обновлено: 13:22, 19 октября 2026
Лух Авт
Кев вуншты пора ванамас
Щёхар тыӆащ кутап хатӆатан Мужевской совхоз няӆмет тащ мойӊ хоятатан ёхтыӆысайт. Уйтантыты еӆпийн, мохет потарты хошап хуват ӆув кутэӆан потрэмисат. Тащан уӆты ёх, муй тахайн уӆӆат па вош эӆты йиты хоятӆаӆ, муй мув сыӆ унты ёхатты верытӆат, щит ӆэрапсэӆ.
Манты хатӆ ёхтаман, Эдуард Ильич Лонгортов Лидия Иосифовна ийимеӆ пиӆан Овкурт эӆты Мужи воша ёхатсаӊан. Щиӆта ай киӆэӆ Алексей Тургачёв Федя похаӆ пиӆан, аэролодка хопа ӆэӆтассат па аӆаӊсахат, нийӆ щёс кеман, Кев пеӆа нёхӆасат.
Там йисан камн хорпи мелак тахайт хуват яӊхты хопат па сора манты юраӊ мотурат верӆайт. Кеваӊ ёхан хуват манман, щутщаты ӆойӆыман ин мохет хатӆ кутапан Кев лепа ёхатсат. Манам юшеӆ хут щёса хойс. Тут аӆсат, шай каварсат. Щёс шуп хащас па няӆмет вуӆы тащ мохет онасӆаӆ пиӆан касаӆман ин ястам тахая тохи ёхатсат.
Еӆпи Эдуард Ильич па Лидия Иосифовна ищи тащ хотан касаӆман яӊхсаӊан. Хольмаӊ моӆтаскем таӆ Мужевской совхозан рупитсаӊан. Ин пенсияя манман юпийн, Овкуртан уӆӆаӊан. Хоръер курта яӊхӆаӊан. Щита паварт хотые омассаӊан. Хуӆ веӆпасӆаман па вонщапса акатман щита уӆӆыӆӊан. Тащ шавиман Роман па Эдуард похӊаӆан рупитӆаӊан.
Няӆмет бригадайн иса Лонгортов айӆат ёх рупитӆат. Арсыр хоттэӆ мохет, ханты щиран, кутӆаӆан ищи па, яйт па апщет. Бригадира Вячеслав Антонович рупитаӆ.
Хар тахайн уӆты утӆам ун хоятӊан, куртан уӆман ищи па марэмаӆайӊан. Хун ай киӆэӆан Кева яӊхты вохсайӊан, мохты кашащсаӊан. Юш альты, еӆпи касӆыман яӊхам мувӆан вантты па няврэмӆана нётты.
Манам хатӆэӆ хошам, найӊ па ӆарпа ус. Щимащ хатаӆан мантыйн, юш кутаӆ па ван. Оӆаӊ пуш Кев муват вантам пох Федя Тургачёв яӊхам юшаӆ эӆты еша потартас:
«Ма ащем пиӆан оӆаӊ пуш там муват пеӆа мантсам. Товийн ӆутам яӆап хопа ӆэӆсув. Ащем рут муваӆ Саранпауль. Айшак уӆмеман, ащикем, антимем, ай имаем па антем-ащем пиӆан щи муватан уӆты Кев ӆоӊӆата яӊхсув. Щита Кев вурамат унты вахтовка машинайн тутӆысаюв. Муват вантман яӊхты хоятат кеша щутщаты харат ӆэщатман уӆӆат. Тата щимащ юшат па ӆэщатам тахайт антомат. Мелак таха хуват манты хоп ант тайсув ки, там муват унты ант мантсув ӆуӆан.
Лида имаем пиӆан юшан манты каш. Ӆув иса ястаӆ, маты таха, муй нэм тайӆ. Катра порайн хота яӊхсат па усат. Уйтантты тахайн шай йинщтэв кут вуӆы тащ этмас. Ӆуӊ порайӊ похла актам вуӆы тащ ма хоӆна ант вантысам. Мет оӆӊа еша паӆтамасам. Там йис кинайн щи альӆа: «Лакки ӆарпиӆаман, наӊ ещаӆтэн накӆат хоятат (паӆтап войт) шушӆат». Сэм еӆпеман ищи щимащ хор этас. Юхат онасат ванамасат па хоятат, няврэмат тур сыйт щащты питсат. Муӊ хоӆыена аматсув. Рут хоятӆув хоща ещаӆ шушмасув.
Хуӆам хатӆ сора хащас. Щита ма ащем па аспохӆам пиӆан тащ ӆаваӆты яӊхсув. Оӆаӊ пуш ӆоӆ нёхи па мохаӆ ӆэсам. Ащем ӆув сэмаӆан ант вантас ки, ант эвӆас ӆуӆан.
Ёхатмеван, ашкуӆа няврэмат хоӆна ант тувамат. Тохӆаӊ хоп китыӆыйм порайн, тащ хот ант уйтса. Щиты утаӆтаты верат туты куща ёх муӊ хорпев хоп митаӆысат па муӊ уӆман ашкуӆа няврэмат акатсайт па воша тусайт.
Хун ащем пиӆан ёхӆы пеӆа актащты питсаман, Маша аспох аньхем мин пиӆэман воша йис. Лида имаем па Эрик акаем щита хащсаӊан. Ӆын тащ хот мохет пиӆан иуӆты Щаня ёхан пеӆа касаӆман манӆаӊан. Яӆпа таӆ порайн туп яха уйтантӆув. Муӊ па хопан ёхӆы пеӆа мантсув.
Яӊхам мувев шеӊк хорамаӊ. Манман иса хор вусам па нёхты хор ханшсам. Юхат ащеман вантты щира ӆэщатса па щёс шуп арат манты кина тыйс. Ёӆан аӊкем па апщиӆам муӊев ӆавӆасман усат».
Зоя Куртямова ханшам потар
