обновлено: 11:50, 20 октября 2026
Лух Авт
Яха уӆты ветъяӊ таӆэӆ постасӊан
Хасям ӆапатан айкеӆан ёхатсаюв, Ӆорвош куртан уӆты ханты хоятӊан Валерий Карпович па Галина Ивановна Кельчинӊан 50-мет яха уӆты таӆэӆ постасӊан.
Емаӊ хатӆэӆан куртаӊ куся нэ Мария Михайловна Истомина ёхтыӆыйс, мойӆапса ясаӊ ӆуӊтас па хоятӊаӆаӆ мойӆаптасӆы. Си еӆпийн, Ӆорвош район куся ху Олег Попов ёхтыӆымаӆан, округ куся китам ишакты нэпекан ханты хоятӊан юкантсаӆӆы.
Хасям таӆан ай тахайт потты тыӆась хусмет хатаӆан Валерий Карпович 70-мет таӆаӆ постас. Тампуш си хатаӆан рут хоятӆаӆ, ӆухасӆаӆ яха ёхтыӆысат, пасан суран актасьман, емаӊ хатӆэӆ па яха уӆты таӆӆаӆ кеша ям ясаӊан ястыӆысайӊан па мойӆапсайн мойӆысайӊан. Хойтат па телефон хуват ясаӊ китсат.
Округ кусяев мойӆапса ясаӊан ситы ястас: «Ветъяӊ таӆ — сит яха уӆты таӆат, ияха манты юш па верты верат, пиӆэна кашӊ хатӆ верты нётопса. Си арат таӆ яха уӆман, щунь па шук яха усӊан. Еӆӆы пеӆа, нынан хуӆантман па шавиман таятан, кашӊ хатӆ хошам па амат ат туӆ».
Ин Валерий Карпович па Галина Ивановна пенсияйн уӆӆаӊан. Ӆорвошан уйтантысӊан, уӆман сыс энмам куртэӆан усӊан па рупитсаӊан. Валерий Карпович Тюменской область Заводоуковск вошан тракториста утаӆтыты етшамаӆ юпийн, ар таӆ тракториста па дизелиста куртаӆан рупитас. Горковской рыбозаводан хуӆ веӆман ус, ӆашкупан рупитас.
Галина Ивановна ашкуӆа етшамаӆ юпийн, Пулӊавта леккар нётты нэӊа утаӆтыты маныӆыйс, ант етшаптас. Сяӆта Владимирской область Собинка вошан сохам верты нэӊа утаӆтыйс. Уӆты ёхи ёхтас. Рупата ант тайман, рыбозаводан ӆуӊ порайн приёмщика ус. Си юпийн, утхотан кассира ар таӆ рупитас, сяӆта па соцзащитайн. Ветъяӊ таӆан пенсияя манас, пиӆ хоятаӆ пиӆан хиӆэӆ энмаӆсаӊан. Си тумпийн, ханты нэӊиев ханты арыты группайн арыйс, касты тахаятан касас, спартакиадаята район па округ хуват яӊхиӆыйс.
Ханты хоятӊаӆув «Ветеран Ямала» нэм тайӆаӊан, ударника усӊан, уӆман сыс арсыр мойӆапса нэпекатан юкантыӆысайӊан.
Ма па рут хоятӊаӆам, сам эӆты манты мет ям ясаӊан ястаӆӆам. Тумтака уӆатан, ван хоятӆанан шавиман па вантман ат тайӆайты. Тумтак ёш, тумтак кур! Ойӊа-пищаӊа, йисаӊа-нуптаӊа!
Альбина Тырлина ханшам потар
