель понӆув».
Хоттэӆ хоятӆаӆ
Владимир Петрович ийимеӆ Ирина Ивановна Тарымова. Уӆман сыс иса яха хуӆ веӆпасӆысӊан. Пенсияя манман порайн, 2020-мет таӆатан «Ветеран ЯНАО» нэман юкантсайӊан. Ишакты нэпекатан кашӊ ӆуӊ мийӆысайӊан. 2020-мет таӆ унты кашӊ таӆ планэӆ тэкаптысэӆ.
Ханты хоятэв катра хуӆ веӆпасӆаты уӆапсайӆ нумаӆмийс: «Ийимем Катравош эӆты. Сита уйтантысман. Си порайн муӊ энамты, каркам няврэмат, мотура ӆэӆапсув па манапсув. Кашӊ ӆуӊ Ӆорвош курт эӆты хуӆ веӆпасӆаты ёх Наӊк ям посӆа па Халэв пухра ноптаӆты пана китыӆысаюв. Си порайн, туп ӆуӊтасты панан ноптаӆты верытсан, па тахаята ант эсӆысайн. Туп Унтсыӆкурт эӆты яӊкем хоп Катравош пеӆа яӊхас.
Хуӆ ар ус. Планӆув тэкаптысув. Йи пуш ёваӆмиман, хуӆамсот киӆа хуӆ хойӆыйс, хопен тэӆаӊ. Тыӆась сыс яӊ-ветхосьяӊ тонна пишьян мийӆысув. Хуӆӆув ураӊан сохаптаты охатан «Вихрь» мотур ӆутты рахас. Яма рупитӆан, тыӆась сыс кат, хуӆам сёрасан сохаптаӆайн. Си порайн сит шеӊк ям охат усат. Аршак хуӆ уӆман, яма рупитӆан, таӆ сыс сютсиӆан. Тохеӆ ант па вантӆан. Си порайн хоӆна няши (уды) поныӆысув.
Ийимем пиӆан хуӆам няврэм энмаӆсаман. Уншак отӆув пиӆаӊӊан. Евгений ай похев ин СВО хося лялясаӆ. Контракт ханшӆтас, няӆмет таӆа йис, хоты сита уӆ».
Ӆуӊ сыс хуӆ веӆман уӆ
Владимир Петрович пиӆан потрэмиман, Анатолий ун похаӆ ликмас. Ӆув па ӆуӊ сыс хуӆ мосятман уӆ. Си вер эӆты ситы ястас: «Ма Ӆорвош ашкуӆайн катхосьяӊмет таӆ рупитӆам, инженера уӆӆам. Там йис модифицированной ашкуӆайт, антом катра сиран. Тут, хошам, вентиляция иса вантман тайты мосаӆ. Ӆуӊан договор хуват хуӆ веӆман уӆӆам.
Ма няврэм физкультурая утаӆтаты хоята Пулӊават вошан утаӆтысам. Сэмӆам вевтамат, леккаратан ант эсаӆсайм, сишан пуӊӆа мантсам. Социальной педагогика специальность хуват етшаптасам. Ма Татьяна опем пиӆан пиӆаӊӊан. Ӆув па ай няврэмат утаӆтыты нэӊа етшаптас. Куртаӊ ай няврэмат хатӆ сыс шавиты хотан воспитателя рупитаӆ.
Рупатая стаж ант тайман, нэмоӆты тахая ант вуйӆысайм. Канась пухаӆан музейн кат таӆкем экскурсовода рупитсам. Сяӆта ёхи йисам. Хуӆамӆэм таӆ хуӆ веӆман усам.
Ай уӆмем порайн хоӆна ун асем пиӆан хоӆап вантты яӊхсам. Там йисан хуӆ шимаӆ. Бензин норма хуват маӆа. Хуӆ веӆпасӆаты ёх яӊхты юшаӆ хув. Ӆуӊан рув порайн, хоӆап каматса пуш вантты мосаӆ. Сохаптаты охаӆ шимаӆ. Муй арат хасям яӊ таӆан хуӆаӆ маты тынаӆ ус, там хатаӆан си аратан иси хасяс».
Хуӆ веӆпасӆаты шеӊк ӆаварт. Энамты ёх симась ӆаварт рупатая ант кашасьӆат манты. Сохаптаты охаӆ па шимаӆ. Сикуш ун кусяйт веӆпасӆаты ёх пиӆан уйтантыӆат, потрэмиӆат. Кашӊ таӆ яӆап нётапсайт ӆэсятӆат, мосаӊ моӆты порайн рупитты ёх сохаптаты па хуӆӆаӆ маты охеӆ эӆатӆайт, уӆапсаеӆ кенашак па ямашак манты питаӆ.
Альбина Тырлина ханшам потар
