Няръяна Ӈэрм
Еся ханодо’ мэць тохолкурӈа’’
Тазовский районхана ненэця’’ мерета еся ханодо’ мэць тохолкурӈа’’. Пыдо’ таняна харад’ помна ӈэдалёрмам’ тасламби’’. Машин’’ сехэрэхэна ӈэда’’ ненадумда’’ми тохоламби’’.
Время для чтения ~ 2 минуты
Харад’ ядэлави’’ помна ӈэдалёрп’’, ӈока табеком ‘ тенева тара. Тикыд теневабат, мюддарев’ вэӈгалёда’’ машин’’ поӈгана таӈгаӈгун. Тараванда мальӈгана харт хибяхавм’ нерня’ ӈэдараӈгун, ханяӈэхэна пыдар нерня’ хэбат таравы ӈэӈгу. Ханямна хэсь пирӈар, ханямна нир пират’’, тикым’ ӈани’ хамедамбаӈгур. Тарем’ вэва серт’ хибяхарт ни еремд’’.
Тохолковандо’ пуд ненэця’’ тохолкось’ падродо’ ня’’маӈгу’’. Еся ханодо’ палытани’’ мякана падвы’’ ӈэӈгу’’. Тад нерня’ падаркана ненэйвана мерета снегоходто’ ерваӈэ толёда’’.
Неноховавна едэйвана тэмдавы буран Ростехнадзорхана ерванда мэтаӈэ падбата тара. Тарем’ ниб’’нанда ӈа’’, ненэць’ падарцяда еся ханхананда палытанаха’’ ерембата, штраф’ есям’ салдамбаӈгу. 1500 — 2000 еся ӈэсь пирӈада. Ӈани’ яӈорэй’ падарци’’ ӈэдалёрць ня’’амравы ӈэбта, (12) юкад вата сидя иры’ ямбан’ снегоходхана ӈэдалёрць нидо’ ӈэдарамбаӈгу’’, падрода мартыдо’.
Ненэця’’ хардан’ тэворпато’, падродо’ етри’ нянандо’ ӈэбто’ серо’’ӈа’’.
Хальмер’’ Седе’’эхэна тохолкова’ нямна хонравандара’’ танябта, тюку телефонувна лаханада’’: +7 (34940) 2-05-58.
Автор: Галина Окотэтто’ падвы
Авторы
Няръяна Нгэрм
Темы