Няръяна Ӈэрм
«Хада»’ иле’’мям’ манэ’’ӈаваць
Нярьяна Маркана «Илебц» нюбета ненэцие’’ театр едэй спектакльм’ манэ’’лабтась. Яна’’ тер’’ ДК «Арктика» нюдя’ лохохона ма’’лыць. Тюку мэвахана Нина Валейской’, падтаӈгода няна’’ падвэвна иле’’мям’ сертавыць.
Время для чтения ~ 3 минуты
Спектаклян’ товы’’ лэркабт’ ваеравы’’ 1950-60 похо’’ еремяць. Невхы Няръяна март’ тэввыдаць. Сырта’’ Ксения Валейской’ маркы илесь лохона ма’’лыць.
— Ама, тюкона пыдари’ Нинанд ня’ илеӈгуди’. Хардава’’ Печора яха’ вархана ӈа, порт хахаи. Иле лохова’’ нюдякоця ӈэбта ӈод’’, сомбой, — небянда Ксения лахана. — Мань тохолковами ёльцеб’’ни тара, пуна ханяна манзаравахадани ехэрадм’.
— Мань илева’ ямбан’ хойхана мюсерӈадамзь, теда’ маркана иленаӈэ хаядм’, — янамбоковна Иринья хада лахана.
— Ама, тюкона хой ни ӈа’’, ӈани’ сава хибяри’’ иле’’. Хэвханана’’, тайкуй лохохона луца’’ мяд’ тер’’ иле’’. Енадм’, пыдара’’ нида’’ торумдаӈгуда’’...
Тарця’’ вади’’ хэт’’махаданда Ксения тоходанаванзь Ленинградан’ ӈэдалэй’’. Маркы мякнанда Нина не нюда хаданда’ ня’ хаихи’. Спектакльхана сянаковы’’ — Ксения не нюнда не ню, Нина (Ева Лочехина), Иринья хада (Надежда Талеева) — нюртей ӈадимзь сеян’ мэёвна тебӈаха’. Нюртей, я’’авлада, мерета некоця, ӈацекы ӈэвада ӈади. Нябиюм’ — хада, ва’’лёй, иланд’ мэёвна сырта, илам’ теневана не. Пыди’, сидяӈэ ӈоб’’ то’’олсаха’, хуркари’’ серк’’ ереберпати’, нихи’ выдараӈг’’, ханярид сававна тарпорӈаха’.
Хойхад март’ товы некоця’ илаӈгана хуркари’’ ехэрана’’ сер’’ ӈокамданасеты’’. Ӈоб’’ пиркана едэй паской тоемям’ ид’ вархана халтамбихинзь. Тикамда тырабтаванзь тибей харад’ ни’ иладинзь, хардахананди’ лата ӈолепятабихинзь…
Театрхана сянакода’’ мал’ пэдаваць, спектакльмдо’ сававна минредонзь. Тикахана сянаковы’’ — Ксения — не ню Наталья Канюкова, нянда хасава ню Саньча — Александр Терлецкий, хэвхы мякана илена — Василий Корепанов, тамна ӈани’’ сянакода’’ нядаӈгуць. Сырманзь товы’’ тарцям’ мание маймбиць, письӈаць.
Ӈэсыхыд март’ илеванзь това нензел’’ ни ӈа’’. Хардахана иле лохоком’ хамадамбава, мяканандо’ хойхад товы’’ мядонди ядабтамбава, тамна ӈани тарана сер’’ — тарем’ ненэциена’’ ехэрана илам’ торомдамбиць. Ӈобкана ныланавандо’ ёльцяӈгана Николай Епифановской аккординсавэй’’ тованда сер’, сырмы’’ хибяри’’ янамбовна ӈобкана сём’ ханаць.
Сянаковы’’ нина’’ невхы’’ похо’’на маркана илевам’ няна’’ манэ’’лабтаць. Ненэся ӈод’’ тамальӈгана ил’ тарцясь. Спектакль ваера’’махад ненэця’’ тамна пон’ лаханакурӈаць, артистха’ ихид минда’’ вадидо’ хэтыбиць. Хусувэдо’ ихинанда ӈопой ялян’ ӈэб’’нанда ӈод’’ невхы март’ ереман’ харвась…
Ӈарка вадам’ «Илебц» манзаям’ нерня’ минрена’’ нина’’ намдаць.
Автор: Юлия Талеева’ падвы
Авторы
Няръяна Нгэрм
Темы