Няръяна Ӈэрм
Газетава’’ теневадо’
Тюку си’’ив яляхана Москвахана «Красной площадь» нюбетахана ненадо сер’’ миӈась. Ӈарка яна’’ тиӈгы яхат товы’’ ненэця’’ яха’’нато’ ӈамгэ’ то’’олха книга, журнал сертабавамдо’ манэ’’лабтамбиць. Таняна «Фестиваль национальных литератур народов России» ӈась.
Время для чтения ~ 3 минуты
Ненэй ненэцие’’ редакцияхана манзаранаӈэ ӈани’ тикахана мэваць. Ӈоб’’ яля’ тодо’’ яха’’на илена’’ ӈэрм’ тер’’, тянё тэнзм’ мэта’’ ханзер’’ газетыдо’ сертабавамдо’ ваде’’ӈаць. Пыдо’ харе’’ вадамдо’, иландо’ саирм’ нерня’ минревамдо’ ваде’’ӈаць. Маня’’ сямянхат нерденаӈэ лаханаваць. Хэвханана’’ хуркари тэнз’’ нина’’ ӈока’’ ӈэвы’’. Якутияхад товы нява’’ ӈамгэ то’’олха падро ӈадимдембавамдо’ хэтась. Игорь Данилов вадавна газетадо’, журналдо’ мале сян. Эвенк’’, якут’’ вадавна ӈа’’. Ненэся няна’’ тасла ӈокамбой падро республикаханандо’ ӈадимдембавы’’. Сямянхат ӈока тираждо’ юкад вата сидя ёнар’’ ӈэвы. Тикыто’ поӈгана ӈацекы’’ е’’эмня сертабада журналдо’ танявы’’. Маня’’ газетава’’ ӈани’’ няхана’’ тасла ӈобкарт вэва ни ӈа’’, сидяӈго, падта’’ми няд’’мяць саць паской ӈэвы. Мордовия’ няби Дагестан’ тер няхаюна’’ ӈобтикы ӈацекы’’ е’’эмня газетыди’, журналди’ манэ’’лабтаӈаханзь. Маня’’ мал’ ӈобкана саць ӈарка манзаям’ тидхалембива’’. Вадам’ лэтрава, минрева, мэ’’ма сяхаринда нензел’’ ни ӈа’’, тарем’ ӈод’’ хусувэва’’ харе’’ яхананда варемда мэ’’ӈа.
Тет яля’ ямбан’ ваде’’мэдо’ ӈокась. Школахана тохолкода’’ ӈацекы’’ е’’эмня вадамдо’ лахарёхо’’нато’ ӈани’ минредонзь. Тёняӈы хаби’’ округхад ӈэда Аграфена Сапочина тарем’ мась: «Маня’’ толаӈго книгы сертабадаӈэ илна’’ саирм’ теневана падтаӈгодава’’ яӈгу. Тарцяна’’ таняб’’ падвыдо’ пайӈэ ниць ха’’морт’’. Ханяӈэхэна имбытадодо’ яӈга’’, не’’ ӈэдо’ ва’’ав’ ниня ӈэӈгу’’, тарця ӈэбта ни серос’’». Дагестан’ няд товы нява’’ ӈобтикы тарця вадам’ хэтась, ма’’нисяв, яханана’’ тодо’’ тэнзм’ мэта ненэцяма’’ ӈока. Падта’’мидо’ тодо’’ тэнзхат ханавы’’ ӈэсеты’’. Илам’ теневанаӈэ сидна’’ ӈули’’ пуда хонрамби’’.
Ма’’лёвы’’ поӈгана падтаӈгурта’’ вадам’ мэ’’ӈаць. Няхар’’ пирибтя Тува’, Хакасия’, Чувашия’ няд ӈэда’’, тодо’’ тэнз’’ вадидо’ ӈопой иӈут’ ха’’мыдаць. Ма’’нисям’’ хусувэдо’ харта тэнзхаданда инда харвобцом’ падта’’ман’ тэврамби. Вадидо’ няд’’мяць сертабадидо’ тамна тяхасовна паскойӈэ хан’’ӈа’’. Тарем’ учебник сертабади’’ сава няд’’маӈэ тараӈгуць.
Тет яля’ сер’ фестивальхана мэвы’’ вадидо’ мэ’’мам’, паднавам’, ӈока нито’ поӈгана харе’’ тэнзм’ нерня’ пэрмам’, сёё мэ’’мам’, тамна ӈани’’ тарана ӈавэ ваде’’ӈаць. Хусувэй таняна лаханавы ненэця’ харта инда ядан’ тэнзамда лэтрава’ нямна пили’’ няркана.
Автор: Марина Марюй’ падвы
Авторы
Няръяна Нгэрм
Темы