обновлено: 06:04, 29 июля 2026
Лух Авт
Мурах акатты пора
Хошам па ертаӊ хатӆат уӆам онтасан унтан ӆэвпасат яма энамӆат. Мет оӆӊа мурах акатты пора ёхатаӆ. Ин ты «Ӆух Авт» газет ӆуӊатты хоятат хорат понӆув. Унта яӊхтыйн, ищи хор верыӆыяты па муӊев китыӆыяты.
Время для чтения ~ 2 минуты
Тампуш ӆуӊев ёлах хатӆат пиӆан ёхтас. Щаӆта па, щи юпийн муй арат вотаӊ хатӆат усат. Туп уйт ӆор тыӆащан веӆщи хошам хатӆат ёхатсат. Хойтат ястаӆат анта хошам, руваӊ хатӆат. Щи ям найӊ хатӆат ёхтам юпийн унтатан лыптат яма энамты питсат.
Лыптат похантсат па унтэв мет хорамаӊа ювмаӆ. Щи кут хоятат ӆаваӆӆат хун вонщамот акатты пора ёхатаӆ. Мет олаӊан мурах вонщапса пошаӆ.
Мурах — щит мет хорам па эпӆаӊ рых. Хоятатан ӆув шеӊк самаӊа тайӆа. Туп мурах акатты кен антом. Ар юр понты мосаӆ. Рув кутан нюрмат, сотаят па варсаӊ соймат кутан шушиӆыты мосаӆ. Щи тумпийн пирмат, пеӆӊайт па нипируват тэӆыя. Хоят ёхи ӆэты утщиӆэӆ. Мурах акатты кутаӆ ван, кум ант шитсан ки — пора хащас.
Щишан щи ар юр понман актам рых, шеӊк эпӆаӊа айӆӆа па самаӊа тайӆа!
