Няръяна Ӈэрм
Ӈэдяӈгад нядаӈгованзь товы
Ӈавар пирембадиʼʼ пирдырма ӈэваʼ мальӈгана хуркари тэнз сянакубц минрена танясь. Саляӈгарданʼ Тасуʼ яʼ тер не Алиса Вэнго товэсь.
Время для чтения ~ 4 минуты
Хэвханда маʼʼлюртаʼʼ ӈокаркаць. Тикыʼʼ поӈгана ӈацекыʼʼ, илебей няби ӈармбэй ненэцяʼʼ мэць. Хусувэдоʼ ныхымда хорʼʼманʼ харвась. Ненэся нянани ныхыдыртиʼʼ поӈгана сидя ӈармбэрка хабейʼʼ нехэʼ, паской имбытатнахаʼ, ной панытанахаʼ ненадоркаханзь. Сидя сава няханзь. Хобаʼʼ ниʼ ӈамдʼʼмахадандиʼ ныхыдырць мэта пякоцямдиʼ мэёвна няʼʼмадинзь, ёльце нэкалпидинзь. Пирдырмандиʼ серʼ ӈока письмʼ хаеӈаханзь. Няндиʼ сыртаʼʼ ӈодʼʼ тэри маймбиць. Пуна малеʼʼмяхадандиʼ маӈаханзь: «Ӈацекы ӈэваниʼ мальӈгана няданиʼ ватаʼʼ яӈгосетыʼʼ! Тедахавʼ ныхыʼʼ таӈокʼʼ вуниʼʼ ӈаʼʼ».
Ныхыдырмаʼ пуд яркула пэйдаць. Сяхаӈгартʼ тынзямʼ нивыʼʼ няʼʼамбавыʼʼ тикахана мэць. Луца ӈацекэцяхаʼʼна яркулава мэкад ӈэвэсь. Тынзяӈодоʼ саць мяртё нибтоʼ ӈодʼʼ ханасʼʼ, «тэмдоʼ» — пяʼ малхана ӈэда нямдамдоʼ нидонзь ӈэдарамбюʼʼ. Нядандоʼ хахаяркаʼ выӈгы иламʼ теневана хасавахаʼ нуӈаханзь, лаханакурӈаханзь, хойʼ няна илеʼʼмямдиʼ тензибтембада тоʼʼолхаханзь. Нябимдейʼʼ яркуланахаʼʼ тэвбаʼʼни мале пыдиʼ тынзяӈо няʼʼамвэхэнзь, индиʼ ватомʼ мэʼʼӈаханзь.
Хано санарпа малевандоʼ серʼ Алиса ӈамгэрида маʼʼламба пясь. Нянда термʼ намдувдавэй варкаваӈгадани някунда паромбарка хаядмʼ. Ӈахат товы няваʼʼ, «Центр развития физической культуры и спорта» мякана манзарана тарця вади мэʼʼӈась:
‒ «Нянь Фест» фестивальхана мале сян тохолковамʼ, «мастер-класс»мʼ ӈадимдембидмʼ. Тюкохона спортʼ нямна ӈэда серо минренаӈэ тарадмʼ. Поʼ тяхана сиʼʼми хаӈаць. Мань пуняʼ нидамзь ӈаʼʼ. Ӈэдяʼ няна тарця манзаи ӈобтикы пэрцетыдмʼ, ӈадьбята нини нядаванзь тодамзь. Сяхаӈгавʼ ӈэрмʼ терʼʼ илебейʼʼ ненэциеʼʼ форумхана нинаʼʼ торомдэйнаць, тевʼ ёльцяндʼ помнанаʼʼ нятаваʼʼ, нинаʼʼ нядабиваʼʼ.
Мальцятаʼʼ, панытаʼʼ
Тамна ӈаниʼ ӈопой ӈадимдембавэда — «футбол». Сямян хибя теневана сянакубцраха вуни ӈаʼʼ, несэйрка. Ненэцяʼʼ малʼ мальцяʼ таӈгатаць, ной панытаць, имбытатаць. Нюртеʼʼэʼ хасаваʼʼ пэйдаць. Мячʼ пумна яʼʼавла сюрберӈаць. Торомбэркаʼʼ ӈэвадоʼ таминда ӈадись. Поӈганандоʼ Пэʼʼ нямна мюсерта ты пэртиʼʼ мякана вадёвы Михаил Лаптандер мэсь, пыда таремʼ лаханась:
‒ Саляӈгардахана манзарадмʼ, МФК «Союз» нюбетахана пыхыдами тохоламбасетыв. Мальцяʼ таӈгата сянакова выӈгана вадёвы ненэцяӈгавахана тоенанада яӈгу. Хойʼ няна пэдёнаʼʼ ӈэдарамба пэвсюмяʼ ёльцяӈгана ӈаниʼ сянакосетываʼʼ. Нумда ӈодʼʼ ханзоӈэ еремя, сабе нись ядембюʼʼ.
Пудандоʼ неʼʼ пэйдаць. Ӈокханда тет командаʼ тераць, маларкаʼ нюртей мэва сянакуць. Сыртахавахаʼʼна ханяцей саварахась, тёрдоʼ ёльце яʼʼавлыць.
Светлана Салиндер «Нянь Фест» пирдырмахана мэнаʼʼ нида манэʼʼманзь товэсь. Тикыʼ нерцюʼʼ мята терʼʼ няʼ ныланаванзь ханʼʼмэць. Мэкад сянакубцхана пыхыдамда мэсь нивэдась тосаʼʼ:
‒ Нерня нинаʼʼ маниенарахаваʼʼ ниваць ӈаʼʼ. Пунахавʼ ханзерʼʼ ӈэсь таравамда хамэдамба пяваць. Мякананаʼʼ таремʼ вуньсятываʼʼ сянакуʼʼ. Тедахавʼ ӈаниʼʼ пирдырмаʼʼ танябʼʼ, ӈахакуд хамекодаваʼʼ. Илека серʼʼ ӈэвы.
Сямянхат няхататоʼ ваʼʼлёйʼʼ Шурышкарской районʼ няд ӈэдаʼʼ неʼʼ. Хасавахат Аксаркаʼ едʼ сянакодаʼʼ яʼʼавлыць. Сиддоʼ Алиса Вэнго савуʼʼӈась, няндоʼ ӈудаʼ тер миʼʼӈась:
‒ Тасуʼ яни няна хусувэй Ты пэртиʼʼ хэбидя яляхана футболмʼ минресетываʼʼ. Таняна ӈобтикы варемдоʼ мэцетыʼʼ. Няндоʼ манэць пыдараʼʼ тамна ваʼʼлёйркавна, илебядё сянаковэдаʼʼ.
Автор: Анна Яптикʼ падвы
Авторы
Няръяна Нгэрм
Темы