Ӈарка март’ ӈэдалёрмы’’ | «Красный Север»
0°C

Няръяна Ӈэрм

Ӈарка март’ ӈэдалёрмы’’

Саляӈгарад’ тер’’ Москван’ ӈэдалёрӈаць. Нямэхэна «Неделя ГТО» миӈась. Тамальӈгана марад’ ӈэвахана мэна сава серм’ сертавь. Хусувэй хибя значокм’ ня’’амванда няю’ розыгрышхана мэсь пир’’ӈадась.

Время для чтения ~ 2 минуты


Си’’ив ненэця’’ няхатато’ ябдавыць. Поӈгандо’ колледжхана тохолкода Тарас Лаптандер еремясь. Тандая’ ӈарка март’ сиддо’ ядэлавы’’. «Россия» выставкам’ манэ’’мы’’, харад’ помна ядэрмы’’. Таняна мэвы’’ нина’’ ма’’нисям’’: «Тарця экскурсия’’ ёльце и’ вато’’. Ӈопой яхана мэва’ то’’олха ниӈа’’. Пова’’ сававна пява’’».

Ненэця’’ Россиява’’ торомдамби’’, ехэрана я манэпи’’. Невхы’’ похона’’ мивы хардо’’ нямна хуркари иле’’ми намдорӈа’’. Маси’’, хибяхавадо’ сяхаӈгарт’ Москван’ нивыкы тэвор’’. Теда’ тикы ӈэдолёро’’мамдо’ иландо’ ямбан’ тенеӈгудо’, сяхари’ ӈацекэхэто’ вадетадо’.

— Мань тум’ хабтабадаӈэ тохолкудм’. Ӈадьбята хусувэхэт ныхыми ӈокамдамбасетыдм’. ГТО’ норма мипавам’ тарана серӈэ тасламбив. Харе’’ ныхына’’ сямбир ӈэвам’, сямбирувна мэбе’’мава’’, сенз ӈэвава’’ манэць пир’’ӈава’’. Таддикахад тамна сидна’’ ӈарка марадм’ манэ’’манзь ӈэдарамби’’. Неновна ӈэвна’’ сибимдева’’, несэй ям’ манэ’’ӈава’’. Ныланава’ ялэна’’ ханзоць мэ’’яна’’, — нябимдей по’ тохолкода тарем’ лахана.

ГТО’ норма ми’’ма’ е’’эмня http’://www.gto.ru/ сайтхана таняб’’нанда’’ серо’’ӈа. Тикахад лекар’’ падар’’, паспорт тара. Пуна сёбар’’ ненэцие’’ хардан’ хэсь тара. Знак ня’’амвы’’ сёбар’’ ненэцие’’ хардан’ мирцярка ханаць пиртада. Солотой знакм’ ня’’амвы скидкада -50%, ненэй — 20%, нярава — 10%.

Автор: Анна Яптик’ падвы


3

0

0

0

0

0



Темы