Няръяна Ӈэрм
Деты пу чепьӈа
Пюԓ дяхана диԓина» неша» деты пон каамдят». Чейня деты пуӈ дяԓям мэма, выӈкай дилхат ӈычимы. Ӈыԓи понанта выӈкна диԓина» неша» каԓьтуӈ понтуӈ ненатумтма» тадяӈаймай». Нешаӈ дилхана, нешаӈ календарьхана няхаԓдяӈкня диԓи. Шаӈкмян веԓкаԓ каԓьтуӈ диԓидётуӈ ним.
Время для чтения ~ 2 минуты
Тэхэ”на мэна», каԓитана неша» тотуӈ тэсамы, таԓям куки диԓидётуӈ ним» ӈуп’тоԓас. Каԓпюԓ няна чуувна диԓина нешаӈкна» чуки ноябрь диԓи нючадюм маԓкомш нимиӈа. Понантоӈ куԓка нум ӈӭймям нешаӈи» нумкай диԓимана, дяԓямана, нумки”мана неԓьшут каматаштомытуӈ. Ӈуп помтоӈ шича поӈэ тонԓапёмытуӈ. Деты пон чейня камаштомэт. Дяку» хэԓ хомана кыниԓемахат нешаӈи» хыԓы мэвштуӈ дяхатуӈ дямташтомэт.
Хыԓы мятутуӈ мештомай», тыӈ копахат хӭтмы» дей”туӈ дешештомай». Тэсамы» неша» тытуӈ ӈомташтомай», каԓитана» ӈай дяши» хэԓ хомана кыниԓемахат каԓиташ чепяштомай». Куки» неша» деты пон тӭйваш каӈуԓонтма дяха”туӈ каӈуԓонташ кӭштомай». Дяку», токуши» хэԓ мыдюмахат наӈыча ӈысыха”на мэна» нетуӈ мят мячидёԓьш кӭштомай». Нюча ӈашкиуди» майпёш ӈокна шана’коштомай». Ӈаԓка ӈашки», поӈкнатуӈ мянаԓман ха’та», вяԓкуԓоԓьш, нэхэԓумпёш, ха”моԓьш пытатуӈ конуԓпёштомай».
Чуувна диԓина» каԓьтуӈ нумтуӈ ненатумтма». Нешаӈ дилхана куԓкаԓи» примета» тадя». Дяԓя ӈопта» шеԓап, — чешхамты. Нумки» нумкна ӈука ӈӭп, катачёп — ӈупчики чешчам падиԓя». Вэдяку хыԓаӈ ниӈ калсупёнԓап –таньшеԓ пяны». Понантоӈ ӈаԓка неша» манаӈа»: тупкаӈ вешам туӈ кӭвхат дютап — нум чешхамты. Тонԓ тун чудеп — нум кытумты, дюпямты, таншеԓӈэ кайны.
Автор: Андрей Пяк патмы
Авторы
Няръяна Нгэрм
Темы