Няръяна Ӈэрм
Ӈэрмʼ терˮ еˮэмня ӈадимдевы вада
Пилюˮ ирыʼ еркад округнаˮ нермбэртя Дмитрий Артюхов Ямалнаˮ ӈарка марадˮ нямна ӈэдалёрӈа. Мале сян яляʼ ямбанʼ ӈока сава сермʼ таславы.
Ненэцяˮ хонрамбадидоʼ ӈокамбой пелядоʼ таб сехэрыˮ, лекарˮ серо, иле хардоˮ, тохолковаʼ сероˮ нямна ӈэвыˮ. Манзаямда ӈахат серʼ тидхалембида: небой похона вадеˮмыˮ табекута нямна хонаркурӈа. Ненэцие табекохоˮ инзеле. Тюку поʼ Ноябрьскʼ няд манзаямда пядась. Таняна едэй лекарˮ мятʼ тюӈгавы. Хурка ӈэвамда тяхасовна манэˮмэда. Вадавнанда, янаˮ терˮ хабцяӈодоʼ таславанзь тодоˮ хардахат таняʼ тэворць пиртадоʼ. Ӈаниˮ маркаˮна едэйвана мивыˮ пэˮ мядодоʼ ӈадимдембавыˮ, СВОʼ няна сайнортиˮ нядˮми вадеˮмыˮ.
Неноховавна Ноябрьскхана мэванда мальӈгана ӈэрмʼ терˮ еˮэмня иле хардоˮ нямна манзарана программамʼ тензебтевыˮ. Ямалнаˮ нермбэртя тикы тоенана серˮ нямна тарцяˮ вади мэˮмы:
— Ӈани похо на округнаˮ есьˮ пэнёсяӈгад ӈэрмʼ терˮ программаʼ няюʼ мэтаˮ есьнаˮ няхарˮ яӈорэй ӈокамдаӈгунаˮ. Юрˮ миллионʼ пирӈэ сертаӈгунаˮ.
Тикы программа мале ӈока по таня. Маняˮ еˮэмнянаˮ ӈадимдевы. Таремʼ таслабˮ, ӈока поˮ ямбанʼ ненэцяӈгˮ тэвравы тарода яӈгу. Ӈояк хибяхав мятамда няˮмаӈгу. Ӈанихивˮ тэри ӈатенаˮ. Таремʼ ӈодˮ мяцядаˮ янаˮ терˮ пыхыдадоʼ таняʼ падыбидоʼ.
Ӈопой лахана няˮмы няваˮ сидя юдʼ мян поˮ ямбанʼ мятамда ӈате:
— Мань 2002 похона падрониˮ сертэйнась. Хусувэй нараʼ «жилищная политика»ʼ серо няˮамбадахаˮ ядэрцетыдмʼ, мяˮни яӈгова, мяни терˮ сяӈок ӈэваʼ нямна падрониˮ тэврасетыдмʼ. Сидя юкад вата поˮ таремʼ хаяˮ. Тевʼ ёльцяндʼ мяцидмʼ. Хасава нюми ӈарка ненэцяӈэ хая. Харта иламда мэˮӈа. Манзара, ненэциеˮ мякана иле, тикэнда няюʼ есямʼ салдамби. Манисяв: «Мятми харˮни есяхаˮнани тэмдаӈгудмʼ. Сит тотревʼ нидмʼ ӈатенаӈгуˮ. Ӈатенава тарода яӈгу». Мань ӈобаӈгуна 2010 поʼ пиркана ӈобтикы тарця иӈудмʼ нёдалӈадамзь. Банканʼ серониˮ таславанзь хаядамзь, таняна сиˮми табˮлаˮ, недвапада есями тянёри ӈэвы, ипотекамʼ мэць нивэдмʼ пиратˮ. Тикыʼ пуд етʼ ӈаниʼ ӈатенадмʼ. Тедаʼ едэйвана ӈадимы юнхад ӈулиˮ маймбидмʼ. Янаˮ ервʼ табекоʼ серʼ масиˮ тадриʼ мятми няˮмабцудмʼ.
Тикы программавна законʼ ватоʼ серʼ хусувэй ӈэрмʼ тер иле мята яӈгобˮ, округнаˮ есяхат мятамда тэмда, няˮма пирӈа. Янаˮ ервʼ вадавна, ӈадимдевандаˮ есяˮ хавна ӈэрмʼ терˮ программамʼ хаця несэймдамбаӈгудоʼ. Ненадовна илебей мядʼ терˮ нямна ибедортаˮ. Иле мятоʼ, манзара яндоʼ танябˮ, тохолковандоʼ пуд хартоʼ яханандоʼ илеӈгуˮ, невхыˮ паӈгодоʼ нидоʼ юрыбаӈгуˮ.
Толаӈгодаӈэ еˮэмнандаˮ тадриʼ янаˮ ервʼ ӈэдалёромаʼ нямна тамна паднаӈгуваˮ.
Авторы
Няръяна Нгэрм
Темы