Ӈарка таром’ ха’’аврамбись

Хахаяда яля’ редакцияханана’’ тарем’ таславаць. Хусувэва’’ саю мардава’ няю’ харе’’ мята’ тер’’ нямна паднаӈгу. Маня’’ ӈавнана’’ ӈэрм’ терӈэ хэбидя саю’’ похона ӈани’ ӈарка таром’ иринана’’, нисянана’’ ха’’аврамбиць. Ненэй ненэця’’ сайнорманзь ханлэйдонзь, ӈокадо’ яханандо’ халядаць, ханець, ты пэрӈаць. Сяни’’ по’’ ямбан’ таӈгм’ юрадонзь.

Время для чтения ~ 5 минут

Нисями Яр Тэтакоча — халям’ хадабись, сэбинена планм’ томдабись. Иланда нямна теда’ ваде’’ман’, невхы лахарёми’ нянда тэвраван’ харвадм’.

Нисява’’ пудана ялянда ӈэсонд’ ӈэдалёбнанда ӈэва инямда нида ӈэдарамбасету’’. Ӈыхы сэвта сыла’’махад манзарась. Невхы паӈгода евако ӈацекэхэд пэвы’’. Нисянда нися’ мяд терсял’’махад тэта ненэцие’’ манзаранаӈэ таравы. Индя ваторихина, иланд’ ена тас ненэцяӈэ хэвы. Манэ’’мэда, намдвэда нисяна’’ ӈокась. Невхы иле’’мида лаханакодарев’ вэроласетыда.

Пили’’ манзарадамзь.

— Илаӈгы ненэця’ ӈэвани мальӈгана тоенавада нись со’’. Ӈопой по’ вэс тэри мэдамзь. Тамальӈгана Ӈэдяӈгана школам’ сертаць, си’’ми ӈарка няни е’’эйӈэ школан’ ханаць. Мале ӈарка ненэцяндамзь. Нянани тохолковы’’ нини’’ ӈод’’ сини ӈараць. Теда’ тасла ю’’ си’’ив, сидя ю’’ пона’’ ӈэвы’’ ӈэӈгу’’. Ӈопой нярива’’ си’’ив потнась, нюдрев’ пэрцетыва’’. Поӈгнана’’ мэбта ни ӈадьсяту’’. Нюрте’’э’ луци’’ паны сер’’махадана’’ пили’’ ханьторцетыва’’. Ӈани’’ няхабина’’ паныто’ пеля харад’ хэвхана илена’’ ненэцяӈг’’ мирдамыдонзь. Тохолко пэ’’мяхадана’’ буквы, пякоци, сюребтяв ӈамгэ падыбасетыва’’. Таняна ӈод’’ луца нюмдами таць. Петям’ нюбе’’ӈадамзь. Ӈани’’ нини’’ мал’ луца’ нюбе мэлаць. По’ вэс тохолковэва’’ ӈэӈгува’’. Сидна’’ ма’’лавандо’ мальӈгана сырада мале ёрмась. Нарэй хаерта сэв тю’’уна хэ’’мяхад луцава’’ сайнорманзь ханаць. Сидна’’ тохоламбада яӈго нисями пырдари’ мякни си’’ми ханась. Пуна тохолко vанзара пэ’’мяхадана’’, сидядо’ поӈгани терханзь. Тамальӈгана луца’’ няна’’ ма’’ним’’: «Сайнорта’’ нядаба тара’’». Тына’’ пел’ хадэйдо’, маня’’ халям’ хадабадаӈэ таралъяваць.

Саць тоенась. Няръяна луца’’ ватодо’ са’’ӈась. Таӈода, сырида таӈгм’ нива’’ хосету’’, вэва нумгад ехэраваць. Никадабцо ӈамгэ ӈэвам’ ӈани’ юраваць. Тюку илаӈгана малкоць вэн’’ тарем’ ни’’ манзара’’, сяйна’’, сидна’’ сянда яӈгусь. Ненэйвана луцина’’ нянана’’ ёраць ханпато’ вэва ӈэсеты. Манзаранаӈэ сидна’’ маниесеты’’. Тикад серо теневанадарев’ табекурта’’. Хэтувандахавадо’ ӈока ӈэӈгу. Хасхана ӈанона» мюня ӈамдёда луци нюхулембаӈгуд, и’’маӈг ӈэсеты’’, ит’ ни’’ ха’’морт’’. Харта ӈод’’ седемы’’ ит’ санарма саць тоенась. Ӈэна’’ тецьда и’’ тэри лядпасетыда. Мале ит’ тэв’’махавад пирдалесетыва’’. Санаванд нерня’ ӈэд харто’ ӈэсондо’ ханимдарха’’ ӈэӈгу’’. Ӈамгэ тарця ӈэвакы, халяда етри’ ӈока ӈэсеты. Нум’ ӈарка маям’ ебтабаванда е’’эмня тарем’ сертабавакэда. Поӈгабина’’ пили’’ панцеты’’. Маня’’ ёртяӈэ тивна’’ ни’’ терсясету’’. Хадавы’’ халякоци ӈаворцетыва’’.

Ӈобаӈгуна

Халя’’ паӈохона немахад ехэраваць. Мэта вуни таня’’. Халя’’ хавна сё’ сивна ханда яӈгува. Маеӈо палеваць. Ӈобаӈгуна яв’ няю’, Хальмер Ваӈга хэвхана ёрманзь ӈэдара’’. Тэв’’махадана’’ ты пэртя’’ мяк’’ лекар’’ луце нем’ ханаванзь табеда’’, нид минзь ёртава’’. Ёрянда тэв’’махадана’’ мерцяӈэ хая. Хамба’’ саха’’ма’’. Ӈанова’’ икад панаӈга пэй’’. Лабидо’ ёрцини’’ ӈули’’ нидонзь ӈэдарамбю’’. Ӈопой няна’’ пуня’ ӈэвы ӈэб’’, нида мал’ хадарабтаӈгудась. Хибяхавана’’ ябан’ ям’ манэ’’ӈава’’. Тикахавад хаӈяцей саха’’мава’’. Ӈанона’’ сэйвам’ хамеда, ненэцие мал’ ӈано’ хуӈган’ хэсь табедэян’. Луца нехев тарензяда тандая’ ха’’амвы сырадарев’ хаясь. Сяӈок хэхэда таня’’, мал’ тензебтевыда ӈэӈгуда. Тарць сэсетавана халэна’’ юрына’’. Индана’’ тедыба япда ит’ санэйва’’. Ёря ӈэвакы, нинякы лаӈгхаван’ маяндорць тэвынаць. Я’ ни’ тэв’’махадана’’ тукуцям’ пятава’’, хибяна’’ серада танявыкы. Тандая’ сэдвы мальцям’ мэта луце не мальцяда нерде явна лэбтась. Ядембада ту’ хэвхана мальцяда тэри сангаръй’’. Пуна’ нина’’ ты пэртя’’ мяк’’ ханадонзь. Маня’’ ӈанова’’ хае’’мяхадана’’, ӈобтикы пэдёдава’’ мэванзь мяк’’ хаяваць. Итя хас’’махад тад манэ’’ӈава’’, ӈанова’’ няби хэванда ни’ мандэвы’’. Хэвхэда тэри сэрако’’я. Ӈока’’я халя’’ тэри ӈано’ хэвхана юседа’’, халэв’’ нито’ ни’ ӈамдорӈа’’. Ӈанова’’ ӈобкана ян’ нэкалӈава’’. Сулур’’махадана’’ ӈани’ ит’ ха’’аврава’’. Пырдари’ минзь, халякоця хадаваць. Тикы серма’’ сенаси’’ хаясь. Луца’’ сидна’’ хонрамба пявы ӈэбто’, мань поӈга’ ервӈэ саць еремдадамзь. Тамальӈгана пыдо’ сыбинець. Тарем’ ӈани’ хаӈгамахавава’’ яӈгу. Тикы тальняю’ тамна пон’ тарем’ ёрӈаваць.

Тарця иле”мида нисями пунда хаесь. Ӈобтикы саю мардава’ няю’ варемда мэ”ӈась. Маня’’ газетахана падананаӈэ я’ тиӈгы сайнормы’’ вэсакохо’’, пухуцяха’’ сейхад ӈэда вади ӈэдарамбива’’. Я’ хоба’ нимня тамна пон’ ядэрӈая’’! Тамна пон’ яля’ сэван’ сырӈая’’! Нюдо’ сававна сиддо’ пэр’’ӈая’’! Мято тер’’ сенз’’ ӈэя’’!

Автор: Марина Яр’ падвы

Авторы

Няръяна Нгэрм

04:58, 08 мая 2024

Темы