Няръяна Ӈэрм
Дёԓьше вильӈаш
Шанат тэмс нешади’’ диԓивсум ӈычимчеӈаш’’. Таԓкахана ӈашки’’ дет ӈайта окружной’ фестиваль’ «Все краски Ямала» мэ’ӈаш’’. Пюԓ дяханана чики мероприятии’ шичадю’’ ӈуп пуӈ чена шеԓтамы. Вильта конкурсхана дянтуӈ чеԓ’’ тэмс диԓивсум ӈычимчемпюта’’ ӈашки’’ пу’’ тахана ӈоктаӈа’’. Куԓкаԓи’’ деты творческий’ коллектив’’ ӈычимшту’’. Четаӈ мянаԓмантуӈ мэт дюԓкат ва’та’’ шичадю’’ шича пимшата’’ ӈашки’’ тоӈаш’’.
Время для чтения ~ 2 минуты
Пюԓ дяханана диԓина’’ ӈашки’’ камна Тазовский’, Ямальский’, Приуральский’, Шурышкарский’, Волновахский районхат мэна’’ мянаԓяш’’, Ноябрьскхат, Муравленкахат, Новый Уренгойхат мэна’’ пы’татуӈ мянаԓьш конуԓпиш’’. Кукиты шеԓтамайтуӈ ӈамыдётуӈ видеон тат’тахадяш ӈайтаптайтоньш. Ӈашки’’ хампԓяӈк номинацихина мянаԓяш’’. Конкурсан’ тотуӈ хомана ӈанатамэт.
Маня’’ ӈаԓка Россия дяханана хома шоньшахана нетун няш ӈука тэмс неша’’ диԓе’’. Таԓям ӈашкиуде’’ шанат нешай’’ диԓивсум ӈычимчемпёш куԓкаԓи’’ ӈамыдю’’ шеԓтаӈаш’’. Мянаԓта’’ вильта обряду’’ нычимчеӈаш’’, шутпяԓсу’’, ванԓту’’ вачаӈаш’’. Каԓьтуӈ ӈутаханатуӈ шеԓтамайтуӈ, хcтмайтуӈ ӈамыкутуӈ де’эмня ӈайта ярмаркам ӈычимчеӈаш’’. Дёԓьше хомана мянаԓяш’’.
Чики фестиваль ӈаԓка мячисы Гран-при Тазовский районхат мэна «Кюрелей» нимита коллектив’ ня’амӈаташ. Ӈайвахай местам Таԓкахай школа-интернатхат мэна «Каймый Чолыты» нимита коллектив’ канаӈаташ’’. Пы’тоӈ капиди’’ обряд’ ӈычимчимпиш’’, шутпяԓсу’’, ванԓту’’ вачаӈаш’’, капиди’’ дилыӈ нямна ӈайта ярмаркам шеԓтаӈаш’’. Каԓпюԓкай школа-интернатхана тохоԓкота’’ ӈашки’’ коллектив’ ‘’Пимшатаку’’ петаԓахана диԓина’’ нешади’’ дилым ӈычимчимпёш ӈупчики хомана мянаԓяш.
Мянаԓта’’ ӈашки’’ тотуӈ фестивалян хомана ӈанатамэт, чуки похона «Все краски Ямала» дёԓьше вильӈаш. Мянаԓмантуӈ камна ӈашки’уде’’ шанат тэмс нешай’’ культурам маныӈа’’, деты диԓютатуӈ коӈа’’. Мянаԓьш нэхэԓмы’’ коллектив’’, хомана мянаԓмы’’ ӈашки’’ тотуӈ мячисы’’ — диплому’’ ня’амӈаш’’.
Автор: Лариса Айваседо патмы
Авторы
Няръяна Нгэрм
Темы