обновлено: 12:20, 07 мая 2024
Няръяна Ӈэрм
Ӈарка маркана тохолковы’’
Ямал’ тер’’ илесь ёто’ нямна етри’ ибедорӈа’’. Хусувэй по’ ӈамгэхэв сава иӈудо’ ваде’’ӈа’’. Таддикахад яӈга теневабцодо’ ӈокамдамби’’.
Время для чтения ~ 2 минуты
Тандая’ ӈацекы ненэциена’’ Московской областян’, Солнечногорскан’ ӈэдалёрмы’’. «Сенеж» тохолкулвахана ӈэда «Кадры для села» семинаран’ инзелевы’’. Ӈобт’ нюдяко’’ хардахат ӈэда’’ ма’’лёвы’’.
Россияна’’ тиӈгэвна нюдяко’’ хардахана илена’’ харто’ союздо’ таня’’. Маня’’ илебей ненэциена’’ ӈобтикы тарцясавэй’’. Серо минренадандо’ Сёяха’ тер Геннадий Окотэтто тара. Ӈэрё’ съезд ӈэва’ мальӈгана пыда проектм’ падась. Проектамда мале сертадась. Ныхыдырта’’ е’’эмня пирдырмам’ ӈадимдесь. Тикы’ хавна пыда ӈарка’’ маркат ӈаха’’на ӈэда яхана иле. Ӈэдолёро’’мита нямна тарем’ лаханась:
— Ӈобт’ яна’’ ханярид ӈэда’’ ненэця’’ ма’’лыць. Нермбэртяӈэ тарана’’, «Лидеры села» пирдырмахана нерня’ ха’’амвы’’, тамна ӈани’’ тохолкован’ харвана’’ тикахана мэць. Няха’’на’’ теневабцона’’ ваде’’ӈаваць. Ненадовна «Лидеры села» нямна намдаваць. Тохолковамдо’ ёльцевэхэ’’на, тандая’ манзара пэвэхэ’’на ӈарка няд’’маӈэ тарана ӈамгэ ӈэвы. Ямалханана’’ «Российский союз сельской молодёжи» (РССМ) ӈобтикы таня, тандаярка’ ӈадимясь. Нерняна таславанда серма’’ ӈока. Нюдяко’’ хардаха’’на илени’’ поӈгана нермбэртя’’ ӈокаркавна ӈадимбато’ сава ӈэӈгу. Тикахана сяхари’ марк’’ илеванзь вуни’’ хант’’, харто’ яха’’нато’ илеӈгу’’ним’’. Тюку по’ пуданахана, харвабта, ӈани похона ӈэбта ӈод’’ Сёяхана съездм’ мэ’’ман’ харвава’’. Округна’’ ханярина нермбэртяӈэ тарана нина’’ ма’’лаӈгува’’.
Тохолковандо’ пуд «Лидеры села» пирдырмам’ нэвы’’. Ханяӈы’’ мале пыхыдадо’ тикан’ падвыдо’. Сую’’ ниць иры’ 31 яля’ ӈэсонд’ падродо’ лидерысела.рф сайтан’ ӈэдара пиртыдо’.
