Лух Авт
Касӆыты хоятата кеншак ураӊан
Там ӆапатан Аксарка вошан Законодательной Собрание Комитет еӊта пасан суран актащийс. Потар манас, хоты сахат факторияйт туӊа-щира уӆты ураӊан рупата туӊматты. Ин няӆ районан 23 факторий рупитаӆ. Таӆ сыс 320 тонна ӆэтот па мосты пормас тувман уса.
Там уйтантопсайн Кев сыӆ, Ямальской, Надымской па Тазовской район хоятат усат. Потар вуӆы тащат эӆты ищи манас. Аратаӆ тащат хоӆ портунан понман уӆӆат. Щи веран, хой нёхи тыныты ки сонтамаӆ, мосты нэпекат ёшан иса таяӆ.
«Муӊев мосаӆ антом туп факторияйт уӆапса шавиты, мосаӆ ямашак верты. Щит эӆты хоят уӆапса ӆойӆ. Кашӊ тахайн ӆуӆан, туп ям пормасат па ӆэтотат ат усат. Хоятата мосты отат туп ат тутӆысайт. Тынӆаӆ морткемат, шеӊк оха ант ат аӆмисайт. Касӆыман яӊхты хоятата там факторияйт онтасаӊ хара ат йисат», — Сергей Ямкин ястас.
Там хатӆатан нийӆ факторияйн Wi-Fi уӆ. Щи веран хоятат тохи ёхатман рутӆаӆ пиӆан потрэмиты, ох китты верытӆат. Хуӆамхощъяӊ факторий таӆ-ӆуӊ рупитаӆ, яӊ пора-порайн, хуӆам-яӊ тыӆащан таӆ сыс. Ӆув рупатаеӆ тащан яӊхты мохет юш эӆты ӆойӆ.
Камн хоят кашӊ факторияйн камн пуш уӆӆыйӆ, номас понтсат «Мурах» карта мохты артаӆыты. Щи веран ошаӊа йиӆ, муй арат пормас па ӆэтот кашӊ тахая тутӆыты мосаӆ. Кущаята партман уӆ, таӆ сыс каматса пуш касӆыты ёх ӆутасты харат вантыӆыты.
Вой леккар куща Евгений Попов ясаӊ ищи вуйӆыйс. Там таӆан сибирской язва эӆты 556 щёрас вуӆы портунан понман уӆӆа. Кев сыӆ районан 81 щёрас вуӆыйн аршака йис. Щи тумпийн бруцеллёз па финноз муш шимаӆшак этас.
Россия ӆоватан артаӆаман муӊ округев мет оӆаӊан RFID мохты вуӆэт ӆуӊатаӆ. Щимащ электронной чип онтасан тащ похла тайты кеншак. Таӆ сыс 132,5 щёрас вуӆыя пос понман уса. 2030-мет таӆ унты аратаӆ вуӆы тащ RFID-биркаяӊа верты нумасӆа. Ӆув ёра тащ тайты рупата хар, хуӆам таӆ сыс, няӆ пуша арашака йис. 431 хоят эӆты 921 хоята хойс. Щит шеӊк ям вер.
«Мет оӆаӊан мосаӆ ястаты, факторияйт усат па ин уӆӆат Овс мув шимӆаӊ мир хоятат уӆапса шавиты па еӆӆы туты ураӊан. Ӆув онтасэӆан касӆыты мохета кеншак. Ванты, ӆув щита ӆэтот па мосты пормас ӆутты верытӆат. Щи тумпийн, хащам таӆатан муӊ щий аратаӆ уӆапсая мосты вер ӆоӊаӆӆув, ӆув кутэӆан Госуслуги верат. Хоятат кутӆаӆан куртат па вошат хоща уӆты мохет пиӆан потрэматы верытты ураӊан связь туӊматӆув.
Округ ӆоватан факторияйт уӆты ураӊан рупата туӊа-щира манаӆ, муй веран нётты мосаӆ, муӊ иса вантман тайӆэв. Законодательной Собрание онтасан щи верат нумман па ванан тайӆайт. Мосты верат иса региональной закон щиран ӆоӊаӆӆайт. Моӆты ки мосты питаӆ, муӊ юр па щём понӆув факторияйт ямашак рупитты ураӊан», — Комитет куща Иван Сакал ястас.
Тамащ уйтантопсайт, хота Овс мув шимӆаӊ мир хоятат уӆапса кентатты ӆаӊхаӆа, шеӊк мосӆат. Нын ищи кашӊ пуш ясаӊ верыӆыяты, моӆты веран нётопса ки ӆаваӆӆаты. Нын уӆапсайн туп нын эӆтайн ӆойӆ.
Аллина Тоярова ханшам потар
Авторы
Лух Авт
Темы