обновлено: 04:46, 24 июля 2023
Няръяна Ӈэрм
Ӈаԓка фестиваль Гран-при няамӈа
Шушенское нимита каԓтыхина ӈаԓка международный’ «Мир Сибири» мэӈаш’’. Чет’ дяԓяӈ дямпан шеcв дю’’ шеcв дёнаԓ’’кат ва’та хампԓяӈк дюԓ’’ неша’’ фестивалян ӈомаш’’. Ӈука тэмс неша’’, шанат дяхат мэна’’, конкурсан тоӈаш’’. Маня’’ Пуровский районхатна Таисья Музыкантова фестивальхана канӈаш. Таисья Апнавна хайтуԓани’’, каԓитуӈ ӈутаханатуӈ ӈамыдю’’ шеԓтапёчи’’ поӈкна мянаԓяш’’. Номинацихина «Современное декоративное прикладное творчество» шеԓтамайта ӈамыкута’’ ӈычимчеӈаш. Мянаԓьчи’’ поӈкна Таисья Апнавна фестиваль ӈаԓка мячисым’ — Гран-при няамӈа.
Время для чтения ~ 2 минуты
Таӈок нешаӈ тэмс’’ поӈкна мянаԓма неньшаԓ ниӈа. Куԓкаԓи’’ пимшата’’ фестивальхана тадямэмай’’. Наԓаняна манԓе чики конкурс’ чепьӈаш, неԓьчеэй шича дёнаԓ’’ ӈок шанат’’ тэмс’’ неша’’ чикехана мянаԓяш’’. Чикидю’’ поӈкат шича’дяӈкня мянаԓтыԓи’’ фестиваль финалан тэвдяташ’’.
Фестивальхана Таисья Музыкантова дилмта вачамамта, куше мякнанта ӈайваш мансԓамамта таттамата видеоролик ӈычимчеӈаш. Каԓьта хятмайта меԓь паны’’, пема’’, ӈай ӈыди нянанта конкурсан пэмыта ӈамыкута’’ ӈычимчеӈаш. Шеԓтамайта’’ ӈамыкута’’ манысаԓмы’’ маньшту’’: «Хятмайта’’ паныдёта’’, пемита’’, паткута’’ дёԓьше меԓят’’». Конкурсхана дятэԓьш шита не’’ нюхудёта’’ Анна, Любовь нятапихиньш’. Фестивальхана мэмантуӈ дямпан пычи’’ пон немяньч’ кэвхана мэӈаханьш’.Таисья Апнавна тамна нюча’ӈэ хайтуԓаш тохомы’’. Ӈамыԓи ӈамым’ хятпёпта дёԓьше меԓьмана шеԓташтута.
Таисья Апнавна дилта дямпан мансԓамы. Вcконта Иосиф Леонидович няӈ «Верхне-Пуровский» совхозхана ты’’ падеԓьш мансԓаӈаханьш’. Чикиӈ камна Таисья Апнавна хома каԓитанаӈэ, каньдянаӈэ путахана камаштуш. Куптаӈ, хомана мансԓаманта де’эмня куԓкаԓи’’ патԓота’’ веԓву’’ мимы’’ тадя’’, пыта ветеран’ Ямала. Четаӈ вcкуӈ няӈ нич’ пэньш пон выӈкай мякач’ кcштухуӈ’. Ничи’’, нич’’ нюуди’’ куԓкаԓи’’ ӈамыдю’’ шеԓтапёшь тохоԓаштуч’. Нич’’ чупей меԓят’’, куԓкаԓи’’ ӈамыдю’’ шеԓташту’’.
Таисия Музыкантова таньше мянаԓьш неԓьчеэй нэхэԓмата ниӈа. Чуки фестиваль неԓьня мята чеԓ’’ няш шанат мянаԓьш мэта’’ конкурсхана нэхэԓьштуш.
Автор: Лариса Айваседо
