Сидяӈг: Марина Ярой’ тадтавы

<div class="content-lead">Нярьяна Маркана «Илебц» нюбета ненэцие’’ театр едэй спектакльм’ манэ’’лабтась. Яна’’ тер’’ ДК «Арктика» нюдя’ лохохона ма’’лыць. Тюку мэвахана Нина Валейской’, падтаӈгода няна’’ падвэвна иле’’мям’ сертавыць.</div><p>Спектаклян’ товы’’ лэркабт’ ваеравы’’ 1950-60 похо’’ еремяць. Невхы Няръяна март’ тэввыдаць. Сырта’’ Ксения Валейской’ маркы илесь лохона ма’’лыць.</p><p>— Ама, тюкона пыдари’ Нинанд ня’ илеӈгуди’. Хардава’’ Печора яха’ вархана ӈа, порт хахаи. Иле лохова’’ нюдякоця ӈэбта ӈод’’, сомбой, — небянда Ксения лахана. — Мань тохолковами ёльцеб’’ни тара, пуна ханяна манзаравахадани ехэрадм’.</p><p>— Мань илева’ ямбан’ хойхана мюсерӈадамзь, теда’ маркана иленаӈэ хаядм’, — янамбоковна Иринья хада лахана.</p><p>— Ама, тюкона хой ни ӈа’’, ӈани’ сава хибяри’’ иле’’. Хэвханана’’, тайкуй лохохона луца’’ мяд’ тер’’ иле’’. Енадм’, пыдара’’ нида’’ торумдаӈгуда’’...</p><p>Тарця’’ вади’’ хэт’’махаданда Ксения тоходанаванзь Ленинградан’ ӈэдалэй’’. Маркы мякнанда Нина не нюда хаданда’ ня’ хаихи’. Спектакльхана сянаковы’’ — Ксения не нюнда не ню, Нина (Ева Лочехина), Иринья хада (Надежда Талеева) — нюртей ӈадимзь сеян’ мэёвна тебӈаха’. Нюртей, я’’авлада, мерета некоця, ӈацекы ӈэвада ӈади. Нябиюм’ — хада, ва’’лёй, иланд’ мэёвна сырта, илам’ теневана не. Пыди’, сидяӈэ ӈоб’’ то’’олсаха’, хуркари’’ серк’’ ереберпати’, нихи’ выдараӈг’’, ханярид сававна тарпорӈаха’.</p><p>Хойхад март’ товы некоця’ илаӈгана хуркари’’ ехэрана’’ сер’’ ӈокамданасеты’’. Ӈоб’’ пиркана едэй паской тоемям’ ид’ вархана халтамбихинзь. Тикамда тырабтаванзь тибей харад’ ни’ иладинзь, хардахананди’ лата ӈолепятабихинзь…</p><p>Театрхана сянакода’’ мал’ пэдаваць, спектакльмдо’ сававна минредонзь. Тикахана сянаковы’’ — Ксения — не ню Наталья Канюкова, нянда хасава ню Саньча — Александр Терлецкий, хэвхы мякана илена — Василий Корепанов, тамна ӈани’’ сянакода’’ нядаӈгуць. Сырманзь товы’’ тарцям’ мание маймбиць, письӈаць.</p><p>Ӈэсыхыд март’ илеванзь това нензел’’ ни ӈа’’. Хардахана иле лохоком’ хамадамбава, мяканандо’ хойхад товы’’ мядонди ядабтамбава, тамна ӈани тарана сер’’ — тарем’ ненэциена’’ ехэрана илам’ торомдамбиць. Ӈобкана ныланавандо’ ёльцяӈгана Николай Епифановской аккординсавэй’’ тованда сер’, сырмы’’ хибяри’’ янамбовна ӈобкана сём’ ханаць.</p><p>Сянаковы’’ нина’’ невхы’’ похо’’на маркана илевам’ няна’’ манэ’’лабтаць. Ненэся ӈод’’ тамальӈгана ил’ тарцясь. Спектакль ваера’’махад ненэця’’ тамна пон’ лаханакурӈаць, артистха’ ихид минда’’ вадидо’ хэтыбиць. Хусувэдо’ ихинанда ӈопой ялян’ ӈэб’’нанда ӈод’’ невхы март’ ереман’ харвась…</p><p>Ӈарка вадам’ «Илебц» манзаям’ нерня’ минрена’’ нина’’ намдаць.</p><p>Автор: Юлия Талеева’ падвы</p>

«Хада»’  иле’’мям’ манэ’’ӈаваць

Фото: Андрей Пяк / Няръяна Нгэрм

<div class="content-lead">Дилта дямпан мансԓамы. Ӈука ӈайватам хайму” нятапёшь мэштомай. Екатерина Аучевна Пяк 1930 похона дяԓяманымы. Ӈаԓка дяна чеԓ” хэлаку” ԓусаха”на хайноԓьш чепьмахана  Екатерина Аучевна ӈуп’дяӈкня пота ӈаймай.</div><p> Кыдипёш каймянта неԓьня веԓкԓата Ӈайвашата ӈаймай. Каԓпюԓ няна выӈкна диԓимай. Хайноԓма похо”на неша” писамэй мансԓаштомай”. Ниӈашки’уди ӈаԓка нета нятапёшь каԓиташтомай, тыхуԓьштомай, каньдяштомай. Ӈука каԓяхана дёԓиԓмантуӈ мэты Тазовский’ губаӈ нядём ӈанохана дямташтомэт. Дямкна дёԓеԓьш катамайтуӈ каԓитуӈ, вомантуӈ тай”хана пяй” бочкаха”  хыԓуташтомытуӈ. Таԓьша ӈайватам мя’кна мэна” неӈи”, ӈашки” падеԓьштомытуӈ.</p><p>  Хыԓутамантуӈ неԓьня ӈукадя’ай каԓитоӈ пяй ԓапты мюӈ мышчеш викна каԓташтомытуӈ. Хэԓьдя’ай, кынюй каԓи” калтампёш ӈуча каньняштомай. Таньше дяԓи” тахана мансԓаш дёԓьше вытаԓаштомай.  Нешади” хыԓутамы” каԓи” ту’ӈанохана Хаԓяӈкаԓтан канаштомытуӈ”. Ту’ ӈануӈ  чудишатат пят ӈупчики неша” матуԓпёштомай”. Тай”ня чики петоӈ каԓват” дёԓьшат тыӈ канхана тайваштомытуӈ”. Хайму” нятапёшь ше’эмна мансдям падеԓьш” Екатерина Пяк ӈука чок’ коштомай”. Каԓитана” нета нятапёманта камна хайноԓьчи” панэт хайтуԓаштомай, хайму” ӈамԓат ӈочи” тыпёштомай”, тутыку” ӈомтапёштомай”.</p><p> Хайноԓьш хитама похона Екатерина Аучевна хампԓяӈк’дяӈкня пота каймай. Ӈаԓмахатата, кыдипёш каймяхата, колхозхана мансԓанна” вӭкомта нятапёштомай.  Хайноԓмаӈ пут неша” ӈупчики ӈука мансдям шеԓташтомай. Екатерина Аучевна коԓхозхана мансԓаманта путы «Верхне-Пуровский» совхозхана мансԓаӈаш. Хайноԓмаӈ дёԓьшкана хомана мансԓаманта де’эмня куԓкаԓи” медалюта”, патԓота” веԓву” мимы тадя”. Чикита” камна нита хомана ватаманта де’эмня ня’аммайта медальта тадя.  Четаӈ пуша каԓтыхина нюхуната мэшту, ни’та ню’увдехе” майпёшту.  Хайноԓьш нэхэԓма дяԓяхана Екатерина Пяк мят Пюԓ дяханана ӈайта «Ямал — нюна дя!» нимита ассоциацихина мансԓанна”, Ӈэԓм’ чеԓ” нешай” дет ӈайта Советхат мэна” тоӈаш”. Катантуӈ мячисэт миӈаш, нянанта дилта нямна мунуӈаш”.</p><p>Автор: Андрей Пяк патмы</p>

Мансԓа хайму” нятапёмы

Сидяӈг: vk.com/ottokote няд ханавы

<div class="content-lead">Окотэтто Альберт — яна’’ тиӈгэвна юнета илебей ненэць’. Пыда сёётэй ӈэванда хавна тамна сёбар’’ серо нерня’ тидхалемби. Ӈани яхана илебата ӈод’’ соя’’ма’ ямда нида юрыбю’’. Ханяри’ тэворпата, Ямалхад ӈэвамда етри’ вадецетыда. Ирината ила’ саирм’, ненэй вадамда ныхында ӈарамдамаӈэ мэта то’’олхыда.</div><p>Тандая’ няданда ӈани’ едэй юнм’ намдаваць. Россия яна’’ ӈарка маркад Ямал’ няю’ тованзь мэ. Тэри вуни ядаӈгу’’ — варемда мэць сюрмбаӈгу. Ӈопойриӈэ мэё сехэры’ ядувна Ӈэрм’ ня’ нэкалтада.</p><p>— Сава нини’’, маӈгты’’ иры’ нюртей яля’ Москва няд Ноябрьскан’ пяӈгув. Сехэрэни ямбдада 3200 км’ пир’’ ӈэӈгу. Хусувэй яля’ 55 — 60 километрм’ пирдалембаӈгудм’. Нянани хонё мэта’’ ӈаворини’’, ӈаврани’’, имбытадони’’ содаӈгудм’. Сюрберць мэта «коляска»’</p><p>мю’ мэӈгун. Москвахана сямянхат ненадо Красная площадь нюбета яхад сюрмбаӈгудм’.</p><p>Ты’’ ниць иры’ 18 яля’ интернет’ мутрам’ няд’’мяць таславы серта нямна лаханась:</p><p>— Си’’ми ненэця’’ етри’ хонрамбасеты’’: «Сюрбермар тикы ӈамгэ? Нянанд хурка тарода таня? Ханяд тарця иӈудм’ хосан?» Мань теда’ няхаромдэй мэва’ сюрмбаӈгудм’. Нюртейвана 2022 похона Нядаӈгардахад Саляӈгардан’ тэвыдамзь. Сёбар’’ тарця сюрберма’ тэнзм’ «ультрамарафон»ӈэ нюбе’’ӈадо’. Тамальӈгана ими ядэр’’ӈась: «Тамна ӈамгэм’ серта сава ӈэдакы? Тарем’ Харпхад Ноябрьск’ ёльцянд’ вэӈгалёда’’ сехэрым’ пирдале тасладамзь. 2024 похона нябимдей мэва’ сюрмбидамзь. Ямалм’ ӈарханда сюртена то’’олхав. Теда’ соя’’ма яхани Москва’ няюд тутадм’. Тарем’ ненэй ненэцяӈэ невхы илаӈгад мэбе’’мава’’ ӈадимдембидм’.</p><p>Лахарёмда ӈарханда намдаван харвабата’’ Альберт’ страницахана хоӈгура’’. «Няръяна Ӈэрм»хана ханзер’’ сюрмбавамда тамна падыбаӈгува’’.</p><p>Автор: Галина Кинчина’ падвы</p>

Вырэй ненэць’

Фото: Алла Вануйто / Няръяна Нгэрм

<div class="content-lead">Нарэй’’ ялэта няю’ пяхава я’ нийм’ хаер’’ юдаба пяда. Нув холморта пэва’ сер’, еси холкана, варю ӈадима’ сер’ ядембада’’ яхат нув’ сармик’’ ёндалцетыд’’. Тиртя’’ то’’махад ӈэрм’ я’ тер’’ хурка тэтнабнандо’ ӈо’’ ханева’’ няю’ хамекулыд’’.</div><p>Тев’ ёльцяӈгана ед’ терӈэ ты’’ ӈамзари’’ ни’’ томд’’, тад ӈо’’ тым’ яхаб’’ нарэй хоба’ тарта вэва, ӈамгэхэртаӈэ нир мэӈгу’’. Ид’’ хэва’ нерня халям’ ӈани’ нин ватаӈгу’’, холкаӈгана’’ сэр’’ поӈгарць тосакабты’’. Тиканда хане ховы’’ ӈамгэхэтато’ ненэця’’ едадо’ тердембидо’. Ханяӈэхэ’’на тарем’ мюлехэя сэратавы’’ нув’ сармик’’ ӈамзи нюртей ёрмито’ ӈэсонд’ ед’ терӈэ пэрцетыдо’. Хусувэй по’ ӈэрм’ тер’’ я’ тиӈгывна тарем’ ханесэйм’ пэрӈа’’.</p><p>Ямал’ яханана’’ ханевам’ минрена’’ ненэця’’ мале ӈока’’. Ӈоб’’ тарцям’ харвобтана — Василий Нэкович Окотэтто. Пыда Ямал’ няна иле, Сё-яха’ харад’ тер. Ӈавнанда, илебей ненэць’ ӈэванда мальӈгана ты’’ лекар’’ манзаям’ минревы, хой’ няна ӈэсыхына мюсермы. Армияхад то’’махаданда хардан’ илелмы’’, тикахана пенсиян’ хэванда ӈэсонд’ манзаравы. Теда’ си’’ив юкад вата понда ӈэб’’ ӈод’’ ханеванзь хамеку.</p><p>Тикы нями лаханакурць ня’’ӈавась. Василий Нэкович нюдя ӈэдаханда нисянда ня хане ядэро’’мида тензебтембись. Вадавнанда, хусувэй ханева’ серо’’ хараха’’ сита нисяда тохолавы. Пили’’ нюрте’’э’ ӈавлад’’, ӈамдлад’’, я’ ваӈг’’ ханзер’’ хамэдамбвам’ тамальӈгы манэ’’мэда. Тикы’ хавна нисяда поӈг пядыба, есӈо мярыба, яӈго ӈабтамба, туним’ мэць тохоламбавэда. Тамальӈгы’’ нерденя’’ ханесэхэта майбавамда сававна тенеда.</p><div class="content-new-image"><img alt="pic" src="https://storage.yandexcloud.net/ym-sites-static/c0d2197a-9f2.webp" style="width:100%" height="708" width="1260"/><div class="content-image_child">Фото: Алла Вануйто / Няръяна Нгэрм</div></div><p>Ябда хане’’махадандо’, ӈысын’ тэвбато’, ханесэйдо’ тярпавыдо’. Хаця ӈарво’’махаданда харта мята тер’’ едм’ пандабадаӈэ хэвы. Сидя хасава нюндя ӈарво’’махад нюхуюта ня’ хане ӈоб’’ ядэрманзь хан’’ӈа. Ӈавна нисянда ваде’’мы’’ табеку сидя илебей ненэцянд’ ӈани’ тид’’ ваде’’яда Ӈобтикы вада, сидя ӈармы хасаваха’ нисяхаданди’ ханевам’ тохолавэди’. Харти’ теда’ вадёдана’’ хасава нюди’ ӈани’ ябто’ мякана ӈамдё тохоламбиди’. Тюку нара’ ӈоб’’ мяд’ тер хасава’’ ӈобкана ханеӈгу’’, ӈани’’ пото’ тотрев’ таславы яхандо’ ханда’’. Таняӈы яхана ханена’’ хусувэндо’ харто’ ёдо’ таня’’. Ядандо’ тэрабадидо’ хуркари’’: яра я’’, яха’ моӈга’’, яха’ ня’’ав’’, хасрё’ то’ хэвхы’’. Тарця’’ я’’ тирти’’ мин’ ӈылна ӈэбто’ серо’’ӈа’’, тарцяха’’ нув’ сармик’’ лакамбой’ хадырманзь ӈамдалӈга’’.</p><p>Лаханакурць ня’’мы няни, Василий Нэкович’ вадавна ханева’ ёльцянда таня. Хусувэй ханёй ненэць’ ханзели’’ ябдаб’’нанда ӈод’’ еданда тер’ тяхамна ваць ханебата ни серос’’. Маӈгты’’ иры’ пэхэва, нув’ сармик’’ пидяхато’ ӈамдвандо’ нерня, хасава’’ хане ӈэвадаӈга’’. Теда’ иры’ падаркана нарэй ханева’ ёльцянда таславы, хусувэй районхана ӈопой ю’’ яля ябто’ мякана мэсь серо’’ӈа.</p><p>Ӈарка няна’’ вадавна, неноховавна якоцява’’ сямбана’’ тара, ядэро’’ма’ пуд я хабтокоцяӈэ хаебада. Тикы ӈармы нява’’ ӈацекэхэ’’ табекуда ӈоб’’ ваде’’яда:</p><p>• хусувэхэна тоса тара;</p><p>•ханева сянакубц ни ӈа’’;</p><p>• мирвхад юрхалӈга вэва — таслава селина туним’ мэць тара;</p><p>•тароси’’ тиртявна енерць вэва.</p><p>Ти, тарця хэбицюку сава лахарём’ ӈармы нями няць минревась. Ханева — ӈэрм’ тер’’ ӈыхы ӈадимы серто’, тев’ тенд’ нарам’, ябто’’ мун ӈатейдо’. Теда’ вадёдана’’ ӈацекы’’ ӈарка нито’ табекохо’’ инзелехэвабто’, нув’ сармикавна енерта’’ хасев’’ туни’’ пенд тамна пон’ намдортына’’, мяканана’’ ханесэй’’ ӈамзахат една’’ панта’’. Невхы илна’’ саирм’ нерня’ тид’’ минреӈгува’’.</p><p>Автор: Алла Вануйто’ падвы</p>

Нарэй ханева

Сидяӈг: vk.com/assoc.yamal_potomkam

<div class="content-lead">Сэр’’ варк’’ илесь’ ёдо’ Итя ӈабтеня’ няна ӈа. Ханяӈы’’ Я’ мал’ тер’’ ӈахат танямна мюсерӈа’’. Невхы’’ похо’’на сэр’’ явым’ ханедаӈэ мэ’’мэдо’. Тарем’ яӈга явэнзь ядэрмы’’. Едэй илаӈгана тарця ни ӈа’’. Тикы я’ сармик закон’ вато’ сер’ лэтрамбада. Ненадо «Красная книга» нюбета падаркана пады. Ӈадьбята ханедаӈэ ни толю’’.</div><p>Варкм’ тунихина ядаб’’, хадаб’’, ненэць’ серт’ еремда. «Ӈэсы’ хэвхана ӈадимбата, ненэцяӈг’’ хавыдабта, тэри пиде тара. Сармикм’ хареба нядна’’ ня’’амвы’’ мирв мэ’’ӈада’’. Тикы’ пуд неноховавна хардан’ палытанаха’’ юнм’ ӈэдабтаида’’», — тарця’’ табекодамдо’ вы’ тер’’ «Медвежий патруль» тохолковам’ минренахат намдавы’’.</p><p>Ямальской районхана мат’’ ю’’ пир’’ мюсерта ненэця’’ тохолкурмы’’. Теневабцудо’ тад нерня’ няд’’маӈэ мэтыдо’, мято’ тер, тыдо’ пинкабтада сармикахад лэтра пиртыдо’. Сиддо’ тохоламбадидо’ няць хусувэй ӈамгэм’ харакута сер’ таславы’’: мят’ товы сармикм’ ханзер’’ вэнолтамбаӈгудо’, тэхэто’ тэввы’’ ӈэбта, ӈани’ ханзер’’ пидебаӈгудо’.</p><p>Палытанахат мирвдандо’ ӈока ӈамгэм’ ня’’амвы’’: ӈарка’’явана мунота’’, пендерта’’ граната’’, ракета’’, фальшфейер’’ (ямбалюй’’, табцамбада’’, лэёмбада’’ серакабт’’), ӈарка фонарь’’. Тикыдо’ мяк’’ товы явым’ пидеба мэтыдо’. Тэри ӈапрамба хубта ян’ танаӈгудо’.</p><div class="content-new-image"><img alt="pic" src="https://storage.yandexcloud.net/ym-sites-static/a200589f-47e.webp" style="width:100%" height="885" width="1575"/><div class="content-image_child">Сидяӈг: vk.com/assoc.yamal_potomkam </div></div><p>Хасава’’ хавна не’’ ӈобтикы таняна мэвы’’. Пыдо’ яв’ варк хареба мэта мирв мэць ӈани’ теневаӈгу’’. Выӈгана хасевто’ тэхэ’’на мэб’’, ӈани серото’ нямна ӈэдалёрпато’, не’’ харто’ хаюрць ереберцеты’’. Ӈадьбято’ сармикахат ӈацекыдо’, мядодо’ лэтрамба ӈани’ тохолкурмы’’. Сяхари’ мая’ хадкэб’’, ракетам’ мэць, серакабт табцамба харто’ пиртадо’.</p><p>Яӈга ненэцяӈг’’ ваде’’мэдо’: ханзер’’ палытанаха’’ юнм’ ӈэдарамбаӈгу’’. Хадёлевы таняб’’, лекар’’ това’ нерцюна лекарабтаӈго тохолкурмы’’. Тикы’ е’’эмня таславы терсавэй пардонто’ ӈэся’’ таняӈгу’’.</p><p>Пудана по’’ сэр’’ явэ’’ нямна вэва юн’’ етри’ танясеты’’. Тунисяда’’ ненэцяӈга’’на ёльце тосакабты’’. Ӈадьбята теда’ ӈэвы тохолкова ӈули’’ ӈарка таром’ минре. Тарем’ Ямалханана’’ «Медвежий патруль» проектм’ няд’’мяць мюсерта’’ ненэцие нядаби’’. Тикы’ хавна сянда сармикм’ лэтрамби’’.</p><p>Автор: Галина Кинчина падвы</p>

Сэр’’ явэхэт лэтрё тохолковы’’

Фото: Марина Яр / Няръяна Нгэрм

<div class="content-lead">Ты’’ ниць ирыва’’ ерканда тэвы’’. Яханана’’ нумда саць ӈарковна ибе’’мада яӈгу. Пыв мерця яля’ сятора, сада пи’ ханьхана нянзико салаба тондабида. Холкаван’ харвавы сыра пи’ тяха’ мэё парандэйӈэ хан’’ӈа’’. Я’ хоба ёльце падвэӈэ хая. Варё’’ ӈокворӈа’’. Салабам’ наволпада мерця минда сахавор’’ӈа. Тарця’’ помна сэр’’ сыра’ нимня нянзико’’ тобато’ ниня паридена’’ су’’ляко’’ нявотарць варемдо’ мэ’’ӈа’’.</div><p>Тюку нини’’ ӈыхы похона торомдэйнась. Нюна’’, нюна’’ нюсавэй’’ теневына’’. Сава юрёни’’. Сава ня ӈэхэваб’’, нина’’ теневабцова’’ ненэця’ вадырӈэ хая. Мякандо’ по’ сидя вэкна сохо таняб’’, тэворцетыдм’. Помнана’’ ваде’’мандава’’ ӈока ӈэсеты. Теда’ ӈод’’ таславы яляхана мято’ няю’ нэкал’’ӈаваць. Саляӈгардахад Саля явм’ тяха’ няю’ мада’’махадана’’ мале пон’ ӈэдалываць. Машина таславы ян’ сидна’’ тэврась. Таняд сидна’’ хосаяванда нява’’ сенасяда нумгана сехэры’ ядхана ӈатеваць. Пон’ ниваць ядэр’’, ӈамгэ’ пиркана еся хан’ хырнам’ намдаваць. Малкось’ вэнекомда пэмба нява’’ тикавна писянзь ӈадимясь. Таняд Лаптандер’’ мяд’ няю’ нэкал’’ӈаваць. Ӈамгэ’ пират ӈэдалё’’махадана’’ ӈоб’’ ӈарка мяд нерна’’ няд ӈадимясь.</p><p>Николай Егорович Лаптандер мята ядхана сидна’’ ядабтась. Пыда ӈыхы сэвта сыла’’махад ӈавкыда мание. Теда’ «Салехардагро» предприятийхана мале сян по’’ ямбан’ ты пэртяӈэ тара. Хабте’’ таркосавэй’’ ня мякнандо’ ванвыць. Ӈавор’’мана’’ сер’ маня’’ помнана’’ иландо’, тыто’ нямна лаханакурӈаваць.</p><div class="content-new-image"><img alt="pic" src="https://storage.yandexcloud.net/ym-sites-static/9e9f1fca-6b6.webp" style="width:100%" height="1329" width="2362"/><div class="content-image_child">Фото: Марина Яр / Няръяна Нгэрм</div></div><p>Тована’’ мальӈгана ты’’ ниць иры’ хасаваюдимдей ялясь. Нердена’’ вадина’’ саю мардавы’’ иринана’’, нисянана’’ нямна хаяць. Мани’ Николай Егорович’ ня’ нисянани’ хэбидя’’ похо’’на манзараӈаханзь. Халям’ пэрӈаханзь. Хусувэди’ харта яхананда ӈарка таром’ ха’’аврамбись. Тамальӈгы’’ манзара’’ма’’ подо’ ӈобкана тензебтейнаць. Маня’’ ненэй ненэцяӈэ ӈани’ ӈарка хэбидя таром’ ха’’авраваць. Мале сенз похона нисяда, Егор Тимофеевич, хасава нюмда ты’’ илам’ мэне табедамбавэдась. Тикы ватом’, нисянда табеко тамна нёдэйда.</p><p>Харта ӈод’’ Николай Егорович вы’ илам’ техэ паӈгхаданда теневавэда. Лахарёва’’ тарцясь:</p><p>— Тюку предприятийхана ӈока соходо’ ӈысма’’ манзара’’. Ненэй ненэцяӈэ маньрина’’. Нянана’’ харе’’ мяна’’ терри’’ мэ’’. Ӈэсыхынана’’ сидя ёнар’’ тэва’’. Тюкона хабтона’’ ва’’ны’’. Ӈысма’’ я’ ӈэхэртабта недармидо’ нюртей тована’’ мальӈгэхэд нина’’ нюракус’’. Ӈабцата нива’’. Хар’’на’’ недармина’’ таминна’’ пяваць. Ӈысма’ ӈэдалёва’ мюмня ненэй ненэць’ хэсь я’’маӈгуда. Пыдо’ ӈопой яривна ӈэдалы’’, сехэрэда ӈамгэри пензя’ ваӈгӈэ хэя, сяхаӈгарт’ хэвнямна ни’’ ӈэдалёд’’. Тикаримдо’ нёдаӈгу’’.</p><p>Автор: Марина Яр падвы </p>

Таӈы’’ мэлвахато’ пядо’

<div class="content-lead">Нум дюпяма, дяԓя’’ димпума’’. Выӈкна нешиӈ ӈайватата ӈука. Чуувна диԓина’’ ненэй неша’’, капи’’ чейня мансдятуӈ ӈокамшту. Мюшаԓта’’ неша’’ таӈичохой мэнԓматуӈ дётэхcтуӈ кан’нутуӈ, ӈамԓотуӈ тайвашту’’.</div><p>Ты’’ падеԓьш, каԓиташ мансԓамантуӈ камна, неша’’ мя’кна ӈайвашту’’. Таӈи пуӈ дет каматаштут’’. Дюԓнуй наԓакохона канну’’туӈ пят пенташту’’, тунтуӈ пят тыӈ канхана тайвашту’’. Вcку’’, пуша’’, неӈи’’ меԓ дюԓкикана, хыԓанта мыдюӈайтан пудюԓоньш кcшту’’, ваԓамантуӈ пят пюԓьшту’’. Ни’’ ваԓанаш чепяшту’’, пятуӈ матуԓпёшту’’, пайташту’’. Ненэй дилхана мансдя ӈука. Шаӈкмян ӈамыдётоӈ чуувна диԓина’’ нешаӈи’’ каԓьтуӈ нэхэха’’натуӈ, каԓьтуӈ ӈутаха’’натуӈ шеԓташтутуӈ.</p><p>Четаӈ ӈаԓка чешчи’’ хитамахат, дяԓи’’ димпумахат куки’’ неша’’ тытуӈ дянямтампёшту’’. Кcхcтана’’ тытоӈ дянаку’’ ты’’ поӈт нютԓештутуӈ, тай’’ня таньше тыӈ кан’нан тохоԓаштутуӈ. Шетшата кан’хана мэта тэӈи’’, дяԓяӈ дямпхана ӈайтаԓёш мэп ӈотнаӈ, меԓ вы’ни нэшаԓамт. Ты’’ падеԓьш мансԓанна’’ дячи’’ вачумаӈ неԓьшуна кысуй, хома дян дямташтут’’. Совхозхана тэхэ’’на мансԓанна’’ чейня, ты’’ вачумаӈ неԓьшуна тытуӈ ӈысы дяԓи’’тахана ӈомтапёштутуӈ. Дячитуӈ ӈатан, ӈука ты’’ кам тэԓаштутуӈ.</p><div class="content-new-image"><img alt="pic" src="https://storage.yandexcloud.net/ym-sites-static/96225c5f-af6.webp" style="width:100%" height="1229" width="2183"/><div class="content-image_child">Таттама: Андрей Пяк</div></div><p>Ты’’ вачутанԓап, мансдя тадёмшей ӈокамшту. Ходю’уди’’ дёхомаӈ тайхана, неша’’ тытуӈ писамэй веԓаштутуӈ. Пя’’ поӈкна диԓина’’, каԓьтуӈ тытуӈ падиԓта’’ куки’’ неша’’ кcхcтана’’, ӈатан нятуӈ кам кcштота’’ тытоӈ пяташтутуӈ. Таньше пятамы’’ ты’’ куптаӈ ниш’ту’’ кай’’. Тыӈпям мевштатуӈ пятуӈ ӈупчики чейня пенташту’’. Дяԓи’’ дячамахат, вай’напташ чепьмахататуӈ тытԓи, неԓьшут пентамайтуӈ пяхататуӈ, миԓьш чепяшту’’. Ни’’ ӈупчики ӈука ӈайватам мэшту’’: кастамытуӈ пенитуӈ, коптуӈ мэдяпёшту’’, хайтуԓашту’’.</p><p>Таԓям четаӈ таӈи пуӈ дет неԓьшут каматы. Шиниӈкуна ӈаԓка’’ неша’’ маньштомай’’: «Ӈамыԓи нешиӈ неԓьшут хомана ӈанатанай, тай’’ня таӈичомта неньшаԓмана  матанаӈата».</p><p>Автор: Андрей Пяк патмы</p>

Таӈи пуӈ дет каматы’’

<div class="content-lead">Чуки пома’’ — дечашама пуӈc тунԓы, Ямална ӈаԓка веԓв таньше тасԓамы. Дечашама — ненэй ӈаԓкамана нешант таԓа. Чуки ноптухуна куԓкаԓи’’ кавша’’ ӈычимшту’’. Ненымана тавсуԓта’’ деча’’ вайма’’. Пу’’ тахана ӈука тэмс неша’’ тонԓакота’’ дечахана’’ канынԓаштут.</div><p>Таԓям’ лекԓы’’ выӈкна диԓина’’ нешаде’’, канаԓмантуӈ тайхана, неԓьшут паԓтонхана шичиԓпёштутуӈ. Наԓаӈ Таԓкахай лекаԓ’’ мя’кна мансԓанна’’ нешай’’ ӈысы’’мана дятынԓаштут’’. Ваԓныӈ диԓихина чуувна мэна’’ нешади’’ паԓтонхана шичиԓмантуӈ мэты, лекаԓ’’ чиԓта кан’хана мяту’’ та’амна чиԓяш’’. Кот’’ дечахат, кыӈкуԓу’’ дечахат’’, ӈыди’’ тавсуԓта’’ кавшаӈкат’’ выӈкна диԓина’’ нешади’’ шичиԓпитоньш. Шичиԓмантуӈ неԓьня нешаде’’ конԓаштутуӈ, нянатуӈ каныԓмантуӈ нямна дюничаԓьшту’’. Ԓаттуӈ, шейнтуӈ деч’’ дет дюньшиԓюԓьшту’’, шодютуӈ манэшту’’. Кимя ни’ канэԓ, таԓьша нешинԓим паԓтонхана ши’шту’’.</p><div class="splide slider-module-serializer"><div class="splide__track"><ul class="splide__list" style="width:100%"><li class="splide__slide" style="width:100%;height:auto"><img src="https://storage.yandexcloud.net/ym-sites-static/32271535-f68.webp"/></li><li class="splide__slide" style="width:100%;height:auto"><img src="https://storage.yandexcloud.net/ym-sites-static/238b6661-e74.webp"/></li></ul></div></div><p>Лекԓы’’ маньшту’’, тавсуԓта деча неньшаԓмана хомяхамтанана ниӈа. Выӈкна диԓина нешиӈ канаԓпата, чики минханта меԓ лекаԓ мят’ тош’ выни’та пиԓас’. Таԓям лекԓы’’ пу’’ тахана нешаде’’ тонԓакота’’ дечахат’’ шичиԓпёштутуӈ. Паԓтонхана ши’мы нешиӈ, лекаԓ вихиня, канаԓпата ӈотнаӈ, дечата меԓ хомяхамты. Ненымана ӈаԓка нешаӈкна’’, ӈашки’удехана’’ тавсуԓта деча’’ вэйма’’. Таԓям кимя прививкам’ ӈамтаман ха’ӈа’’, таԓьша нешай’’ чупей шичиԓдятоньш’’. Таньше куптана диԓина’’, выӈкна мэна’’ нешади’’ дяԓян падиԓматоӈ хома шеԓ.</p><p>Четаӈ куняӈи’’ вэку’’, пуша’’ каԓват някудёԓ тcвнана выни’ӈа’’. Пон ӈамтампючетуӈ прививкетуӈ камна, чуки похона нешаде’’ мыт дечахана канаԓмантуӈ тайхана шичиԓпитоньш. Ԓакхай похо’’ты ӈука дяӈ тамна хамум ташту. Хамуӈ минюмахат дя вомшту, вит’’ ӈэԓанаӈc ниш’ту кай. Таԓям четаӈ канаԓмантуӈ тайхана выӈкна диԓина’’ нешади’’ гепатит’А нимита дечахат шичиԓпитоньш.</p><p>Чикиӈ камна каныԓмамтуӈ манымантуӈ мэты, лекԓы’’ нешай’’ кыму’’ нэхэпиш’’. Кимяӈ мят куняна ӈаймям лекаԓки’’ нешай’’ дет тасԓёта управленихина мансԓанна’’ тапаташтутуӈ, «Ямал -нюна’’ дя!» нимита ассоциацихит мэна’’ нянатоӈ дятэԓьшту’’.</p><p>Чуки похона ӈыдихийтуӈ шеԓ лекԓы’’ ӈука мяту’’ коӈаш’’. Выӈкна, петаԓахана диԓина’’ нешади’’ чупей шичиԓмантуӈ мэты, няхаԓ диԓиӈ выӈкай мятумана дятыԓты’’.</p><p>Автор: Андрей Пяк патмы</p>

Мяту’’ та’амна дятыԓяш’’

Фото: Анна Яптик / Няръяна Нгэрм

<div class="content-lead">Округханана’’ «Ямал-ню’’на’’ я!» Ассоциацияхана ӈармы’’ ненэцие’’ Совет манзара. Ӈоб’’ «Мел’ не»м’ нюбета кружокдо’ таня. Пенсияхана мэна’’ не’’ тикан’ турӈа’’. Ӈобт’ ма’’люрӈа’’, серодо’ тасламби’’, сэдора’’, панорӈа’’, хуркари’’ ӈамгэри ӈудахана сертаби’’. Харто’ манзаито’ нямна падна’’.</div><p>Хэвы си’’ив яляхана клубандо’ соя’’ма’ ялям’ ядабтамбиць. Ю’’ подандо’ хаясь. Тикы ненадо яляндо’ е’’эмня ӈарка выставкам’ сертавыць. Таӈок по’’ ямбан’ сэдвыдо’, паӈгалмыдо’ манэ’’лабтамбиць. Ӈэвахана мэнадо’ Татьяна Александровна Ямщикова тарем’ мась:</p><p>— Тарця тарана иӈуд ӈавна Окотэтто Елена Николаевнан’ товысь. Пыда ма’’нисяв: «Маня’’ нива’’ манзара’’. Ханяӈына’’ тэри ӈопой яхана ӈамды’’, хэвня’ ни’’ ханас’’. Тарем’ ма’’люрць нина’’ хар’’на’’ нерня’ пэртярхава’’ ӈэӈгува’’. Няхана’’ енаӈгува’’». Тюкова’’ нердена ӈарка выставкава’’ ни ӈа’’. Ю’’ по’ сер’ хуркари’’ тарана’’ ӈавэ сертаваць. Теда’ сайнорта’’ ненэцие нядабива’’. Пыдо’ е’’эмняндо’ юдерсавэй носкадамдо’ паӈгалпива’’. Няна’’ ядэрта’’ тад’ нерня’ тамна варемдо’ мэта’’.</p><div class="content-new-image"><img alt="pic" src="https://storage.yandexcloud.net/ym-sites-static/8179741d-3e0.webp" style="width:100%" height="1329" width="2362"/><div class="content-image_child">Фото: Анна Яптик / Няръяна Нгэрм</div></div><p>Ӈоб’’ си’’ивхана ӈобт’ ма’’люрӈа’’. Мал’’ ӈэрм’ тер’’ не’’, тодо’ тэнз’’. Паркола’’, сэдора’’, ӈадьбято’ — «Мел’ не’’». Ненэй не’’ ядхана хабей не’’ ӈодякохот панор’’ӈа’’. Паской’’ имбытадо сэдыбасеты’’. Яберена’’ ик’ тяха’ серыбада’’ ӈодякудо’ паӈгалпасеты’’.</p><p>Теневана’’ манзаидо’ тамна’ тяха’ ӈацекэхэ’’ ваде’’ядо’, пыдо’ няндо’ сыраць ӈобтарем’ сэдораван’ харбиласетыд’’. Тикы’ хавна тарана’’ серо падыби’’, мал’’ ӈобт’ ма’’ламбидо’. Нидо’ сэдора, панорць тохоламби’’. Хаданана’’ пуня’ ӈэда’’ ни’’ ӈа’’. Ил’ нерня’ миӈа, пыдо’ мале ӈарма’’, ханяӈы’’ нидо’ пилибт’’ нядандо’ мараӈгыманзь ханӈа’’. Тикы нидо’ хэбидя яляханандо’ ӈани’ тензебтейдонзь.</p><div class="content-new-image"><img alt="pic" src="https://storage.yandexcloud.net/ym-sites-static/30134294-25b.webp" style="width:100%" height="1329" width="2362"/><div class="content-image_child">Фото: Анна Яптик / Няръяна Нгэрм</div></div><p>Манзаито’ помна сяйӈа’’, нито’ соя’’ма’ ялэ ядабтамби’’. Сейхад миндя’’ вади помнандо’ мэцеты’’. Хусувэй сава серкана мал’’ тарасеты’’. Лакри’ нидо’ манэ’’пато’ майсетыд’’. «Мел’ не» кружокхандо’ тандая’ турти, сэдора ехэрани харто’ тохоламбидо’. Тодо’’ явна хэвандо’ нерцюна Валентина Нёлековна Няруй, юнета нява’’ тарем’ мась:</p><p>— Пыдар ӈод’’ ӈани’ тоин’’, ӈопойӈэ нён ӈамдю’’. Ӈэрм’ яханана’’ неӈэ мал’’ мелва’’. Тоб’’нанд ня’’анд ӈули’’ майӈгува’’.</p><p>Ти, тарем’ «Мел’ не» клуб’ тер’’ ю’’ по’’ нидо’ майбтамби’’, масиёдо’ няхато’ тэворць моёпидо’.</p><p>Автор: Марина Ярой’ падвы</p>

«Мел’ не» ю’’ пода

<div class="content-lead">Мюсерта’’ нина’’ харад’’ тердарев’ Россия’ Ӈэвахы табеко нёда иле’’. Таӈга, хынёси’’ илева таняд паӈгды. Яна’’ тиӈгэвна хусувэй тэнз харе’’ инда сер’ ханзер’’, ханяна илевамда, манзаравамда харта тасламбида. Тикы закон’’ вато’’ ня’’амбидо’, мэйрамбидо’.</div><p>Тикахад хусувэй Россия’ тер харта ӈарка падарта таня, паспортда. Хибя ӈэвада, еркарада, сяха’, ханяна соя’’мада, нюсавэй, нюсьва ӈэвада мал’ мюнянда пады’’. Тикы’ хавна сямянхат тарана — «регистрация». Тэри помнана’’ «прописка»ӈэ нюбецетыва’’, Ерв’’ ненэця’ илесь я ханяна ӈэвам’ таняд манэ’’сарӈадо’. Хардаха’’на илена илесь ёто’ ненадумда’’маӈэ хардато’ нюбе, мядото’ толыр’’ мэ’’ӈа’’. Вы’ тер, пэдара’ тер’, таӈоцяӈга’’на нядэна’’ ӈамгэм’ падаӈгу?</p><p>Невхы ила’ саиркад тарем’ таславы: ненэй ненэцяӈэ илма’’ тэхэт пере. Выӈгана, пэдарахана илена’’ ты пэртя’’ сяхаӈгарт’ ӈопой яхана пон’ ни’’ мэсету’’. Тыто’ хадо сянзь етри’ мюсерӈа’’. Недармидо’ похо’’ таславы’’. Харад’ илаӈгана тарана’’ серодо’ таславанзь хахаярка ӈэда хардахандо’ ха’’морӈа’’.</p><p>Таняна ӈаврадамдо’ тэмдаӈгу’’, тарабата лекар’’ мят’ тюӈгу’’, хабцяӈото’ танявам’, яӈговам’ таслаӈгу’’, ервхат хонравандадо’ таняб’’, ӈани’ нядандо’ хонаркода’’. Нюдо’ ӈобтикы таняна тохолкурӈа’’, интернатхана мэ’’.</p><p>Мюсерта’’ ненэця’’ паспортха’’нато’ илесь ядандо’ мюсерць ёдо’ падсеты’’. Тарем’ толаӈгур: «Сеяхинская тундра», «Гыданская тундра», тамна ӈани’’. Едэй илаӈгана тарця ӈэбта вэва. Неноховавна ӈэрм’ тер’’ е’’эмня ӈадимдембада’’ няд’’ми ня’’ма тараб’’нанда, илесь ядо’ ӈопой таславы яхана ӈэбта тара. Ӈани’ сер’ няд’’мидо’ ня’’ма нидо’ пират’’.</p><p>Паспортхана падуванда хардаӈэ вы’ тер ӈэсында хэвхана ӈэдам’ тэра пирӈа. Нермбэртяӈэ тарана’’ ерво’’ манзарась ям’ илесь яданда падаӈгу’’. Тарем’ е’’энянда ӈадимдембада’’ няд’’мида ня’’ма, тамна илаӈгана тарана’’ серода тасламба таӈга пиртада.</p><p>Автор: Галина Окотэтто’ падвы</p>

Мюсерта’’ е’’эмня таславы вато

Таттама: Лариса Айваседо таттамы

<div class="content-lead">Шанат тэмс нешади’’ диԓивсум ӈычимчеӈаш’’. Таԓкахана ӈашки’’ дет ӈайта окружной’ фестиваль’ «Все краски Ямала» мэ’ӈаш’’. Пюԓ дяханана чики мероприятии’ шичадю’’ ӈуп пуӈ чена шеԓтамы. Вильта конкурсхана дянтуӈ чеԓ’’ тэмс диԓивсум ӈычимчемпюта’’ ӈашки’’ пу’’ тахана ӈоктаӈа’’. Куԓкаԓи’’ деты творческий’ коллектив’’ ӈычимшту’’. Четаӈ мянаԓмантуӈ мэт дюԓкат ва’та’’ шичадю’’ шича пимшата’’ ӈашки’’ тоӈаш’’.</div><p>Пюԓ дяханана диԓина’’ ӈашки’’ камна Тазовский’, Ямальский’, Приуральский’, Шурышкарский’, Волновахский районхат мэна’’ мянаԓяш’’, Ноябрьскхат, Муравленкахат, Новый Уренгойхат мэна’’ пы’татуӈ мянаԓьш конуԓпиш’’. Кукиты шеԓтамайтуӈ ӈамыдётуӈ видеон тат’тахадяш ӈайтаптайтоньш. Ӈашки’’ хампԓяӈк номинацихина мянаԓяш’’. Конкурсан’ тотуӈ хомана ӈанатамэт.</p><p>Маня’’ ӈаԓка Россия дяханана хома шоньшахана нетун няш ӈука тэмс неша’’ диԓе’’. Таԓям ӈашкиуде’’ шанат нешай’’ диԓивсум ӈычимчемпёш куԓкаԓи’’ ӈамыдю’’ шеԓтаӈаш’’. Мянаԓта’’ вильта обряду’’ нычимчеӈаш’’, шутпяԓсу’’, ванԓту’’ вачаӈаш’’. Каԓьтуӈ ӈутаханатуӈ шеԓтамайтуӈ, хcтмайтуӈ ӈамыкутуӈ де’эмня ӈайта ярмаркам ӈычимчеӈаш’’. Дёԓьше хомана мянаԓяш’’.</p><div class="content-new-image"><img alt="pic" src="https://storage.yandexcloud.net/ym-sites-static/35392a48-9e5.webp" style="width:100%" height="885" width="1575"/><div class="content-image_child">Таттама: Лариса Айваседо таттамы</div></div><p>Чики фестиваль ӈаԓка мячисы Гран-при Тазовский районхат мэна «Кюрелей» нимита коллектив’ ня’амӈаташ. Ӈайвахай местам Таԓкахай школа-интернатхат мэна «Каймый Чолыты» нимита коллектив’ канаӈаташ’’. Пы’тоӈ капиди’’ обряд’ ӈычимчимпиш’’, шутпяԓсу’’, ванԓту’’ вачаӈаш’’, капиди’’ дилыӈ нямна ӈайта ярмаркам шеԓтаӈаш’’. Каԓпюԓкай школа-интернатхана тохоԓкота’’ ӈашки’’ коллектив’ ‘’Пимшатаку’’ петаԓахана диԓина’’ нешади’’ дилым ӈычимчимпёш ӈупчики хомана мянаԓяш.</p><p>Мянаԓта’’ ӈашки’’ тотуӈ фестивалян хомана ӈанатамэт, чуки похона «Все краски Ямала» дёԓьше вильӈаш. Мянаԓмантуӈ камна ӈашки’уде’’ шанат тэмс нешай’’ культурам маныӈа’’, деты диԓютатуӈ коӈа’’. Мянаԓьш нэхэԓмы’’ коллектив’’, хомана мянаԓмы’’ ӈашки’’ тотуӈ мячисы’’ — диплому’’ ня’амӈаш’’.</p><p>Автор: Лариса Айваседо патмы</p>

Дёԓьше вильӈаш

Сидяӈг: dkmns89  няд ханавы

<div class="content-lead">Тюку илаӈгана хуркари’’ едэй’’ мутра’’ ӈадибелыд’’. Ханяӈыдо’ ӈарка няд’’маӈэ тара’’, илма’’ сибимдемби’’, ӈамгэ тарана серм’ мер’ тидхалемби’’. Хой’ илаӈганана’’ ӈод’’ ӈани’ мэ’’эйдо’. Ӈоб’’ юн тарцясь. Ты пэрмахана ехэрана мутры мэ’’ма’ нямна ӈа. Тарабцонда танявам’ вадамбой’ манэ’’лабтаӈгудо’.</div><p>Россияна’’ тиӈгэвна нюртейӈэ Ямалханана’’ ӈадимдевы серӈэ ваде’’ӈадо’. Тикы проектадо’ «Безопасная тундра» нюбе’’ӈа. Ненэця’’ тыто’ ханяна хадырмам’ ёӈгато’ тяха’ тебдевы’’ мутравна маниеӈгудл’. Тарця ехэрана серм’ Ямальской районхы ӈэрм’ тер нядабада «Ямал» нюбета движение няби ӈэрм’ тер’’ управлениядо’ минреди’. Манзаидо’ округна’’ нермбэртя’ грант’ есявна тидхалембадо’.</p><p>Тикы проектан’ 31 ты пэрти’’ организациям’ мэванзь тасламби’’. Вадавнато’, тарем’ ты’’ хадо лэтраван’ харва’’. Хэвы си’’ив яляхана Панаевск’ вымна’’ мюсерта’’ ты пэртяха’ тэвормы’’, мале сидя спутникхад мэта сярасьм’ ты’ ик’ тяха’ тебдевыць. Тамна Яр-Саля’ хэвхы мюсерта’’ ненэцие’’ тэхэ’’ тарцядамдо’ сертаӈгу’’.</p><p>Хахаяда яля’ мат’’ ӈарка ӈэсы’’ юкад вата хасаваю’’ ёнар’’ ты проектхана манэ’’манзь тасламби’’. Ӈокханда юр’’ ёнар’’ тым’ тикы проектхана мэта’’.</p><p>Сидяӈгахана МОП «Ярсалинское»‘ Худи Василийм’, «Харп» ТСО КМНС’ терм’, Яптик Андрейм’ маниеда’’.</p><p>Автор: Марина Яр’ падвы</p>

Ты’’ ненадумда’’ма’’

Фото: «Край Земли» мультфильмхад сертавы

<div class="content-lead">Небой та’ Ямал’ нямна ӈэда «мультфильм» ӈадимясь. Нюмда — «Край Земли». Илна’’ нямна ӈэда падтавы иле’’мярхам’ луца вадахад ненэця’ вадан’ тэвравыдонзь. Тарця сава серм’ сертаба округна’’ ӈэвахана мэна ервава’’ нядаӈговысь.</div><p>Сие ниць иры’ матдомдэй яляхана тикы иле’’мям’ Нядаӈгарад’ няна манэ’’лабтадонзь. «Сё мэти’’ мядм’» нюбета студия’ тер’’ ваде’’ӈадонзь. Луца вадавна лаханана Хадкохо’, Илнехэ’ ненэй вадавна вахалмэхэнзь.</p><p>Хадкохо’, Илнехэ’ иле’’мяхана Марина’, Валентин’, Артём’, Максим’, Илья’ вабцо намдаваць. Тюку’’ ненэця’’ мал’ Сэротэтто еркарм’ мэ’’ӈа’’. Хэтыбавы’’ вадидо’ ӈули’’ сававна хан’’ӈаць. Ӈацекы ӈэбта ӈацекэдрев’ лаханаць, ӈармы ненэць’ ӈэбта вадидо’ ӈармы ненэцяндрев’ хэтыбидонзь.</p><div class="content-new-image"><img alt="pic" src="https://storage.yandexcloud.net/ym-sites-static/0cdd9f42-c6b.webp" style="width:100%" height="1234" width="2193"/><div class="content-image_child">Фото: «Край Земли» мультфильмхад сертавы</div></div><p>— Вабцм’ мутран’ падыбава нензел’’ манзая ни ӈа’’. Лаханана ненэць’ вабцамда яӈгамдамбабата тара. Ненэй вадан’ тидхалеӈгова’ серм’ пухуцяни ня’ ӈобкана минреми’. Марина, Валентин, Артём, Максим — мал’’ пыда нида. Сидя иры’ ямбан’ манзаява’’ пэрӈаваць. Нерня харе’’ вадан’ пада тарась, пуна — нини’’ вабц падыбиваць. Тарцям’ пэраць торомбэйва’’. Небой по’ «Ми-ми-мишки» мультфильмам’ вадахана’’ мэваць. Сейхад минда вади Тусида Светлана Ивановнан’ няби Худи Евгений Варьевичан’ хэтыбива’’. Манзаява’’ пэрмана’’ мальӈгана ненэй вадам’, илна’’ саирм’ теневана няхаюна’’ хонрамбиваць. Ненэй вадамда’’ лэтрамбира’’, тенера’’, — «Сё мэти’’ мяд»‘ ерв Илья Сэротэтто тарем’ лахана.</p><p>Тад нерня’ тарця иле’’мядрев’ тадтавы ядэръя хуркари мутра’’ сер’ ненэй вадавна ӈадимдембабато’ ӈацекы’’ маймбаӈгу’’, вадамдо’ нидо’ юрыбаӈгу’’. Харе’’ вадавна ӈэда падтавыдарев’ сертавы иле’’мякоцям’ манэ’’мандо’ сер’ ненэця’’ ма’’нисям’’: «Манэсарп’’, ёльце илека ӈэвы. Пелямда тамна’ сяха’ манэтава’’?»</p><p>«Край Земли» иле’’мям’ Москва’ хардахана ӈэда «КиноАтис» студия’ тер’’ сертабавэдонзь. Ӈавна «Белка и Стрелка» падтавыраха иле’’мям’ ӈадимдевыць.</p><p>Автор: Анна Яптик </p>

Ӈацекы’’ е’’эмня сертабидо’

<div class="content-lead">Тюку си’’ивхана ӈоб’’ тарана юнм’ намдаваць. Нерняна мэ’’манда’’ нувона’’ хурка ӈэвахад теневана’’ ненэця’’ тарем’ лаханаць.</div><p>Вадавнандо’ тюку по’ таӈы ёльць’ ӈоб’’ градус’ пирувна ядембаӈгу. Ябтада, сарёда, итя ӈокамбой ӈэӈгу. Округна’’ ЦГМС’ ӈэвахана мэна Артем Кошкин тарця юнм’ ваде’’ӈась: «Маӈгты’’ ирыва’’ ядембаркаӈгу, явода +8...+13 ёльцянд’ тэворта. Неняӈг’’ ирыхына сававна ядембаӈгу. Пилю’’ иры ӈахат ӈэванда пир’’ ӈэӈгу.</p><p>Мэта си’’ив ныланава’ яляханана’’ нумда ибаӈэ ханда. Сие ниць ирына’’ пудана яля’ пиркана ӈани’ тецьхамда. Ты’’ ниць ирыхына нумда ӈахат пирда ӈэӈгу, -3, +3 ӈэсонд’ ядемда.</p><div class="content-new-image"><img alt="pic" src="https://storage.yandexcloud.net/ym-sites-static/370bb7bf-7f0.webp" style="width:100%" height="1176" width="2090"/><div class="content-image_child">Фото: Марина Яр / Няръяна Нгэрм</div></div><p>Тюку по’ сидя ӈарка хардана’’ Салехард няби Си’’ив Харв марк’ поӈгы салабава’’ ёльцяӈгананда хэӈгадаӈгу. Ты’’ ниць иры’ 22 яля’ пиркана итя салабасяламда. Мужи харад’ хэвхы, хаби’’ нина’’ илелава’ няюна сидя яля’ пирувна мерарка савоӈэ ханда. Яханандо’ салабадо’ ты’’ ниць иры’ еркана хэӈгадаӈгу. Хоя саляхана ты’’ ниць ирына’’ пудана яля пиркана итя ӈадимда.</p><p>Яв’ салаба 109 сантиметр’ пир’’ ӈэрха. Мале танякуй 1956 похона тюку ялэ’’ ёльцяӈгана салабанда латдада 158 см ӈэвы. Та’ мальӈгана саць няӈо’’мы.</p><p>Теда’ Саля’ явна’’ салаба тю’’уна Томской область’ няна яна’’ няю’ мюсе.</p><p>Автор: Марина Ярой’ падвы</p>

Нум’ хурка ӈэвахад теневава’’

<div class="content-lead">«Няръяна Ӈэрм» газетахана паднанаӈэ сидя яля’ ямбан’ теневабцуна’’ ӈокамдамба тохолкурӈаваць. Сидна’’ табедамбадаӈэ Елена Тимофеевна Пушкарёва тарась. Пыда илна’’ саир’’, вадина’’ нямна паднани’’ поӈгана ёльце юнета яна’’ тер.</div><p>Нюртей яля’ няданда ӈока тирний’’ табекодва’’’ намдаваць. Елена Тимофеевна’ вадавна, мэта вадава’’ етри’ несэйворӈа, тикахана вэвам’ ни мание’’. Ӈопой, лаханаб’’на’’ ӈока луца вадам’ мэ’’ӈава’’. По’ ямбан’ ӈадибермы’’ «Няръяна Ӈэрм», «Лух Авт» юн’ падрона’’ тяхасовна манэ’’мыда. Таняд луца вади ховы, ӈопой падарт’ падвыда. Тикыда мал’ няна’’ ӈадимдейдась. «Гектар», «материнский капитал», «дартс», «номинация», «автобус», тамна ӈани’’. Е’’эмнана’’ табекурӈась:</p><p>— 1931 поход луца’’ вади ненэй вадан’ падыбаб’’на’’, хусувэй ненэць’ ханзер’’ хамедамбида, тарем’ падыбасетыда. Толаӈгода ханяӈэхэна тамна нида хамедаӈгу’’: «Паднана ӈамгэ’ нямна лахананакы?» Теда’ ӈоб’ то’’олсавна паднавы ӈэб’’та’’, сава ӈэӈгусь. Тикы’ е’’эмня помнанда’’ ӈопой иӈут’ ха’’амбата’’ тара: луца вадахад товы вадам’ ханзер’’ падыбаӈгура’’. Ӈобкана таслахая падарт’ ма’’лэйда’’. Манзаяхананда’’ ӈоб’ сер’ мал’ мэ’’эйда’’. Вадамбой’ толаӈгода’’ ненэциеда’’ хамедамбаӈгудо’.</p><p>Тёняӈы Ненэцие’’ округхад товы «Няръяна вындер»кана манзарана Юлия Талеева Саляӈгардахана тохолковамда тарем’ ваде’’ӈадась:</p><p>— Сидя яля’ ямбан’ ӈобт’ тэворӈаваць. Нюртей яля’ падна тоенана’’ серона’’ тасламбиваць. Теда’ вадаханана’’ едэй вада’’ ӈадиберӈа’’. Хуркари’’ лапка’’, пардон’’, ядэлава’’, несэй’’ хабця’’, манзарась’ я’’ нюм’’ ӈэдакы’’. Невхы’’ похо’’на тарця’’ яӈговы’’ ӈэ’’ ним’’. Луца вадавна нюбедо’ теневына’’. Ненэй вадавна ехэрава’’, ханзер’’ падаркана пада сава’’. Юне падыбавана’’ мальӈгана хар’’на’’ ибедорцетыва’’: «Ханзер’’ харе’’ няхана’’ тарця’’ несэй вади тэвраӈгуна’’?». Ханяӈы’’ вада’’ ӈэрм’ тер’’ нина’’ харто’ теневыдо’. Тикы’’ — интернет, такси, компьютер, социальной сеть, эссе, тамна ӈани’’. Луца вадахана ӈэвандо’ сер’ мэцетына’’. Яӈга ненэй вадавна нина’’ вадес’’. Маня’’ хусувэй яля’ юне ма’’ламбадаӈэ манзаява’’ тикаханда ӈока ӈэсеты, луца’’ вада’’ е’’эйӈэ ненэй вади хомба ёльцьва’’ нисеты том’’. Ӈадьбята тарця ӈэ’’ нив’’: ӈопой яхана вунин ӈамдю’’, лахана нядамд хоӈгун, лаханакуртади’, тикы’ пуд намдавыд мер’ падарт’ падаӈгуд, сит хибяхарт пон’ вуни ӈатеӈгу’’. Юн’ падар’’ хусувэй си’’ив яляхана харта ялян’ вуни ӈадимд’’. Етри’ паромбаркаӈгун.</p><div class="content-new-image"><img alt="pic" src="https://storage.yandexcloud.net/ym-sites-static/b8bc6756-5ab.webp" style="width:100%" height="1300" width="2310"/><div class="content-image_child">Фото: Анна Яптик / Няръяна Нгэрм</div></div><p>«Лух Авт»‘ тер Зоя Куртямова тарем’ лаханась:</p><p>— Неноховавна тодо’’ департамент’’ нюбе хаби’’ вадавна ханзели’’ падыбасетына’’. Мань хар’’ни ини сер’ падаӈгун, няби нями ӈани’ яӈгана’’ вади мэта. Ӈадьбяна’’ маня’’ ӈани’ ӈарка няна’’ табеком’ нёдаб’’на’’ сава. Ӈоб’ то’’олсавна паднаб’’на’’, толаӈгода’’ ненэциена’’ нина’’ поёлтамбаӈгу’’.</p><p>Светлана Пантюк компьютерхана падвына’’ газетан’ ӈобт’ ма’’ламбада нява’’ ӈобтикы тохолкурӈась:</p><p>— «Искусственный интеллект»‘ нямна няна’’ лаханаць. Сидна’’ тохоламбавы ненэць’ мась: «Тарця’’ едэй мутрам’ мэць тосарка манзарада’’! Ненэй ненэцие’’ ила’ саир’ нямна ӈэда’’ падта’’ми вэнзер’’ серта пиръяда: ненэй паны’ е’’эйӈэ яӈганя ӈэрм’ тер’’ ембдярм’ падтаӈгу, ӈэдалёда’ е’’эйӈэ юнетанам’ ӈадимдеӈгу, пибитана хасава’ е’’эйӈэ хутытанам’ сертаӈгу… Ӈадьбята ӈули’’ тяхасовна хусувэй ӈамгэм’ табедамбида’’!»</p><p>«Няръяна Ӈэрм»‘ ӈэвахана мэна Марина Яр тохолковава’’ саву’’ӈадась:</p><p>— Ӈока по’’ манзаравана’’ сер’ ханяӈы’’ луца вада’’ е’’эйӈэ ховы вадина’’ мале таня’’. Хар’’на’’ помнана’’ паднаб’’нана’’ мэцетына’’. Ӈокамбой пелядо’ сёбар’’ пирдырми’’ тэнз’’ нямна ӈа’’. Тодо’’ ерво’’ манзарась’ я ӈани’ ӈоб’’ то’’олсаркавна падыбасетына’’. Тарем’ ненэця’’ газетахана толабадидо’ хамедамбидо’. Тад нерня’ Елена Тимофеевна’ ваде’’мы’’ табеку няд’’мадана’’ тараӈгу’’.</p><p> Тарем’ сидя сава яля’ сер’ газетана’’ соя’’ма ялям’ сававна мэ’’ӈаваць. Теневабцуна’’ тамна ӈокамдэйнаць.</p><p>Автор: Галина Окотэтто’ падвы</p>

Тохолкурӈаваць

Таттама: Андрей Пяк таттамы

<div class="content-lead">«Ваԓны тоӈа — нум дюпа няӈ шатхаԓтай» — таԓям понантоӈ маньштомай’’. Капиди’’ дилхана ваԓны — кайвюча халаку. Шиниӈкуна капиди’’ ванԓхана чики халако’ ни’’, ӈашки’уди’’ ԓэтпёта нум кcхc’ ӈаймай. Таԓям кайвюча халакуӈ маймаӈ мэты, наԓаӈ ваԓны дяԓям мэ’шту’’.</div><p>Таԓкахана ваԓны дяԓям пя’’ поӈкна «Северный очаг» нимита паркхана мэ’ӈатоньш. Культурахана мансԓанна’’ капиди’’ кайвюча дяԓян хомана ӈанатамэт. Ваԓныӈ дяԓян томы’’ хыниԓмаӈ мэты вильта праздник’ шеԓтаӈаш’’. Куԓкаԓи’’ кынсу’’ мэ’ӈаш’’, таԓаӈаш’’. Понантоӈ Ӈэԓм’ дян ваԓныӈ тcйвап, капиди’’ мятчеԓ’’ мадяштомэт.  Кайвюча халакуӈ тcвма дюнь дятынԓаш мячидёԓьш кcштомай’’. Чики дяԓяхана кукиты’’ каӈуԓонташтомай’’. Дюԓнуӈ, меԓ дюԓкикана неӈи’’ куй’’кохо’’ дяԓяӈ миԓ то’оԓа пcшку’’ няню’’, сушки’’ ӈытыштомай’’. Тай’’ня ӈашки’уде’’ майпё пя’’ помна пcшку няньтатуӈ пюԓьштомай’’. «Кимя ӈука нянь ӈомтаӈа — чике дилта, вяпта пон хома ӈайты», таԓям шиниӈкуна ӈаԓка неша’’ маньштомай’’. Ӈашки’’ кукинтуӈ нюӈк’ ӈаймям, мэмямам’ конуԓпёш мянаԓьштомай’’, ваԓныӈ пичат шеԓташтомай’’ — таԓям шана’коштомай’’. Ваԓны ӈайта’’ дютамаӈ мэты, ӈаԓка пуша’’ нитуӈ ӈупухут посами’’ куйкуӈ пахант камташтомай’’. Четаӈ Таԓкахана мэ’мытуӈ ваԓныӈ дяԓяхана ӈупчики ӈашки’уде’’ куԓкаԓи’’ шана’кохона’’ шана’куш’’, мянаԓяш’’. Сувениру’’ шеԓтапиш’’, мастер-классхана тохоԓкуш’’. Капиди’’ шеԓ кайвюча халакуӈ дяԓяхана куйкон дяԓнасай видя’уди шаԓӈаш’’. Чикиӈ камна ваԓныӈ миԓас шеԓтапё мянаԓмы’’ мячисыӈc диплому’’ ня’амӈаш’’. Ваԓны дяԓян томы’’ неша’’ дёԓьше хомана ныптакуш’’. Капиди’’ дилхана таԓьша, кимя неԓьче’эй Ӈэԓм’ дян тcвмы ваԓным маныӈа, чике пуӈ дямпхана вяпта хома ӈайты.</p><p>Автор: Андрей Пяк патмы</p>

Ваԓныӈ дяԓян майпиш’’

<div class="content-lead">Нешади’’ дилыӈ дюнь дяӈ тамна канԓаӈа. «Няръяна Ӈэрм» кашем’дюԓ хампԓяӈк по’’та кадя. Нешаӈ ватамана ӈайта патаԓ дилта дямпны ӈука ӈут матаӈаш. Шитчет пуӈ чена «Няръяна Ӈэрм»хана петаԓахана диԓина’’ нешади’’ ватамана ӈайта полоса’ ӈычимяш. Четаӈ Пюԓ дяхана диԓина’’ неша’’ каԓьтуӈ ватаманантуӈ тонԓакошту’’, дюԓмэйтуӈ вачитуӈ вивхаԓьшту’’.</div><div class="content-new-image"><img alt="pic" src="https://storage.yandexcloud.net/ym-sites-static/ea1126e4-5d4.webp" style="width:100%" height="708" width="1260"/><div class="content-image_child">Таттама: Лариса Айваседо таттамы</div></div><p>Каԓпюԓкай школа-интернатхана нешаӈ ватан ӈашки’’ тохоԓампё мансԓаӈа Юлия Айваседо маньшту, пы’тоӈ «Няръяна Ӈэрм» пон тонԓапёштутуӈ:</p><p>— Нешаӈ ватамана ӈайта газетам хашаӈоӈама’’, тонԓапёштума’’. Тохоԓкота’’ ӈашки’уди’’ патмайтуӈ сочиненитуӈ «Мынико»н ӈайтапташту’’. «Няръяна Ӈэрм» нешаӈ ватам ԓэтԓампюӈа, чуув падиԓя. Каԓьна ватаманана тонԓако’ нешай’’ де’эмня ӈайта дюнь намташтума’’, шиниӈкуй дилхай шеԓу’’ каматаштума’’. «Няръяна Ӈэрм» поздравийпёшь маман ха’ӈат, тат неԓьняӈ пон хомана мансԓадя, деты формата пюԓьштодя, тадёмшей ӈаԓтана’’ ӈашкcхcна’’ вильманта мэт.</p><p>Марина Дзюненко лекаԓӈc мансԓаӈа, пы’та газетаӈ нямна мунуш маньшту:</p><p>— Таԓьша патԓу’уди нивня таԓа. Деты ӈамы новостьудим танят коштума. Нешаӈ ватаманана пачута патаԓ тонԓапёш неньшаԓ ӈcшту. Мань нинчеԓ ватам ташта ниш’тум каматымпю, таԓям нешаӈ ватамана пачутам ӈамым тонԓапанай майпёштут.</p><p>Пуровский’ ассоциацин «Ямал-потомкам!» ӈаԓдя ӈашки’’ дет ӈайта советхат мэна Мария Вэлло газетаӈ нямна мунуш маӈаш:</p><p>— Мань нешаӈ ватамана ӈайта патаԓ «Няръяна Ӈэрм» соцсетьмана коштум, таԓям тонԓапёштум. Ӈаԓтана ӈашки’’ нешаӈ ватам дюԓмаӈ тайхана, шичина’’ мян неша’’ каԓьтуӈ ватаманантуӈ мунумаӈ, патнамаӈ мэт чики газета’ таԓаӈа.</p><div class="content-new-image"><img alt="pic" src="https://storage.yandexcloud.net/ym-sites-static/667956f5-83c.webp" style="width:100%" height="1133" width="2013"/><div class="content-image_child">Таттама: Лариса Айваседо таттамы</div></div><p>Каԓпюԓ садикхана мансԓана Владимир Казымкин ӈупчики хома вачи’’ «Няръяна Ӈэрм» де’эмня мэ’ӈаш: «Нешаӈ ватамана ӈайта газетама «Няръяна Ӈэрм» дёԓьше хома. Чики патаԓкат нешади’’ дил нямна ӈайта дюнь намташтума’’, дяна чеԓ’’ нешади’’ де’эмня ӈайта статьи’’ тонԓаштума’’. Чики газета’ нешаӈ ватам ԓэтԓампюта. Четаӈ кашем’ дюԓ хампԓяӈк пота каймя юбилейхананта хома шоньшахана поздравийпим. Пон хома ӈcдя, пон минԓената ӈотакота ненса ӈcдя».</p><div class="content-new-image"><img alt="pic" src="https://storage.yandexcloud.net/ym-sites-static/bd2cc68c-8ec.webp" style="width:100%" height="647" width="1151"/><div class="content-image_child">Таттама: Лариса Айваседо таттамы</div></div><p>Таԓкахай школа-интернатхана ӈашки’’ нешаӈ ватан тохоԓампё мансԓана Ольга Докучаева маньшту:</p><p>— Мань нешаӈ ватамана ӈайта газетам тонԓапёштум. Таԓьша патаԓ таԓа. Нешаӈ вата культурам, дилм ԓэтԓампюӈа. Ӈаԓтана ӈашки’’ шиниӈкуй ниԓинатуӈ диԓивсум чедимямаӈ мэт нешаӈ вата таԓа.</p><p>Нешай дет тонԓюта управленин веԓв Маргарита Маслова ӈупчики газетам тонԓапёштута:</p><p>‒ Чуки дилхана нешаӈ ватам чу’ув падеԓьш хома. Нешаӈ вата шиниӈкуй дилм ԓэтԓампюта. Маня’’ каԓьна ватаманана патнаштума, тонԓако’ тохоташтума. Газетама пон хома, вильта статьета’’ ӈука ӈcдя’’.</p><p>Газетам’ тонԓапёши Пюԓ дяхана диԓина’’ неша’’ шанат дяхат туԓта’’ дюньхат конпы ӈcшту’’, дяна чеԓ’’ нешади’’ дилм, куше мансԓамам намташту’’.</p><p>Автор: Лариса Айваседо патмы</p>

Таԓана, хома патаԓ

<div class="content-lead">Газетаха’’на, журналха’’на, телевидениеха’’на манзарана’’ ненэця’’ ӈопой манзаям’, паднавам’ минре’’. Маня’’ округханана’’ Советской власть ӈамд’’махад 1931 похона сие ниць иры’ 19 яляхана ненэй вадавна «Няръяна Ӈэрм» газетава’’ ӈадимясь. Нерде’ сидямбой страницадась. Тамальӈгана Пэсь Павлович Анагуричи, Иван Антонович Юганпелик, Елена Григорьевна Сусой паднанаӈэ тараць.</div><p>Газетана’’ редакторӈэ Иван Григорьевич Истомин таралъяць. Тэнзувнанда ӈысма ӈэбта ӈод’’ ненэй вадам’ ӈули’’ савовна теневавэдась. Тамна стихотворения падыбись. Тикы нява’’ саць ӈарка таром’ ха’’аврась.</p><p>Ӈани ӈопой газетава’’ ня’’амбавы — Иван Антонович Юганпелик. Сайноро’’махаданда нява’’ манзаямда хуркаси’’ хараси’’ минре пядась. Ӈобтарем’ стихотворения падыбись. Таддикад Культпросвет училищан’ тохолко лабцевыць. Тохолко ӈэвада’’махаданда Иван Антоновичм’ Тазовской районхы Ӈэдя хардан’ ӈэдаравэдо’. Танянанда ӈани’ паднавы. Нюртей’’ падвы’’ стихотворенита нюв’’ ти’’: «Сельсовет’ ний флаг», «Нохо’ сё», «Сихирти’’ не ню». Иван Антонович ханяри’ тэвбата лаханако мэта ненэцяӈг’’ ӈули’’ инзеле пэрмы. Ханяӈыдо’ падарк’’ падыбавыда. Тальцюня ӈобт’ ма’’лавыда. Яӈга книгаӈэ ӈадимяць. Нюбедо’ тарця’’: «Мань хыно’’ӈадм’», «Ӈэрм тер ӈацекы», «Хар’’н», «Хэд’’ Нардалеко». «Няръяна Ӈэрм» газетахана вэсэйманда’ ӈэсонд’ манзарась. Книгаха’’ната, газетан’ падвэхэ’’ната вы’ яна’’ илам’ едэй ӈадимы манзаи’’ тэнз ваде’’ӈась. Ӈарка ненэциена’’ падыбись.</p><div class="content-new-image"><img alt="pic" src="https://storage.yandexcloud.net/ym-sites-static/d8c913e3-412.webp" style="width:100%" height="879" width="1562"/><div class="content-image_child"></div></div><p>Нянда сехэрым’ Леонид Васильевич Лапцуй нёдалӈадась. Та’ мальӈгана газетана’’ тамна сидя страницадась. Манэ’’сыта саву’’мась. Леонид Васильевич ненэй вадавна, луца вадавна падна пир’’ӈадась. Падвыда нидо’ поёць хуркари’’ журналха’’на, газетаха’’на ӈадиберӈаць. Хусувэй падвэхэнанда невхы ӈарка Совет’’ яна’’, ӈэрм’ тер’’ нита илам’, манзарабцом’, тид’’ сертавыто’ нямна лаханась. Ӈацекы нидясь юрыбю’’. Книгыта нюв’’ ти’’: «Сэвтя», «Едэйко». «Инзер’ толаӈгобць». 1982 похона нява’’ яӈгумась.</p><p>Ӈани ӈопой паднавы ненэця’’ма’’ — Геннадий Алексеевич Пуйко, нянда ед’ минта стихотворением’ падась. Падвэхэнанда тарем’ мась: «Мэ’’мэр’’ тюрамд, мэ’’мэр’’ паднабцямд, мэ’’мэр’’ тынзямд теда’ тю’’у’ миндя’’ нюд ня’’маӈгудо’».</p><p>Автор: Хабэча Нямбара’ падвы</p>

95 по’’ ямбан’ паднава’’

Фото: poyushiegolosa няд ханавы

<div class="content-lead">Яна тиӈгывна сёётэй’’ ненэцие’’ пирдырма миӈась. Луца вадавна нюмда «Поющие голоса». Няхар’’ иры’ ямбан’ ненэй ненэця’’, хаби’’, тасу’ хаби’’, ӈысма’’ харто’ вадахато’ юнета сё тэврамбиць, падыбиць. Сие ниць иры’ юдимдей яляхана ва’’лёйдо’ намдаваць.</div><p>Интернет’ мутравна минда конкурс 2019 поход пэяць. Тад тикы’ пуд 2020 похона ӈась. Самляӈг по’ хэ’’мяхад ӈани’ серта тасладонзь. Теда’ сё мэта’’ Таймыр’, Республика Коми’, Ямал’ тераць. Ӈокханда юкад вата тет видеом’ ӈэдаравыць: ӈысма’’ — самляӈгм’, хаби’’ — сидям’, тасу’ хаби’’ — ӈопойм’, ненэй ненэця’’ — матадм’.</p><p>Тасу’ хаби’’ вадавна Виктория Айваседо хыно’’ӈась. Пыда «Дарите женщинам цветы» сём’ харта вадавнанда мэ’’ӈась. Сита нюртей ян’ мэць. Хабихит Саляӈгардыхы «Овас мувие» сё мэта’’ няби Питлярхана тохолкода Ярослав Сюртахов нерня’ ха’’мыдаць. Ӈысмахат Валентина Коваленком’, Яна Сажинам’, «Горань» группам’ тэраць. Мэ’’мы’’ сёдо’: «Ой, у вишневому саду», «Матушка-Земля», «Numb». Ненэй ненэцяӈгат Хальмер’’ седе’’э’ тер’’ «Тэта’’ не’’», Саттане Окотэтто, Таймыр’ тер Вячеслав Сигуней нито’ нерня’ еремяць. Мэ’’мы’’ сёдо’ Виктор Яр’ няби Лилия Ядне’ «Луна» сё, Олег Газманов няби Татьяна Куртукова’ «Озёра синие» сё, «Ты неси меня река» сё. Ӈацекэхэт Салемалхана тохолкода Лар Мариям’, Сёяха’ няна няхаромдэй классахана мэни Лаптандер Ираидам’, Вануйто Розалинам’, Окотэтто Миленам’ ненадумдаць. Варемдо’ мэ’’мы’’ мал’’ ӈуда’ тер ня’’маӈгу’’.</p><p>Сёётэй’’ е’’эмня ӈадимдембада пирдырмадо’ сава таром’ минре: ӈэрм’ тер’’ вадидо’ нерня’ пэрӈа’’, сёёта пир’’мамдо’ манэ’’лабтамби’’. Вада’ нямна тидхалеӈговэхэ’’на ӈани’ нюрцям’, нядаӈговандо’ хавна теневабцодо’ ӈокамдамби’’.</p><p>Хыноць пир’’мамдо’ няби сёто’ ханзер’’ хайнавам’ сёётэй не Ксения Кручинина (Айна) Эвенкия’ тер манэсаръядась. Проектм’ ня’’амбанадо’ — Елена Неркагы. Пыда Нядаӈгарад’ няд ӈа. Серо тасламбадито’ ӈэвахана «Ямал — ню’’на’’ я!» Ассоциация’ ӈудандана Эдуард Яунгад мэсь. Таремгав’ нядаӈговы ӈока, мал’’ етя няндо’ таславы серодо’ тид’’ минрейдонзь.</p><p>Автор: Анна Яптик’ падвы</p>

Сёдо’ хайнаць

<div class="content-lead">Небо’ Яр-Саляхана ты пэртя’’ Сянакова’ яляхана тодо’’ харад’ тер’’ ӈацекы’’ ныхыдырӈаць. Тикы’’ пирдырта’’ поӈгана ӈопой мэбета хасава ӈацекым’ манэ’’ӈаваць. Нюртей тарем’ ныхыдырць хорпавахананда таминда няхаромдэян’ ха’’мыць.</div><p>Тамальӈгана Роман Лаптандер’ нюмам’ хэтвандо’ сер’ сырта’’ ненэця’’ тёрдо’ ёльце я’’авлыць… Пуна ныхыдырмам’ саваӈэ манэ’’мэда, тикан’ тоходана таславэда. Харта инда сер’ пыхыдамда таня’ падвэда. Ӈэрё’ няна тид’’ пирдырмаха’’ хамеко пэвы’’. Ялэхэ’’ сюрберманзь хан’’мы, вэва нумгад ехэравы. Няданда ӈарка’’ няха’’ната пивна сюрбермы, сёбар’’ мэлван’ ӈобӈгэв’ ядэрмы.</p><div class="content-new-image"><img alt="pic" src="https://storage.yandexcloud.net/ym-sites-static/17d74e98-995.webp" style="width:100%" height="885" width="1575"/><div class="content-image_child">Фото: yamal-sport.yanao.ru</div></div><p>Нямэхэна сита Хальмер’’ Седе’’эн’ ӈэдарамбиць. Таняӈы ян’ сяхаӈгарт’ тэвормадавэй ӈэвысь. Яра иры’ 28 яляхад ты’’ саполана иры’ 1 яля’ ӈэсонд’ помнандо’ Тазовской, Пуровской, Ямальской район’, Новый Уренгой’ тер’’ пирдырмыць. Ӈокханда самляӈг ю’’ матдонзь. Подо’ юкад вата сидяхад юкад вата си’’ив’ пирт’ тэворӈаць. Саӈговодо’ тет юкад сидндет ю’’ ӈэсонд’ ӈаць.</p><p>Роман саӈгомдо’ мат’’ ю’’, 14-15 пота’’ поӈгана мэсь. Няданда мэбета яӈгусь, ныхыдырць пямда ӈобкарт’ нидась ӈэдара’’. Мяканда тэв’’махаданда ня’’мавы медальмда ӈадьда ян’ ӈыдадась. Мята тер’’ харбё ӈэвамда ӈули’’ саву’’ӈадо’. Неноховавна нюдяко няхаюда ӈармдыхы’. Ӈарка неканди’ тотрев’ ӈани’ мэбе’’ман’ харваӈаха’.</p><div class="content-new-image"><img alt="pic" src="https://storage.yandexcloud.net/ym-sites-static/6c578d5b-030.webp" style="width:100%" height="1107" width="1969"/><div class="content-image_child">Фото: yamal-sport.yanao.ru</div></div><p>Мань хадамда хонрадамзь:</p><p>— Романхав хусувэй ӈамгэмда ивъер’ сертабасетыда. Хэт’’махаданда вадамда нисетыда мадабю’’. Мэван харванамда ненэся мэӈгуда. Та’ хой’ няна турпата ӈани’ тарця ӈэсеты. Ялэхэ’’ сюрберцеты. Ӈамгэри нум’ ӈэя. Манзетыдм’: «Ӈэд нёя’’ са’’не’’». Хутыта хэсеты. Манд’’нив: «Ни’’им ханяцей’ саӈговот’’». Пя’’ помна сюрбертаханда нёховы ӈэӈгува. Теда’ хамекобта ӈадьбята варемда мэць пэрманӈгабя. Хэвнямна ядэрма, пирдырма нянанда ёльце сава ӈэ’’нив’’. Ненэцие, харад манэта. Манд’’нив: «Тамна таремрка таравынё’’». Ӈамгэри ӈамгы няхад манэпада. Нерня’ ӈэван’ харвабцода ӈармда.</p><p>Вырэй ныхыдырта ӈани яляхана Чебоксары хардан’ ханда. Россия’ тиӈгывна илена’’ сёбар’’ няха’’ната пирдырта. Пыда’ хавнанда Тазовский хардан’ ядэрмы’’ поӈгад тамна мат’’ ва’’лёйм’ тэравыць. Пыдо’ сиддо’ мал’ округ’ ныхыдырти’’ мандалт’ падвыць. Тад нерня’ «Лидер»м’ нюбета сёбар’’ тохолкулван’ ханта’’, варемдо’ мэць пыхыдадо’ тохоламбаӈгу’’.</p><p>Автор: Анна Яптик’ падвы</p>

Няръяна Нгэрм

Публикации автора

«Хада»’ иле’’мям’ манэ’’ӈаваць