обновлено: 06:37, 15 сентября 2023
Няръяна Ӈэрм
Едэй иланд’ тоходана’’
Техэ ныланава’’ яляха’’на Галина Кинчина’ ня’ Яр-Салян’ ӈэдалёрӈанинзь. Хардаханандо’ самляӈг интернатадо’. Мани’ няхар’’ мю’ тюӈганинзь. Ӈацекы’’ илесь харда’’амна ядэрӈанинзь. Ненэся теда’ мюйдо’ ёльце сава’’, яля’’, ӈарка’’. Ӈамгэрито’ ӈэся’’ едэй’’, яӈга сянако лоходо’, падна няби толаӈго ёдо’ таня’’. Ӈолавандо’ мюйхав тарси’’ сюдбяко ӈэвы. Тарця сомбой мякана илевари, тохолковари то’’олха.
Время для чтения ~ 2 минуты
Ӈацекы’’ хой’ няд тандая’ товы’’. Сямянхат нюдякудо’ харад’ иланд’ тедари’ тамна тоховдавэй’’. Нядандо’ хонаркудамзь: «Интернатхана нянанда’’ хурков?» Ма’’нисям’’: «Савахав сава, ӈопой’’ мякана’’ харвава’’. Таняна нюдяко’’ нина’’, ӈавкына’’, вэнекуна’’ хаи’’». Си’’ив яля ваера’’махад пыдо’ ӈоб’’ хардахана илевэрха’’ ӈэӈгу’’. Хэвханандо’ нянандо’ манзаранидо’ мэ’’. Сиддо’ нядаба, табадамба варедо’ мэ’’ӈа’’.
Падтаӈгода, паднана, сянакода ӈацекы манэ’’ӈанинзь. Хусувэдо’ ӈамгэхэвм’ пэрӈась, сабе тябихутна яӈгусь. Ӈокаюм’ пелядо’ харад мядо’’манато’ хэвыць. Ныланава ялясь, ӈадьбята интернат’ мюй терсяркась.
Мядоманзь туртидо’ хусувэхэт таняя’’. Подо’ хайна миӈая. Хаӈгуртадо’ яӈгоя. Тетрадьдо’ тетха’’на, самляӈгаха’’на пан’’ӈая’’.
Анна Яптик’ падвы
