обновлено: 08:23, 01 сентября 2026
Няръяна Ӈэрм
Тохолко пэядˮ
Пилюˮ ирываˮ ваера. Тедаʼ ӈэрёйˮ нувонаˮ тоˮ. Ӈэрё товаʼ серʼ тохолковаʼ ёльцьӈэ хая. Выӈгана илена ӈацекы мале маˮлэйдонзь. Ядембадаˮ яхаˮ ханˮмыˮ ӈаниʼ мякатоʼ тоць. Тевʼ пиркана мюсертаˮ нинаˮ тэраӈгосетыˮ, нютоʼ пумна харадʼ няюʼ пясетыдоʼ.
Ӈацекыˮ сулормы, мюйдоʼ сомбовна сертавы тохолкулва яхаˮ тюваʼ еˮэмня таʼ ямбанʼ манзаравы ӈокась. Ханяӈыˮ нинаˮ ныланавахад ехэраць. Танда хэмʼ ӈэбˮ ӈодˮ ненэциеˮ манзара пэваʼ нерцюˮ тохолкова серо минренаˮ хусувэй ӈамгэмдоʼ сававна хамэдавыць. Ӈацекыˮ тохолко мэта, мэлвитоʼ мюня тарани ӈаво мэвыць. Сулормэдоʼ, несэймдавы хардадоʼ ӈаниʼ тянё ни ӈаˮ. Хойʼ няд товыˮ ӈацекыˮ ядембадаˮ илелаваʼ лохохоˮ мятю''. Тохолковаʼ паӈо то, тохолкодиˮ едʼ ӈэда ненадо хэбидя яля то. Вэбаʼ ирыʼ нюртей ялянʼ малʼ ӈахакуд хамекуваць.
Округнаˮ тиӈгывна тикы ялямʼ хусувэй хардахана мэˮӈава''. Ненадо хэбидя ялямʼ тодоˮ яхаˮна ӈатеваць. Таӈы ныланаваʼ ялэˮ ваерава нись соˮ хахаялма. Нюртей поʼ паднабцьмʼ мэˮмандаˮ нюртей сеӈгандоʼ мунмʼ намдаˮ. Едэйвана ӈацекы тохоламба пянаˮ нюртей урокамдоʼ минре хорˮӈаˮ. Нюртей поʼ тохолковандакуˮ ӈаркаˮ нитоʼ еˮэмня сомбой сё мэˮӈаˮ. Юкад вата нюртей классмʼ пянаˮ нюдякоцяˮ няхатоʼ табекудоʼ вадеˮӈаˮ. Школамʼ ёльцебадиˮ таӈокˮ поˮ ямбанʼ хамэдавэдоʼ ӈока, ӈэвандоʼ мюʼ пэмыдоʼ. Пыдоʼ тохолковаʼ пондоʼ паӈо нензелˮ ни ӈэӈгуˮ, экзамен падыбаӈгуˮ, ӈамгэ манзаямʼ пяванʼ харвавандоʼ нямна ибедортаˮ. Тюку поʼ ӈарка хардахаˮ манзаяʼ няюʼ тохолкованзь хэвыˮ нидоʼ ӈаниʼ нюртей ензидоʼ сертаба пяӈгуˮ.
Ямалхананаˮ тохолко мэта тольтоʼ тяхаʼ юрʼ мянʼ ёнарˮ пирˮ ӈамдыдˮ. Сельбяʼ няӈы нердена яля тохолковаʼ сермʼ ёльцевэхэˮна, тохолкодахаˮна, ӈацекы тохоламбдахаˮна — ихина саць пойда ялядоʼ. Тад нерняʼ пыдоʼ малʼ несэй, ехэрана иламʼ пяӈгуˮ. Тохолкодаˮ тоходанвандоʼ серʼ хуркари ӈамгэхэˮ тоходанаӈгуˮ. Тикы тарана серкана сиддоʼ небянадоʼ, нисянадоʼ, тамна ӈаниˮ мятоʼ терˮ нядабаӈгуˮ. Хусувэй небя ӈэя, нися ӈэя — малʼ сёнзитоʼ мюня няркнаˮ, пэрманда сертоʼ ӈаниʼ ӈарка — нюдоʼ тидхалембаӈгуˮ.
Несэй минмʼ пявыˮ нинаˮ сававна тохолкояˮ. Школанʼ хусувэй яляʼ маймба ядаяˮ. Теневабцудоʼ ӈокамдамбаяˮ, едэй иˮ ӈу содабаяˮ. Ӈацекы тохоламбадаˮ варемдоʼ мэць манзараяˮ, нюдякоця саваˮ нидоʼ хартоʼ нюдревʼ лэтрамбидоʼ. Таремʼ таслабˮ, тохолкова серотоʼ ханзерˮ мимахад, ӈацекыˮ ханзерˮ тохолковахад ӈарка янаˮ сяхариʼ пяванда илʼ пере.
Анна Яптикʼ падвы
