Няръяна Ӈэрм
ЭтноАртхана мянаԓяш”
Мат’ команда», куԓкаԓи» мэкат паны», ӈамсадята» ӈамаԓ». Таԓкахана шанат тэмс» неша» «ЭтноАрт» нимита фестиваль ӈомаш». Чики мероприятин дюԓкат ва’та» неша» мячидёԓьш тоӈаш». Чуки похона «ЭтноАрт» манԓе хампԓяӈкты шеԓтаматуӈ.
Время для чтения ~ 2 минуты
Мат’ тэмс нешай» команда» поӈкнатуӈ мянаԓяш». Мянаԓта» тотуӈ хомана конкурсхатоӈ ӈанатамэт, таамнатуӈ каԓитуӈ дилмтуӈ вачаӈаш», культурамтуӈ ӈычимчеӈаш». Чикидю» поӈкна маня» нена», Каԓпюԓкат мэна», мянаԓяш». Пытоӈ дяханана диԓина» нешай» дилм ӈычимчеӈаш». Маня» нена» ӈупчики конкурсхана» мянаԓмантуӈ мэты хомана ӈанатамэт. Шаӈкмян таньдет таԓанна» ӈамыкутун тамай», мээвчетуӈ вачитуӈ, кынсутуӈ хомана тохоԓамай», куԓкаԓи» ӈамԓу» пиԓимай».
ЭтноАртхана шанат ӈамыдю» ӈычимчеӈаш». Таньняӈ томы» неша» маньшту», пы’туӈ вихинянтуӈ таньше ӈопт ӈома дёԓьше хома. Чики дяԓяхана мянаԓчи» маныдемантуӈ мэты ӈука неша» тоӈаш». Мянаԓьш шана’кочи» маныдемантуӈ камна фестивальхана мэна» мастер- классхана» кынуш, таԓаш, шеӈкауди» шеԓтапё тохотаӈаш». Мянаԓмы поӈкна ӈэйвахай местам «Ямальские татарочки» канаӈатоньш. Няхамты местан и «Квитана» каамдихиньш. Ӈамԓу» дет ӈайта номинацихина «Дегустационный сет» ӈай команда «Культурный коктейль» нэхэԓяш.
Маня» Каԓпюԓкат мэна» нена» ӈупчики пимши, шанат конкурсхана» дёԓьше хомана мянаԓяш». ЭтноАрт шаӈкмян нешади» тэмс» ӈокна ныптакомаӈ мэт шеԓтамы. Фестивалян томы» маньшту, маня» ӈуп дяхана диԓина ӈӭш, ӈуп вин камоԓьш нена» няштуна». Ӈокна неԓьняӈ минтӈама», чикехена дилма хома ӈайты.
Андрей Пяк патмы
Авторы
Няръяна Нгэрм
Темы