обновлено: 06:20, 04 июля 2024
Няръяна Ӈэрм
Едэй ё манэ’’ӈадм’
Сидя иры’ тяхана ӈопой сава няни ня ӈарка толь’ тяха’ ӈамдхая, сава’серм’ тасланинзь, паднана ненэцие’’ пирдырман’ заявкам’ паданинзь. Си’’ми нядабавы нями — Екатерина Сюлись, Ругинский Клуб’ ӈэвахана мэна.
Время для чтения ~ 2 минуты
Иры’ пеля хэ’’мяхад техэ’’ яхат вада тось, падракохона тарем’ падысь: «Манзаид сава’’, сит Башкортостанан’ хаӈава’’, маӈгты’’ иры’ пудана яляха’’на хадян’’ пароӈода’ хардан’ Уфан’ тоин». Тарця юнм’ ӈэдара си’’ми нядаванда няю’ Екатеринан’ — ӈарка сава вада.
Ӈари’’ теда’ хадян’’ яхана мале тетюмдей яля’ мэдм’, тюкона хаерта ядемби, пэдарада ӈарка, пэ’’ хой’’ пирця’’. Теняна хэхэ’’ сарё ӈась, мунота’’ ӈэдалёрӈаць, пи’ тидӈэ хэ’’мяхаданда яля’’ ялкабтырӈаць. Пэдара’ поӈгад хуркари’’ нув’ сармик’’ тёр’’ со’’, ламбаро’’ тирӈа’’, хути’’ по толаби’’.
Илесь ява’’ — лагерь, нюмда Агидель. Хэвхананда яха таня, нюмда ӈани’ Агидель. Ненэця’ вадавна таслаб’’, «Сэр’’ Яха». Маня’’ малхананда мэва’’. Пэхэт ӈыльня’ миӈа, ендата паӈгабты. Тарем’ ӈод’’, тей’ тяхакуна варувнанда ядбани, ӈамгэхэв’’ халякоця’’ ид’ ӈылад тю’’у’ санарӈаць. Ӈули’’ нюдякоця’’, сэври’’ ӈар’’. Сэр-Яха яханандо’ — ӈарка яхадо’, ёльце сяӈадо’. Няби сяндадо’ — Салават Юлаев, невхы иримдо’ пили’’ тензебтембидо’, саць мэнедо’.
Тюку ян’ ма’’лёвы’’ — ӈарка яна’’ тиӈгад тодо’’ яхат товы’’, харто’ яндо’ вадавна паднана’’. Теняна лагерькана нюртей яля мэваць. Пэ’ хой’ ни’ танаӈгаваць, тикы’ пуд хахаяда хардакон’ хан’’ӈаваць, таняна няна’’ ханзер ӈэвтавамдо’ манэ’’лабтамбиць, пуна хадян’’ имбытака’’на сидна’’ ембӈаць, хуркари’’ сава’’ ӈавраха’’на сидна’’ ӈавлаць.
Тарем’ ӈэдалёро’’мани сер’ ехэрана ям’, яӈганя илам’ манэ’’ӈадм’, паднава’ серкана теневабцуни ӈокамдадм’.
Автор: Макар Окотэтто’ падвы
