обновлено: 13:38, 16 августа 2023
Няръяна Ӈэрм
Ӈэрм’ яна’’ сё’’
Красноярской крайхана неняӈг’’ ирыхына ӈарка фестиваль миӈась. «Мир Сибири» нюбе’’ӈа. Таня’ яна’’ тиӈгад хуркари ненэцие’’ тэнз’’ теневабцодо’ манэ’’лабтамба ядэрӈа’’. Тикадо’ 2003 поход миӈа. Тамальӈгана «Саянское кольцо» нюм’ мэ’’ӈась. 2012 похона нюмда несэймдадонзь «Мир Сибири» ваде’’лаваць.
Время для чтения ~ 2 минуты
Хусувэй по’ фестивальва’’ ӈарворӈа. Шушенское’ нюбета посёлкан’ ӈамгэри маркат, хардахат ненэця’’ ӈобт’ ма’’люрӈа’’. Тикы’ хавна ӈани я’ тер’’ ненэцие тэнз’’ ӈобтикы мядонзь, теневабцодо’ манэ’’лабтамба ӈэдалёрӈа’’. Ненэйвана тикы фестиваль теда’ ӈаркаӈэ хая.
Тюку по’ неняӈг’’ иры’ 6-9 яляхана миӈась. Ӈэдалёрта’’, мядонда’’ няхар’’ яля’ ямбан’ манэ’’мандадо’ ёльце ӈокась. Хуркари площадка’’, выставка’’, театр’’, тэмдолава’ мя’’ манзараць. Мастер-классхана ӈацекы’’ ӈарка нидо’ няць сянако сэдабавы’’, ӈумгад ӈухуко паӈгалпавы’’. Ханяӈыдо’ табхад хыдядамдо’ сертабиць, таддикад ехэрана сянакубц мэ’’ӈаць, хыноць тохолкурӈаць.
Таймыр’ тер’’ хусувэй по’ таня’ ӈэдалёрӈа’’. Ӈэсыдо’ мядондахат панцеты. Тюку по’ «Этнодеревня» няби «Обрядовая поляна» нюбета площадкаха’’на манзаравыць.
Елена Евай, Семён Яптуӈэ, Влад Вэнго ненэй ненэцие’’ ила’ саирм’ манэ’’лабтамбавыць. Некоця невхы ирината ханзер’’ илевам’ ваде’’мы. Няхаюда тарава’ таддикад хыно’’ма’ нямна тохолкова сертабавэхэ’. Хынота няди Влад Вэнго сё мэ’’мы.
Ӈани ненэциена’’ тэнз’’, туӈго’’, тавыс’’ ӈобтикы илека серо сертабавы’’, манэ’’лабтамбавы’’. Нямдхад нюдямбой ӈуда’’ теркоци мимбавы’’, невхы тавысо’’ сё мэ’’мы’’.
Фестивальхана манзарани’’ вадавна, тюку по’, ӈани похо’’ манэць, си’’ив ю’’ ёнар’’ мядонда’’ ӈэвы’’.
Автор: Елена Ямкина’ падвы
