Сидяӈг: Марина Ярʼ тадтавы

<div class="content-lead">Хусувэй ты пэртя ӈэдалёбˮнанда хэвхананда тынзяда ӈэсеты. Хойхана мюсертахана — ямб ӈудада. Тарабˮнанда тэдамда яркаӈгу.</div>Ӈамгэʼ тэхэˮнаˮ мэна хибяриʼ еˮэмня сямяндʼ таранада? Тикымʼ округнаˮ музейхана манзаранаˮ «Дневник знатного оленевода» проектхана вадеˮӈадоʼ.Тынзяʼ — ямб, няхарˮ юˮ метрʼ пирˮ мэё иня. Яӈга нялиртавы хобахад паӈгалпада, ханяӈэхэна ненэцяˮ явʼ сармикˮ хоба пэрцетыˮ. Вармда лэхэд мадавы сармикахана мэйрасетыдоʼ, тикахана моепавандоʼ мальӈгана мярадоʼ ӈобʼ пирувна маˮламбаӈгудоʼ.Тынзямʼ паӈгалпава — хасаваʼ манзая. Наӈэдя ӈарка тыʼ хобахад сертабада, ӈобкарт сикоцяда яӈгода. Нердеʼ итʼ паклеӈгудоʼ, тимдеӈгудоʼ, тареда хаˮавраӈгуˮ, тырабтаӈгудоʼ, юркана масартадоʼ, пунаʼ сомбоковна пиделтадоʼ. Варувнанда сюртесь ӈобʼ пирˮ инякоʼ тотревʼ матортадоʼ, ямб иняӈэ сертаӈгудоʼ, хархана вэнтадоʼ, сарёрка яляхана хольцоʼ тяхаʼ ӈэдараӈгудоʼ, нюлкэцяӈэ сертаӈгудоʼ. Тет янʼ ӈобˮ пирувна матортадоʼ. Хусувэй инякоʼ маланʼ пякоцямʼ мэйраӈгуˮ. Валакада тикахад тет хамадавы инякоход тынзямʼ паӈгалтаˮ. Хусувэй ӈамгэмʼ сававна сертабˮ, салмуй, сюртяв тынзяʼ ӈадимда. Мэё ӈэбˮнанда, манзаяхана сероˮта.Ярколава — ӈаниʼ ӈарка серˮ, тарця серкана теневанаˮ ненэцие савуцетыдоʼ. Сидя ӈудахананда ӈобˮ пирувна тынзямʼ моепадамʼ — саць мэбетаӈэ нюмдебасетыдоʼ. Тарця серкана ӈобкартʼ ты пэртя выдарабˮнанда ни тараˮ. Яркола нюдоʼ хэвханандоʼ нюдякоӈэ тохоламбсетыдоʼ. Хойхана вадюданаˮ ӈацекыˮ сямянд харвабтана сянаковадоʼ — тюрмʼ яркыбава. Таремʼ сянакось, мэбета, ныхыта, сермʼ теневана хибяриӈэ хэсетыˮ.Манзаяхана мэтари ни ӈаˮ, хасавамʼ лэтамбадаӈэ таславы. Ненэциеˮ илʼ ватовна, яʼ ниня юседана тынзямʼ нехэна еӈгалпа ни серосˮ. Еӈгалпата, хасавада ныхымда ётаˮ. Тэри юседабˮнанда ни тараˮ, мякана, пихина яӈга яда танясеты. Тикахад ӈопой ӈудахаˮ торумы, ӈадьбянда хариˮ тынзямʼ ӈаниˮ ӈудахаˮ мипат, хане ябамд ётан.Округнаˮ музейхана ненэциеˮ иламʼ манэˮлабтамбава коллекцияхана самляӈг тынзядоʼ, маняˮ янаˮ хойхад тэвравыˮ. Хусувэдоʼ ӈавнанда выӈгана тэхэˮна мэˮмы.Юлия Талееваʼ тадтавы

Тынзяʼ – тарана ӈамгэ

Таттама: Лариса Айваседо таттамы

<div class="content-lead">Чуки похона Ягельхана шеэвдюˮ хампԓяӈк командахатˮ четʼдюˮ ӈоптоӈ пиԓи хаʼта, шеʼэмна «Таежный герой» нимиʼта мянаԓмахана пытатуӈ конуԓпишˮ.</div>Чикехена нэхэмтуӈ, нюӈк ӈаймямтуӈ конуԓпёшь шанат тэмс нешаˮ куԓкаԓиˮ ӈамэхӭнаˮ мянаԓяшˮ. Чикидю поӈкна Ӈэԓмʼ чеԓˮ нешаˮ ӈупчики тадямэӈашˮ. Каԓпюԓкана диԓина ненаˮ няхаԓ командам шеԓтаӈаш: «Харвэй», «Росинка», «Харампур», Каԓясамэхэт мэнаˮ команда «Тынзян» нимиʼӈаш.Чикиӈ камна Самбуԓкахат томыˮ мянаԓтаˮ тадямэӈашˮ, Тазовский районхат мэна нешаˮ. Ӈуп командахана четʼӈӭ мянаԓяшˮ — шича ни, шича каса. Мянаԓтаˮ шуԓпяш матапёмытуӈ ӈуˮтуӈ куны 1,5 километраӈ дёԓьшаш. Чики ӈуˮумнантуӈ миньш ӈопшеԓ четʼдяӈкня хаʼта, шеʼэмна этапʼ конуԓяшˮ. Таньше мянаԓма неньшаԓ ниӈа.Таежный геройхана шаӈкмян этаптоӈ неньшаԓмана матанана нишӈа. Мянаԓтаˮ неша ненаˮ шаӈкмян шехеԓайтуӈ мюня компючетуӈ хаʼта ӈамыдё ӈуп вин камоԓьш маташтутоньш. Таԓям ӈуп нэхэм мэʼши таӈок мянаԓчиˮ поӈкна дёԓьше хомана нюӈкмана мянаԓяшˮ. Таежный геройхана ӈайвахай местам «Неудержимые» канаӈатуӈ.Маняˮ Ӈэԓмʼ чеԓˮ нешайнаˮ командаˮ ӈупчики хомана нюӈкмана мянаԓяшˮ. Мянаԓма дяԓям хома шоньшахана мэӈатоньшˮ. Пуӈчена ӈай мэмятаˮ, пиԓи хаʼтаˮ, нюӈк нешаˮ поӈкнатуӈ Таежный геройхана мянаԓмантуӈ мэты Ягелян ӈомтыˮ.Лариса Айваседо патмы

Хаʼта, шеʼэмна мянаԓма

<div class="content-lead">Куԓкаԓиˮ хома, вильта ӈамыˮ тадяӈашˮ. Пюԓ дяханана ӈашки нешайˮ дет ӈайта «Ягель» нимиʼта фестиваль мэʼӈашˮ. Поӈкнатуӈ мянаԓмантуӈ мэты Таԓкан шанат дяхат мэнаˮ, шаӈкмян тэмс нешаˮ тоӈашˮ. Чуки похона «Ягель» хампԓяӈк пота кадя.</div>Чики фестивали няхаԓ дяԓяӈ дямпан миньдяш. Каԓват камшуна, пяˮ поӈкна мэӈатоньш. Ненэй мятˮ, палаткаˮ ӈаԓка дямп ӈысытаԓям диньдяайӈ помна вэнаԓышˮ. Таньняӈ кӭймян хаʼтаˮ автобусханаˮ кӭштуш, таԓьша машенʼканыˮ няхаԓ дяԓяӈ дямпан дятыԓяшˮ. Шанат тэмс нешаˮ мятчеԓсамыӈ ныптакомантуӈ мэты фестивалян тоӈашˮ. Шеэв дюˮ хампԓяӈк командаˮ, ӈуп дёнаԓкат ваʼтаˮ участникˮ.Маняˮ Ӈэԓмʼ чеԓˮ неша ненаˮ ӈупчики мянаԓяшˮ. Ягельхана ныптакомантуӈ мэты таньняӈ ӈопшеԓ дюˮ дёнаԓкат ваʼтаˮ нешаˮ тоӈашˮ. Хомана нешайˮ ныптакомаӈ мэты куԓкаԓиˮ мероприятииˮ шеԓтаӈашˮ. Шаӈкмян организацииˮ, учрежденииˮ нятакушˮ. Таԓьша мянаԓма «Квартирник в лесу», «У нас это семейное», «НестандАРТ» нимиʼта этнофестиваль шанат тэмс нешайˮ вин каʼамдяташˮ.Чуки похона ӈашки нешайˮ дет ӈайта ныптакома дяԓя дёԓьше хомаш, вильӈаш. Няхаԓ дяԓяӈ дямпан мянаԓтаˮ командаˮ нэхэмтуӈ, нюӈк ӈаймямтуӈ конуԓпишˮ. Мянаԓтаˮ поӈкнатуӈ мянаԓмаӈ мэтыˮ куԓкаԓиˮ вильтаˮ конкурсуˮ, шанат площадкиˮ шеԓтаӈашˮ.<div class="content-new-image"><img alt="pic" src="https://storage.yandexcloud.net/ym-sites-static/14f61de1-811.webp" style="width:100%" height="1440" width="2560"/><div class="content-image_child"></div></div>Фестивальхана шанат выставкиˮ шеԓтаӈашˮ, куԓкаԓи вильтаˮ, хома мастер — классуˮ ӈычимчеӈашˮ, Ӈэԓмʼ чеԓˮ нешайˮ диливсум ӈычимчемпютаˮ ненэй мятуˮ меӈашˮ. Чуки похона Ягелян мячидёԓьш Кагалымхат, «Юты капияха» нимиʼта ӈысыхат мэнаˮ нешаˮ ненаˮ тоӈашˮ. Пыʼтоӈ фестивальхана ненэй мят меӈашˮ, нешадиˮ, капидиˮ дилм ӈычимчимпишˮ. Выӈкай дилхана мансԓаш мэтаˮ куԓкаԓи миԓвиˮ тамайˮ, паныдюˮ, ӈай ӈыдиˮ ненэй дилант таԓанаˮ ӈамыкуˮ. Чуки похона Ягельхана «Росмолодёжь.Гранты» нимиʼта мянаԓмахана шеэвдюˮ ӈуп нешаˮ патмайтуӈ проектуӈ ӈычимчеӈашˮ. Таньше мянаԓмыˮ поӈкна маняˮ Пуровскийʼ районхатна мэнаˮ ненаˮ тадямэӈашˮ.Фестивальхана мэмыˮ нешаˮ маньшту, таԓьша мероприятииʼ ӈашки нешаӈкнаˮ, ӈаԓтанаˮ ӈашкӭхенаˮ таԓа. Поӈкнатуӈ мянаԓьш шанаʼкоштуˮ, наӈича каԓтыхит томыˮ нетуӈ коштуˮ, шанат тэмс нешадиˮ манэштуˮ. Ягелян томы нешаˮ няхаԓ дяԓяӈ дямпан фестивальхана куԓкаԓиˮ маныӈаˮ, хомана ныптакуˮ.Лариса Айваседо патмы

Дёԓьше хомаш, вильӈаш

Сидяӈг: Анна Яптикʼ тадтавы

<div class="content-lead">Хэвы ирынаˮ пудана ныланаваʼ яляхана «Полярный круг» нюбета пирдырма ӈась. Тевʼ ёльцяӈгана хусувэй поʼ сертабасетыдоʼ, тедаʼ сибимдейʼ мэваʼ маˮлюрӈаць. Ӈокханда ёнарˮ няхарˮ юрˮ ненэцясь. Харадʼ терˮ мядʼ терсавэйʼ пинʼ тарпыдаць.</div>Ненэциеˮ мандалˮ поӈгана ӈацекыˮ, илебейˮ няби ӈармыˮ ненэцяˮ таняць. Тохолкодаˮ ӈэдакыˮ, ӈацекэхэˮна манзаранаˮ, тамна ӈаниˮ тодоˮ организацияхат ӈэдаˮ — малʼ тикахана мэць. Ӈэрмʼ терхав ӈулиˮ ӈокась. Ханяӈыˮ Хоˮ яʼ саляʼ, Яр-Саляʼ, Сёяхаʼ няд товыць. Сюрбертаˮ нинаˮ маниенаӈэ сарюнаˮ помна нинаˮ ӈатейнаць.Нитоʼ нерня 500 метраʼ хунатʼ мэнаˮ хаяць. Няхатата мерʼ хасава ӈацекэця тось. Пудандоʼ 3 километрʼ хунатʼ сюрамбыдаць. Хасавахат нита нерня Хоˮ яʼ саляʼ тер Роман Талеев ӈадимясь (миманда ёльцьʼ — 0:11:43). Нехэт Харпʼ тер юкад вата тет пота не ӈацекы мереˮӈась (миманда ёльцьʼ — 0:13:36). Нябимдейӈэ Хальмерˮ Седеˮэхэд ӈэда Ксения Тэсида тэвыць (миманда ёльцьʼ — 0:13:44). Сюрамбаˮманда пуд таремʼ мась:— Тасуʼ яʼ няд няхарˮӈэ товаць. Нянани товы няхаюни Антон Сэротэтто няби Екатерина Тэсида. Антон юˮ километрмʼ мэванзь мэ. Екатерина — сидя юˮ ӈопоймʼ. Сюрамбабˮ, ӈулиˮ тоенась. Тарця сарю нумгана ёльце тецись. Идеˮнаˮ тялнариˮ хаюрӈаць, сехэрэваˮ садаӈэ хаясь. Сюрберкава мань ӈобӈгэвʼ ханцетыдмʼ. Тюку пирдырмаʼ нямна хусувэхэт сёбарˮ няхаюˮни няд намдадамзь. Неноховавна сюрберць пэˮмами похорт яӈгу, тандаяркаʼ пэйваць. Нюртеˮэʼ тоенасеты, тедахавʼ тохолана тоˮолхав. Мале ӈока пирдырмахана мэдамзь: Новой Уренгойхана ӈэвы «Забег.РФ» няби «Зелёный марафон», Новой Уренгойʼ няна няби Харпхана мимы «Северный характер». Нерняʼ хаˮмороˮмини таняна ӈаниʼ таняˮ. Сюрбермаʼ хавна ӈэрмʼ терˮ сянакубцˮ тэнз минредмʼ. Сёбарˮ иламʼ школахана тохолковани мальӈгана пявась. Пуна ӈарка харданʼ тохолкованзь хэвани серʼ тикы серˮми малевась. Тедаʼ «Дом творчества» мякана манзара, ӈацекы «конструирование»мʼ няби «моделированием»ʼ нюбета серкʼ няʼ тохоламба пявани серʼ ӈаниʼ сюрберць таславась.Няхарˮ километраʼ хунатʼ ханˮмыˮ нитоʼ пуд 10 няби 21,1 километраʼ пиртʼ пыхыдадоʼ падвы хаӈаць. Ксения сюрамбаванда няхаюта няна хаясь. Антон няби Екатерина нитиʼ поӈгана нуӈаханзь, тарензидиʼ тэри саваць, хамэдыхынзь. Пыдиʼ торомбэйхаʼ, ваˮлёй сёбаркʼ. Хэвханандиʼ сидтиʼ тоˮолхаˮ нидиʼ нуць. Хусувэйдоʼ варемда мэˮманзь, ныхымда манэˮлабтаванзь товы. Поӈганандоʼ Ямалнаˮ тодоˮ хардахат ӈэдаˮ сёбарˮ ӈулиˮ ӈокаць. Россиянаˮ ӈаниˮ хардахат ӈэдаˮ ӈаниʼ таняць.Мале понʼ нуˮмахаданаˮ 10 километраʼ хунатʼ сюрамбадаˮ ӈадибелыдаць. Нябимдейӈэ Паютеˮэʼ тер Антон Сэротэтто тэвыць (миманда ёльцьʼ — 0:31:44). Нехэт няхаромдэйӈэ Хоˮ яʼ саляʼ няд ядэрта Мария Худяʼ тось (миманда ёльцьʼ –0: 43:24). Нитоʼ пуд сямянхат понʼ сюрамбавыˮ ӈадиберць пэйдаць. Няхатата мерета хасава Новосибирскʼ няд ӈа. Нехэт — Сыктывкар. Ненэй ненэцяӈгат Хальмерˮ Седеˮэʼ тер Екатерина Тэсида матдомдэясь. Сидндетимдейӈэ тэвавы ненэцяʼ ӈэсондʼ ӈудаʼ терхана, есяхана митерпидонзь. Нюртейӈэ тэвавэхэʼ 100 ёнарˮмана няˮамӈаханзь. Сидндетимдейӈэ товэхэʼ 55 ёнарˮ есяˮамна недвоˮӈаханзь.Сиддоʼ ӈопой сава серˮ маˮла — харвабтана сюрберма сертоʼ. Ӈобтʼ маˮлёваханандоʼ мэбеˮмамдоʼ, ӈобнзерˮ ӈэвамдоʼ манэˮлабтамбиˮ. Тюку минрена сертоʼ Ямалхананаˮ Сензувна илеваʼ поʼ, Россиянаˮ тиӈгывна Ӈобˮ няюʼ нятва поʼ, округнаˮ ӈэвахана мэна ерванаˮ «Ни дня без движения» акция едʼ ӈа. Пыхыдадоʼ сензумдамбвандоʼ хавна нядаӈгуˮ. Ӈаркаˮ ненэцяˮ сюрбермандоʼ няюʼ есямʼ мипиць. Есьдоʼ хаӈгурта ӈацекы нядабаваʼ няю серода минрена «Ямине» фонданʼ ӈэдарэйдонзь.Анна Яптикʼ падвы

Хартоʼ ваˮлёйˮ ӈэсетыˮ

Сидяӈг: Роман Ищенкоʼ тадтавы

<div class="content-lead">Пилюˮ ирыʼ пуняӈы яляхаˮна Тазовский районʼ ӈэвахана мэна Виктор Югай мюсертаˮ ненэцяӈгˮ тэвормы. Ӈобнзерˮ ӈэвандаˮ серотоʼ нямна тасалковыˮ, хойʼ терˮ илаʼ няюʼ таранаˮ нядˮми вадеˮмы.</div>Тасуʼ яʼ ӈэвахана мэнадоʼ марцьхыˮ нита няʼ минренаˮ серотоʼ серʼ мюсертаˮ ненэциетоʼ нямна ядэрмы. Танянандоʼ СПК «Тазовский» манзаранаˮ, ӈаниˮ тыˮ пэртяˮ, хартоʼ илениˮ ӈысыˮ тер хомбвыˮ. Ненэциеˮ мюсьлаваˮ ёˮ нямна, тытоʼ хадылаваˮ яʼ нямна лаханакурмыˮ. Ӈэрёʼ няӈы ӈэванда хабартаваʼ серо вадеˮӈаць. Таняӈы яхана хэвы ядембада тандоʼ тыˮ сававна мадавэдоʼ. Ӈадьбята хабартаӈговаʼ мальӈгана ӈамзитоʼ планмʼ ёльцевэндоʼ пирувна ӈыдаванзь тасламбидоʼ.Илаӈгана хуркариˮ ӈадибертаˮ серˮ ханяӈэхэˮна таʼ минʼ таславаˮ тоˮолхаˮ нисетыˮ ӈаˮ. Тиканда ервандоʼ марцьхыˮ мюсертаˮ ненэциеʼ вадеˮмыˮ падартʼ падыбидоʼ. Тад пуна намдавыˮ серо тидхалеˮмахадандоʼ хусувэй хойʼ теранʼ етя таслахая вадетыдоʼ.Ервандоʼ вадавна, хойʼ терˮ ненэциеˮ ӈысывна ӈэдалёрма хуркариˮ ӈадибертаˮ серо нензелабтамбавахана сава. Хусувэй намдавэваˮ таслаˮмахаданаˮ мюсертаˮ нинаˮ илмʼ сибилемба мэˮӈаваˮ.Миндя похона пудана ядэрмадоʼ ни ӈа, тамна халямʼ пэртиˮ ненэциетоʼ нямна ӈэдалёрманзь пэрӈаˮ.Нюдяне Махакуйʼ падвы

Мюсертаˮ ненэцяӈгˮ тэвормы

Нареʼ терˮ школахана тюку поʼ самляӈг нюдя ӈацекы тохолкованзь товы''

<div class="content-lead">Пилюˮ ирываˮ ваера. Тедаʼ ӈэрёйˮ нувонаˮ тоˮ. Ӈэрё товаʼ серʼ тохолковаʼ ёльцьӈэ хая. Выӈгана илена ӈацекы мале маˮлэйдонзь. Ядембадаˮ яхаˮ ханˮмыˮ ӈаниʼ мякатоʼ тоць. Тевʼ пиркана мюсертаˮ нинаˮ тэраӈгосетыˮ, нютоʼ пумна харадʼ няюʼ пясетыдоʼ.</div>Ӈацекыˮ сулормы, мюйдоʼ сомбовна сертавы тохолкулва яхаˮ тюваʼ еˮэмня таʼ ямбанʼ манзаравы ӈокась. Ханяӈыˮ нинаˮ ныланавахад ехэраць. Танда хэмʼ ӈэбˮ ӈодˮ ненэциеˮ манзара пэваʼ нерцюˮ тохолкова серо минренаˮ хусувэй ӈамгэмдоʼ сававна хамэдавыць. Ӈацекыˮ тохолко мэта, мэлвитоʼ мюня тарани ӈаво мэвыць. Сулормэдоʼ, несэймдавы хардадоʼ ӈаниʼ тянё ни ӈаˮ. Хойʼ няд товыˮ ӈацекыˮ ядембадаˮ илелаваʼ лохохоˮ мятю&#x27;&#x27;. Тохолковаʼ паӈо то, тохолкодиˮ едʼ ӈэда ненадо хэбидя яля то. Вэбаʼ ирыʼ нюртей ялянʼ малʼ ӈахакуд хамекуваць.Округнаˮ тиӈгывна тикы ялямʼ хусувэй хардахана мэˮӈава&#x27;&#x27;. Ненадо хэбидя ялямʼ тодоˮ яхаˮна ӈатеваць. Таӈы ныланаваʼ ялэˮ ваерава нись соˮ хахаялма. Нюртей поʼ паднабцьмʼ мэˮмандаˮ нюртей сеӈгандоʼ мунмʼ намдаˮ. Едэйвана ӈацекы тохоламба пянаˮ нюртей урокамдоʼ минре хорˮӈаˮ. Нюртей поʼ тохолковандакуˮ ӈаркаˮ нитоʼ еˮэмня сомбой сё мэˮӈаˮ. Юкад вата нюртей классмʼ пянаˮ нюдякоцяˮ няхатоʼ табекудоʼ вадеˮӈаˮ. Школамʼ ёльцебадиˮ таӈокˮ поˮ ямбанʼ хамэдавэдоʼ ӈока, ӈэвандоʼ мюʼ пэмыдоʼ. Пыдоʼ тохолковаʼ пондоʼ паӈо нензелˮ ни ӈэӈгуˮ, экзамен падыбаӈгуˮ, ӈамгэ манзаямʼ пяванʼ харвавандоʼ нямна ибедортаˮ. Тюку поʼ ӈарка хардахаˮ манзаяʼ няюʼ тохолкованзь хэвыˮ нидоʼ ӈаниʼ нюртей ензидоʼ сертаба пяӈгуˮ.Ямалхананаˮ тохолко мэта тольтоʼ тяхаʼ юрʼ мянʼ ёнарˮ пирˮ ӈамдыдˮ. Сельбяʼ няӈы нердена яля тохолковаʼ сермʼ ёльцевэхэˮна, тохолкодахаˮна, ӈацекы тохоламбдахаˮна — ихина саць пойда ялядоʼ. Тад нерняʼ пыдоʼ малʼ несэй, ехэрана иламʼ пяӈгуˮ. Тохолкодаˮ тоходанвандоʼ серʼ хуркари ӈамгэхэˮ тоходанаӈгуˮ. Тикы тарана серкана сиддоʼ небянадоʼ, нисянадоʼ, тамна ӈаниˮ мятоʼ терˮ нядабаӈгуˮ. Хусувэй небя ӈэя, нися ӈэя — малʼ сёнзитоʼ мюня няркнаˮ, пэрманда сертоʼ ӈаниʼ ӈарка — нюдоʼ тидхалембаӈгуˮ.Несэй минмʼ пявыˮ нинаˮ сававна тохолкояˮ. Школанʼ хусувэй яляʼ маймба ядаяˮ. Теневабцудоʼ ӈокамдамбаяˮ, едэй иˮ ӈу содабаяˮ. Ӈацекы тохоламбадаˮ варемдоʼ мэць манзараяˮ, нюдякоця саваˮ нидоʼ хартоʼ нюдревʼ лэтрамбидоʼ. Таремʼ таслабˮ, тохолкова серотоʼ ханзерˮ мимахад, ӈацекыˮ ханзерˮ тохолковахад ӈарка янаˮ сяхариʼ пяванда илʼ пере. Анна Яптикʼ падвы

Тохолко пэядˮ

<div class="content-lead">Ямалʼ янаˮ тиӈгывна пилюˮ ирыʼ 20 яляхад выӈгана иленаˮ ненэциеˮ школахана тохолкодаˮ ӈацекы тиртя ӈанохоˮна маˮламбидоʼ. Тикы пэртя сертоʼ вэбаʼ ирыʼ 5 яляʼ ӈэсондʼ минреӈгудоʼ.</div>Тюку поʼ пилиˮ нердеʼ Ямальской районхана тохолкодаˮ ӈацекыˮ мякататоʼ харданʼ тиртя ӈанохоˮна тэвоˮла пяйдунзь. Ӈокханда таняӈы районхана маˮлавндадоʼ ёнаркад ватаˮ ӈацекыˮ. Тикы Яр-Салеʼ, Салемалʼ, Панаевскʼ, Новый-Портʼ, Пэʼ салеʼ, Сё-Яхаʼ хардахана тохолковандаˮ. Тазовской районхана ёнарˮ мян ӈацекымʼ тэвраӈгуˮ. Приуральскойʼ няби Пуровскойʼ районхана тодоˮ самляӈг юрʼ мянʼ ӈацекыˮ выӈгад тохолкодаˮ.Ханяӈыˮ школахаˮ тяхакуй похона нюртей классанʼ хэвандиˮ ӈацекыˮ ӈахакуд тэвоˮлаˮ. Тиканда нюдямбойˮ хойʼ терˮ ӈобˮ поʼ тохолкованзь хамэдамбидоʼ. Ӈавна хусувэй интернатхананаˮ нулевойˮ класс танясь, тальцюна едэйвана предшкольной классаӈэ нюмдеба пяйдунзь. Тедаʼ едэй тохолкованзь хамекудиˮ ӈацекыˮ едʼ ӈани ӈопой сермʼ серта таславыˮ. Поʼ серʼ хойʼ няд тадриʼ тохолкованзь товандиˮ ӈацекы ӈахакуд самляӈг иры школанʼ хэванзь хамэдамбаӈгуˮ. Тикы сермʼ етя таняюʼ таславыˮ лицензияʼ падро няˮамвыˮ школаˮ минре пиртадоʼ.Хусувэй поʼ ӈэрмʼ терˮ ненэциеˮ нюˮ хасаваюˮ ирынʼ интернатхатоʼ ӈобтʼ маˮлюрӈаˮ. Едэй тованда похона, небянатоʼ, нисянатоʼ хойʼ нямна мюсерман, тохолковандаˮ ӈацекыˮ сиддоʼ тохоламбдахаˮтатоʼ ӈока илека ӈамгэмʼ намдаяˮ, сававна тохолкояˮ.Нюдяне Махакуйʼ падвы

Едэй тохолковаʼ понʼ хамекуˮ

Сидяӈг: Галина Кинчинаʼ тадтавы

<div class="content-lead">Сие ниць ирыхыд Ӈыдхана няньʼ лапка ни манзараˮ. Хардаханандоʼ пекарнядоʼ тедаʼ юӈгу. Ервотоʼ вадавна, няньдоʼ маӈг ни ӈаˮ, ненэцие еˮэмня няхарˮ ӈаварˮ лапкаˮ манзараˮ. Харадʼ терˮ няньдамдоʼ таняд тэмдабиˮ.</div>Ненэсянда, лапкахаˮна манзаранаˮ няньдамдоʼ Нядаӈгардахад тэволаˮ, тикыдоʼ ненэцяӈгˮ мирдапидоʼ. Ӈопой няньʼ мирта юрˮ-сидя юрˮ мян еся ӈэсеты. Тикар саць ӈока.— Мирдападаˮ нянёдоʼ саваˮ ӈэвыˮ ӈэбтоʼ, таӈок есямʼ салдамбаӈгуваць. Таӈгунʼ янʼ тэврамбадидоʼ пуруворӈаˮ. Ӈобаӈгуна мале сян няньдаваˮ тэмдаванзь нюми ӈэдабтадамзь, пыда лапкахана нянёда сомбовна нивыда манэсˮ. Тикынаˮ нядэнаˮ нинаˮ мятʼ ӈанохона ӈэдабтэйнаˮ. Таняна пыдоʼ пурцавэй ӈэвамдоʼ таславыˮ. Мале пуня вунинаˮ митˮ. Тамальӈгэхэд лапкахад тэмдорпани хусувэй ӈамгэмʼ харˮни манэцетыв.Тикыʼ хавна пилюˮ ирыхына ненэцяˮ Нядаӈгарадʼ няд вэва юнмʼ намдавыˮ. Таняна ханяӈыˮ лапкахаˮна ӈаниʼ няньдоʼ яӈговы. Ӈарка харадʼ терхартˮ няньсипойˮ хаюрмыˮ. Ӈопой нянё ябцыбада мятоʼ ӈаниʼ нивы манзараˮ.Ӈадьбята тедаʼ ханяӈыˮ мядʼ терˮ хартоʼ ябцанаˮ:— Няньсиˮ ӈаворма ӈавыта яӈгу нивˮ. Няньдаваˮ харˮнаˮ ябцыбиваˮ. Ӈопой, тюку ирыʼ еркана лапкахаˮнанаˮ ямʼ тэмда яˮмаваць. Ясипойˮ няньмʼ вунин сертаӈгуˮ. Ӈавэдана ӈаварˮ мирдапада ту ӈано то. Таняд ӈокамбовна тэмдорӈаваˮ. Мань сидя яʼ падмʼ ханадамзь. Есяӈэ таслабˮ, ӈобтикы миреˮӈа. Таремʼ ӈодˮ ханядмʼ ханаˮ. Ӈани ханяхартад вунидмʼ хоӈгуˮ. Ӈопой яляʼ мяни терˮ еˮэмня ӈопой, ханяӈэхэна сидя няньмʼ ябцыбасетыдмʼ.Мюсертаˮ Ӈыдʼ терˮ нянь лапкаʼ нямна ӈаниʼ намдавыˮ:— Тедариʼ нарэй тэмдавыˮ талбэйˮ нянёнаˮ тамна таняˮ. Ӈаврандаванаˮ мальӈгана ӈахат серʼ ӈокамбовна тэмдорӈаваць. Сидя сян я падмʼ, самляӈг няньʼ падмʼ ханаваць. Сыраʼ ёльцяндʼ мась ӈэӈгуˮ. Масиˮ тамальӈгана харданаˮ ервˮ тоенана сертоʼ таслаӈгудоʼ. Нибтоʼ, Заполярныйʼ няд тэмдортакэваˮ.Тандаяʼ «Честный маршрут»ʼ серʼ янаˮ нермбэртя Нядаӈгардахана нултаӈгаванда мальӈгана Ӈыдʼ терˮ тоенана сертоʼ нямна хонаркурӈаць. Районандоʼ ӈэвахана мэнаˮ ервˮ няндоʼ тарцяˮ вади мэˮмыˮ: «Нянь лапка няˮамбадаӈэ Ядне Владимир тараӈгу. Харадʼ терˮ еˮэмня няньдамдоʼ мини-хлебопекарняхана сертабаӈгуˮ». Ненэся хурка ӈэвамда тадриʼ манэтаваˮ.Галина Окотэттоʼ падвы

Няньдамдоʼ хартоʼ ябцыбиˮ

<div class="content-lead">Таԓкан Ямална Законодательныйʼ Собраниӈ мансдям минԓена веԓв Сергей Миронович Ямкин тоӈаш. Депутатхана мунумантуӈ мэты Пюԓ дяханана ӈайта «Ямал-потомкам!» нимиʼта ассоциацихит мэнаˮ, нешайˮ дет тонԓюта управленихина мансԓаннаˮ, Ӈэԓм чеԓˮ нешадиˮ дет тасламы Советхана мэнаˮ ӈопт ӈомашˮ.</div>Ӈокна нешайӈ дил нямна мунуʼӈашˮ. Сергей Ямкин нешаӈкнаˮ мунуш куԓка нятакома шеԓˮ Ямалханана тадяӈӭймям вачаӈаш. Выӈкна диԓинаˮ, мюшаԓтаˮ Ӈэԓм чеԓˮ нешадиˮ округханана нятапитуӈ. Чуувна диԓинаˮ, мансԓаннаˮ нешаӈкˮ ӈамы таԓамам Хаԓяӈкаԓтыхина мансԓаннаˮ веԓвыˮ выӈ нямна, нешадиˮ ӈысыманаˮ дятэԓьш намташтутуӈ. Таньше выӈкна, петаԓахана диԓинаˮ нешадиˮ мятуˮ таʼамна дятыԓма вивӈуты, округна ӈаԓка тэтаӈ комы.Маняˮ ненаˮ ӈупчики нешайˮ деʼэмня ӈамы тасԓавта вачитуӈ тадя, чикитуӈ депутатан мэʼнашˮ. Выӈкна диԓинаˮ нешадиˮ куше диԓимам, ӈамы няӈтуӈ таԓамам, ӈамы тасԓавтаˮ шеԓутуӈ тадяӈӭймям — таԓьша шеԓуˮ вачаӈашˮ. Мансдяӈ дет тохоԓкотаˮ ӈашкиˮ нямна ӈайта шеԓˮ, чуувна, каԓтыхина диԓинаˮ нешайˮ нятапёма, дяна чеԓˮ дечашамаӈ нямна ӈайта ватаˮ, нюча каԓтуувдехенаˮ мансԓаннаˮ ӈашкиˮ тохоԓампючиˮ дет ӈайта шеԓˮ, нешайˮ пяй мяшмаˮ — тасԓавта шеԓыˮ ӈукаˮ.Чикиӈ камна маняˮ Пюԓ дяхана «Таӈ деԓь дяԓя» нимиʼта праздникʼ шеԓтаман хаʼӈаˮ. Таԓьша дяԓям маньԓе выӈ няна ӈайтаˮ каԓтыхинаˮ мэʼштуˮ. Чуки ноптухуна куԓкаԓиˮ деты шеԓˮ ӈычимштуˮ, шаӈкмян ӈамэʼ вивинтоԓкадя хомана тасԓамата таԓа. Таԓям четаӈ таньше нешаӈкнаˮ дилтуӈ нямна веԓвуˮ дюничаԓма — хома шеԓ.Лариса Айваседо патмы

Ӈокна мунуʼӈашˮ

<div class="content-lead">Дёԓьше мэкатˮ, меԓьмана шеԓтамыˮ. Ниӈашкиˮ мысыхиˮ панытатуӈ хайтуԓаӈаˮ. Таньше мэкатамна хӭтмыˮ паныдю шеԓтама вивӈут ЦНКхана мансԓана няна комы. Мария Вокуева проектʼ «Арктический дизайн» патӈаш, тайˮня чикита «Газпром нефть» шеԓтамы грантʼ дет ӈайта конкурсхана «Родные города» нэхэԓяш.</div>Четаӈ чики проектʼмананта ниӈашкиˮ, Ӈэԓмʼ чеԓˮ нешайˮ нюˮ, мысыˮ, мэкатˮ паныдю хайтуԓаш тохоԓымпи. Ӈупдяӈкня — шичадюˮ четʼ потуӈ ӈайта матʼ ниӈашкиˮ тохотаӈаˮ. Чики проектʼ шеԓтамы Мария Вокуева маньшту:— Маняˮ неԓьшут хайтуԓаш мэсутатма ӈамыкотмаˮ тэмтаӈамашˮ. Хайтуԓаш мэтаˮ машинкаˮ, маникенˮ, дяԓнас — ӈай ӈыдиˮ паным хӭтмаӈ дет таԓана ӈамыˮ.Таԓьша вивӈутым Мария ни нюхунанта, ныдиˮ ӈаԓтана ниӈашкӭхена дёԓимяшоʼ комыта. Чики проекта ниӈашкиˮ мысыˮ паныдю детымана хайтуԓаш тохотамаӈ мэт шеԓтамайта. Мария маньшту:— Ӈэԓмʼ чеԓˮ нешайˮ нюˮ хайтуԓаш няʼампёмам чедимяӈаˮ, хомана хайтуԓаштуˮ. Чики проектʼхана ниӈашкиˮ детымана хайтуԓаш тохотаӈаˮ. Пыʼтоӈ каԓтыхинаˮ мэʼэвтатуӈ мэкатыхиˮ панытатуӈ хӭтпиˮ.Деты паныдётуӈ дизайнат ни ӈашкӭэˮ каԓьтуӈ вимнянтуӈ коӈашˮ, куԓка дяԓнасыхит панытатуӈ хӭтшататуӈ каԓьтуӈ тасԓаӈашˮ. Эскизʼтатуӈ каԓьтуӈ шеԓтаӈашˮ. Ӈуп диԓиӈ паныдётуӈ куԓка ӈаймям тасԓампюмайтуӈ. Куԓка дяԓнас, ԓаткум, пюмям хӭтшатуӈ, шичитуӈ дизайнанʼ тохоԓампюта ԓушиним няш тасԓайтоньш. Каԓтыхинаˮ мэʼэвта мэкатˮ, мысыˮ паныдю шеԓтапё ниӈашкэˮ няхаԓ экспертʼ тохоԓымпитуӈ.Ӈоптуӈ паныӈ дизайнʼ шеԓтапёшь ниӈашкиˮ тохоԓымпишь. Куԓка тэмсˮ дяԓнасˮ ӈопт тасԓыˮ, куше хӭтмайтуӈ панэханатуӈ Ӈэԓмʼ дямаˮ ӈычимчешь хома, куԓка матамыˮ таԓа — таԓьшˮ вачаӈаш. Ними ԓушини — меԓьмана ӈоӈкташ, лусатаԓям хайтуԓаш ниӈашкиˮ тохоԓымпита. Куԓка тэмс дяԓнасыхит шеԓтамы матамыˮ панэханатуӈ хома ӈаймям няӈтуӈ вачаӈа.Няхамты экспертʼӈӭ мэна — хӭтмайтуӈ паныдётуӈ каԓьтуӈ няӈԓинтуӈ шеԓтанайта, шан таԓьшаˮ паны дякутыˮ. Шеԓтамайтуӈ матамайтуӈ куше мэкатамна паныдётуӈ ниӈ хайташ хомаӈаймям няӈтуӈ ӈычемчены. Татʼ ӈэвна диԓиӈ хампԓяӈкты дяԓяхана ниӈашкӭэˮ деты паныдётуӈ хӭтпё дёԓьшинайтуӈ. Таԓкана праздникхана маньԓе ӈычимчендятуӈ. Лариса Айваседо патмы

Паныˮ хӭтпё тохотаӈаˮ

Сидяӈг: Лариса Вануйто тадтавы

<div class="content-lead">Пилюʼ ирыхына Ямальской районхана иленаˮ ненэцяˮ ӈаниʼ ӈопой проектмʼ техэ малханда ёльцеˮ. «Лэё» организациямʼ минрена Лариса Вануйто паӈгдоʼ Яптик-Салеʼ хардахад перенаˮ нита няʼ ямдоʼ таборкат хабтомдамбавыˮ.</div>Саляʼ явʼ лаӈгʼ нина ӈобˮ нюдя хардако таня, нюмда Яптик-Сале. Тедаʼ тикы яхана сянбой ненэцьʼ иле. Сяхаӈгав таняна мале ӈока ӈэвыˮ. Ӈаниʼ харадʼ терˮ тотревʼ манзаравыˮ, халямʼ хадабавыˮ, нюдоʼ вадабавыˮ. Тикы явна пидицяˮ ӈодˮ ӈаниʼ манзаидоʼ минревыдоʼ. Сидя юдʼ мян поʼ тяхана халямʼ пэрмыˮ ненэцяˮ манзаясиˮ хаюˮмахад ханяӈы мядʼ терˮ Сёяхаʼ няби Пэʼ салеʼ харданʼ, тамна ӈаниˮ яхаˮ ямдавыдˮ. Хэвняӈы яхаˮна илӈы хибяˮ манзаядамдоʼ хомбавыˮ, ӈацекыдоʼ вадабавыˮ. Тедаʼ тамальӈгы ӈацекыˮ малˮ ӈаркаˮ ненэцяˮ. Ханяӈыдоʼ хэвыˮ похоˮна яндоʼ хобацянʼ тэворкава ӈобˮ тэвормыˮ. Таняӈы яхана пидяцяˮ хэˮмяхад хуркариˮ еся лоӈгˮ , тахабэй харадʼ пеляˮ хаёвыˮ. Тарцяˮ нэлорˮ сэвхана маниебˮ вэваˮ.<div class="content-new-image"><img alt="pic" src="https://storage.yandexcloud.net/ym-sites-static/21c6a7b1-b69.webp" style="width:100%" height="720" width="1280"/><div class="content-image_child"></div></div>Сёяхаʼ тер Лариса Вануйто тикы нюдя хардакохона вадёвы. Тиканда таняӈы ямда таборкат хабтумдамба идевыˮ. Хэвы похона проектмʼ падвы, нюмда «Экспедиция «Родина моя — Яптик-Сале»). Падвэхэнанда серакута серʼ ненэциета няʼ сертавандаˮ серодоʼ малˮ вадеˮмыда.Пилюʼ ирыʼ нерденаˮ яляхаˮна, таславэндоʼ серʼ, вадёˮма яханда экспедициямʼ ханаванзь нида Сёяхаʼ харданʼ маˮлавыда. Ханяӈыдоʼ Яптик-Салянʼ тиртя ӈанохона нэкалӈадонзь. Ӈокханда тарця сава серˮ няюʼ няхарˮ юдʼ мянʼ ненэцьʼ таралъядаць. Танянандоʼ экспедициянʼ маˮлёвыˮ ӈока сава сермʼ сертаць.Нерде Ӈарка Таркабтёдаʼ яхаʼ вармʼ есяˮ лоӈгахат, бочкахат хабтумдамбавыˮ. Сяхариʼ машинаʼ мюʼ нензелмана пэмаʼ еˮэмня маˮлавыˮ таборо тюˮукуʼ нэкалмыдоʼ. Харадʼ поӈгана ӈэдаˮ ӈаркаˮ таборˮ, тахабэйˮ, паравыˮ харадʼ пеляˮ, сэвхана насортанаˮ ӈавоˮ, пяʼ хамболˮ, —ӈопой янʼ маˮлавыдоʼ. Ӈацекыˮ ӈарка няхатоʼ сыраць ӈобтикы пад ханахая, томʼ сюрте, сидндет таборˮ падмʼ маˮлавыˮ. Тоʼ вархана хомбвыдоʼ пэˮ тахараˮмаˮ, неракуˮ хаёˮмаˮ. Ӈацекыˮ ямʼ таборкад хабтумдаˮмахад тоʼ вархана нувʼ сармикахартˮ маймбада тоˮолхаць — хабту яхана ханидоʼ вадабаӈгуˮ.<div class="content-new-image"><img alt="pic" src="https://storage.yandexcloud.net/ym-sites-static/810b9286-57c.webp" style="width:100%" height="1080" width="1920"/><div class="content-image_child"></div></div>Экспедицияхана таравыˮ ӈобнзерˮ сидя юрˮ мянʼ пурцавэй бочкамʼ, няхарˮ тонна тарусялмыˮ есяˮ лоӈг, табороˮ пад маˮлавыˮ. Тедаʼ маниебˮ, хардандоʼ пой, тондоʼ хэвхы, яхандоʼ лаӈгʼ няӈы ненадовна хабтума.Пыдоʼ наӈэдя сиˮив ямбанʼ Яптик-Саляхана иленаˮ нитоʼ няʼ ӈопой мядʼ тердаревʼ манзаравыˮ. Ханяӈэхэˮна ӈобнзерˮ ёрманзь, ӈодиманзь ханмыˮ. Неноховавна хэбидя яханандоʼ хаӈорондвыˮ. Невхыˮ таняна манзаравыˮ луциˮ хальмерˮ ямʼ тяхасовна таборкат хабтумдавэдоʼ. Тикы нюдяко ӈэрмʼ хардахад сайнорманзь мале сян илебей хасава ӈацекы хэвы. Небянадоʼ, нисянадоʼ Яптик-Саляхана илеˮ, нюдоʼ ӈатеˮ. Экспедицияʼ терˮ сайнортиˮ нитоʼ харадʼ мядоˮ яӈотʼ латанʼ вади падвыˮ: «Саювхат яваˮ ӈэдабадаˮ нинаˮ яваˮ лэтрамбиˮ!» Сяхариʼ хусувэй ӈэрмʼ няӈы нюдяко харданʼ тэвна тарця серкат теневаӈгу.<div class="content-new-image"><img alt="pic" src="https://storage.yandexcloud.net/ym-sites-static/87ea1d23-b3f.webp" style="width:100%" height="720" width="1280"/><div class="content-image_child"></div></div>Илека ядэръямʼ минревы Лариса Вануйто таремʼ лахана: «Тедаʼ ядэроˮмахананаˮ таборириˮ ниваць яебтамбюˮ. Ӈаркамбойˮ ненэцяӈгаˮна лахарю минреваць. Пыдоʼ невхыˮ похоˮна ханзерˮ илевамдоʼ тензибтембиць, хуркариˮ илекаˮ серо вадеˮӈаць. Ӈобˮ ӈармы не, Окотэтто Ябне Иривна музейʼ няюʼ таˮнёмда, ӈобˮ невхыˮ сихиртяʼ есямʼ тась. Сяхаӈгавʼ тарця есь вэсакода Сихиртиˮ тоʼ хэвхана хомбавы. Тикыʼ хавна нянанаˮ ӈобˮ ӈармы ненэцямаˮ, Татьяна Нюдевна Сэротэтто ядэрӈась. Пыда невхы Яптик-Сале хурка ӈэвамʼ нянаˮ сававна вадеˮӈадась».Тэриʼ ӈабцата таняӈы яхана невхыˮ пидяциˮ минревыˮ манзаиˮ серкат сюдбякоˮ есяˮ лоӈгˮ хаюмяˮ тяханда ӈока. Тикыˮ сюдбяˮ ӈонерˮ хэвняʼ ӈудиˮ ныхырихиˮна наволмаˮ тоˮолхаˮ вуниˮ ӈаˮ. Хартоʼ нюдяко хардакохондоʼ экспедициянʼ ядэрмыˮ нинаˮ ӈарка серо тасламбадаˮ организацияхаˮ вадамʼ ӈэдарамбиˮ. Ӈобнзерˮ яваˮ лэтрамбаван харвабанаˮ таняӈы ямʼ ӈобтикы есяˮ нэлоркад хабтумда тара. Тикыˮ сероˮ нямна таняʼ ядэрмы нюдя экспедиция манэˮмэхэт, сертавэхэт лаханахаваˮ. Ӈарка ненэциеˮ вадавна, тюˮуʼ миндяˮ, илебейˮ ненэцяˮ сояˮма ямдоʼ нёмдо юрыбюˮ, сояˮма яхатоʼ тэворӈаяˮ, яханандоʼ илеяˮ. Хусувэй ясавэй хибя янда хобацямʼ лэтрамбабата тара.Алла Вануйтоʼ падвы

Яхандоʼ таромʼ хаˮаврамбиˮ

<div class="content-lead">Ямалхана ёртяˮ ненэцяˮ тедаʼ манзаравандоʼ паӈо. Вадавнандоʼ, сэрˮ халя миӈа. Небой понʼ манэпˮ, тевʼ ёльцяӈгана мале ӈокамʼ няˮамвыˮ.</div>Епдяˮ ялэнаˮ ланомаˮ. Саля явʼ иˮ мале саць ни ядембюˮ. Таʼ ерˮ хулёда пэйˮ. Ӈаркамбойˮ халяˮ явʼ няʼ хаˮмотаˮ. Пайхаˮ, идюрцяˮ хэвдоʼ саваˮ. Таʼ ямбанʼ тохоˮна, нюдяˮ яхакохоˮна ӈаврадоʼ ӈока ӈэрхавы.Халямʼ хадабадаˮ манзаядоʼ тидˮ миӈа. Нитоʼ нерняна ӈахат серʼ няхарˮ предприятиеʼ терˮ мэˮ. Тикыˮ — МП «Аксарковское РПП», АО «Горковский рыбозавод» и ООО «Тазагрорыбпром».Приуральской районхана манзаяханандоʼ нядˮмаӈэ тет плашкоутмʼ, няхарˮ ту ӈаномʼ мэˮӈаˮ. Ӈокханда 40 поӈгаˮ терˮ халямʼ хадабадаӈэ тараˮ. Пыдоʼ тюку понʼ таславы планандоʼ серʼ пайхамʼ ёльцянда пирувна хадавыˮ. Тадриʼ палкурмʼ ватабаӈгуˮ. Ӈобтикы ёльцянда пирувна няˮма тасламбидоʼ.Тикыʼ хавна тенкана тиребясавэй халя ӈадиберӈа. Ӈадьбята халя луцаˮ Саля явʼ мюмня ӈэдалёртаˮ, поӈгартаˮ ненэцие манэсартаˮ, табедамбаӈгудоʼ: ханяна, ӈамгэʼ тоˮолха халямʼ хадаба сава, хуркаˮ поӈга мэць тара.Галина Окотэттоʼ падвы

Варемдоʼ мэˮӈаˮ

Сидяӈг: Федор Вороновʼ тадтавы

<div class="content-lead">Ямалнаˮ ӈардавна тумʼ хабтабадаˮ тамна таӈгмʼ ниˮ хомбюˮ. Пилюˮ ирыʼ еркана ӈокханда сиˮив юкад вата сиˮив паранана ямʼ вадеˮӈаˮ. Неноховавна матˮ районхана ӈаˮ: Красноселькупской, Надымской, Пуровской, Приуральской, Тазовской, Шурышкарской.</div>Таʼ ямбанʼ ханярид вэва юне намдорӈаваць. Янаˮ тиӈгэвна 780 паранана ямʼ хабтабавыˮ. Ӈардамдоʼ 242 ёнарˮ гектарӈэ тасламбидоʼ. Мале сян ӈэрм ялякоцяхана ханяӈыˮ яхаˮна тумʼ сарё хабтавэда. Таремʼ ӈодˮ ӈарка тарода яӈговы.Тумʼ хабтабадаˮ серодоʼ тидˮ минревандоʼ няюʼ хусувэй ӈамгэдоʼ таня. Теневанаˮ ненэциеˮ вадавна, ӈокамбой пеляда сарёсяда хэ тухут яваˮ парана. Ӈадьбята яваˮ лэтрамбадаˮ сата мерцяхад, сэлуй яхад тамна тосаˮ. Тумʼ хабтаба 1018 ненэцяˮ тараˮ. Поӈганандоʼ ӈаниˮ яʼ терˮ таняˮ. Нядˮмадандоʼ Ми-8 тиртя ӈано мэˮӈаˮ.Янаˮ ерв манзаямдоʼ савуˮмэда: «Харадˮ хэвхана ту яӈгу. Ӈадьбянаˮ саць ниваˮ тосаˮ. Харˮна янаˮ терˮ хавна сиднаˮ Иркутскʼ, Архангельскʼ, Пермский крайʼ, Тюменьʼ, Юграʼ няд товыˮ ненэцяˮ нядабиˮ. Пыдоʼ хубта яхана ӈэда тумʼ табˮламбиˮ».Пилюˮ ирыʼ 27 яляʼ ёльцяндʼ тамна лэтрываˮ. Палытанаˮ ненэцие табедамбиˮ: «Сяхариʼ парана ямʼ манэпатаˮ, ямʼ лэтрамбадахаˮ 112 номертʼ лаханадаˮ».Галина Окотэттоʼ падвы

Яваˮ тамна парана

Сидяӈг: Андрей Ткачевʼ тадтавы

<div class="content-lead">Тадриʼ Саляӈгардахана тохолкодаˮ илебейˮ ненэцяˮ тохолкосьʼ яхандоʼ ӈэдалаӈгудˮ. Ямальской многопрофильной колледжхана сиддоʼ мале ӈатеˮ. Тюку поʼ общежитиехана илевандаˮ нянандоʼ лекарахат яӈга падармʼ тэврабатоʼ тара.</div>Пилюˮ ирыʼ 31 яляʼ ёльцяндʼ тивакˮ хабцяӈо тасламбада лекаранʼ хэсь тараӈгу. Пыда сенз ӈэвандаˮ нямна падармʼ падаӈгу. Тамна нябиюмʼ падарˮ районханандаˮ палаӈгана хабцяˮ яӈговаʼ нямна ӈэӈгу.Сенз ӈэвамдаˮ хартаˮ районханатаˮ манэць пирˮӈараˮ. Мякнатаˮ лекаранʼ хэсь яˮамбатаˮ, Саляӈгардахана тюкуˮ нядˮми мэць пыхыдмʼ пада сава:— телефонувна 8 (34922) 4-00-68— Госуслугиʼ серʼ— лекарˮ порталхана: yamalmed.ru/— Max приложениехана: https://max.ru/yamal_kvrachu_botЛекарˮ тивакатаˮ сидяӈг сертаӈгуˮ, хаӈгурмамдаˮ, нивамдаˮ таслаӈгуˮ.Саляӈгарданʼ мале товы ӈэбтаˮ, колледжхана понедельникхад четвергʼ ёльцяндʼ 09.00 — 13.00 часˮ пиркана тиваката сидяӈг, Диаскинтест серта пирˮӈадаˮ.Серодаˮ ӈахакуд тидхалембидаˮ, паромбарка сертабидаˮ. Таремʼ Салеӈгардахана мерʼ общежитияхатаˮ илелтыдаˮ.Хонравандараˮ танябˮ, Ямальской многопрофильной колледжʼ сайтхана таранаˮ юне тола пиръядаˮ.Галина Кинчинаʼ падвы

Тохолкодаˮ еˮэмня тарана юн

Сидяӈг: Алина Дьякова' тадтавы

<div class="content-lead">Пилюˮ ирыʼ 22 яля Россия янаˮ сямянхат теневана, ханярина тумдыбада ненадумдаˮманда яляӈэ таславы. Луца вадавна манзь: «День Государственного флага Российской Федерации». Тодоˮ яханаˮ иленаˮ ненэй ненэцяӈэ тикы ненадумдаˮмаваˮ хаця яӈга нюмдебасетываˮ. Ханяӈынаˮ лабцяӈэ, ӈанинаˮ лабакӈэ, лабкаӈэ вадецетыдоʼ.</div>Сёбарˮ нинаˮ тодоˮ пареӈодаˮ яʼ терˮ поӈгана пирдырпатоʼ Россия янаˮ лабакмʼ етриʼ нянандоʼ минарцетыдоʼ. Харˮнаˮ яхананаˮ ӈаниʼ ненадоˮ яхаˮна ӈыдёсеты. Ервоˮ манзарасьʼ яˮ, ӈацекыˮ, сёбарˮ тохолкулваˮ харадˮ ниня ӈэсеты.Хусувэй ӈолепянда тэнз ӈамгэхэвмʼ вадеˮӈа. Сэрˮ — хынёсиˮ, таӈга илевамʼ, сенз ӈэвамʼ ӈадимдемби. Ихинанаˮ сэрˮ тиреˮ, яберена сыраʼ тоˮолха. Сюнраха — хариˮ ныхынʼ пунрёваʼ нямна ӈа. Явоˮ, тоˮ идеˮ тоˮолха. Няръяна — мэбеˮмамʼ, сояˮмаʼ яваˮ лэтраваʼ еˮэмня пыхыдмʼ нива сяˮмамʼ хэтыби. Хаертаревʼ няръя, тудревʼ ядемби.Россия янаˮ ӈардавна тюку яляʼ хуркариˮ ненадоˮ серˮ миӈаˮ. Неноховавна тодоˮ харадʼ терˮ ӈаркаˮя лабакмʼ тюˮуʼ илыбиˮ. Ӈацекыˮ еˮэмня хуркариˮ сянакурмаˮ миӈаˮ. Сёбарˮ ненэцяˮ пирдырмахаˮнатоʼ теневабцудоʼ ӈадимдембиˮ. Сёётэй нинаˮ хыноˮӈаˮ. Таранаˮ тарабцудоʼ манэˮлабтамбиˮ. Ӈаварˮ пирембадаˮ ӈавыдотаˮ ӈавраханатоʼ нидоʼ ӈавламбиˮ. Таремʼ малʼ ӈобкана ӈарка янаˮ лабакмʼ савуˮӈаваˮ. Ненэсянда ӈопой ӈарка мядʼ тердаревʼ ханˮӈаваˮ.

Янаˮ ненадумдаˮма' яля

<div class="content-lead">Пилюˮ ирыʼ еркад округнаˮ нермбэртя Дмитрий Артюхов Ямалнаˮ ӈарка марадˮ нямна ӈэдалёрӈа. Мале сян яляʼ ямбанʼ ӈока сава сермʼ таславы.</div>Ненэцяˮ хонрамбадидоʼ ӈокамбой пелядоʼ таб сехэрыˮ, лекарˮ серо, иле хардоˮ, тохолковаʼ сероˮ нямна ӈэвыˮ. Манзаямда ӈахат серʼ тидхалембида: небой похона вадеˮмыˮ табекута нямна хонаркурӈа. Ненэцие табекохоˮ инзеле. Тюку поʼ Ноябрьскʼ няд манзаямда пядась. Таняна едэй лекарˮ мятʼ тюӈгавы. Хурка ӈэвамда тяхасовна манэˮмэда. Вадавнанда, янаˮ терˮ хабцяӈодоʼ таславанзь тодоˮ хардахат таняʼ тэворць пиртадоʼ. Ӈаниˮ маркаˮна едэйвана мивыˮ пэˮ мядодоʼ ӈадимдембавыˮ, СВОʼ няна сайнортиˮ нядˮми вадеˮмыˮ.Неноховавна Ноябрьскхана мэванда мальӈгана ӈэрмʼ терˮ еˮэмня иле хардоˮ нямна манзарана программамʼ тензебтевыˮ. Ямалнаˮ нермбэртя тикы тоенана серˮ нямна тарцяˮ вади мэˮмы:— Ӈани похо на округнаˮ есьˮ пэнёсяӈгад ӈэрмʼ терˮ программаʼ няюʼ мэтаˮ есьнаˮ няхарˮ яӈорэй ӈокамдаӈгунаˮ. Юрˮ миллионʼ пирӈэ сертаӈгунаˮ.Тикы программа мале ӈока по таня. Маняˮ еˮэмнянаˮ ӈадимдевы. Таремʼ таслабˮ, ӈока поˮ ямбанʼ ненэцяӈгˮ тэвравы тарода яӈгу. Ӈояк хибяхав мятамда няˮмаӈгу. Ӈанихивˮ тэри ӈатенаˮ. Таремʼ ӈодˮ мяцядаˮ янаˮ терˮ пыхыдадоʼ таняʼ падыбидоʼ.Ӈопой лахана няˮмы няваˮ сидя юдʼ мян поˮ ямбанʼ мятамда ӈате:— Мань 2002 похона падрониˮ сертэйнась. Хусувэй нараʼ «жилищная политика»ʼ серо няˮамбадахаˮ ядэрцетыдмʼ, мяˮни яӈгова, мяни терˮ сяӈок ӈэваʼ нямна падрониˮ тэврасетыдмʼ. Сидя юкад вата поˮ таремʼ хаяˮ. Тевʼ ёльцяндʼ мяцидмʼ. Хасава нюми ӈарка ненэцяӈэ хая. Харта иламда мэˮӈа. Манзара, ненэциеˮ мякана иле, тикэнда няюʼ есямʼ салдамби. Манисяв: «Мятми харˮни есяхаˮнани тэмдаӈгудмʼ. Сит тотревʼ нидмʼ ӈатенаӈгуˮ. Ӈатенава тарода яӈгу». Мань ӈобаӈгуна 2010 поʼ пиркана ӈобтикы тарця иӈудмʼ нёдалӈадамзь. Банканʼ серониˮ таславанзь хаядамзь, таняна сиˮми табˮлаˮ, недвапада есями тянёри ӈэвы, ипотекамʼ мэць нивэдмʼ пиратˮ. Тикыʼ пуд етʼ ӈаниʼ ӈатенадмʼ. Тедаʼ едэйвана ӈадимы юнхад ӈулиˮ маймбидмʼ. Янаˮ ервʼ табекоʼ серʼ масиˮ тадриʼ мятми няˮмабцудмʼ.Тикы программавна законʼ ватоʼ серʼ хусувэй ӈэрмʼ тер иле мята яӈгобˮ, округнаˮ есяхат мятамда тэмда, няˮма пирӈа. Янаˮ ервʼ вадавна, ӈадимдевандаˮ есяˮ хавна ӈэрмʼ терˮ программамʼ хаця несэймдамбаӈгудоʼ. Ненадовна илебей мядʼ терˮ нямна ибедортаˮ. Иле мятоʼ, манзара яндоʼ танябˮ, тохолковандоʼ пуд хартоʼ яханандоʼ илеӈгуˮ, невхыˮ паӈгодоʼ нидоʼ юрыбаӈгуˮ.Толаӈгодаӈэ еˮэмнандаˮ тадриʼ янаˮ ервʼ ӈэдалёромаʼ нямна тамна паднаӈгуваˮ.

Ӈэрмʼ терˮ еˮэмня ӈадимдевы вада

Сидяӈгˮ: Алла Вануйто тадтавыˮ

<div class="content-lead">Хэвы сиˮивʼ пуняна Ензяʼ яхаʼ лаӈгʼ ниня Няръяна надо мартʼ «Сокровища Севераˮ» выставканʼ мелˮ, ваˮлёйˮ хибяриˮ ӈэдалёрӈаць. «Россия» нюбета тодоˮ тэнзˮ маˮлюрма мякана юкад вата хасава юˮ яхад тет юрˮ мян ненэцьʼ хуркариˮ ӈавориˮ манэˮлабтярӈэ тэвраць.</div>Тикы выставка Россияʼ яхананаˮ тяхакуй похоˮна сяхаринда Москва маркана минзеты. Сидя юˮ нюртейʼ яӈорˮ ӈэвамда Красноярской крайхана ӈэсь таславэдоʼ. Манэˮлабтамбадидоʼ сяниˮ явна ӈэдаˮ серˮ: ӈэрмʼ терˮ яхана сертабадаˮ наварˮ тэнзˮ, ембдярˮ, хуркариˮ сэдъяˮ, панортиˮ, миртиˮ манзаяˮ, сертавыˮ сянакуˮ. Сёетэйˮ, таранаˮ, ваˮалˮ вадетаˮ ӈаниʼ помнандоʼ пирдырӈаць.Няръяна Надо мартʼ яндоʼ няд тэвравыˮ ӈамгэридоʼ «Россия»ʼ центр мюня хусувэхэндоʼ таславыˮ лохоʼ мюня ӈабтамбидонзь. Пыдоʼ туртиˮ ненэциеˮ едʼ тэвравыˮ ӈамгэривнатоʼ экскурсия мэˮӈаць. Ямалʼ няд ядэртаˮ нинаˮ сырэй илʼ саирмʼ манэˮлабтамбиць. Ханты-Мансийской автономный округʼ терˮ манэˮламбтярӈэ тюгӈаниˮ неʼ мюдмʼ вэталавыць. Вэӈгалавы мюдʼ серˮ хаюпа хэня ненʼ небянда табеку вадеˮӈаˮ. Тамна тяхакуна ӈаниʼ ӈопой ӈарка лохона Красноярскʼ яʼ терˮ сертавы выставка «Хранители Севера» танясь. Вивиʼ тоʼ сидяӈг сидяʼ хэвувна таняӈы яханандоʼ сидндет ӈэрмʼ терˮ тэнзˮ илаʼ саирмʼ вадеˮӈаць. Яндоʼ нямна хуркариˮ сидяӈгˮ ӈадиберӈаць. Тамна тяхакуна нюдяркаˮ выставкаˮ нуць: Амурʼ я, Забайкальской я, Тываʼ я, Карелияʼ я, Ленинградской, Иркутской, Мурманской, Кемеровской, Томской областяхад, Якутияхад, Камчаткахад, Магаданхад, Сахалинхад, Алтайхад, Хакасияхад, тамна ӈаниˮ яхат ӈаць.Манэˮлабтярӈэ таславыˮ лохоˮ сидяӈгахаˮна падтавыць. Тикыˮ тадтаˮми «Северный взор» конкурсхана ӈэдаˮ сидяӈгˮ поӈгад тэравыдонзь. Ямалʼ няд Ксения Ярʼ, Равиль Сафербековʼ, Елена Неркагыʼ, «Изватас»ʼ ненэциеˮ манзаяˮ таняць. Маняˮ янаˮ нямна миндя выставкаʼ ядхана сидяӈг сертаба мэта мутра ӈыдысь. Тиканʼ туртаˮ выӈгыˮ ненэциеˮ мирбяхаˮна тадтаӈгурӈаць.Ядэрмыˮ нинаˮ мякататоʼ тэвравыˮ мастер-классдоʼ таняць. Мядондаˮ неноховавна илекаӈэ Вячеслав Вануйтоʼ поӈгамʼ сярыбавамʼ манэˮӈаць. Алла Вануйто ӈухуку сэдыба тохоламбидась. Галина Лобанова халяʼ хоб пыябавамʼ манэˮлабтамбись. Зина Климова мадавы паркабись. Егор Наков турмыˮ ӈацекы сянакултамбись. Елизавета Вахрушева лыʼ нямдʼ нимня падтаӈгурӈась. Окотэтто Алина пэ банкаʼ мюʼ нюдяко выӈгы илʼ сидяӈгацярахаˮ мэхэя композиция сертабись. Ямалʼ терˮ тамна ӈаниˮ хуркариˮ мастер-классдоʼ таняць. Сертабадидоʼ хибярихиˮна мэкадархаць, ӈадьбянда выставкахандоʼ турта ӈокась.Яʼ ханярид маˮлёвыˮ нинаˮ хартоʼ сэдвыˮ ембдяродоʼ «Полярный стиль» пирдырмахана манэˮлабтамбидонзь. Мелˮ ненэцяˮ ётоʼ няд хуркариˮ сырэйˮ, таӈыˮ, харадʼ илаӈгана мэтаˮ паныдоʼ тэвравыць. Таремʼ сэдвыдоʼ мядʼ терˮ ембдярˮ, ханяӈыˮ етя хибяхавʼ едʼ сертавыˮ ӈамгэˮ. Хусувэндоʼ сыдырˮ янда мэсыдмʼ вадеˮӈа, мал паскойˮ. Ямалʼ няӈы ненэй ненэциеˮ, хабиˮ, тасуʼ хабиˮ ембдяро манэˮлабтярӈэ тэвравыць. Тикыдоʼ поʼ серʼ мэтаˮ паныˮ, мальцяˮ, тохокат сэдвыˮ имбытадˮ. Маняˮ яхаданаˮ тецьдаˮ нумгаˮна мэта «Эко Хирви»ʼ ембдирмʼ манэˮлабтамбиць. Сюдбя тецьдахана иба ӈэванда еˮэмня едэй мутравна сэдъхая, тыʼ тармʼ нядˮмята «Лимбика» таӈгакана таӈгадавы.Хартоʼ яндоʼ мысыдовна сёдоʼ, тарабцодоʼ «Кочевье Севера» фестивальхана мэйдонзь. Няхарˮ ямб яляʼ турта нитоʼ еˮэмня сёетэйˮ ненэцяˮ сиˮив яʼ вадавна хыноˮӈаць. Маняˮ яхаданаˮ ярабц мэта Вячеслав Вануйто, Фолк-Группа «Илебц» нитоʼ поӈгана мэць.Хуркариˮ илекавна сертабадиˮ хавна ӈэрмʼ яʼ тиӈгэхэд тэвравыˮ ӈамняладаˮ ӈавар «Экомаркет» выставканʼ тэвравыць. Тикыдоʼ пихиня, Енсяʼ яхаʼ лаӈгʼ ядувна миндя пулʼ няна ямб ӈысыʼ «Кочевое стойбище»ʼ хэвхана туртаˮ ненэцяӈгˮ тэмдарамбидонзь. Маняˮ яхаданаˮ ӈамзахат, халят, ӈодяхат сертавы ӈаварˮ тэнз «Дары Заполярья» мирдапидась.«Сокровища Севера»ʼ ирмня хуркариˮ ӈаркаˮ тасалкурмаˮ миӈаць. Ӈобˮ тарця форумхана толыртоʼ тянёˮ ненэцие нядабавамʼ вадеˮӈаць. Яʼ сярʼ ниймʼ лэтамбаваʼ нямна лаханаць. Няхаромдэй яляханандоʼ выставкахана мэвыˮ нинаˮ ӈаркаˮ концертанʼ маˮлыць. Тиканʼ товыˮ ӈэрмʼ терˮ ненэциеˮ вадавна ӈэдаˮ сё намдаць. Хуркариˮ ёˮ мысыдовна ӈэдаˮ тарабцо манэˮӈаць.Пудана яляханандоʼ «Сокровища Севера» выставкахана пирдыртаˮ нинаˮ сямянхат ваˮлёйˮ хибяриˮ ненадумдаванзь ӈобтʼ маˮлыць. Маняˮ янаˮ терˮ ӈобнзерˮ манэˮлабтамбавэдоʼ нюртей янʼ хаˮмыць. Ӈокханда Ямалʼ няд ядэрмыˮ нинаˮ юкадʼ вата сиˮив ненадо ӈудаʼ термʼ няˮмаць. «Полярный стиль»ʼ фестивальхана Ямальской районхад ӈэда Зинаида Климоваʼ няби Пуровской районхад Татьяна Пякʼ сырэй ембдяродиʼ нюртей янʼ хаˮамвыдˮ. Манзаитоʼ серʼ нябимдей янʼ Алла Вануйто, Сергей Ледков, Галина Лобанова , ОЦНКахад ӈэда сёмʼ мэтиʼ группа «Илебц» еремыˮ.Няръяна Надо маркана тет яляʼ ямбанʼ ӈэрмʼ терˮ илмʼ ӈадимдембада ӈарка выставканʼ хибяриˮ турӈаць. Россия яʼ терˮ хавна ӈаниˮ яʼ пареӈодиˮ яхат мядондаˮ ӈадиберӈаць. Пыдоʼ ӈэрмʼ няӈыˮ илʼ саироˮ нямна намдавэдоʼ, манэˮмэдоʼ ӈока.«Сокровища Севера»ʼ выставка яʼ терˮ илʼ няюʼ ӈарка тарабцомʼ хаˮаврамби. Тодоʼ тэнзм мэтаˮ янаˮ тер ӈобтʼ нясламби. Ӈарка Россия янаˮ терˮ ненэциеˮ илаʼ саироˮ нямна лахананараха. Ӈэрмʼ няӈы илмʼ ехэранар танямна ядэроˮмахаданда илекавна манэˮмыда, намдвыда харта индаʼ серˮ тамна тяхакуʼ тохоламба пяӈгуда.Нюдяне Махакуйʼ падвы

Илма'' манэˮлабтамбавы''

<div class="content-lead">Нешадиˮ куше диԓимам, ӈамы няӈтуӈ таԓамам, нешаӈкнаˮ дёԓимяшоʼ намтдятоньшˮ. Таньнякуйˮ дяԓяханаˮ Пюԓ дяханана Хаԓяӈкаԓтыхит мэнаˮ веԓвˮ мансԓаӈашˮ. Ямална Законодательныйʼ Собранихина депутатӈӭ мэнаˮ, АПКхана, Ӈэԓмʼ чеԓˮ нешайˮ дет ӈайта департаментхана мансԓаннаˮ чуувна диԓинаˮ нешаӈкна дюничаԓяшˮ. Нянантоӈ маняˮ Пюԓ дяхатана мэнаˮ веԓвунаˮ дятыԓяшˮ, «Ямал-потомкам!» ассоциацихина мансԓаннаˮ.</div>Каԓпюԓ няна диԓинаˮ нешаӈкнаˮ дюничаԓяшˮ, «Верхне-Пуровский» совхоз четты ӈысыхана канӈашˮ. Нешаӈкнаˮ дёԓимяшуӈашˮ, дилтуӈ нямна дюничаԓьш куше диԓимамтуӈ, мансԓамамтуӈ нымтыпишˮ. Мэʼэвтатуӈ ватантуӈ тадяӈайтаˮ нешаˮ чики вачитуӈ веԓвхиˮ мэʼӈашˮ. Выӈкна чуувна диԓинаˮ, мансԓаннаˮ нешаˮ диԓтуӈ нямна мунуʼӈашˮ, ӈамыˮ тасԓавта шеԓутуӈ тадяӈӭймям вачаӈашˮ.Хаԓяӈкаԓтыхит томыˮ веԓвыˮ куԓка нятакома хома шеԓˮ Ямалханана тадяӈӭймям нешаӈкˮ кэтӈашˮ. Куше округханана выӈкна диԓинаˮ, мюшаԓтаˮ Ӈэԓм чеԓˮ нешадиˮ нятапёмамтуӈ вачаӈашˮ. Ямалхана ӈука программаˮ, нятакомаӈ дет ӈайта, тадяˮ. Выӈкна мюшаԓтаˮ, чуувна мансԓаннаˮ нешадиˮ ӈамыкот пуˮ тахана тэмташтуˮ. Нешаӈк мичиԓпечитуӈ ӈамыкутуӈ тэмсˮ ӈопшеԓ шичадюкат ваʼӈаˮ. Маняˮ Пюԓ дяханана нешаˮ пяˮ поӈкна диԓиӈаˮ, каԓитуӈ тытуӈ падиԓтаˮ куптамна нишʼтуˮ мюшаԓˮ. Каԓитанаˮ кукиˮ нешаӈиˮ ӈай хыԓаӈ пяй мякна диԓештуˮ, таԓям няӈтоӈ пяй мятуӈ шеԓташататуӈ ӈамыкуˮ таԓаштуˮ.Тэсамы нешаӈкна ӈай мыдю ватʼ — коральʼ таԓа. Тыˮ паԓтонхана шичиԓпёмантуӈ дёԓьшкана мыдю ватыӈ мюня тытуӈ няʼмаԓпёматуӈ хома. Нешаˮ таньдет ӈайта вачиˮ веԓвханаˮ муʼнушˮ ӈупчики мэʼӈашˮ.Чикиӈ камна чуки дилхана аппыˮ ӈокмаˮ, четаӈ халакоˮ понтуӈ шеԓ нешаӈ каԓнамʼ ниʼ пиԓюсˮ, ԓакан мятуˮ кӭйван тоштуˮ, тыˮ тэʼтапташтуˮ. Таԓям таԓьша халакуˮ пичипё мэʼэвта отпугиватель чуувна диԓинахана таԓа. Чикиӈ камна таӈичохона дячапётахана дяʼ каԓкомшту. Хыԓуйˮ нятаˮ, кысуйˮ дяˮ пӭйӈ пускохотˮ, аппыˮ тухутˮ тавсаштутˮ. Петаԓахана, нятасамы диӈкня тавсмы ту меԓ каптанана ниӈа. Ӈамыԓи туӈим ӈаԓкамана тавсманта неԓьня каптанаӈата, таԓям чуувна диԓина нешаӈкнаˮ тум каптапё мэʼтаˮ огнетушительˮ таԓаˮ.Нешаˮ веԓвханаˮ дёԓимяшоʼ ань деʼэмня ӈупчики муʼнуӈашˮ. Таӈ камна ӈашкиˮ тохоԓкумаӈ дет ӈайтаˮ шеԓуˮ, дяна чеԓˮ дечашамаӈ нямна ӈайта вачиˮ тасԓаӈашˮ. Нешадиˮ няӈтуӈ мэмыˮ вачеˮ Хаԓяӈкаԓтыхит мэнаˮ веԓвыˮ тат неԓьняӈ ӈокна тасԓандятуӈ.Таньше выӈкна, петаԓахана диԓинаˮ нешадиˮ мятуˮ таʼамна дятыԓма вивӈут округна ӈаԓка тэтаӈ комы. Маняˮ Ямалханана вымна мюшаԓтаˮ, чуувна диԓинаˮ, мансԓаннаˮ нешайˮ нятапёмаӈ дет тасԓёта «Дорожная карта» тадя. Нешадиˮ мэмыˮ ватаˮ чикинтуӈ дет таԓаныˮ. Чуки дилхана куԓкаԓиˮ деты шеԓˮ ӈычимштуˮ, таԓям таньше нешаӈкнаˮ дюничаԓма хома.Лариса Айваседо патмы

Нешаӈкнаˮ дёԓимяшоʼ дюничаԓяшˮ

<div class="content-lead">Лаханакуˮ вадеˮма сямян ненэциеˮ тэнзхана ӈулиˮ невхэт миндя серˮ. Тедаʼ вадёданаˮ ӈацекэхэˮ хурка таромʼ хаˮаврамбавандоʼ нямна Саляӈгардахана ненадо лахарёмʼ минрець.</div>Тэри ӈабцата лаханаку вадець, толаба тедаʼ тюˮуʼ миндя ненэцяӈгаˮна таранакы, нинякы? Тикыʼ нямна ненэй ненэциеˮ юнета няваˮ Елена Тимофеевна Пушкарёва, ОЦНКʼ манзарана Антон Владимирович Верещагин, «Няръяна Ӈэрм»хананаˮ паднана Алла Хосевна Вануйто ӈобнзерˮ ибедорӈаць. Лахарёндоʼ вэта яӈгода тоˮолхась, маˮлёвыˮ нинаˮ хусувэндоʼ вадеˮмы нюрцьмʼ тоˮолхась. Янаˮ терˮ вадеˮмыˮ индоʼ ядэрабцо «Радио России. Ямал» мутравна минхандоʼ намдоръядонзь.Елена Тимофеевна ненэциеˮ невхыˮ падарци иʼ ӈутʼ мэвыˮ ӈавоˮ нямна ӈока падармʼ тидхалевы, ӈока тарця сермʼ тенева. Пыда мале сян лаханакосавэй, сюдбабцсавэй, ярабцсавэй книгамʼ падвы.– Учёнойˮ манзаиˮ серˮ, яʼ сярʼ ний лаханакуˮ невхэт ӈобкад паӈгдёдарахаˮ. Тиканда ханяӈыˮ ненэцие вадетаˮ ӈобˮ тоˮолсархаˮ ӈэсетыˮ. Ӈарка Россия янаˮ яʼ тиӈгывна «Колобок»мʼ, «Курочка ряба»мʼ, «Теремок»мʼ, тамна ӈаниˮ малʼ теневыдоʼ. Ӈэрмʼ терӈэ вадетинаˮ ӈаниʼ сиˮив яʼ тяхамна юндоʼ ядэрӈаˮ: «Хорекохоʼ, Писякохоʼ», «Хутий», «Лынзермяʼ сэвʼ не», тамна ӈаниˮ. Лаханакуˮ ӈацекэхэˮна тарабцодоʼ ӈарка. Хусувэй ненэциеˮ тэнзхана небяда, нисяда вадёдана ӈацекэнʼ пилиˮ нерде вадець пэръядоʼ.Янаˮ ӈарданʼ тедаʼ ӈацекыˮ ныланаваˮ ялэдоʼ илекавна мадабавандоʼ еˮэмня хуркариˮ мэкад серо сертабиˮ. Салехардʼ маркана ӈэда ОЦНКахана ханзерˮ ӈэрмʼ терˮ ненэциеˮ илаʼ хари, мелʼ серо, пирдырмаʼ серо тохоламбвамдоʼ Антон Верещагин вадеˮӈадась:– Нянаˮ туртаˮ ӈацекыˮ хуркариˮ ӈэсь пэрӈаˮ, ханяӈыдоʼ ӈока лаханаку теневаˮ, ӈаниˮ ханяӈыдоʼ сабе ехэраˮ. Тюкона мэбтоʼ, Иван Истоминʼ падвыˮ толаˮмахадандоʼ нюрцьмʼ ӈэванда еˮэмня падтасетыдоʼ, тад пуна тикавнатоʼ мультфильм сертаба хорцетыˮ. Лаханакохоˮна мэнитоʼ вади хартоʼ вабцувнандоʼ вадеˮядоʼ. Тарензитоʼ ний хурка ӈэвамʼ ӈаниʼ манэˮлабтаӈгудоʼ, тикытоʼ серʼ хуркариˮ мунобцахаˮ хаˮмортаˮ.Антон Владимировичʼ вадавна, минрена манзаядоʼ ӈацекэхэˮна илекарха ӈэсеты. Тарця нюрцьмʼ серкана хартоʼ няхатоʼ намдвыдоʼ вадеман харвасетыдоʼ.Сяхариʼ тохолкода ӈацекыˮ сценаʼ нид лахана тохоламбасетыдоʼ. Тикахана ӈацекыˮ хартоʼ лаханаку манэˮлабтамбадаӈэ тарасетыˮ. Сё-Яха хардахана тохолкодиˮ минрена тарця сермʼ Алла Вануйто тензебтедась:– Ӈацекыˮ воспитательтоʼ ня «Лабтэйко» театрахана хуркариˮ лаханаку манэˮлабтамбиˮ. Нердеʼ сиддоʼ табэдамбадитоʼ няʼ лаханакохона мэнитоʼ вади тохоламбвандоʼ серʼ мэˮманда панэдамдоʼ сэдабиˮ. Тарана хамэдяртамдоʼ ӈобнзерˮ сертабиˮ. Спектакльʼ мальӈгана артистӈэ таранаˮ няндоʼ сырманзь товыˮ нитоʼ едʼ варемдоʼ мэцетыˮ.Алла Хосевнаʼ вадавна, пилиˮ нердеʼ ӈацекы илʼ хурка ӈэвамʼ лаханакохот тасламбида. Намдвэхэтата вэваˮ, саваˮ серо таняд тэраба тохода.Илʼ ханзелиˮ несэйворпата ӈодˮ лаханакуˮ ӈацекэхэˮна тарабцодоʼ тедарихив тамна таня. Пыдоʼ хуркаривна таремʼ вадетаку ӈулиˮ харвобтэйдоʼ. Тиканда невхэт ӈадимыˮ лаханакоци ӈацекэхэˮ вадеˮма, толабава сяхариʼ сава.Нюдяне Махакуйʼ падвы

Лаханакуˮ тарабцо

Сидяӈг: Марина Ярʼ  тадтавы

<div class="content-lead">Пилюʼ ирыʼ юкад вата няхаромдэй яляхана Красноярскʼ маркана мелˮ ненэцяˮ 21 Международной выставка-ярмарканʼ «Сокровища Севера» нюбетанʼ маˮлыдаць. Тикы яляхад тамна сидя фестиваль «Кочевье Севера» няби «Полярный стиль» ӈэӈгухуʼ.</div>Россияʼ янаˮ тиӈгэхэд сидя юдʼ яхад няхарˮ юрˮ мян мелˮ ненэцяˮ таняʼ ӈобтʼ тэввыдˮ. Хуркариˮ илекаˮ серодоʼ Красноярскʼ маркана «Россия» национальной центрахана мэць пяйдонзь. Хусувэдоʼ манэˮлабтярӈэ харта янда нямна ӈэда ӈавори тэвравыˮ. Ётоʼ нямна вадеˮмандидоʼ етя таняʼ таславы стендахаˮна ӈаˮ. Тикахана ненэцие паскойвана сэдвыˮ ембдяро, падтавыˮ ӈамгэри, сертавыˮ сянаку манэˮлабтамбиˮ. Тикыʼ хавна ненэциеʼ илʼ няюʼ таранаˮ серˮмана конференцияхаˮна лахарю мэтаˮ. Ханяӈыˮ хартоʼ яндоʼ мысыдовна сёдоʼ , тарабцодоʼ «Кочевье Севера» фестивальхана манэˮлабтамбаӈгуˮ. Ембдяроˮ фестиваль «Полярный стиль» таняӈгу.Пихиня, Енсяʼ яхаʼ лаӈгʼ няюʼ ӈэда пулʼ ядувна ямб ӈысы паллы, нюмда «Кочевое стойбище». Тикахана хуркариˮ ненэциеˮ тэнзˮ иле мэтаˮ мядˮ таняˮ. Ӈэрмʼ терˮ илмʼ ӈадимдембада ӈарка выставканʼ хибяриˮ турць пирӈадоʼ. Пыдоʼ танянандоʼ ӈэрмʼ няӈы илʼ саиро хурка ӈэвамʼ манэць, намда ӈаниʼ пиртаˮ.Туртиˮ еˮэмня маˮлёвыˮ нинаˮ мякататоʼ тэвравыˮ мастер-классдоʼ сертабиˮ, выставкитоʼ серʼ экскурсияˮ мэˮӈаˮ. Ӈэрмʼ яʼ тиӈгэхэд тэвравыˮ ӈамняладаˮ ӈавар хорпиˮ.Ӈокаˮ ненэцяˮ нидоʼ ядабтамбаваʼ пудана яляханандоʼ помнандоʼ ёʼ терˮ ёрасˮ ӈэвандоʼ нид нитоʼ ӈудиʼ няˮамхаяʼ ӈарка сюрхалмʼ сертаӈгуˮ.«Няръяна Ӈэрм» газетанаˮ терˮ ӈаниʼ таняна мэˮ. Толаӈгодинаˮ еˮэмня сава юне маˮламбиˮ. Тедаʼ ӈадимдембада сидяӈгахананаˮ мале сян поˮ тяхана ӈэвы серо маниедаˮ. Тад ӈадиманда номеркана едэй юндамдаˮ ӈатедаˮ. Еˮэмнандаˮ паднаӈгуваˮ.Вануйто Алла&#x27; падвы

Няръяна Нгэрм

Публикации автора