обновлено: 04:10, 01 декабря 2023
Няръяна Ӈэрм
Харе’’ вадавнандо’ лахана’’
Хор’’ ирыхына Санкт-Петебургхана тохолкода илебей ненэця’’ ӈобт’ харе’’ индё’ ватовна ма’’люрць пэйдаць. Ненэй вадавна лаханакурмандо’ няю’ клубм’ сертаць. Сиддо’ нерня’ тидхалембада — Арина Вануйто. Ӈамгэ тарем’ серта таславэда, тикым’ няна’’ ваде’’ӈадась.
Время для чтения ~ 3 минуты
Санкт-Петербург маркана ӈэрм’ тер’’ тохолкода’’ ӈока’’. Поӈганандо’ ненэй ӈацекы’’ ӈани’ таня’’. Пыдо’ тодо яхат товы’’. Хэ’’ли’ помнандо’ нидо’ ни’’ ядабтамбю’’. Тадӈо’’ нина’’ ехэрэйна’’. Тикада саць вэва. Тарця яӈгова’ е’’эмня ихинани ненэй ӈацекы ӈобт’ ма’’ла тасладамзь. Тарем’ серта’’махадани’ ханяхавана нина’’ ядабтамбава’ мяд тарась. Тикы’ нямна сидна’’ Санкт-Петебург маркана ӈэда Ямална’’ представительство нядась.
Хусувэй си’’ив яляхана ма’’люрӈава’’. Нюрте’’э’ ю’’ ненэця’’ ӈадимясь. Тамальӈгана мале Ензя’ тер’’ ӈацекы’’ тоць. Ихиня ӈули’’ савась. Мале нябимдей яӈорэй’ нина’’ ма’’лавана мальӈгана Ненэцие’’ округхад илебей ненэця’’ ӈадимяць. Тарем’ тодо яхат товы ненэй ӈацекэӈэ «Вано» клубахана ма’’лываць.
Иры’ вэкад танябана’’ ӈод’’ теда’ мале юнва’’ со. Хэвы си’’ив яляхана вадина’’ лэтрава’ нямна минревы фестивалян’ сидна’’ мале хаӈаць. Таняна ненэй вадана’’ нямна мэкад вади ваде’’ӈаваць. Мань экономистӈэ тохолкудм’, маркана вадёвэдм’, ӈадьбяни вадами хойхана вадёвы нини тотрев’ техэ паӈгхаданда ехэрав. Нянандо’ лаханакурць тамна тяхасовна ненэй вадами теневаван’ харвав.
Ӈоб’’ час’ пир’’ лаханакурӈава’’. Хуркари мэкад иле’’мина’’ тензебтембива’’. Ихинани, няхана’’ тарем’ тэворма ёльце сава. Ӈоб’’ си’’ив яля’ сер’ ӈока нина’’ поӈгана луца’ вадарим’ мэ’’ӈава’’. Нюрте’’э’ ма’’лёвана’’ мальӈгана таӈы ялэна’’ тензебтембиваць. Тамальӈгана хорпивась, клубава’’ хурка ӈэбата тара. Тад тасла’’, ӈобт’ тэворпана’’ ӈоб’’ час ханзер’’ ханамам’ нивэва’’ хамеда’’. Тамбирувнана’’ нямнана’’ пюлвэва’’. Лаханакурмарива’’ ни ӈа’’, нина’’ маниева’’, нина’’ торомдамбива’’.
Тандая’ Ямалхадна’’ Заксобранияна’’ депутат Эдуард Яунгуд турӈась. Сидна’’ тидхалембись. Тарця ня това — ӈули’’ сава ӈэвы.
Тад нерня’ тамна варева’’ мэтава’’. Няна’’ сыраць ӈани тэнз’’ нина’’ маси’’ ӈобт’ ма’’люрта’’.
Автор: Марина Яр’ падвы
Сидяӈг: Арина Вануйто’ тавы
