Лух Авт
Ащет емаӊ хатӆ
Тампуш Россия хон мувев ӆоватан Ащет емаӊ хатӆ ветмет пуш постаты питӆа. Мет оӆаӊан 2021-мет таӆан постаса. Щи ураӊна Владимир Путин нэман партапса ханшӆтас. Партапса щиран, кашӊ таӆ ай тахайт потты тыӆащан хуӆмет ӆапат ох хатаӆан щи хатӆ постаты.
Там емаӊ хатӆ нэман атэӆ емаӊ хатӆа верса. Ванты, няврэмӆаӆ нох пайтты ураӊна ащи ищи ар юр понаӆ. Щишан мосаӆ ащет эӆты ищи потарты, ям ясаӊан ястаты. Там потар шупан Афанасий Тимофеевич Лонгортов эӆты ӆунтаты. Ӆув ин СВО ляль харан мувев аратыйӆ. Ёӆан па ӆув хоттэӆ хоятӆаӆан ӆаваӆӆа.
Афанасий Лонгортов 2-мет хатӆ 1991-мет таӆан вуӆэӊ хоятат хоща сэма питас. Ай пора эӆты ащеӆ-антеӆ пиӆан, вуӆы тащат воштыман, Кев пеӆа касӆыйс. Юхат Овкуртаӊ ашкуӆа-интернатан ус па утаӆтыйс. Ийимеӆ пиӆан ищи щита уйтантас. Ашкуӆа пора эӆты иса яха ям номасан уӆӆаӊан. Ин няӆ няврэм энмаӆӆаӊан: кат эвие па кат похие.
– Интернет па телевизор эӆты ма айкеӆат вантты питсам, хоты аӆ уӆты хоятат паратӆайт, хоты яма уӆты ант маӆайт. Ӆув ищи рущ мувата ӆуӊтасман уӆӆат, ӆувиӆаӆ ищи шавиты мосӆат. Щишан ма номас понтсам ляль хара мувев аратыты манты. Тампуш хуӆам таӆа йис, хоты ма сапёр щира гвардейской мотострелковой бригадайн рупитӆам, — Афанасий Тимофеевич ястас. — Ма щита ай тохӆаӊ хопата тохты нёӆат ханаӆӆам па еӆӆы китӆаӆӆам. Мет оӆӊа Авдеевской коксохимической завод па Красноармейск вош аратысув. Щита ма ӆэщатам тохты нёӆэм американской танк М1 Abrams щах нох ущитсаӆӆы.
Яма, вещката рупитты ураӊна соӆтанэв няӆ меваӆ посан мойӆаптаса: «За отвагу», «За храбрость» 2 степени, «За боевые отличия» па «Георгиевский крест» 4 степени. Ёӆан ийимеӆан па няврэмӆаӆан шеӊк ӆаваӆӆа. Ин ӆув щутщаты эсаӆса. Ащет емаӊ хатӆ кеша ёхи ёхтас.
Иван Сандрин ханшам потар
Авторы
Лух Авт
Темы