Няръяна Ӈэрм
Хаерма’’ тю’’уна хая
Нядаӈгардахана илена’’ ӈэрм’ тер’’ ӈобт’ тэвормы’’. Нердена хаер’ яля’ сэвм’ ядабтамбавы’’. Тикаханандо’ иринато’ ила’ саирм’ тензебтембавы’’.
Время для чтения ~ 3 минуты
Ӈацекы’’, небянадо’, нисянадо’, хаданадо’, мал’’ «Дом природы» нюбета мяд’ хэвхана ма’’лёвы’’. Сиддо’ сёётэй’’ не’’ мядолабтамбавы’’. Пыдо’ — культура’ харад’ манзарана’’. Нядаӈгодидо’ «Ямал — нюна’’ я!» ассоциация’ тер’’ ӈэвы’’. Нито’ е’’эмня мято’ мюйм’ ядемдавы’’, ӈавыдота ӈаврадамдо’ пиревы’’.
Харад’ тер’’ нидо’ манэць ёльце маймбавы’’. Ненэй мятрев’ мярвы мядикондо’ хэвхана ӈацекыдо’ няць сянаковы’’. Пихина нумда ӈули’’ хэнё ӈэвы. Тецьдам’ нивэдо’ пилюс’’. Паской ненэй паныдо’ сервы’’. Ӈармы’’ нидо’ тэри илебядё ядэсумбавы’’.
«Сырэй нум’ сидна’’ мэбеламби. Ханяцей мэйрыва’’. Хаер’’ сэв едэй иланд’ сидна’’ тидхалембадараха. Лимбя’ ирыхына ялэна’’ ямбума’’. Яберена яля’ сэв ина’’ ӈу савумдамби. Ӈэвна’’ мюй’’ сибёворӈа’’. Ӈарка пэвдя’’ пуд едэйвана юркотанарахава’’. Сертаванда’’ манзаина’’ тасламбива’’. Ныхына’’ ӈокамданараха’’. Ӈацекына’’ сянэрта су’’лякодарев’ сюрберӈа’’. Ихинандо’ таӈга’’», — ванерабтёрка ненадо яляндо’ нямна тарця вади мэ’’мы’’.
Хаӈоротаванзь тэвравы’’ ӈаврадо’ — мал’’ ӈэрм’ яна’’ ӈавар’’, пиревы ӈамза’’, халя’’, тэри ханюй ӈаябад’’. Тодо’’ тэнз’’ ӈоди’’ поӈгана няръяна мараӈгаця сырэй хаертарев’ нярмортавы. Мят’ тювы’’ мядонда’’ ӈули’’ саву’’мэдо’.
Ӈармы’’ ненэцие’’ вадавна, неноховавна вы’ тер’’ ил’ хаер’ сэвхад паӈгды. Ӈавнанда вымна мюсермы хасава иламда тарем’ тензебтедась: «Тев’ ёльцяӈгана яля’ хаераком’ нёдалцетыва’’. Ханенаӈэ мале ӈахакумна ӈэдалёрцетыва’’. Еся яӈгуна’’ хубтаркахана мярыба пясетына’’. Мерець манзарасетыва’’. Маймбадарахадм’ ӈэсетыдм’».
Сёётэй нидо’ нито’ е’’эмня тодо тэнз’’ вадавна хыно’’мы’’. Мал ӈобкана тарця иӈудм’ нёдавы’’: «Хаерако’ сей сидна’’ тодаламби. Пыда няринда маня’’ хыноӈава’’! Небя’ ядёраха, сава вадараха!». Антонина Салиндер хаераком’ хынабтамба мэта сёда тэри хайнавы. Паднана нядо’ Анагуричи Никита Александрович ӈобт’ ма’’лёвы’’ нита е’’эмня харта падвыда толабавы.
Ненэй ненэця’’, хаби’’, ӈысма’’, ӈани тэнзм’ мэта’’ нерняӈы иламдо’ савумдамба, нись поёмба ӈобкана мэвы’’. Хусувэдо’ тенева: ӈопой ныхырим’ мэць тоенана серодо’ пирдалеӈгудо’. Тарем’ яна’’ сяр’ нина хэд’’ иӈудм’ мэта’’ яӈгода’’.
Автор: Галина Окотэтто’ падвы
Авторы
Няръяна Нгэрм
Темы