обновлено: 04:17, 12 сентября 2023
Няръяна Ӈэрм
Ӈарка март’ паромби’’
Выӈгы ява’’ терсялма, сыӈгрёсялма. Мяд’’ мюй’’ таӈгоӈэ хая’’. Нув’ няра ярм’ нэкалӈа. Тире’’ помна сарё’ тэс’’ няйналыд’’. Тиртя сармик’’ икдо’ ядембада’’ ё’’ няю’ вэн’’ядо’. Я’ ӈолепя’’ несэймъяд’’. Тасехэй’’ вэба’’ ян’ лехэбтэяд’’. Пензя’ ваӈгахана лыӈгарёвыдарев’ вэба’ иры ям’ севолӈа.
Время для чтения ~ 3 минуты
Тюку ирыхына ӈарка’’ марка’’на тохолкода’’ ӈацекы’’ тохолкулава’ яхато’ вэрна’’. Хой’ няд тиртя ӈанохона турӈа’’. Пуна тамна’ тяха’ и’’мана ӈэдалёрта мерета ӈанон’ тиӈга’’. Нябимдей по тохолкода’’ маймба миӈа’’. Тандая’ школам’ ёльцевы’’ сейдо’ ледрерка’’. Нерняӈыдо’ сата синёхона талвэрха. Пинбато’ ӈод’’ пуня’ ни’’ ӈа’’, сававна тенева’’, тохолкова илаӈгандо’ саць ӈарка таром’ ха’’авраӈгу.
Людмила Лаптандер’ нисяха’-небяха’ Яр-Саля’ вымна мюсерӈаха’. Не нюмди’ ӈацекы’’ ӈанохона ӈэдаравэди’. Тедахав’ таӈгаӈаха’, нюди’ нябимдей помда пяӈгу. Нюдяко’’ ӈацекэхэ’’на манзаранаӈэ тоходанаӈгу. Людмила мале Саляӈгардан’ тэворӈась: «Хой’ няд си’’ми ёльце ӈатевыць. «Северный характер» пирдырман’ хэвандава’’ ӈэвываць. Харпхад то’’махадани ӈани’ мякани ныланаванзь хаядамзь. Ти, тохолкова поми тарем’ пяв».
Панаевск хардан’ нултавана’’ сер’ самляӈг хасава ӈацекы’’ тю’’. Мал’’ ня’’амбада’’ пададо’ пан’’ӈа’’. Тетадо’ нюртей по’ маркана илеванда’’ ӈэвы’’. Кирилл Лаптандер, Георгий Хороля, Пётр Пырирко, Михаил Сэротэтто едэй иланд’ ха’’маӈгуд’’. Няхатата ваӈутадо’, нябимдей по’ тохолкода — Александр Лаптандер.
«Та’ ямбан’ ты’’ мякана мэдамзь. Нисяни ня’ малкосетыни’. Маня’’ няхар’’ мя’’маць, ӈадьбята таӈга илеваць. Мякани сыранда ха’’ам’’марихид тэваӈгув’’, таӈгунат пон’ мэ’’мами яӈгусь», — Георгий ма. Няби’’ нида лахарёхонда инзелець, ӈопой’’ идо’ мядото’ нямна ӈэда то’’олхаць.
Мерета ӈано’ мунли сось, сидя ядувнанда ид’ тялнари’’ хаюрӈа’’. Ӈамгэ’ пиркана Саляӈгарад’ лаӈг’’ ӈадимя’’, яхана’’ тэвына’’. Хамэдёда сяйм’ ӈаманзь теневана’’ нини’’ мят’ хаядм’. Тикахана Мария Ӈокдэта Сёяха’ тер, сёётэй не мэсь еремы. Мария сидяри пода хаи, тикахавад манзара пэӈгу’’. «Мань выӈгад пилю’’ иры’ пудана яляхана тэвываць. Сэдоранахани таӈы’’ нувони лакри’ суса’’. Ӈани’ паднаӈгува’’, толаӈгодава’’, хынотава’’».
Тандая’ школам’ ёльцена, нюртей еся сехэры’ мунм’ намдана то’’олхадамзь. Мале сян по’’ юдэрмадрев’ хая’’. Ӈацекы’’, ӈацекэхэ’’на манзарана’’ сенз’’ ӈэя’’, подо’ сибё ӈэя.
Анна Яптик’ падвы
