обновлено: 06:34, 18 августа 2026
Няръяна Ӈэрм
Нешаӈкнаˮ дёԓимяшоʼ дюничаԓяшˮ
Нешадиˮ куше диԓимам, ӈамы няӈтуӈ таԓамам, нешаӈкнаˮ дёԓимяшоʼ намтдятоньшˮ. Таньнякуйˮ дяԓяханаˮ Пюԓ дяханана Хаԓяӈкаԓтыхит мэнаˮ веԓвˮ мансԓаӈашˮ. Ямална Законодательныйʼ Собранихина депутатӈӭ мэнаˮ, АПКхана, Ӈэԓмʼ чеԓˮ нешайˮ дет ӈайта департаментхана мансԓаннаˮ чуувна диԓинаˮ нешаӈкна дюничаԓяшˮ. Нянантоӈ маняˮ Пюԓ дяхатана мэнаˮ веԓвунаˮ дятыԓяшˮ, «Ямал-потомкам!» ассоциацихина мансԓаннаˮ.
Каԓпюԓ няна диԓинаˮ нешаӈкнаˮ дюничаԓяшˮ, «Верхне-Пуровский» совхоз четты ӈысыхана канӈашˮ. Нешаӈкнаˮ дёԓимяшуӈашˮ, дилтуӈ нямна дюничаԓьш куше диԓимамтуӈ, мансԓамамтуӈ нымтыпишˮ. Мэʼэвтатуӈ ватантуӈ тадяӈайтаˮ нешаˮ чики вачитуӈ веԓвхиˮ мэʼӈашˮ. Выӈкна чуувна диԓинаˮ, мансԓаннаˮ нешаˮ диԓтуӈ нямна мунуʼӈашˮ, ӈамыˮ тасԓавта шеԓутуӈ тадяӈӭймям вачаӈашˮ.
Хаԓяӈкаԓтыхит томыˮ веԓвыˮ куԓка нятакома хома шеԓˮ Ямалханана тадяӈӭймям нешаӈкˮ кэтӈашˮ. Куше округханана выӈкна диԓинаˮ, мюшаԓтаˮ Ӈэԓм чеԓˮ нешадиˮ нятапёмамтуӈ вачаӈашˮ. Ямалхана ӈука программаˮ, нятакомаӈ дет ӈайта, тадяˮ. Выӈкна мюшаԓтаˮ, чуувна мансԓаннаˮ нешадиˮ ӈамыкот пуˮ тахана тэмташтуˮ. Нешаӈк мичиԓпечитуӈ ӈамыкутуӈ тэмсˮ ӈопшеԓ шичадюкат ваʼӈаˮ. Маняˮ Пюԓ дяханана нешаˮ пяˮ поӈкна диԓиӈаˮ, каԓитуӈ тытуӈ падиԓтаˮ куптамна нишʼтуˮ мюшаԓˮ. Каԓитанаˮ кукиˮ нешаӈиˮ ӈай хыԓаӈ пяй мякна диԓештуˮ, таԓям няӈтоӈ пяй мятуӈ шеԓташататуӈ ӈамыкуˮ таԓаштуˮ.
Тэсамы нешаӈкна ӈай мыдю ватʼ — коральʼ таԓа. Тыˮ паԓтонхана шичиԓпёмантуӈ дёԓьшкана мыдю ватыӈ мюня тытуӈ няʼмаԓпёматуӈ хома. Нешаˮ таньдет ӈайта вачиˮ веԓвханаˮ муʼнушˮ ӈупчики мэʼӈашˮ.
Чикиӈ камна чуки дилхана аппыˮ ӈокмаˮ, четаӈ халакоˮ понтуӈ шеԓ нешаӈ каԓнамʼ ниʼ пиԓюсˮ, ԓакан мятуˮ кӭйван тоштуˮ, тыˮ тэʼтапташтуˮ. Таԓям таԓьша халакуˮ пичипё мэʼэвта отпугиватель чуувна диԓинахана таԓа. Чикиӈ камна таӈичохона дячапётахана дяʼ каԓкомшту. Хыԓуйˮ нятаˮ, кысуйˮ дяˮ пӭйӈ пускохотˮ, аппыˮ тухутˮ тавсаштутˮ. Петаԓахана, нятасамы диӈкня тавсмы ту меԓ каптанана ниӈа. Ӈамыԓи туӈим ӈаԓкамана тавсманта неԓьня каптанаӈата, таԓям чуувна диԓина нешаӈкнаˮ тум каптапё мэʼтаˮ огнетушительˮ таԓаˮ.
Нешаˮ веԓвханаˮ дёԓимяшоʼ ань деʼэмня ӈупчики муʼнуӈашˮ. Таӈ камна ӈашкиˮ тохоԓкумаӈ дет ӈайтаˮ шеԓуˮ, дяна чеԓˮ дечашамаӈ нямна ӈайта вачиˮ тасԓаӈашˮ. Нешадиˮ няӈтуӈ мэмыˮ вачеˮ Хаԓяӈкаԓтыхит мэнаˮ веԓвыˮ тат неԓьняӈ ӈокна тасԓандятуӈ.
Таньше выӈкна, петаԓахана диԓинаˮ нешадиˮ мятуˮ таʼамна дятыԓма вивӈут округна ӈаԓка тэтаӈ комы. Маняˮ Ямалханана вымна мюшаԓтаˮ, чуувна диԓинаˮ, мансԓаннаˮ нешайˮ нятапёмаӈ дет тасԓёта «Дорожная карта» тадя. Нешадиˮ мэмыˮ ватаˮ чикинтуӈ дет таԓаныˮ. Чуки дилхана куԓкаԓиˮ деты шеԓˮ ӈычимштуˮ, таԓям таньше нешаӈкнаˮ дюничаԓма хома.
Лариса Айваседо патмы
