Няръяна Ӈэрм
Ӈацекына’’ яля
Илма’’ нерня’ минреванда’’ — ӈацекына’’. Маӈгты’’ иры’ нюртей яля — пыдо’ е’’эмнандо’ таславы ненадо яля. Ӈарка яна’’ тиӈгэвна сидто’ саву’’ӈава’’. Е’’эмнандо’ хуркари’’ сянакова’’, пирдырма’’, тамна ӈани’’ илека’’ сер’’ миӈа’’.
Время для чтения ~ 1 минута
Пэдарахана илена’’, выӈгана мюсерта’’ ӈацекэхэв’’ теда’ ныланавандо’ паӈо пэй’’. Тарця’’ мэкад’’ серкат ехэрабто’ ӈод’’, ихинандо’ ӈули’’ таӈга’’. Небянато’, нисянато’ хэвхана мэ’’. Ӈавкыдо’ мание’’. Нарэй манзаи тидхалемба нядаӈгурӈа’’.
Ӈацекы’’ сяхари’ сертавандадо’ етри’ танясеты. Лакри хибяхавамдо’ хонрабна’’: «Мякананд мэванд’ е’’эмня хардан’ ненадо ялям’ мэ’’манзь ха’’маӈгун?». Хибяхартадо’ ни харваӈгу’’. Та’ еквавна не ӈацекы небямда нядаба ютъи сэдыбаӈгу, итамда тэвраӈгу, папакуда лэтамбаӈгу, еддамда пиреӈгу. Хасава ӈацекы нисяхананда тэхэната мэӈгу. Ты’’ ниць’ ирыхына сава няд’’макоӈэ тараӈгу.
Сямянхат нёлёкохорт’’ таром’ ха’’аврасеты’’, ӈод’’ ядэрць пирӈамдо’. Ӈарка нябакуто’, некыто’ ӈэвкоӈэ сюрберць варемдо’ мэцеты’’.
Автор: Г. Окотэтто’ падвы
Авторы
Няръяна Нгэрм
Темы