Ӈарка пирдырми’’ нерня’

Нара’ няна Салехард’ ядхана харе’’ тыдо’ пэртя’’ пирдырцеты’’. Приуральской район’ тер’’ илева’ тарця сянакова мэ’’ӈа’’. Тикыдо’ харе’’ помнандо’ «Хулейдаваӈэ» ваде’’ядо’. Нябимдей по’ «Ямал-ню’’на’’ я!» ассоциация’ тер’’ сидто’ нядаби’’. Хахаяда яля’ ӈод’’ няхар’’ ӈэсы’ тер’’ ӈани’ ӈобт’ ма’’лыць.

Время для чтения ~ 4 минуты

Таславы яляхана Леонид Ильич Лаптандер’ ӈэсыхына ӈа’’и хубтахад ӈатенаць. Хахая илена’’ нито’ хавна ӈани’’ яхат мяк’’ турта’’ танявандаць. Маня’’ тована’’ мальӈгана мале тыдо’ мяканандо’ ванвыць. Тарцям’ манэсо’’махадана’’ ина’’ ӈылмна маиваць. Мякад нито’ нерде’ Леонид Ильич ӈадимясь. Нюрцьбямда вахалъяць. Ма’’нисяв: «Пон хуныда’’! Мале ӈаха’’на сянакубина’’ помнана’’ мэйнаць. Нерденаӈэ товы нява’’ мядонзэйримда ӈате». Тарцям’ намда’’махадана’’ ханяцей ихинана’’ маиваць: «Ненэся нина’’ ӈатенавы’’».

Ты пэртя’’ ӈатена’’, сянаковам’ мэтава’’. Сидяӈг: М.Яр’ тадтавы

Хасава’’ тынзяӈодо’ нэкалӈа’’, пэдари’’ поӈгад ӈоб’’, сидлад’’мана ӈэдалёрта’’ ӈадиберӈа’’. Тэхэ’’на, мерета «Ямахаха’’на» нито’ пумна тэри вэрна’’. Харта ӈод’’, Лаптандер’’ ярколаб’’нандо’, ӈэдаравандадо’ яӈговы. Ӈоб’’ мовахана сидям’ яркыба пирмы’’.

Вы’ илаӈгана луца’ часхад юрыбива’’. Ӈадьбята ӈод’’ яля’ вэкана таславы ян’ сехэры’ няю’ пяваць. Таняна мале нерденаӈэ ӈэдалёвандидо’ тыдо’ хареба хорпидонзь. Сырахад сертавы ябти сехэры’ нимня хан’’ тэри хайнаць.

Тюку не ӈэдалёбта ва’’лёй, лабакм’ мер’ сюртевэда. Сидяӈг: М.Яр’ тадтавы

Наталья Тысия тарем’ лаханась:

— Ӈани’’ похо’’на хасавари’’ пирдырцеты’’. Тюку по’ неӈэ сидяни’ ӈэӈгуни’. Тыни’’ вэсакоми янемдамбавы’’. Мань тэри хан’ ни’ ӈамдаӈгудм’. Ты’’ харебавахана ӈани’ пэдабцо, мэё тёр таранив’’. Тарцясипой’’ ханяӈэхэна тэр ни намдаӈгу’’.

Ефим Петрович Тайбери мале ӈаркамбой ненэця’. Пыда пирдырма’ нямна тарем’ мась.

— Маня’’ илебей ӈэвана’’ мальӈгана ӈани’ тарем’ поӈганана’’ «хулейдава» мэцетыва’’. Тикар тэри помнана’’ мимбата нюрцьм’ ӈэсеты. Ӈуда’ тер’’ пирдырманда’’ харто’ помнандо’ ӈадимдебасеты’’. Тамальӈгана сянакова’ ялэна’’ тарем’ ненадовна нина’’ мэцету’’.

Теда’ ӈэдалё мэ’’мы’’ тыдо’ Салехардахана ӈани’ тараӈгу’’. Ӈули’’ сава ӈэбато’ Аксаркан’ подертыдо’, теда’ вэваӈэ хамедаб’’нандо’, мале нидо’ мэт’’. Сидяӈг: М.Яр’ тадтавы

Нерде’ хасава’’ ӈэдалёрӈаць. Мат’’ хан’ терм’ ӈоболад’’мана ӈэдарамбидонзь. Сехэрэдо’ сидя ханхана тыясь. Харта ӈод’’ тарем’ пирдырмахана ихинани хан’ ни’ ӈамдавада тоена. Мале ӈамда’’махавахад тэри хайнава ӈарка серта яӈгода’ то’’олха. Ябти тёр ӈани’ няд’’ма.

Пуна’ не’’ ханото’ ни’ ӈамдыдаць. Сидто’ паробтахая ӈэдабтамбиць. Нина Лаптэй’ пирувна Пэ’ тер’’ не’’ поӈгана ӈэдалёда яӈговы. Ёря паным’ мэць, хананда ни’ тиванда сер’ хури’ мунзипой нэкал’’ӈада. Ӈэдалаванда нерня’ хонраваць. Ма’’нисядам: «Тёрар я’’авлаӈгу?» Мась:

— Мань нидм’ тёрыцету’’, тыни янамбовна харебасетын. Тадӈо’’ таӈар тёрми яӈгу. Мэёвна матидевы ты’’ тёрылемба ни тара’’.

Не’’ поӈгат ӈэдалё Нина Лаптандер пир’’мэда. Нянда пуд Наталья Тысия ӈадимы. Пыди’ ӈуданди’ терӈэ есь ня’’амвэхэ’ . Сидяӈг: М.Яр’ тадтавы

Ялянда сэв тасина хэсь ӈани мяд’’ няю’ пяваць. Таняна нерня’ ха’’амвыдо’ таслаць. Лаптандер Василий нита поӈгад тыда сямянхат меремы’’. Пыда бензинхад мэта ихибцям’ ня’’мась. Нянда пуд Тысия Алексей ӈадимясь, нянда мирць мэта харм’ ми’’ӈаць. Няхаромдэй Лаптандер Пётр ӈэвы. Пыда термосм’ е’’эйӈась. Не’’ поӈгат ӈэдалё Нина Лаптандер пир’’мэда. Нянда пуд Наталья Тысия ӈадимясь. Пыди’ ӈуданди’ терӈэ есь ня’’амӈаханзь. Ти, Салехард’ ядхы пэдари’’ поӈгана тарця сянакубцм’ мэ’’ӈаць.

Теда’ тикы нина’’ Салехард’ няю’, Аксаркан’ нэкалтадо’. Таняна ӈани’ сянакода’’. Сидяӈг: М.Яр’ тадтавы

М.Ярой’ падвы

Авторы

Няръяна Нгэрм

03:34, 24 марта 2023

обновлено: 05:11, 24 марта 2023

Темы