Няръяна Ӈэрм
Хайтуԓаш тохотаӈа’’
Выӈкна диԓина’’ ни ӈашкиуди’’ хампԓяӈк — мат’ похонатоӈ манԓе хайтуԓаш чепяшту’’. Нойхат тувшаку’’, паткуди’’ хайташту’’, ӈухукутуӈ паныудет шеԓташту’’. Таԓям мэмантуӈ шеԓ хайтуԓаш тохошту’’. Няхаԓ пуӈ чена «Ямал-потомкам!» нимита ассоциацихина мансԓанна’’ проект’ «Тувшаку» шеԓтаӈаш’’.
Время для чтения ~ 2 минуты
Таԓям четаӈ Пуровский’ районхана ӈайта’’ школа-интернатха’’на тохоԓкота’’ ӈашкиуди’’ хайтуԓаш тохотамаӈ мэт конкурсат шеԓташту’’. Таԓкахай школа-интернатхана тохоԓкота’’ ни ӈашки’’ хайтуԓамантуӈ мэты пон музей’ мят ӈомшту’’.
Шичитоӈ школантуӈ музей мансдям минԓена Нина Топоева конкурсан ӈанаташту. Чуки похона ненэй тувшаку хcтмай’’, нюча паныуди’’, матамэхэна пытыԓмы шеԓтамай’’. Таньше мэма тохоԓкота’’ ӈашкехена дёԓьше хома. Ни ӈашки’’ хcтмы тувшаку’’, паныуди’’ жюри манысаԓьтоньш. Меԓьмана ӈоӈкмамтуӈ, пытыԓмамтуӈ, хайтуӈотуӈ куԓка ӈаймям манысаԓяш’’. Ни ӈашкиуде’’ шеԓтамайтуӈ ӈамыкутоӈ дёԓьше меԓят. Хайтуӈотуӈ хома’’, тушакутуӈ миԓ’’ меԓят’’.
Хайтуԓаш мянаԓмы’’ ӈашки’’ поӈкат ӈайвахай местам Ольга Айваседо канаӈата, пыта хcтмайта паныудимта пиԓи меԓьӈэ жюри’’ тонԓаӈа’’. Ольга пон чики конкурсхана мянаԓьшту, чики неԓьня таӈат, ӈопам хcтӈаш. Хайтуԓаш мянаԓмы’’ ни ӈашки’’ тотуӈ мячисы’’ няамӈа’’. Мянаԓьш хитамахататоӈ «Тувшаку» проект шеԓтамы нетоӈ писан ӈамта’’, ӈокна шай’мантуӈ мэты.
Автор: Лариса Айваседо патмы
Авторы
Няръяна Нгэрм
Темы