Няръяна Ӈэрм
Няньдамдоʼ хартоʼ ябцыбиˮ
Сие ниць ирыхыд Ӈыдхана няньʼ лапка ни манзараˮ. Хардаханандоʼ пекарнядоʼ тедаʼ юӈгу. Ервотоʼ вадавна, няньдоʼ маӈг ни ӈаˮ, ненэцие еˮэмня няхарˮ ӈаварˮ лапкаˮ манзараˮ. Харадʼ терˮ няньдамдоʼ таняд тэмдабиˮ.
Ненэсянда, лапкахаˮна манзаранаˮ няньдамдоʼ Нядаӈгардахад тэволаˮ, тикыдоʼ ненэцяӈгˮ мирдапидоʼ. Ӈопой няньʼ мирта юрˮ-сидя юрˮ мян еся ӈэсеты. Тикар саць ӈока.
— Мирдападаˮ нянёдоʼ саваˮ ӈэвыˮ ӈэбтоʼ, таӈок есямʼ салдамбаӈгуваць. Таӈгунʼ янʼ тэврамбадидоʼ пуруворӈаˮ. Ӈобаӈгуна мале сян няньдаваˮ тэмдаванзь нюми ӈэдабтадамзь, пыда лапкахана нянёда сомбовна нивыда манэсˮ. Тикынаˮ нядэнаˮ нинаˮ мятʼ ӈанохона ӈэдабтэйнаˮ. Таняна пыдоʼ пурцавэй ӈэвамдоʼ таславыˮ. Мале пуня вунинаˮ митˮ. Тамальӈгэхэд лапкахад тэмдорпани хусувэй ӈамгэмʼ харˮни манэцетыв.
Тикыʼ хавна пилюˮ ирыхына ненэцяˮ Нядаӈгарадʼ няд вэва юнмʼ намдавыˮ. Таняна ханяӈыˮ лапкахаˮна ӈаниʼ няньдоʼ яӈговы. Ӈарка харадʼ терхартˮ няньсипойˮ хаюрмыˮ. Ӈопой нянё ябцыбада мятоʼ ӈаниʼ нивы манзараˮ.
Ӈадьбята тедаʼ ханяӈыˮ мядʼ терˮ хартоʼ ябцанаˮ:
— Няньсиˮ ӈаворма ӈавыта яӈгу нивˮ. Няньдаваˮ харˮнаˮ ябцыбиваˮ. Ӈопой, тюку ирыʼ еркана лапкахаˮнанаˮ ямʼ тэмда яˮмаваць. Ясипойˮ няньмʼ вунин сертаӈгуˮ. Ӈавэдана ӈаварˮ мирдапада ту ӈано то. Таняд ӈокамбовна тэмдорӈаваˮ. Мань сидя яʼ падмʼ ханадамзь. Есяӈэ таслабˮ, ӈобтикы миреˮӈа. Таремʼ ӈодˮ ханядмʼ ханаˮ. Ӈани ханяхартад вунидмʼ хоӈгуˮ. Ӈопой яляʼ мяни терˮ еˮэмня ӈопой, ханяӈэхэна сидя няньмʼ ябцыбасетыдмʼ.
Мюсертаˮ Ӈыдʼ терˮ нянь лапкаʼ нямна ӈаниʼ намдавыˮ:
— Тедариʼ нарэй тэмдавыˮ талбэйˮ нянёнаˮ тамна таняˮ. Ӈаврандаванаˮ мальӈгана ӈахат серʼ ӈокамбовна тэмдорӈаваць. Сидя сян я падмʼ, самляӈг няньʼ падмʼ ханаваць. Сыраʼ ёльцяндʼ мась ӈэӈгуˮ. Масиˮ тамальӈгана харданаˮ ервˮ тоенана сертоʼ таслаӈгудоʼ. Нибтоʼ, Заполярныйʼ няд тэмдортакэваˮ.
Тандаяʼ «Честный маршрут»ʼ серʼ янаˮ нермбэртя Нядаӈгардахана нултаӈгаванда мальӈгана Ӈыдʼ терˮ тоенана сертоʼ нямна хонаркурӈаць. Районандоʼ ӈэвахана мэнаˮ ервˮ няндоʼ тарцяˮ вади мэˮмыˮ: «Нянь лапка няˮамбадаӈэ Ядне Владимир тараӈгу. Харадʼ терˮ еˮэмня няньдамдоʼ мини-хлебопекарняхана сертабаӈгуˮ». Ненэся хурка ӈэвамда тадриʼ манэтаваˮ.
Галина Окотэттоʼ падвы
Авторы
Няръяна Нгэрм
Темы