Няръяна Ӈэрм
Ӈаԓка хамум канаӈа
Чуки похона Пуровский’ районхана ӈаԓка хамум канаӈа. Неԓьня выӈкна, дяку’’ кcвхана диԓина’’ неша’’ тэтнаӈаш’’. Каймы диԓиӈ хусыкана пя’’ поӈкна ӈайта хыԓи’’ дюнаӈ, дяку’’, токуши’’ хэԓ кайнаӈ ви’’ ӈокмаш’’. Выӈкна, петаԓахана хамута ӈаԓкаш. Хаму дяԓи’’ тахана чуув миньдяш. Дям хэԓ кайнан куки’’ нешади’’ мят’’, ӈамыку’’ вит поӈкна кадяш’’. Дяхаӈ кcвхана ӈайта мяту’’ чупей хаму койташ.
Время для чтения ~ 3 минуты
Ненымана пяй’’ мят’’ тэтнаӈаш’’. Таԓьша мя’’ ненэй мятԓям ӈатан тайванана’’ выни’ӈа’’. Хамуӈ поӈкна мятутуӈ каймы’’ неша’’ ӈамыкутуӈ чупей ха’ниӈаш’’. Неша’’ маньшту: ԓакхай по’’хона’’ таԓьша ӈаԓка хаму дикуш. Таньше ӈаԓкамана ха’нимы’’ ӈамыку’’ меԓ кастанана ни’ӈа’’, тай’’ня дюԓпымты’’, вомты’’. Таԓям Ӈэԓм’ чеԓ нешади’’ дет ӈайта управленихина мансԓанна’’ нешаӈк маньш патӈатоньш: кимяӈ мят хаму тcвдяш, мятута’’, ха’нимы’’ ӈамыкута’’ таттыдита’’, няӈна’’ ӈайтаптыдита’’. Управлениӈ веԓв маԓьшхи Терентий Пяк маӈаш, хамохана мятутуӈ, ӈамыкутуӈ ха’нимы’’ неша’’ фонд «Надежда» конԓаматуӈ таԓа’’, таньняна шичитуӈ нятамантуӈ мэт.
Чуки похона хамута ӈаԓкаш, выӈкна, петаԓахана ӈайта мяту’’ камна дяши’’ кcвхана ӈайта каԓтыхи’’ тcвдяш. Каԓпюԓкана куки’’ мят’’ ӈупчики хамуӈ поӈкна кадяш. Дяхаӈ ԓаӈк няна ӈайта пяй’’ мят’’ вит поӈкна кадяш’’. Хамуӈ меԓ каймяӈ мэты Каԓпюԓ чеԓ’’ ӈуп нэхэхана ӈайваӈаш’’. Шичитуӈ нятамантуӈ мэты Ямалспасхана мансԓанна’’ Таԓкахат тоӈаш’’. Чуки диԓиӈ нимимты дяԓяхана хаму Таԓкан тcвдяш. Пякупур хэԓ минтан дяхаӈ вит чуув дюԓкдяш. Дяхаӈ ԓаӈк нимня вит тотан, шанат мят’’ хамуӈ поӈкна кадяш’’.
Чикиӈ камна пя’’ поӈкна ӈайта хыԓи’’ дюнаӈ, дяку, токуши хэԓ кайнаӈ Таԓкаӈ выӈ няӈат ви’’ тоӈаш’’. Каԓват маԓхай дачный’ участок’’ няна ӈайта мят’’ чупей хаму тcвдята. Шанат дяԓи’’ хамуӈ ви’’ нуӈа. Пуровский’ районна веԓвы’’, таньдет ӈайта оперативный службахана мэна’’, ГО и ЧС, волонтёрӈэ нятакота’’, Ямалспасхана мансԓанна’’ шанат каԓтыхит томы’’ МЧС няш ӈука ӈайватам шеԓташту’’. Хамуӈ меԓ каймяӈ мэты ӈуп нэхэхана мансԓаӈа’’. Чупей нятакуш’’, куше мансԓамамтоӈ Ямална ӈаԓка веԓв маӈктата маныдеӈаташ. Мятутуӈ хамуӈ вит поӈкна каймыдю’’ ӈамэхэна, куше няташатуӈ де’эмня конԓымпитоньш. Четаӈ каԓват поӈкна ӈайта мяту’’ кcвхана ӈайта вит’’ касӈа’’. Хамунта ви’’ манԓе камутаӈа.
Автор: Андрей Пяк патмы
Авторы
Няръяна Нгэрм
Темы