Няръяна Ӈэрм
Ӈокна мунуʼӈашˮ
Таԓкан Ямална Законодательныйʼ Собраниӈ мансдям минԓена веԓв Сергей Миронович Ямкин тоӈаш. Депутатхана мунумантуӈ мэты Пюԓ дяханана ӈайта «Ямал-потомкам!» нимиʼта ассоциацихит мэнаˮ, нешайˮ дет тонԓюта управленихина мансԓаннаˮ, Ӈэԓм чеԓˮ нешадиˮ дет тасламы Советхана мэнаˮ ӈопт ӈомашˮ.
Ӈокна нешайӈ дил нямна мунуʼӈашˮ. Сергей Ямкин нешаӈкнаˮ мунуш куԓка нятакома шеԓˮ Ямалханана тадяӈӭймям вачаӈаш. Выӈкна диԓинаˮ, мюшаԓтаˮ Ӈэԓм чеԓˮ нешадиˮ округханана нятапитуӈ. Чуувна диԓинаˮ, мансԓаннаˮ нешаӈкˮ ӈамы таԓамам Хаԓяӈкаԓтыхина мансԓаннаˮ веԓвыˮ выӈ нямна, нешадиˮ ӈысыманаˮ дятэԓьш намташтутуӈ. Таньше выӈкна, петаԓахана диԓинаˮ нешадиˮ мятуˮ таʼамна дятыԓма вивӈуты, округна ӈаԓка тэтаӈ комы.
Маняˮ ненаˮ ӈупчики нешайˮ деʼэмня ӈамы тасԓавта вачитуӈ тадя, чикитуӈ депутатан мэʼнашˮ. Выӈкна диԓинаˮ нешадиˮ куше диԓимам, ӈамы няӈтуӈ таԓамам, ӈамы тасԓавтаˮ шеԓутуӈ тадяӈӭймям — таԓьша шеԓуˮ вачаӈашˮ. Мансдяӈ дет тохоԓкотаˮ ӈашкиˮ нямна ӈайта шеԓˮ, чуувна, каԓтыхина диԓинаˮ нешайˮ нятапёма, дяна чеԓˮ дечашамаӈ нямна ӈайта ватаˮ, нюча каԓтуувдехенаˮ мансԓаннаˮ ӈашкиˮ тохоԓампючиˮ дет ӈайта шеԓˮ, нешайˮ пяй мяшмаˮ — тасԓавта шеԓыˮ ӈукаˮ.
Чикиӈ камна маняˮ Пюԓ дяхана «Таӈ деԓь дяԓя» нимиʼта праздникʼ шеԓтаман хаʼӈаˮ. Таԓьша дяԓям маньԓе выӈ няна ӈайтаˮ каԓтыхинаˮ мэʼштуˮ. Чуки ноптухуна куԓкаԓиˮ деты шеԓˮ ӈычимштуˮ, шаӈкмян ӈамэʼ вивинтоԓкадя хомана тасԓамата таԓа. Таԓям четаӈ таньше нешаӈкнаˮ дилтуӈ нямна веԓвуˮ дюничаԓма — хома шеԓ.
Лариса Айваседо патмы
Авторы
Няръяна Нгэрм
Темы