Хабцяӈодо’ мора’’ савумдаӈгудо’

Дудинкахана «Центр пантотерапии» нэць. Нюмда «Тыяха». Норникель компаниям’ няд’’мяць проектм’ община «Ханавэй» ӈадимдедась. Тарця центр Красноярской крайхана тедари’ ӈопой.

Время для чтения ~ 2 минуты

Ненэця’’ ӈавна нюртейӈэ ты’ морахана хабця савумдамба Китайхана пявыдонзь. Пыдо’ сюдбяко марал’’ мора мэ’’мы’’. Яханана’’ тарця центр теда’ ӈока. Алтайхана ненэйвана мэйдо’. Лекар’’ вадавна мора’’ сей’, лы’, вэя’ хабцяӈга’’нана мэць сава’’. Лекар’’ морахат пантогематоген пардон сертаби’’. Вэя’ хабцяӈгад мэта’’.

Дудинкаха тарця мядм’ нэць, община’ тер’’ по’ ямбан’ манзараць. Пыдо’ сямян нянандо’ тарана ӈамгэдамдо’ ӈабтавы’’, манзаранидо’ тохолавы’’. Ненэця’’ ты’ морахад сертавы ванна мэць пирта’’, таддикахад фитобочка. Фитобочка тыдэ пяхад сертавы, Алтай’ няд тэвравы. Тарана ӈамдэ’’ ӈобтикы таняд тавы’’. Тад нерня’ община серо минрена Алексей Вацик’ вадавна, хар’’на’’ яханана’’ вадёданана’’ ӈамдэд’’ хораць тара’’. Ты пэртяхат ты’ мора ма’’ламби’’, тэмдамби’’. Хой’ няна илена’’ есядамдо’ недва’’лемби’’.

Мал’’ едэйвана ӈадимы мядм’ манэ’’ман’ харвадо’. Сидяӈг: Е.Ямкина’ тадтавы

Та’ ёльцяӈгана ту ӈанохона мядонда’’ ӈэдалёрӈа’’. Таня’ ӈани’ тэворта’’. Центрахана манзарани’’ вадавна теда’ мале ненэця’’ пыхыдадо’ тикы мят’ падыбидо’. Мал’’ едэйвана ӈадимы мядм’ манэ’’ман’ харвадо’. Тарем’ турта мядондаха’’ пыдо’ ӈули’’ маямбаӈгу’’.

Елена Ямкина’ падвы

Авторы

Няръяна Нгэрм

09:40, 15 июня 2023

Темы