Няръяна Ӈэрм
Ӈармы ненэцие’’ яля’ ед’
Мяд’ ядувна мимб’’, нюдя нюмда сянакултамба ябти письда пин’ сосеты. Пирибтя ни ӈа’’, тикы нява’’ ӈаркамбой нябакова’’ — Юля-хада, помнана’’ хасава нюнда нюмгана Токо’ небяӈэ пэрцетыва’’. Хадава’’ ӈамгэ тензебтева’’? Хор’’ иры’ нюртей яляхана ӈарка яна’’ тиӈгывна ӈармы ненэцие’’ ялям’ ядабтамбаӈгува’’. Тикы’ няю’ хаданана’’, иринана’’ нямна лаханаӈгува’’.
Время для чтения ~ 3 минуты
Токо’ небя хадаӈэ вадепана’’ ӈод’’ мякананда сяхаӈгарт’ тэри ӈамдёда ни ӈа’’. Ядембада нумгана, хубтакохона сяй’’махадандо’ ӈэсоӈода высылтамба пинякуна тэри ядэрцеты. Неняӈгасяда нумгана ваӈг тэлхана поёрцеты. Ныхында, выранда пирувна ӈоб’’ севэйхана тэванасеты. Хадана’’ 79 пода, ӈани похона мале 80-ӈэ ханда, тикы пода вадавнанда ни со’’. Тэри ниванда ӈамдёванда е’’эмня, яля’ мадасэйда тэри яёл’’ манзая’’. Ӈодя’’ ӈадиво’’махавад пыда ваӈго’’ тэл’’мана сюрберманда. Ӈоди’’мам’ пили’’ харвобтада.
Мяд’ манзаяхана тэри ӈамдёда ӈани’ ни ӈа’’, ненэйвана нюта нюм’, мядонда хасава ӈацекым’ сянакултамбасеты. Пыди’ хосарка’’на сянакосетыхы’. Хардахат товы нюмда тарем’ сянако ненэй вадан’ тохоламбида. Помнанди’ нюрцямба тэдорпати’, ёльце мэкадаха’ ӈэсетыхы’.
Харта ӈод’’ хадава’’ юкад вата сидя нюм’ ховы. Тикыда мал’ ӈарка ненэця’’, харто’ иландо’ сехэрым’ нёданаӈэ хэвыць. Тэхэ’’нато’ мэ’’, нюсавэй’’, ханяӈыто’ тамна нюто’ ню’’ таня’’. Пыдо’ небямдо’, хадамдо’ вэдепасетыдо’. Теда’ пудана мале сян по’’ ӈарка не нюхунанда иле. Хада ма’’нисяв: «Ӈарка не нюми си’’ми манзая’’ӈа. Та’ ненэй мякана илева’’, сельбя’ няна хардан’ тэворӈава’’, сыра’ ямбан’ ядембада харад’ мюня илева’’».
Хадам’ невхы поход теневав, ӈавна тамна ӈобкана мюсебана’’, ӈэсыхынана’’ нянё ябцыбасеты. Тикы иле’’мямда ӈани’ тензебтеминзь.
— Илева’ тэхэ’’на мэсь, мюсерць саӈгом’ хурсадасетыва’’. Мань сидя няньни ӈэсяха’ таняӈаханзь, тикахаюни’ падэни мюня мюселембаӈахаюнась. Вэсакоми ӈули’’ вырэй’’ ненэцянзь, саӈгом’ ёльце волтамбидась. Ӈэсяӈони’’ ниванда манэ’’манда е’’эмня нянёни парада’’махадани минхани етри’ сюрпасетын’. Сертавы няньхабини тарем’ ӈод’’ ӈорцетыда. Теда’ тикы ялэни тензебтембабани мэкад ӈэсеты. Ӈавнани тамна школахана тохолкудамзь. Си’’ив по’ тохолкомами мэ’’махадани нини’’ си’’ми хойхана хаець. Ихинани тохолкова саць мэкадась. Няд’’ма таравакы, тарем’ хой’ иланд’ тэвыдамзь. Луца вадам’ теневав, лахана пирӈав. Харта ӈод’’ ёльце иськабтада ӈацекэдамзь, ӈока вадам’ намдасетыдм’. Тамальӈгана ӈацекэӈэ мер’ манзара пэсетына’’, мале си’’ив похонана’’ ӈарка ненэцие’’ пирувна тэтнасетыва’’. Ӈобтикы нензел’’ нись ӈа’’. Пуна си’’ми хаюпа миӈаць.
Ил’ харта тарця ӈамгэ, ялэни ӈопой ялядарев’ хэня то’’олха’’. Теда’ мале тынарцюй пухуцядм’, сёнзяни мюхувахана тамна мывдана илебей нерхадм’. Ини харвобцохов тамна ёнре’’э’’ тыни пумна миндяраха’’.
Автор: Марина Ярой’ падвы
Авторы
Няръяна Нгэрм
Темы