обновлено: 03:43, 25 августа 2023
Няръяна Ӈэрм
Ӈэрм’ тер’’ ил’ нерняри’ хайна
Ирына’’ 12 яляхана хуркари’’ сава’’ сер’’ мимы’’. Яна’’ ханярина ӈавхы похот харто’ яха’’нато’ илени’’ ялям’ мэ’’мы’’. Си’’ив район’ тер’’ харто’ хардаханато’ ма’’лёвы’’. Саляӈгардахана илена’’ ӈопой мяд’ тердарев’ тодо тэнз’’ ненэцие’’ культура’ мякана мядомы’’. Сёбар’’ ӈани’ ненадо ялядо’ ӈэвы. Пыдо’ е’’эмняндо’ сямян тэнз сянакова сертабавы’’.
Время для чтения ~ 4 минуты
Ныланавава’’ ненэся ёльце ина’’ ватось. Пон’ нивы манэпавы няха’’на ӈули’’ маймбиваць. Нюрте’’э’ Нядма Няруй «Су’’ляко» сём’ ханась, сёда сидна’’ ӈаха’ вынд’ тэврана то’’олхась, ина’’ тэри савумдэйдась.
Ненадумда’’мам’ ня’’амва ненэцям’ сахамламби
Хынота’ пуд ӈэрм’ тер’’ серо минрена департамент’ ерв’ марцьхы Ренат Пяк вадам’ хэтась. «Мы говорим на родном языке» пирдырмахана мэвы’’ ненэцяӈг’’ ненадо падро, мядонзэй ми’’ӈась. Ӈокханда 83 видеороликм’ ӈэдаравыць. Ненэй вадавна ӈэда — 33. Хаби’’ 27 манзаям’ ми’’мы’’, тасу’ хаби’’ — 8, ӈысма’’ — 11, тет луца’ вадавна ӈэвы’’. Ненэй ненэцие’’ поӈгана Сэротэтто Ксения Белоярскхана тохолкода са’’мы, пыда 1 ян’ ха’’амвы. Сёяхана илена Окотэтто Сяндане мята тер’’ нямна лаханавы. Пяк Тамара Юрьевна Ноябрьск марад’ няна манзарана «Традиции живого ремесла» номинацияхана ва’’лёй ӈэвы. Пыди’ нябимдей ян’ еремэхэ’. Няхаромдэй’’ — Белоярск’ «Сёётэй» нюбета ансамбльхана мэна’’, няби Тасу’ я’ тер Яндо Степан.
Харе’’ ӈудаха’’на мивы, паӈгалмы мядонзэй сямянхат сава
Ненэцие’’ е’’эмня хуркари тохолкова сертавыць. Ханяӈыдо’ пихина миӈаць. Ӈопойм’ Надежда Ларивна Сэрпива ваде’’ӈадась: «Ӈацекы’’ е’’эмня сянако мядм’ тэвраваць. Ханзер’’ ӈу мярыбавам’, мюйко есебавам’ манэ’’лабтабидм’». Пуна мято’ мюня ӈухукурӈаць. Мяд’ хэвхана хано санарпада’’ таняць.
Харад’ мюня нямдахат ик’ тяхана, ӈуда’ тяхана мэта ӈаво паӈгалпиць, мадавэхэ’’на ӈоксие падтамбиць. Данислав Вануйто тандая’ мята тер’’ ня’ Санкт-Петербург’ нямна ӈэдалёрмы.
— Сёяхан’ хэвана’’ нерцю’’ тюкон’ тось таслава’’. Мякани ӈуда’ терм’ ханаван харвадм’. Нюрте’’э пясикарха нямдакоця’ ни’ тым’ падтаӈгун, пуна мирць мэтахана есьтар, ӈолепядаӈгур, мэё иняхана мэӈгур. Харада яӈговы, сава няни мядонзэйӈэ митав».
Тарця ныланава’ яля юрва’ пир’’ ни ӈа’’
Няби лохо’ няд сё’’ солыд’’, паромба таняна хаядм’. Ӈоб’’ пуд паской имбытатна’’ не’’ яда’’. Мел’’ нехэ’ сэдвы’’ имбытадоди’ манэ’’лабтамбавэхэ’. Няби сэдорана не тарем’ мась: «Манзаини сэдабавани мальӈгана хар’’н яни, яханана’’ илена’’ нямна ими ядэрӈась. Ембдяро’’ни падта’’маха’’на сэв’’ мэнена ява’’ мание пир’’ӈада’’».
Юне тэволана’’ ӈани’ тикахана мэць. Минрена’’ манзаито’ нямна лаханаць. Марина Яр «Няръяна Ӈэрм» няби «Мынико» газетаха’ ваде’’ӈась: «Я’ сяр’ нина’’ ненэй вадавна ӈэда газетава’’ — ӈопойри, ненэциена’’ Таймыр’, Ӈарка я’, Ямал’ няна иле’’. Пыдара’’ е’’эмнянда’’ паднава’’. Толаӈгурӈада’’».
Библиотекахад товы’’ ненэцие’’ е’’эмня «Большой аргиш» этноквизм’ ӈадимдевыць. Сямянхат иӈудотидо’ тасламбиць. Хуркари’’ тэнз’’ ненэцие’’ хобцоко, иӈудота вади’’ хара, лаханако пюрӈаць. Мал’’ нидо’ нертеван’ харваць, падыбада’’ падродо’ лакри’ сянаковам’ минренан’ мипидонзь. Вэнзер’’ падвы ӈэбнандо’ нидо’ манзабтамба ханяцей’’ лаханаць: «Тарси’’ ва’’лёйва’’, мал’’ сававна сертавына’’!»
Яля’ ер’’ ёльцьӈэ хэ’’мяхад сёётэй’’ нина’’ сёдо’ ханаць. Инзелена’’ тэри ниць ну’’ — собкавы ӈэсоӈодо’ высылпиць, тараць! Манэ’’мэва’’, намдвэва’’ ӈока, ӈопой газетахарт ни томд’’.
Автор: Анна Яптикы’ падвы
