Няръяна Ӈэрм
Лаханакуˮ тарабцо
Лаханакуˮ вадеˮма сямян ненэциеˮ тэнзхана ӈулиˮ невхэт миндя серˮ. Тедаʼ вадёданаˮ ӈацекэхэˮ хурка таромʼ хаˮаврамбавандоʼ нямна Саляӈгардахана ненадо лахарёмʼ минрець.
Тэри ӈабцата лаханаку вадець, толаба тедаʼ тюˮуʼ миндя ненэцяӈгаˮна таранакы, нинякы? Тикыʼ нямна ненэй ненэциеˮ юнета няваˮ Елена Тимофеевна Пушкарёва, ОЦНКʼ манзарана Антон Владимирович Верещагин, «Няръяна Ӈэрм»хананаˮ паднана Алла Хосевна Вануйто ӈобнзерˮ ибедорӈаць. Лахарёндоʼ вэта яӈгода тоˮолхась, маˮлёвыˮ нинаˮ хусувэндоʼ вадеˮмы нюрцьмʼ тоˮолхась. Янаˮ терˮ вадеˮмыˮ индоʼ ядэрабцо «Радио России. Ямал» мутравна минхандоʼ намдоръядонзь.
Елена Тимофеевна ненэциеˮ невхыˮ падарци иʼ ӈутʼ мэвыˮ ӈавоˮ нямна ӈока падармʼ тидхалевы, ӈока тарця сермʼ тенева. Пыда мале сян лаханакосавэй, сюдбабцсавэй, ярабцсавэй книгамʼ падвы.
– Учёнойˮ манзаиˮ серˮ, яʼ сярʼ ний лаханакуˮ невхэт ӈобкад паӈгдёдарахаˮ. Тиканда ханяӈыˮ ненэцие вадетаˮ ӈобˮ тоˮолсархаˮ ӈэсетыˮ. Ӈарка Россия янаˮ яʼ тиӈгывна «Колобок»мʼ, «Курочка ряба»мʼ, «Теремок»мʼ, тамна ӈаниˮ малʼ теневыдоʼ. Ӈэрмʼ терӈэ вадетинаˮ ӈаниʼ сиˮив яʼ тяхамна юндоʼ ядэрӈаˮ: «Хорекохоʼ, Писякохоʼ», «Хутий», «Лынзермяʼ сэвʼ не», тамна ӈаниˮ. Лаханакуˮ ӈацекэхэˮна тарабцодоʼ ӈарка. Хусувэй ненэциеˮ тэнзхана небяда, нисяда вадёдана ӈацекэнʼ пилиˮ нерде вадець пэръядоʼ.
Янаˮ ӈарданʼ тедаʼ ӈацекыˮ ныланаваˮ ялэдоʼ илекавна мадабавандоʼ еˮэмня хуркариˮ мэкад серо сертабиˮ. Салехардʼ маркана ӈэда ОЦНКахана ханзерˮ ӈэрмʼ терˮ ненэциеˮ илаʼ хари, мелʼ серо, пирдырмаʼ серо тохоламбвамдоʼ Антон Верещагин вадеˮӈадась:
– Нянаˮ туртаˮ ӈацекыˮ хуркариˮ ӈэсь пэрӈаˮ, ханяӈыдоʼ ӈока лаханаку теневаˮ, ӈаниˮ ханяӈыдоʼ сабе ехэраˮ. Тюкона мэбтоʼ, Иван Истоминʼ падвыˮ толаˮмахадандоʼ нюрцьмʼ ӈэванда еˮэмня падтасетыдоʼ, тад пуна тикавнатоʼ мультфильм сертаба хорцетыˮ. Лаханакохоˮна мэнитоʼ вади хартоʼ вабцувнандоʼ вадеˮядоʼ. Тарензитоʼ ний хурка ӈэвамʼ ӈаниʼ манэˮлабтаӈгудоʼ, тикытоʼ серʼ хуркариˮ мунобцахаˮ хаˮмортаˮ.
Антон Владимировичʼ вадавна, минрена манзаядоʼ ӈацекэхэˮна илекарха ӈэсеты. Тарця нюрцьмʼ серкана хартоʼ няхатоʼ намдвыдоʼ вадеман харвасетыдоʼ.
Сяхариʼ тохолкода ӈацекыˮ сценаʼ нид лахана тохоламбасетыдоʼ. Тикахана ӈацекыˮ хартоʼ лаханаку манэˮлабтамбадаӈэ тарасетыˮ. Сё-Яха хардахана тохолкодиˮ минрена тарця сермʼ Алла Вануйто тензебтедась:
– Ӈацекыˮ воспитательтоʼ ня «Лабтэйко» театрахана хуркариˮ лаханаку манэˮлабтамбиˮ. Нердеʼ сиддоʼ табэдамбадитоʼ няʼ лаханакохона мэнитоʼ вади тохоламбвандоʼ серʼ мэˮманда панэдамдоʼ сэдабиˮ. Тарана хамэдяртамдоʼ ӈобнзерˮ сертабиˮ. Спектакльʼ мальӈгана артистӈэ таранаˮ няндоʼ сырманзь товыˮ нитоʼ едʼ варемдоʼ мэцетыˮ.
Алла Хосевнаʼ вадавна, пилиˮ нердеʼ ӈацекы илʼ хурка ӈэвамʼ лаханакохот тасламбида. Намдвэхэтата вэваˮ, саваˮ серо таняд тэраба тохода.
Илʼ ханзелиˮ несэйворпата ӈодˮ лаханакуˮ ӈацекэхэˮна тарабцодоʼ тедарихив тамна таня. Пыдоʼ хуркаривна таремʼ вадетаку ӈулиˮ харвобтэйдоʼ. Тиканда невхэт ӈадимыˮ лаханакоци ӈацекэхэˮ вадеˮма, толабава сяхариʼ сава.
Нюдяне Махакуйʼ падвы
Авторы
Няръяна Нгэрм
Темы