обновлено: 09:59, 25 августа 2026
Няръяна Ӈэрм
Илма'' манэˮлабтамбавы''
Хэвы сиˮивʼ пуняна Ензяʼ яхаʼ лаӈгʼ ниня Няръяна надо мартʼ «Сокровища Севераˮ» выставканʼ мелˮ, ваˮлёйˮ хибяриˮ ӈэдалёрӈаць. «Россия» нюбета тодоˮ тэнзˮ маˮлюрма мякана юкад вата хасава юˮ яхад тет юрˮ мян ненэцьʼ хуркариˮ ӈавориˮ манэˮлабтярӈэ тэвраць.
Тикы выставка Россияʼ яхананаˮ тяхакуй похоˮна сяхаринда Москва маркана минзеты. Сидя юˮ нюртейʼ яӈорˮ ӈэвамда Красноярской крайхана ӈэсь таславэдоʼ. Манэˮлабтамбадидоʼ сяниˮ явна ӈэдаˮ серˮ: ӈэрмʼ терˮ яхана сертабадаˮ наварˮ тэнзˮ, ембдярˮ, хуркариˮ сэдъяˮ, панортиˮ, миртиˮ манзаяˮ, сертавыˮ сянакуˮ. Сёетэйˮ, таранаˮ, ваˮалˮ вадетаˮ ӈаниʼ помнандоʼ пирдырӈаць.
Няръяна Надо мартʼ яндоʼ няд тэвравыˮ ӈамгэридоʼ «Россия»ʼ центр мюня хусувэхэндоʼ таславыˮ лохоʼ мюня ӈабтамбидонзь. Пыдоʼ туртиˮ ненэциеˮ едʼ тэвравыˮ ӈамгэривнатоʼ экскурсия мэˮӈаць. Ямалʼ няд ядэртаˮ нинаˮ сырэй илʼ саирмʼ манэˮлабтамбиць. Ханты-Мансийской автономный округʼ терˮ манэˮламбтярӈэ тюгӈаниˮ неʼ мюдмʼ вэталавыць. Вэӈгалавы мюдʼ серˮ хаюпа хэня ненʼ небянда табеку вадеˮӈаˮ. Тамна тяхакуна ӈаниʼ ӈопой ӈарка лохона Красноярскʼ яʼ терˮ сертавы выставка «Хранители Севера» танясь. Вивиʼ тоʼ сидяӈг сидяʼ хэвувна таняӈы яханандоʼ сидндет ӈэрмʼ терˮ тэнзˮ илаʼ саирмʼ вадеˮӈаць. Яндоʼ нямна хуркариˮ сидяӈгˮ ӈадиберӈаць. Тамна тяхакуна нюдяркаˮ выставкаˮ нуць: Амурʼ я, Забайкальской я, Тываʼ я, Карелияʼ я, Ленинградской, Иркутской, Мурманской, Кемеровской, Томской областяхад, Якутияхад, Камчаткахад, Магаданхад, Сахалинхад, Алтайхад, Хакасияхад, тамна ӈаниˮ яхат ӈаць.
Манэˮлабтярӈэ таславыˮ лохоˮ сидяӈгахаˮна падтавыць. Тикыˮ тадтаˮми «Северный взор» конкурсхана ӈэдаˮ сидяӈгˮ поӈгад тэравыдонзь. Ямалʼ няд Ксения Ярʼ, Равиль Сафербековʼ, Елена Неркагыʼ, «Изватас»ʼ ненэциеˮ манзаяˮ таняць. Маняˮ янаˮ нямна миндя выставкаʼ ядхана сидяӈг сертаба мэта мутра ӈыдысь. Тиканʼ туртаˮ выӈгыˮ ненэциеˮ мирбяхаˮна тадтаӈгурӈаць.
Ядэрмыˮ нинаˮ мякататоʼ тэвравыˮ мастер-классдоʼ таняць. Мядондаˮ неноховавна илекаӈэ Вячеслав Вануйтоʼ поӈгамʼ сярыбавамʼ манэˮӈаць. Алла Вануйто ӈухуку сэдыба тохоламбидась. Галина Лобанова халяʼ хоб пыябавамʼ манэˮлабтамбись. Зина Климова мадавы паркабись. Егор Наков турмыˮ ӈацекы сянакултамбись. Елизавета Вахрушева лыʼ нямдʼ нимня падтаӈгурӈась. Окотэтто Алина пэ банкаʼ мюʼ нюдяко выӈгы илʼ сидяӈгацярахаˮ мэхэя композиция сертабись. Ямалʼ терˮ тамна ӈаниˮ хуркариˮ мастер-классдоʼ таняць. Сертабадидоʼ хибярихиˮна мэкадархаць, ӈадьбянда выставкахандоʼ турта ӈокась.
Яʼ ханярид маˮлёвыˮ нинаˮ хартоʼ сэдвыˮ ембдяродоʼ «Полярный стиль» пирдырмахана манэˮлабтамбидонзь. Мелˮ ненэцяˮ ётоʼ няд хуркариˮ сырэйˮ, таӈыˮ, харадʼ илаӈгана мэтаˮ паныдоʼ тэвравыць. Таремʼ сэдвыдоʼ мядʼ терˮ ембдярˮ, ханяӈыˮ етя хибяхавʼ едʼ сертавыˮ ӈамгэˮ. Хусувэндоʼ сыдырˮ янда мэсыдмʼ вадеˮӈа, мал паскойˮ. Ямалʼ няӈы ненэй ненэциеˮ, хабиˮ, тасуʼ хабиˮ ембдяро манэˮлабтярӈэ тэвравыць. Тикыдоʼ поʼ серʼ мэтаˮ паныˮ, мальцяˮ, тохокат сэдвыˮ имбытадˮ. Маняˮ яхаданаˮ тецьдаˮ нумгаˮна мэта «Эко Хирви»ʼ ембдирмʼ манэˮлабтамбиць. Сюдбя тецьдахана иба ӈэванда еˮэмня едэй мутравна сэдъхая, тыʼ тармʼ нядˮмята «Лимбика» таӈгакана таӈгадавы.
Хартоʼ яндоʼ мысыдовна сёдоʼ, тарабцодоʼ «Кочевье Севера» фестивальхана мэйдонзь. Няхарˮ ямб яляʼ турта нитоʼ еˮэмня сёетэйˮ ненэцяˮ сиˮив яʼ вадавна хыноˮӈаць. Маняˮ яхаданаˮ ярабц мэта Вячеслав Вануйто, Фолк-Группа «Илебц» нитоʼ поӈгана мэць.
Хуркариˮ илекавна сертабадиˮ хавна ӈэрмʼ яʼ тиӈгэхэд тэвравыˮ ӈамняладаˮ ӈавар «Экомаркет» выставканʼ тэвравыць. Тикыдоʼ пихиня, Енсяʼ яхаʼ лаӈгʼ ядувна миндя пулʼ няна ямб ӈысыʼ «Кочевое стойбище»ʼ хэвхана туртаˮ ненэцяӈгˮ тэмдарамбидонзь. Маняˮ яхаданаˮ ӈамзахат, халят, ӈодяхат сертавы ӈаварˮ тэнз «Дары Заполярья» мирдапидась.
«Сокровища Севера»ʼ ирмня хуркариˮ ӈаркаˮ тасалкурмаˮ миӈаць. Ӈобˮ тарця форумхана толыртоʼ тянёˮ ненэцие нядабавамʼ вадеˮӈаць. Яʼ сярʼ ниймʼ лэтамбаваʼ нямна лаханаць. Няхаромдэй яляханандоʼ выставкахана мэвыˮ нинаˮ ӈаркаˮ концертанʼ маˮлыць. Тиканʼ товыˮ ӈэрмʼ терˮ ненэциеˮ вадавна ӈэдаˮ сё намдаць. Хуркариˮ ёˮ мысыдовна ӈэдаˮ тарабцо манэˮӈаць.
Пудана яляханандоʼ «Сокровища Севера» выставкахана пирдыртаˮ нинаˮ сямянхат ваˮлёйˮ хибяриˮ ненадумдаванзь ӈобтʼ маˮлыць. Маняˮ янаˮ терˮ ӈобнзерˮ манэˮлабтамбавэдоʼ нюртей янʼ хаˮмыць. Ӈокханда Ямалʼ няд ядэрмыˮ нинаˮ юкадʼ вата сиˮив ненадо ӈудаʼ термʼ няˮмаць. «Полярный стиль»ʼ фестивальхана Ямальской районхад ӈэда Зинаида Климоваʼ няби Пуровской районхад Татьяна Пякʼ сырэй ембдяродиʼ нюртей янʼ хаˮамвыдˮ. Манзаитоʼ серʼ нябимдей янʼ Алла Вануйто, Сергей Ледков, Галина Лобанова , ОЦНКахад ӈэда сёмʼ мэтиʼ группа «Илебц» еремыˮ.
Няръяна Надо маркана тет яляʼ ямбанʼ ӈэрмʼ терˮ илмʼ ӈадимдембада ӈарка выставканʼ хибяриˮ турӈаць. Россия яʼ терˮ хавна ӈаниˮ яʼ пареӈодиˮ яхат мядондаˮ ӈадиберӈаць. Пыдоʼ ӈэрмʼ няӈыˮ илʼ саироˮ нямна намдавэдоʼ, манэˮмэдоʼ ӈока.
«Сокровища Севера»ʼ выставка яʼ терˮ илʼ няюʼ ӈарка тарабцомʼ хаˮаврамби. Тодоʼ тэнзм мэтаˮ янаˮ тер ӈобтʼ нясламби. Ӈарка Россия янаˮ терˮ ненэциеˮ илаʼ саироˮ нямна лахананараха. Ӈэрмʼ няӈы илмʼ ехэранар танямна ядэроˮмахаданда илекавна манэˮмыда, намдвыда харта индаʼ серˮ тамна тяхакуʼ тохоламба пяӈгуда.
Нюдяне Махакуйʼ падвы
