Няръяна Ӈэрм
Харта тохолавэда
Тюку похо’’на ӈэрм’ тер’’ илебей ненэця’’ ханярина манзара пирӈадо’. Хусувэдо’ пэрманда серта харта тасламбида. Хахаяда яля’ Виталий Окотэттом’ ядабтадамзь.
Время для чтения ~ 3 минуты
Пыда Саляхардыхы хасава’’ «барбершоп»хана ӈэбто пидыби. Иланда, манзаянда нямна вадамда тарем’ ханадась:
— Мань харад’ терадм’, нини’’ Сёяха’ хардахана иле’’. Хой’ илам’ ӈани’ теневав. Нюдяко ӈэвани мальӈгэхэд хадаханани ты’’ мякана мэсетыдм’. Таӈы’’ ныланавахана ядембада я’ е’’эйӈэ хой’ ня’ хэсетыдм’. Нянани нюрцям’ ӈэсеты. Ты ма’’лававнзь, халядаванзь ӈэдалёрцетыдм’. Школахана ӈод’’ хусувэй мэкад, тарана серкана, пирдырмахана тарасетыдм’. Тэри нидм’ мэсету’’, етри’ мэкад ӈамгэ хомбасетыдм’. Сававна тохолкудамзь. Юдимдей классм’ ёльце’’мяхадани, манзаядми тохолаванзь идейваць. Та’ Тюмень’ тохолкулва’ мят’ падрони ми’’ийнась. Еся ӈавэ ӈудаха’’на сертабадаӈэ тохолкудамзь. Ӈацекы ӈэвани мальӈгэхэд ӈамгэ тикы сулурпасетыдм’.
Лаханако нями лахарёмда тамна минреда.
— Тохолковани хавна ӈэва’ таре пидыбадаӈэ тарадамзь. Тарця серм’ хар’’ни тохолавась. Сибимдей классахана мэб’’ни тохолко нини ӈэва’ тар пидыбасетыдм’. Интернет’ сер’ ӈэбто пидыбади маниесетыдм’. Тарем’ тухудамзь. Техникумам’ мале’’мяхадани етя «барбер»ӈэ тохолкудамзь. Няхар’’ по’ манзарадамзь. Ихиняни тикырими савась, мале тохолавэми ӈэ’’нив’’. Ныланавини’’ ёльцяӈгана’ мякни тэворцедыдм’. Пуна Саляӈгардан’ тось таславась, ӈэрм яхани харбилываць. Мя’’ни тер’’ нини’’ ӈод’’ хахая мэнараха’’ ӈэӈгу’’. Март’ тэв’’махадани манзаядми тамини ходамзь. Ӈули’’ сава мэлван’ еремэдамазь. Ӈэбтодо’, муноциедо’ пидавнзь турта’’ ӈока ӈэсеты’’. Ненэця’ телефонувна, интернетувна пыхыдадо’ ӈахакуд падыбасетыдо’. Нюдяко нюдо’ тэволасеты’’. Тикы’ хавна тараванда несэй ӈамгэхэ’’ тоходасетыдм’. Тедахав’ пиднавам’ тамна сававна теневав. Ӈобтикы мелад манзаям’ пэрӈадм’. Ӈули’’ тяхасовна таслахая пиднасетыдм’. Ненэця’’ ӈэбтодо’ хуркаркавна пида таравам’ ваде’’цетыдо’. Ханяӈыдо’ хар’’н харвабцони’’ сер’ пидыбасетын. Тюку похо’’на ӈэбто ханзели пидыба пиры’’.
Ненэсянда, Виталий тарана манзаям’ пэрӈа, тидхалё минреда. Няданда тарпавы’’ пыхыдадо’ несэймдамбада’’ то’’олха’’. Нява’’ тамна’ тяха варемда мэӈая.
Автор: Руфина Окотэтто’ падвы
Авторы
Няръяна Нгэрм
Темы