Няръяна Ӈэрм
Ӈэрм’ тер’’ тодо ян’ ӈэдалэяд’’
Си’’ив яля’ Москвахана ӈэвы выставка-ярмарка «Сокровища Севера» ёльцей’’. Ӈани понда ӈэсонд’ ӈэрм’ тер’’ ӈарка яна’’ тиӈгывна яхато’ ӈэдалэяд’’. Тикы’’ поӈгана Ямалхадна’’ ӈани’ мел хибяри’’ тэворӈаць. Ва’’лёй ненэця’’ тодо районхат ӈаць.
Время для чтения ~ 2 минуты
Хуркари’’ пирдырма’’, конкурс’’ мэсо’’махадандо’ хибя нерня’ ха’’амвам’ пудана яляхана ваде’’ӈадонзь. Ямална’’ экспозиция ӈока нита поӈгад нюртей ян’ ха’’мыць. Нина’’ поӈгана хуркари юнета ненэця’’ ӈадимяць.
Сёяха’ няд ӈэдалёрта Надежда Худи сыв паныдо’ манэ’’лабтамбади’’ поӈгана сямянхат мелӈэ таславэдо’. Харта ӈод’’ тикы няна’’ пирувна сэдора теневана яӈгода то’’олха. Няби я’ панан’ ӈока паны, мальци тэвравысь. Конкурсхана манэ’’лабтамбавандо’ мальӈгана сырта’’ пеедо’ ӈули’’ тоедамбидонзь. Тарця панэхэна ӈамгэхэрт тецьдам’ нин пилют’’.
Хусувэй тэнз’’ харе’’ ӈаврадо’ ямбака’’я толь’ ни’ ӈадимдембидонзь. Ӈавыдота ӈавар’’ манэ’’лабтамбавандо’ мальӈгана «Ямал» нюбета организацияхад ӈэда’’ не’’ нябимдей ян’ ха’’амвыдаць. Сямянхат ӈавыдота ӈавар’’ Надымской районхад ӈэдалёрмы’’ нина’’ серта теневавы’’. Ямальской районхад ӈэда Тако Яптик хыноти’’ поӈгана нерня’ еремысь. Сита пир’’ ӈэрм’ тер’’ поӈгана яӈговы. Тасу Яв’ няд сё мэтам’ Лилия Яднем’, «Мараӈга» ансамбль’ тер ненадумдавыць. Тюку по’ Тазовской район’ тер’’ Ӈэдяӈгад тарана ӈацекыдо’ тэвравыць. Пыдо’ нердена яӈорэй’ ӈарка ян’ тэвбато’ ӈод’’ тарабцодо’ ӈули’’ сававна манэ’’лабтэйдонзь. Тохолкоди’’ поӈгад Станислав Евайм’ ӈани’ сэвтедонзь. Пыда сямянхат сававна лаханаку манэ’’лабтамбись. Ӈобтикы школахана тохолкурӈа, мята тер’’ вымна мюсерӈа’’. Лаханакурпата пилютада яӈговы.
Тарця мел’’ ненэця’’ ва’’лёй ӈэвамдо’ манэ’’лабтаванзь Москван’ ӈэдалёрӈаць. Тикы нина’’ няд’’мяць ӈани яха’’на илена’’ ӈэрм’ тер’’ теневаӈгу’’, ненэсянда ненэй ненэця’’ ва’’лёй ӈэвы’’.
Автор: Марина Яр’ падвы
Авторы
Няръяна Нгэрм
Темы